1. Ke phetho efe e bohlokwa yeo motho yo mongwe le yo mongwe a swanetšego go e dira?

 LEHONO batho ba swanetše go itirela phetho e bohlokwa. Na ba tla kgetha go thekga Jehofa Modimo le gore ke yena a swanetšego ke go buša lefase goba na ba tla kgetha go thekga lenaba la gagwe Sathane Diabolo? Motho yo mongwe le yo mongwe o swanetše go kgetha. Phetho yeo ba e dirago e tlo ama bophelo bja bona. (Mat. 25:31-33, 46) Nakong ya ‘masetlapelo a magolo,’ ba tlo swaelwa go phologa goba go fedišwa.—Kut. 7:14; 14:9-11; Hesek. 9:4, 6.

2. (a) Baheberu 10:35-39 e re kgothaletša go dira’ng? (b) Puku ya Kutullo e ka re thuša bjang?

² Bala Baheberu 10:35-39. Ge e ba o kgethile go bušwa ke Jehofa o dirile phetho e botse. Gona bjale o nyaka go thuša batho ba bangwe gore le bona ba dire phetho e botse. O ka diriša seo o ithutilego sona ka Pukung ya Kutollo go ba thuša. Puku ye e re botša gore go tlo direga eng ka batho bao ba sa thekgego Jehofa le kamoo a tlago go šegofatša bao ba mo thekgago. Re swanetše go ithuta dithuto tše tše bohlokwa. Ge re dira bjalo re tlo ikemišetša le go feta go hlankela Jehofa. Le gona re ka diriša seo re ithutilego sona go thuša batho gore ba dire phetho e bohlokwa.

3. Re tlo ithuta ka’ng sehlogong se?

³ Sehlogong se re tlo araba dipotšišo tše di latelago: Go tlo direga eng ka bao ba thekgago Mmušo wa Modimo? Go tlo direga eng ka bao ba thekgago sebata  sa mmala o mohwibiduhwibidu seo go bolelwago ka sona ka pukung ya Kutullo?

4. Moapostola Johane o bona sehlopha sefe se na le Jesu legodimong?

⁴ Moapostola Johane o ile a bona pono yeo go nago le dihlopha tše pedi tša batho bao ba thekgago Mmušo wa Jehofa gomme ba hwetša bophelo bjo bo sa felego. Go na le batho ba 144 000 sehlopheng sa mathomo. (Kut. 7:4) Ba tšerwe lefaseng gore ba ye go thoma Mmušo le Jesu legodimong. Le gona ba ya go buša lefase ba na le Jesu. (Kut. 5:9, 10; 14:3, 4) Ponong yeo, Johane o ba bona ba na le Jesu ba le Thabeng ya Tsione.—Kut. 14:1.

5. Go tlo direga eng ka ba karolo ya 144 000 bao ba sa lego mo lefaseng?

⁵ Ga e sa le go tloga mehleng ya baapostola go fihla lehono, batho ba dikete ba kgethilwe gore e be karolo ya ba 144 000. (Luka 12:32; Baroma 8:17) Le gona Johane o boditšwe gore gare ga batho bao ba kgethilwego go ya legodimong, ke ba sego kae bao ba tla bego ba šetše mo lefaseng mehleng ya bofelo. Bao “ba šetšego” ba tla hwetša “leswao” la mafelelo la Jehofa pele masetlapelo a magolo a thoma. (Kut. 7:2, 3; 12:17) Nakong ya masetlapelo a magolo batlotšwa bao ba šetšego mo lefaseng ba tlo išwa legodimong gore ba ye ba hwetše ba bangwe ba karolo ya 144 000, bao ba hlokofetšego ba botega. Ge ba le moo, ba tlo buša gotee le Jesu Mmušong wa Modimo.—Mat. 24:31; Kut. 5:9, 10.

6-7. (a) Ke sehlopha sefe se sengwe seo Johane a se bonago, gona re ithuta eng go sona? (b) Ke ka baka la’ng “lešaba le legolo” le bao ba yago legodimong ba swanetše go ithuta Kutollo kgaolo 7?

