1. Ke ka baka la’ng ka moka ga rena re hloka bohlale bjo bo tšwago go Modimo? (Diema 4:7)

 KE NNETE gore o rapela Modimo gore a go fe bohlale ge o dira phetho e bohlokwa. (Jak. 1:5) Kgoši Solomone o ngwadile gore: “Bohlale ke selo se segolo.” (Bala Diema 4:7.) Solomone o be a sa bolele ka bohlale bjo bongwe le bjo bongwe. O be a bolela ka bohlale bjo bo tšwago go Jehofa (Die. 2:6) Eupša na bohlale bjo bo tšwago go Modimo bo ka re thuša go lebeletšana le mathata ao re kopanago le ona? Ee, le gona re tlo bona seo mo sehlogong se.

2. Ke tsela efe yeo e ka re thušago gore re be bohlale?

² Tsela e nngwe yeo re ka bago le bohlale ka yona ke ka go ithuta le go diriša dikeletšo tša banna ba babedi bao ba bego ba le bohlale e bile ba hlomphega. Re tlo thoma go boledišana ka Solomone. Beibele e re: “Modimo a nea Solomone bohlale le kwešišo ka tekanyo e kgolo kudu.” (1 Dikg. 4:29) Ke moka ra tla ra boledišana ka Jesu, e lego monna yo bohlalehlale yo a kilego a phela. (Mat. 12:42) Go ile gwa porofetwa ka Jesu gore: “Moya wa Jehofa o tla dula go yena, e lego moya wa bohlale le wa kwešišo.”—Jes. 11:2.

3. Re tlo boledišana ka’ng sehlogong se?

³ Solomone le Jesu ba ile ba diriša bohlale bjo bo tšwago go Modimo go bolela ka dikeletšo tšeo di ka re holago. Sehlogong se re tlo boledišana ka tše tharo tša tšona e lego: Go ba le pono e lekalekanego ka tšhelete, mošomo wa boiphedišo le maphelo a rena.

4. Solomone le Jesu ba be ba fapana ka eng?

⁴ Solomone o be a humile kudu e bile a dula ntlong e botse le ya manobonobo. (1 Dikg. 10:7, 14, 15) Eupša Jesu o be a se na dilo tše dintši e bile ka dinako tše dingwe a sa tsebe gore o ya go robala kae. (Mat. 8:20) Eupša ka moka ga bona ba be ba na le pono e lekalekanego ka go ba le dilo tše dintši ka ge bohlale bja bona bo be bo etšwa go Jehofa Modimo.

5. Solomone o be a lebelela tšhelete bjang?

⁵ Solomone o itše tšhelete e a “šireletša.” (Mmo. 7:12) Tšhelete e re thuša go hwetša dilo tšeo re di hlokago le tšeo re ka phelago ntle le tšona. Le ge Solomone a be a humile kudu, o ile a lemoga gore go na le dilo tše bohlokwa go feta tšhelete. Ka mohlala o ile a ngwala gore: “Leina le lebotse le phala mahumo a mantši kudu.” (Die. 22:1) Solomone o ile a lemoga le gore batho bao ba ratago tšhelete ga ba kgotsofalele seo ba nago le sona. (Mmo. 5:10, 12) Le gona o ile a re lemoša ka gore re se ke ra etiša tšhelete pele ka gobane e ka fela nako e nngwe le e nngwe.—Die. 23:4, 5.

6. Jesu o be a na le pono efe e lekalekanego ka dilo tše di bonagalago? (Mateo 6:31-33)

⁶ Jesu o be a na le pono e lekalekanego ka dilo tše di bonagalago. O be a thabela go ja le go nwa. (Luka 19:2, 6, 7) Ka letšatši le lengwe o ile a dira beine e bose e lego mohlolo woo a o dirilego la mathomo. (Joh. 2:10, 11) Le gona ka letšatši leo a hwilego ka lona o be a apere seaparo sa theko e kgolo. (Joh. 19:23, 24) Eupša Jesu ga se a ka a dumelela dilo tše di bonagalago di etla pele bophelong bja gagwe. O boditše balatedi ba gagwe gore: “Ga go yo a ka bago lekgoba la marena a mabedi,. . . Le ka se be makgoba a Modimo le a Mahumo.” (Mat. 6:24) Jesu o ile a ruta gore ge re etiša Mmušo wa Modimo pele, Jehofa o tlo kgonthišetša gore re hwetša dilo tšeo re di hlokago.—Bala Mateo 6:31-33.

