1-2. Ke ka baka la’ng re swanetše go thabela go bala puku ya Kutollo?

 Na o ile wa bogela dinepe tša motho yo o mo tsebago? Ge o dutše o lebeletše dinepe tšeo, o bona batho ba bantši bao o sa ba tsebego. Ke moka wa ema wa lebeledišiša senepe se sengwe se setee. Ka baka la’ng? Ka gobane o gona mo senepeng seo. Ge o dutše o lebeletše senepe seo, o leka go gopola gore se tšerwe neng le gona kae. O leka go gopola le batho ka moka bao ba lego mo senepeng seo. Senepe seo se bohlokwa go wena.

² Puku ya Kutollo e swana le senepe seo. Ka baka la’ng? Lebaka la pele ke gore puku ye ya ka Beibeleng e ngwaletšwe rena. Temaneng ya mathomo pukung ya Kutollo re bala gore: “Kutollo ka Jesu Kriste, yeo Modimo a mo neilego yona, gore a bontšhe bahlanka ba gagwe dilo tše di tlago go direga kgauswinyane.” (Kut. 1:1) Ka gona, seo se ngwadilwego ka pukung ye ga se sa ngwalelwa batho ka moka eupša se ngwaletšwe bahlanka ba Modimo. Ka ge re le bahlanka ba Modimo, ga se ra swanela go makala ge re bona gore le rena re tšea karolo go phethagatša boporofeta bjo bja puku ye e kgahlišago. Ka gona, ge re bala puku ya Kutollo re bala ka dilo tšeo di re amago.

3-4. Boporofeta bjo bo lego ka pukung ya Kutollo bo phethagala neng, gona bo re ama bjang?

³ Lebaka la bobedi le akaretša nakong yeo boporofeta bjo bo tlago go phethagala ka yona. Moapostola Johane o ile a bolela gore boporofeta bjo bo tlo phethagala neng ge  a be a re: “Ke bile letšatšing la Morena ka pudulelo.” (Kut. 1:10) Ge Johane a be a ngwala mantšu a mo e ka bago ka 96 C.E., “letšatši la Morena” le be le sa le kgole kudu le go fihla. (Mat. 25:14, 19; Luka 19:12) Go ya ka boporofeta bjo bo lego Beibeleng, letšatši leo le ile la thoma ka 1914 ge Jesu a e ba Kgoši legodimong. Go tloga ka ngwaga woo, boporofeta bja Kutollo bjo bo bego bo ama batho ba Modimo, bo ile bja thoma go phethagala. Lehono re phela “letšatšing la Morena”!

⁴ Ka ge re phela nakong e kgahlišago, ke rena bao re swanetšego go diriša keletšo e lerato yeo e lego go Kutollo 1:3 yeo e rego: “Go thaba yo a balago ka go hlaboša le bao ba kwago mantšu a boporofeta bjo, bao ba bolokago dilo tše di ngwadilwego go bjona; gobane nako e beilwego e batametše.” Ke nnete gore re swanetše go ‘bala ka go hlaboša,’ re ‘kwe mantšu a boporofeta bjo,’ re be re a ‘boloke’ goba re a diriše. Ke mantšu afe a mangwe ao re swanetšego go a diriša?

5. Puku ya Kutollo e bontšha bjang gore go bohlokwa gore Jehofa a amogele borapedi bja rena?

⁵ Kgaolong ya Mathomo ya lengwalo la Kutollo, re ithuta gore Jesu o tseba selo se sengwe le se sengwe seo se diregago ka diphuthegong. (Kut. 1:12-16, 20; 2:1) Re bona se go molaetša wo a ilego ao romela go diphuthego tše šupa tša kua Asia Minor. O ile a botša Bakriste ba nakong yeo gore ba kgonthišetše gore borapedi bja bona bo a amogelega go Jehofa. Le gona molaetša wo o sa šoma go bahlanka ba Modimo le lehono. Re ithuta’ng? Moetapele wa rena Kriste Jesu, o a tseba gore re rata Jehofa. Ke yena a re eteletšego pele, a re hlokometšego e bile o bona selo se sengwe le se sengwe. O tseba seo re swanetšego go se dira gore Jehofa amogele borapedi bja rena. Ke eng seo re swanetšego go se hlokomela seo Jesu a re laetšego gore re se dire?

6. (a) Go ya ka mantšu a Jesu ao a lego go Kutollo 2:3, 4, go be go na le bothata bofe phuthegong ya Efeso? (b) Re ithuta’ng go se?