⁶ Ka morago ga go bona sehlopha sa bao ba yago legodimong, Johane o bona “lešaba le legolo.” Go fapana le ba 144 000, sehlopha se ga se na palo. (Kut. 7:9, 10) Re ithuta’ng ka bona? Johane o boditšwe gore: “Ba ke bao ba tšwago masetlapelong a magolo gomme ba hlatswitše diaparo tša bona tše telele ba di šweufatša mading a Kwana.” (Kut. 7:14) Ka morago ga gore “lešaba le legolo” le phologe masetlapelo a magolo le tlo thabela ditšhegofatšo mo lefaseng.—Ps. 37:9-11, 27-29; Die. 2:21, 22; Kut. 7:16, 17.

⁷ Go sa šetšwe gore re na le kholofelo ya go phela legodimong goba mo lefaseng, re swanetše go ipona re le gare ga batho bao go bolelwago ka bona go Kutullo kgaolo 7. Ye e tlo ba e le nako e thabišago kudu go dihlopha tše tše pedi tša bahlanka ba Jehofa! Re thaba kudu ka gobane re kgethile go bušwa ke Jehofa. Ke eng se sengwe seo Puku ya Kutollo e re botšago sona ka masetlapelo a magolo?—Mat. 24:21.

8. Masetlapelo a magolo a tlo thoma bjang, gona a tlo ama batho ba bantši bjang?

⁸ Sehlogong se se fetilego re ithutile gore e se kgale mebušo ya lefase e tlo hlasela Babilona o Mogolo, e lego bodumedi bja maaka lefaseng ka moka. (Kut. 17:16, 17) Tiragolo ye e tla be e bontšha gore ke mathomo a masetlapelo a magolo. Eupša na seo se tla dira gore batho ba bantši ba  thome go hlankela Jehofa? Aowa. Go e na le moo, Kutullo kgaolo 16 e bontšha gore batho bao ba sa hlankelego Jehofa ba tlo nyaka go šireletšwa ke mebušo ya dipolotiki le dikgwebo tšeo di swantšhwago le dithaba. Ka ge batho bao ba sa thekge Mmušo wa Modimo, Jehofa o tlo ba bona e le baganetši.—Luka 11:23; Kut. 6:15-17.

9. Nakong ya masetlapelo a magolo bahlanka ba Jehofa ba tlo gana go dira’ng, gona go tlo direga eng ka bona?

⁹ Bahlanka ba Jehofa ba tlo fapana le batho ba bangwe ka nako yeo e thata ya masetlapelo a magolo. E tlo ba e le bona feela mo lefaseng bao ba hlankelago Jehofa e bile ba gana go hlankela “sebata.” (Kut. 13:14-17) Ka ge ba botegela Jehofa, bao ba ganetšago Jehofa ba tlo galefa kudu. Ka gona ditšhaba tšeo di ipopilego ngatana e tee di tlo hlasela batho ba Modimo lefaseng ka moka. Beibele e bitša tlhaselo ye gore ke ya Gogo wa Magogo.—Hesek. 38:14-16.

10. Go ya ka Kutollo 19:19-21, Jehofa o tlo arabela bjang nakong ya ge Gogo wa Magogo a hlasela batho ba gagwe?

¹⁰ Jehofa o tlo arabela bjang nakong ya ge Gogo wa Magogo a re hlasela? O re botša gore: “Pefelo ya ka e tla bonagala sefahlegong sa ka.” (Hesek. 38:18, 21-23) Kutollo kgaolo 19 e re botša gore go tlo direga eng ka morago. Jehofa o romela Morwa wa gagwe go šireletša batho ba gagwe le go fenya manaba a gagwe. Jesu o tlo lwa le Gogo wa Magogo a na le “madira a legodimong” le ba 144 000. (Kut. 17:14; 19:11-15) Mafelelo a ntwa ye e tlo ba afe? Batho ka moka le mekgatlo yeo e ganetšago Jehofa e tlo fedišwa!—Bala Kutollo 19:19-21.