7. Ngwanabo rena yo mongwe o holegile bjang ka go ba le pono e lekalekanego ka tšhelete?

 ⁷ Bana babo rena ba bantši le dikgaetšedi ba ile ba holwa ke go diriša keletšo ya Jehofa ka tšhelete. Nagana ka mohlala wa ngwanabo rena yo a sego a nyala yo a bitšwago Daniel. O re: “Ge ke sa le mofsa ke ile ka dira phetho ya gore selo sa bohlokwa bophelong bja ka ke go hlankela Jehofa.” Ka ge Daniel a ile a nolofatša bophelo bja gagwe, o ile a diriša nako ya gagwe le bokgoni bja gagwe tirelong ya Jehofa. O oketša ka gore: “Ke nnete gore ke be ke tlo ba le tšhelete e ntši ge nkabe ke e etiša pele. Eupša ke be nka se be le bagwera ba babotse bao ke nago le bona gona bjale. Ge nkabe ke etišitše tšhelete pele, ke be nka se thabe go swana le gona bjale. Jehofa o nneile lethabo le legolo kudu leo le phalago leo le tlišwago ke tšhelete.” Re kgona go bona gore re a holega ge re etiša Jehofa pele e sego tšhelete.

8. Re tseba bjang gore Solomone o be a na le pono e lekalekanego ka mošomo? (Mmoledi 5:18, 19)

⁸ Solomone o itše go šoma ka thata ke “mpho ya Modimo” e bile go ka dira gore motho a thabe.” (Bala Mmoledi 5:18, 19.) O ngwadile gore: “Boitapišo bja mohuta le ge e le ofe bo a hola.” (Die. 14:23) Solomone o be a tseba seo a bolelago ka sona. O be a šoma ka thata! O agile dintlo, a bjala dirapa tša merara, a dira dirapa tše dingwe le matamo. O agile le metse e mengwe. (1 Dikg. 9:19; Mmo. 2:4-6) Dilo tše ka moka di bontšha gore o be a šoma ka thata le gona o ile a kgotsofala. Eupša Solomone o be a se a ithekga ka mešomo yeo feela gore e mo tlišetše lethabo. O ile a direla Jehofa dilo tše dintši. Ka mohlala, o ile a okamela modiro wa go aga Tempele ya Jehofa yeo e tšerego mengwaga e šupa! (1 Dikg. 6:38; 9:1) Ka morago ga gore Solomone a dire dilo tše dintši tša go fapana o ile a lemoga gore selo sa bohlokwa kudu ke go hlankela Jehofa. O ngwadile gore: “Bofelo bja ditaba tšohle tšeo o di kwelego ke gore: Boifa Modimo wa therešo gomme o lote ditaelo tša gagwe.”—Mmo. 12:13.