⁶ Bala Kutollo 2:3, 4. Ga se ra swanela go tlogela go rata Jehofa. Molaetša wa Jesu wo o bego o eya go bao ba lego phuthegong ya Efeso, o be o bontšha gore ba swanetše go kgotlelela le go hlankela Jehofa go sa šetšwe mathata ao ba bego ba na le ona. Eupša lerato la bona le ile la fola. Ba ile ba swanelwa ke go tsošološa lerato la bona, e le gore borapedi bja bona bo amogelege. Le rena lehono, re swanetše go ba le mabaka a kwagalago a go kgotlelela mathata. Modimo wa rena ga a kgahlwe fela ke dilo tšeo re di dirago eupša o kgahlwa le ke mabaka a rena a go dira dilo tšeo. Maikemišetšo a rena a bohlokwa go yena, ka gobane o nyaka gore re mo hlankele ka ge re mo rata.—Die. 16:2; Mar. 12:29, 30.

7. (a) Go ya ka Kutollo 3:1-3, phuthego ya Sarede e be e na le bothata bofe? (b) Re swanetše go dira’ng?

⁷ Bala Kutollo 3:1-3. Re swanetše go dula re phafogile. Phuthego ya Sarede e be e na le bothata bjo bo fapanego. Le ge ba be ba hlankela Jehofa gabotse nakong e fetilego, gona bjale ba be ba se sa mo hlankela. Ka gona Jesu o ile a ba botša gore ba “tsoge.” Temošo ke efe go rena?  Jehofa a ka se tsoge a lebetše mošomo wo re mo dire tšego wona. (Baheb. 6:10) Eupša ga se ra swanela go nagana gore ka ge re hlanketše Jehofa nakong e fetilego, ga go sa hlokagala gore re mo hlankele gona bjale. Le ge e ba re se sa kgona go dira dilo go swana le peleng, re swanetše go swarega “modirong wa Morena,” re dule re phafogile go fihla bofelong.—1 Bakor. 15:58; Mat. 24:13; Mar. 13:33

8. Go ya ka Kutollo 3:15-17, re ithuta’ng mantšung a Jesu ao a a boditšego Bakriste ba kua Laoditsea?

⁸ Bala Kutollo 3:15-17. Re swanetše go hlankela Jehofa ka mafolofolo le ka pelo ka moka. Molaetša wa Jesu woo ao ngwaletšego bao ba lego Laoditsea o be o bontšha bothata bjo bongwe gape. Ba be ba le “bololo” goba ba sa fiše e bile ba sa tonye. Ka baka la ge ba be ba hloka mafolofolo, Jesu o ile a ba botša gore ba “hlomola pelo e bile ba a šokiša”. Ba be ba swanetše go fišega ge ba hlankela Jehofa. (Kut. 3:19) Re ithuta’ng? Ge e ba re ikwa re se sa na mafolofolo, re swanetše go leboga dilo tše dibotse tšeo mokgatlo wa Jehofa o re neago tšona. (Kut. 3:18) Ga se ra swanela go dumelela bophelo bja manobonobo bo dira gore go hlankela Jehofa go se sa tla pele bophelong a rena.

9. Go ya ka mantšu a Jesu ao a a boditšego Bakriste ba Peregamo le ba Thiathira, re swanetše go phema kotsi efe?

⁹ Re swanetše go gana dithuto tša bahlanogi. Jesu o ile a kgalemela Bakriste ba bangwe kua Peregamo, ka gobane ba be ba dira gore go se sa ba le botee ka phuthegong. (Kut. 2:14-16) O ile a reta Bakriste bao ba lego Thiathira ka gobane ba ile ba gana “dilo tše di tseneletšego tšeo di tšwago go Sathane” gomme ba “swarelela” therešong. (Kut. 2:24-26) Bakriste bao ba ilego ba latela dithuto tša maaka ba be ba swanetše go itshola. Rena re swanetše go dira’ng lehono? Re swanetše go gana dithuto ka moka tšeo di ganetšanago le tsela yeo Jehofa a bonago dilo ka yona.. Bahlanogi ba ka “bonala eka ke barapedi ba Modimo”, eupša ba latola “matla a borapedi bjoo.” (2 Tim. 3:5) Go bonolo go gana dithuto tša maaka ge re diriša seo re ithutago sona ka Lentšung la Modimo.—2 Tim. 3:14-17; Juda 3, 4