11. Ke tiragalo efe e bohlokwa le e thabišago ka pukung ya Kutullo?

¹¹ Nagana gore batho bao ba botegago ba tla be ba thabile bjang ge ba phologile nakong ya ge Modimo a fediša batho ba babe. Batho ba tlabe ba thabile lefaseng ka moka! Le ge bao ba lego legodimong ba tlabe ba thabile ge Babilona o Mogolo a fedišwa, go na le seo se tlago go ba thabiša kudu. (Kut. 19:1-3) “Lenyalo la Kwana” ke tiragalo e bohlokwa le e thabišago ka pukung ya Kutullo.—Kut. 19:6-9.

12. Go ya ka Kutollo 21:1, 2, lenyalo la Kwana le tlo ba neng?

¹² Lenyalo leo le tlo ba neng? Ba karolo ya 144 000 ba tla be ba le legodimong pele ga ge ntwa ya Haramagedone e thoma. Eupša yeo ga se nako ya lenyalo la Kwana. (Bala Kutollo 21:1, 2.) Lenyalo le le tlo ba ka morago ga ge ntwa ya Haramagedone e fedile gomme manaba a Modimo a fedišitšwe.—Ps. 45:3, 4, 13-17.

13. Go tlo direga eng ka lenyalo la Kwana?

¹³ Go tlo direga eng ka lenyalo la Kwana? Go no swana le ge lenyalo le kopanya monna le mosadi, le lenyalo la kwana le kopanya Jesu Kriste le ba 144 000 bao ba lego bjalo ka “monyadiwa.” Tiragalo yeo e bohlokwa e tlo hloma Mmušo woo o tlago go buša mo lefaseng ka mengwaga e sekete.—Kut. 20:6.

14-15. Kutullo kgaolo 21 e swantšha ba 144 000 le eng? (Bona seswantšho sa letlakala la ka ntle.)

¹⁴ Ka morago, Kutullo kgaolo 21 e swantšha ba 144 000 le motse o mobotse kudu wo o bitšwago “Jerusalema o  mofsa.” (Kut. 21:2, 9) Motse wo o na le maswika a 12 a motheo “gomme go ona go na le maina a lesomepedi a baapostola ba lesomepedi ba Kwana.” Ke ka baka la’ng se se ile sa thabiša Johane? Ke ka gobane o bone leina la gagwe le ngwadilwe go le lengwe la maswika ao. Yeo e be e le tokelo e kgolo kudu!—Kut. 21:10-14; Baef. 2:20.

¹⁵ Motse wo wa seswantšhetšo o fapana le metse e mengwe. O be o na le ditsela tša gauta e sekilego, mejako e 12 ya perela, merako le metheo yeo e dirilwego ka maswika a bohlokwa, e bile o lekalekane gabotse. (Kut. 21:15-21) Eupša Johane o ile a bona gore go na le seo se hlaelago! Johane o re: “Ga se ka bona tempele go wona gobane Jehofa Modimo Ramatlaohle le Kwana ke tempele ya wona. Motse ga o nyake letšatši goba kgwedi go o bonegela, gobane letago la Modimo le be le o edišetša gomme lebone la wona e be e le Kwana.” (Kut. 21:22, 23) Bao ba bopago Jerusalema e mpsha ba ya go dula le Jehofa. (Baheb. 7:27; Kut. 22:3, 4) Ka gona, Jehofa le Jesu ke tempele ya motseng woo.