9. Jesu o ile a dira’ng gore mošomo wa gagwe wa boiphedišo o se ke wa ba bohlokwa kudu go yena?

⁹ Jesu o be a šoma ka thata. Ge e be e sa le yo monyenyane o be a šoma ka go betla. (Mar. 6:3) Batswadi ba gagwe ba ile ba thabela thušo ya gagwe ge ba be ba leka ka thata go hlokomela lapa la bona le legolo. Ka ge Jesu a be a phethagetše o swanetše go ba a be a dira mošomo o mobotse kudu, e bile batho ba bantši ba be ba nyaka dilo tšeo a bego a di dira. Jesu o be a thabela mošomo wa gagwe. Le ge Jesu a be a šoma ka thata mošomong wa gagwe wa boiphedišo, o ile a beela nako ya go hlankela Jehofa ka thoko. (Joh. 7:15) Ka morago ge a be a ruta batho ka Modimo letšatši le lengwe le le lengwe o ile a eletša balatedi ba gagwe gore: “Le se ke la šomela dijo tše di senyegago, eupša le šomele dijo tše di dulago go iša bophelong bjo bo sa felego.” (Joh. 6:27) Le gona Thutong ya gagwe ya Thabeng o ile a re: “Ipolokeleng matlotlo legodimong.”—Mat. 6:20.

10. Re ka kopana le mathata afe ge re leka go dira dilo gabotse mošomong?

¹⁰ Ge re diriša keletšo ya Jehofa e bohlale, re tlo ba le pono e lekalekanego ka mešomo ya boiphedišo. Ka ge re le Bakriste re rutwa gore re “šome ka thata . . . , [re] dire se sebotse.” (Baef. 4:28) Batho bao re ba šomelago ba kgona go bona gore re a tshepega,  re šoma ka thata, e bile ba ka re botša gore ba rata mošomo wa rena. Ka baka la seo re ka thoma go šoma diiri tše dintši re nyaka gore motho yo re mo šomelago a lebelele Dihlatse tša Jehofa gabotse. Eupša ka morago ra lemoga gore ga re na le nako ya go ba le malapa a rena goba go dira dilo tša Jehofa. Re swanetše go dira diphetogo gomme re be le nako ya go dira dilo tše bohlokwa.

11. Ngwanabo rena yo mongwe o ithutile eng ka go ba le tekatekano ka mošomo?

¹¹ Ngwanabo rena wa mofsa yo a bitšwago William yoo a bego a šomela ngwanabo rena yo mongwe, o ile a ithuta mohlaleng wa ngwanabo rena yoo gore go bohlokwa go ba le pono e lekalekanego ka mošomo wa boiphedišo. William o re: Ngwanabo rena yo ke mohlala o mobotse wa motho yo a nago le tekatekano. O šoma ka thata e bile o na le botumo bjo bobotse ka ge a šomišana le batho gabotse. Eupša ka morago ga mošomo, o tlogela mošomo wa gagwe gomme a diriša nako yeo go ba le lapa la gagwe le go dira dilo tša Jehofa. Le gona ke yo mongwe wa batho bao ke ba tsebago ba thabile kudu!” *

12. Solomone o bontšhitše bjang gore o na le pono e lekalekanego ka bophelo bja gagwe, gona e ile ya mo lahlegela bjang?

¹² Solomone e be e le mohlanka yo a botegago wa Jehofa, le gona o be a na le pono e lekalekanego ka bophelo bja gagwe. Ge e be sa le mošemanyana, o ile a dumela gore o na le mafokodi gomme a kgopela Jehofa gore a mo eletše. (1 Dikg. 3:7-9) Le gona ge a be a thoma go buša, o ile a bona gore o swanetše go phema go ikgogomoša. O ngwadile gore: “Boikgantšho bo eta go wa pele, gomme moya wa boikgogomošo o eta go kgopša pele.” (Die. 16:18) Sa go nyamiša ke gore Solomone o ile a palelwa ke go latela  keletšo ya gagwe. Ge nako e dutše e eya o ile a tshela melao ya Modimo. Ka mohlala, o mongwe wa melao o laetše gore kgoši ya Moheberu e ‘se ke ya ikatišetša basadi, e le gore pelo ya yona e se ke ya aroga.’ (Doit. 17:17) Solomone ga se a latela molao woo gomme a itšeela basadi ba 700 le basadi ba direthe ba 300! (1 Dikg. 11:1-3) Mohlomongwe Solomone o be a nagana gore a ka se be le mathata. Eupša Solomone ka morago o ile a lebeletšana le ditlamorago tša go se latele melao ya Jehofa.—1 Dikg. 11:9-13.