10. Ke eng se sengwe seo re ithutago sona go seo Jesu a se boditšego diphuthego tša kua Peregamo le Thiathira?

 ¹⁰ Re swanetše go gana boitshwaro ka moka bjo bo gobogilego. Go be go na le bothata bjo bongwe kua Peregamo le Thiathira. Jesu o ile a sola batho ba bangwe ka phuthegong bao ba bego ba itshwara ka tsela yeo e gobogilego. (Kut. 2:14, 20) Re ithuta’ng? Re ka se no letela gore Jehofa a dumele re itshwara ka tsela e gobogilego, ka ge re na le mengwaga e mentši re mo hlankela e bile gona bjale re na le maikarabelo a mantši ka phuthegong. (1 Sam. 15:22; 1 Pet. 2:16) O letetše gore re dule re itshwere gabotse le ge lefase le le senyega go ya pele.—Baef. 6:11-13

11. Ke eng seo re ithutilego sona go fihla ga bjale? (Bona lepokisi leo le re go “ Seo re Ithutago Sona Lehono.”)

¹¹ Ke eng seo re ithutilego sona go fihla ga bjale? Re bone bohlokwa bja go kgonthišetša gore borapedi bja rena e be bjo bo amogelegago go Jehofa. Re swanetše go tšea kgato ge e ba re dira selo seo se ka dirago gore borapedi bja rena bo se ke bja amogelega go Jehofa. (Kut. 2:5, 16; 3:3, 16) Eupša Jesu o boletše ka selo se sengwe gape mo molaetšeng wa gagwe o yago diphuthegong. Ke sefe?

12. Re ithuta’ng go molaetša wa Jesu wo a ilego a o botša Bakriste ba Simirina le Filadelefia? (Kutollo 2:10)

¹² Ga bjale a re boledišaneng ka molaetša wa Jesu wo a o boditšego diphuthego tša Simirina le Filadelefia. O ile a botša Bakriste ba moo gore ba se ke ba tšhaba go tlaišwa ka gobane ge ba ka dula ba tshepa Jehofa e bile ba botega o tlo ba putsa. (Bala Kutollo 2:10; 3:10) Re ithuta’ng lehono? Re swanetše go letela go tlaišwa e bile re ikemišetše go kgotlelela. (Mat. 24:9, 13; 2 Bakor. 12:10) Ke ka baka la’ng kgopotšo ye e le bohlokwa?

13-14. Bahlanka ba Modimo ba kgomilwe bjang ke seo go bolelwago ka sona go Kutollo kgaolo 12?

¹³ Puku ya Kutollo e re botša gore bahlanka ba Modimo ba be ba tlo tlaišwa mehleng ya rena, e le go “letšatši la Morena.” Kutollo Kgaolo 12 e re ntwa e ile ya tsoga legodimong ka morago ga gore Jesu e be Kgoši ya Mmušo wa Modimo. Mikaele e lego Jesu a na le barongwa ba gagwe ba ile ba lwa le Sathane le batemona. (Kut. 12:7, 8.) Manaba ao a Modimo a ile a fenywa gomme a lahlelwa mo lefaseng, ke moka a thoma go dira gore batho ba tlaišege. (Kut. 12:9, 12) Eupša se se ama bjang batho ba Modimo?

¹⁴ Kutollo e re botša seo Sathane a se dirago ka morago. Ga a sa kgona go boela legodimong, ka gona o hlasela batlotšwa ba Modimo bao ba sa lego mo lefaseng bao ba “swaregilego ka modiro wa go nea  bohlatse ka Jesu.” (Kut. 12:17; 2 Bakor. 5:20; Baef. 6:19, 20) Boporofeta bjo bo phethagetše bjang?

15. Ke bomang bao ba emelwago ke “dihlatse tše pedi” tšeo go bolelwago bao ka tšona go Kutollo kgaolo 11, gona go diregile eng ka tšona?

¹⁵ Sathane o ile a dira gore manaba a hlasele bana babo rena bao ba tloditšwego bao ba bego ba etelela pele modiro wa go bolela ditaba tše dibotse. Bana babo rena bao ba emelwa ke “dihlatse tše pedi” tša seswantšhetšo tšeo go bolelwago ka tšona go Kutollo. * (Kut. 11:3, 7-11) Ka 1918, bana babo rena ba seswai ba ile ba latofatšwa ka maaka gomme ba golegwa, ke moka ba romelwa kgolegong gore ba ye go dula nako e telele. Batho ba bantši ba be ba nagana gore modiro wa batlotšwa bao o fedišitšwe.

16. Ke selo sefe seo se bego se sa letelwa seo se ilego sa direga ka 1919, gona Sathane o ile a tšwela pele a dira’ng go tloga ka nako yeo?