16. Batho ba tlo thabela eng nakong ya Pušo ya Mengwaga e Sekete ya Mmušo wa Modimo?

¹⁶ Batlotšwa ba a thaba ge ba naganišiša ka motse wo. Eupša le bao ba nago le kholofelo ya go phela mo lefaseng ba a o thabela. Nakong ya Pušo ya Mengwaga e Sekete, Jerusalema e mpsha goba Mmušo wa Modimo o tlo tliša ditšhegofatšo tše dintši mo lefaseng. Johane o bona ditšhegofatšo tšeo di ela go swana le “noka ya meetse a bophelo.” Ka gona ka mahlakoreng ka moka a noka yeo go na le “dihlare tša bophelo” tšeo di tšweletšago matlakala a “go alafa ditšhaba.” (Kut. 22:1, 2) Batho ka moka ba tlo holwa ke tokišetšo yeo. Le gona batho ka moka bao ba kwago Jehofa ba tlo phethagala. Go ka se sa ba le malwetši, bohloko le megokgo.—Kut. 21:3-5.

17. Go ya ka Kutollo 20:11-13, ke bomang bao ba tlago go holwa ke Pušo ya Mengwaga e Sekete?

¹⁷ Ke bomang bao ba tlago go thabela dilo tše? Batho ba pele bao ba tla go  go thabela dilo tše ke lešaba le legolo leo le phologilego Haramagedone le bana bao ba ka tlago ba belegwa lefaseng le lefsa. Kutollo kgaolo 20 e tshepiša gape le gore bahu ba tla tsošwa. (Bala Kutollo 20:11-13.) Batho bao “ba lokilego” bao ba hwilego ba botega le “ba sa lokago”, bao ba hwilego ba sa tsebe ka Jehofa, ba tlo tsošwa gomme ba phela gape mo lefaseng. (Dit. 24:15; Joh. 5:28, 29) Na seo se bolela gore batho ka moka ba tlo tsošwa gomme ba phela mo lefaseng nakong ya Pušo ya Mengwaga e Sekete? Aowa. Bao ba ilego ba kgetha go se hlankele Jehofa pele ba ka hwa, ba ka se tsošwe. Ba bile le sebaka sa go ithuta ka Modimo gomme ba ipontšha ba sa swanelege go phela lefaseng la Paradeise.—Mat. 25:46; 2 Bathes. 1:9; Kut. 17:8; 20:15.

18. Go tla be go le bjang mafelelong a mengwaga e sekete?

¹⁸ Mafelelong a mengwaga e sekete batho ka moka bao ba phelago mo lefaseng ba tla be ba phethagetše. Go ka se sa ba le motho yo a phelago ka sebe seo re se hweditšego go Adama. (Baroma 5:12) Sebe se tla be se fedišitšwe. Se se bolela gore bao ba lego mo lefaseng “ba tla phela” mafelelong a mengwaga e sekete ka gobane ba tla be ba phethagetše.—Kut. 20:5.

19. Ke ka baka la’ng go le bohlokwa gore go be le teko ya mafelelo?

¹⁹ Re a tseba gore Jesu o ile a dula a botegela Modimo le ge Sathane a be a mo leka. Na batho bao ba phethagetšego ba tla dula ba botegela Jehofa ge Sathane a ba leka? Yo mongwe le yo mongwe o tlo kgona go bontšha gore ka nnete o botegela Jehofa ge Sathane a lokollwa ka morago ga mengwaga e sekete. (Kut. 20:7) Bao ba botegelago Jehofa ba tlo hwetša bophelo bjo bo sa felego le tokologo ya sa ruri. (Baroma 8:21) Bao ba ganetšago Jehofa ba tlo fedišwa le Sathane le batemona ba gagwe.—Kut. 20:8-10.

20. O ikwa bjang ka boporofeta bjo bo thabišago bjo bo lego ka pukung ya Kutollo?

²⁰ O ikwa bjang ka morago ga go ithuta ka puku ya Kutollo? Na ga o thabišwe ke go bona o phela nakong ya ge diporofeto tše di phethagala? Na se ga se go dire gore o nyake go mema batho ba bangwe gore le bona ba rapele Jehofa? (Kut. 22:17) Ka ge re boletše ka dilo tšeo di tlago go direga nakong e tlago, re a thaba e bile re nyaka go bolela go swana le moapostola Johane ge a be a re: “Amene! Tlaa, Morena Jesu.”—Kut. 22:20.