13. Re ithuta’ng tabeng ya gore Jesu o be a ikokobeditše?

¹³ |Jesu o be a ikokobeditše e bile a na le tekatekano. Ge a be a le mo lefaseng o ile a dira dilo tše dintši ge a hlankela Jehofa. “Dilo tše dingwe ka moka tše di lego magodimong le lefaseng di hlodilwe ka yena.” (Bakol. 1:16) Ge Jesu a be a kolobetšwa, o ile a gopola dilo ka moka tšeo a di dirilego ge a be a na le Tatagwe. (Mat. 3:16; Joh. 17:5) Eupša ga se a ikgogomoša. Le gona ga se a ipona a le bohlokwa go feta batho ba bangwe. O boditše barutiwa ba gagwe gore ge a etla mo lefaseng, ga “se a tlela go hlankelwa, eupša o tletše go hlankela le go nea moya wa gagwe gore e be topollo bakeng sa ba bantši.” (Mat. 20:28) Le gona o ile a dumela gore a ka se kgone go dira selo ka matla a gagwe. (Joh. 5:19) Jesu o be a ikokobeditše kudu! O re beetše mohlala woo ka moka ga rena re ka o latelago.

14. Re ka ithuta’ng go Jesu ge re ipona re se na mohola?

¹⁴ Jesu o ile a ruta barutiwa ba gagwe gore ba se ke ba inyatša. Ka letšatši le lengwe o ile a ba kgonthišetša gore: “Meriri ye ya dihlogo tša lena e badilwe ka moka.” (Mat. 10:30) Mantšu ao a tloga a re kgothatša, kudukudu ge e ba re fela re ipona re se na mohola. Se se ra gore Tatago rena wa legodimong o re rata kudu e bile o re bona re le bohlokwa. Ge e ba Jehofa a re dumelela gore re mo hlankele e bile a re tshepiša go tlo phela lefaseng le lefsa, ga se ra swanela go nagana gore ga re swanelege.

15. (a) Morokami o mongwe o ile wa kgothaletša gore re itebelele bjang? (b) Ka ge re bona seswantšhong seo se lego go letlakala 24, ge e ba re ipona re le bohlokwa kudu re tlo hlaelwa ke eng?

 ¹⁵ Mengwageng e 15 e fetilego, Morokami o mongwe o ile wa re re swanetše go ba le tekatekano. O itše: “Ka kgonthe, re ka se rate go itebelela re le ba bohlokwa kudu go fihla bokgoleng bja go ba bao ba ikgantšhago; goba go nyaka go ba le pono e fapanego le yeo ka mo go feteletšego gomme ra nagana gore ga re na mohola. Go e na le moo, boikemišetšo bja rena e swanetše go ba go hlagolela pono e leka-lekanego ka rena ka noši, e lego ya go lemoga bokgoni bja rena gotee le mafokodi a rena. Mosadi yo mongwe wa Mokriste o bea taba ka tsela ye: ‘Ga ke motho yo mobe; e bile ga ke motho yo kaone go feta ba bangwe. Ke na le dika tše dibotse le tše mpe, go fo swana le motho yo mongwe le yo mongwe.’” *[3] Re kgona go bona bohlokwa bja go ba le teketekano.

16. Ke ka baka la’ng Jehofa a re nea keletšo e bohlale?

¹⁶ Jehofa o re nea keletšo e bohlale a diriša Beibele. O a re rata e bile o nyaka gore re thabe. (Jes. 48:17, 18) Phetho e bohlale yeo e ka dirago gore re be le lethabo la kgonthe ke go tšwelapele re hlankela Jehofa. Ge re dira bjalo, re tlo phema go ba le mathata ao batho bao ba etišago tšhelete, mošomo goba maphelo a bona pele ba bago le ona. Eka yo mongwe le yo mongwe wa rena a ka ikemišetša go ba bohlale le go thabiša pelo ya Jehofa!—Die. 23:15.