¹⁶ Boporofeta bjo bo lego go Kutollo kgaolo 11 bo ile bja bontšha le gore ‘dihlatse tšeo tše pedi’ di tla boa tša phela ka morago ga nako e kopana. Boporofeta bjo, bo ile bja phethagala ka tsela e makatšago pele ngwaga o fela. Mathomong a 1919 bana babo rena ba ile ba lokollwa kgolegong, gomme melato ya bona ya phumolwa. Ka ntle le go senya nako bana babo rena ba ile ba tšwela pele ka modiro wa go ruta le wa go bolela ditaba tse dibotse. Eupša se ga se sa thibela Sathane go hlasela batho ba Modimo. Go tloga ka nako yeo, Sathane o ile a dira gore batho ba Modimo ba tlaišege goba ba kgangwe ke meetse “a noka” ya seswantšhetšo. (Kut. 12:15) Se se dira gore ka moka ga rena re be le “kgotlelelo le tumelo.”—Kut. 13:10.

17. Bahlanka ba Modimo ba hweditše thušo efe yeo ba sa e letelago le ge Sathane a be a ba hlasela?

¹⁷ Kutollo kgaolo 12 e bontšha gore batho ba Modimo ba be ba tlo hwetša thušo mo ba bego ba sa nagane gore ba tlo e hwetša gona. Go tlo ba bjale ka ge eka “lefase” le meditše “noka” ya tlaišo. (Kut. 12:16) Se ke seo se ilego sa direga. Ka dinako tše dingwe dilo tša mo lefaseng la Sathane tše bjalo ka dikgoro tša tsheko, di kgona go thuša batho ba Modimo. Gantši bahlanka ba Modimo ba fenya melato kgorong ya tsheko  gomme ba lokologa. Ba dirišitše tokologo ya bona bjang? Ba dirišitše nako ya bona gabotse ka go dira mošomo wo Jehofa a ba neilego ona. (1 Bakor. 16:9) Mošomo wo o akaretša eng?

18. Ke mošomo ofe o bohlokwa wo re o dirago mehleng ya bofelo?

¹⁸ Jesu o ile a porofeta gore batho ba gagwe ba be ba tlo bolela “ditaba tše dibotse tša Mmušo [wa Modimo]” lefaseng ka moka pele bofelo bo etla. (Mat. 24:14) Ge ba dira bjalo, ba hwetša thušo go morongwa goba sehlopha sa barongwa, seo go bolelwago ka sona se na le “ditaba tše dibotse tša ka mo go sa felego gore [se] di tsebiše bao ba dulago lefaseng, le go ditšhaba tšohle, meloko yohle, maleme ohle le batho bohle.”—Kut. 14:6.

19. Ke molaetša ofe o mongwe woo batho ba Jehofa ba swanetšego go o bolela?

¹⁹ Ditaba tše dibotse tša Mmušo wa Modimo ga se molaetša feela woo batho ba Modimo ba bolelago ka ona. Ba swanetše go thekga le mošomo wa barongwa wo o hlaloswago go Kutollo kgaolo 8 go ya go 10. Barongwa ba ba tsebatša masetlapelo ao a tlago go wela batho bao ba sa thekgego Mmušo wa Modimo. Ka gona, Dihlatse tša Jehofa di be di dutše di tsebatša molaetša wa kahlolo wo o swantšhwago le “sefako le mollo,” e bile o utulla dikahlolo tša Modimo tšeo di tlago go wela lefase le le lebe la Sathane. (Kut. 8:7, 13) Batho ba swanetše go tseba gore bofelo bo kgauswi ke moka ba dire diphetogo tše dikgolo maphelong a bona e le gore ba tle ba phologe letšatši la bogale bja Jehofa. (Tsef. 2:2, 3) Eupša molaetša wo ke selo seo se sa tlwaelegago. Go tlo nyakega gore re be le sebete gore re botše batho molaetša wo. Nakong ya masetlapelo a magolo molaetša wa mafelelo wa kahlolo o tlo befediša batho.—Kut. 16:21.

20. Re tlo bolela ka’ng dihlogong tše pedi tše di latelago?

²⁰ Re swanetše go boloka “mantšu a boporofeta bjo” ka gobane le rena re a akaretšwa go seo re se balago ka pukung ya Kutollo. (Kut. 1:3) Re ka dira eng gore re botege le go kgotlelela ge re tlaišwa e bile re tšwele pele re bolela melaetša ye ka sebete? Re tlo tiišwa ke dilo tše pedi: sa pele, seo se bolelwago ke puku ya Kutollo mabapi le manaba a Modimo, sa bobedi, ditšhegofatšo tšeo re tlago go di hwetša ge re dula re botega. Re tlo bolela ka dilo tše dihlogong tše pedi tše di latelago.