1-2. Ke phetho efe e bohlokwa yeo Bajuda bao ba bego ba le Babilona ba bego ba swanetše go e dira? (Esera 1:2-4)

 KGOŠI e ile ya ntšha taelo! Bajuda bao ba bego ba le bothopša Babilona ka mengwaga e ka bago e 70 ba be ba lokolotšwe gore ba ka boela gae Isiraele. (Bala Esera 1:2-4.) Ke Jehofa feela yo a bego a ka kgona go dira seo. Ke ka baka la’ng re re’alo? Babilona e be e tsebja ka go se lokolle mathopša a yona. (Jes. 14:4, 17) Eupša Babilona e be e fentšwe, gomme moetapele yo mofsa o be a boditše Bajuda gore ba ka tloga nageng yeo. Ka baka leo Mojuda yo mongwe le yo mongwe, kudukudu hlogo ya lapa, o be a swanetše go dira phetho ya ge e ba o tla tloga Babilona goba o tla šala. Go be go ka se be bonolo go dira phetho yeo. Ka baka la’ng?

² Ba bangwe ba be ba tšofetše moo ba bego ba ka se kgone go tšea leeto le letelele. Le gona Bajuda ba bantši ba be ba belegetšwe Babilona, ka gona e be e le legae la bona leo ba le tsebago e bile ba se ba ka ba dula lefelong le lengwe. Ba be ba lebelela Isiraele e le naga ya borakgolokhukhu ba bona. Bajuda ba bangwe ba be ba humile kua Babilona, ka gona go be go ka ba thata gore ba tlogele magae a bona a mabotse goba dikgwebo tša bona ke moka ba ye go dula nageng yeo ba sa e tsebego.

3. Bajuda bao ba botegago ba be ba tlo holega bjang ge ba be ba ka boela Isiraele?

³ Bajuda bao ba botegago ba be ba tseba gore ba tlo holega kudu ge ba ka boela Isiraele go feta go kgetha go šala Babilona. E nngwe ya dilo tšeo ba bego ba tlo holega ka tšona e be e le borapedi bja bona. Le ge kua Babilona go be go na le ditempele tše fetago tše 50, eupša gare ga tšona go be go se na tempele ya Jehofa.  Go be go se na aletare yeo Baisiraele ba bego ba ka direla dihlabelo go yona go ya le ka Molao wa Moše, e bile go be se na moperisita yo a phagamego go neela dihlabelo tšeo. Go oketša moo, batho ba Jehofa e be e le ba banyenyane ge ba bapetšwa le banna le basadi ba bantši bao ba bego ba rapela medimo ya maaka e bile ba sa iše felo ka melao ya Jehofa. Ka gona, Bajuda ba diketekete bao ba bego ba rata Modimo, ba be ba fela pelo ya go boela nageng ya bona moo ba bego ba tla tsošološa borapedi bjo bo hlwekilego.

4. Jehofa o be a tshepišitše go thuša bjang Bajuda bao ba bego ba boela Isiraele?

⁴ Tsela ya kgonthe ya go tloga Babilona go ya Isiraele e be e ka tšea dikgwedi tše e ka bago tše nne, eupša Jehofa o ile a tshepiša gore o tla tloša selo le ge e le sefe seo se bego se tla ba šitiša go sepela tseleng yeo. Jesaya o ngwadile gore: “Kgorang tsela ya Jehofa! Otlollelang Modimo wa rena tsela e kgolo leganateng. . . . Le naga ya dithota e be yeo e ikadilego gomme naga e sa lekalekanelago e be molala.” (Jes. 40:3, 4) Nagana ka tsela e kgolo yeo e lego leganateng moo e lego molala! Batho ba be ba tla thabela go sepela tseleng yeo. Go be go tla ba bonolo gore batho ba sepele tseleng e kgolo le e bulegilego go e na le go tshela meedi goba go namela dithaba le meboto. E bile ba be ba tla fihla ka pela.

5. Tsela e kgolo ya seswantšhetšo yeo e bego e le gare ga Babilona le Isiraele e be e bitšwa’ng?

⁵ Lehono ditsela tše dintši tše dikgolo di bitšwa ka maina goba ka dinomoro. Tsela ya seswantšhetšo yeo Jesaya a ngwadilego ka yona le yona e be e na le leina. Re bala gore: “Go tla ba le tsela e kgolo, yona tsela; e tla bitšwa Tsela e Kgethwa. Motho wa go se hlweke a ka se fete go yona.” (Jes. 35:8) Kholofetšo ye e be e bolela’ng go Baisiraele ba nakong e fetilego? Gona e bolela’ng go rena lehono?

6. Ke ka baka la’ng tsela ye e be e bitšwa e kgethwa?

⁶ “Tsela e Kgethwa.” Le e tloga e le leina le lebotse kudu! Ke ka baka la’ng tsela ye e be e bitšwa e kgethwa? Ka gobane go be go ka se be le ‘batho ba go se hlweke’ tseleng yeo, e lego Mojuda yo mongwe le yo mongwe yo a bego a ikemišeditše go dira bootswa, go rapela medimo ya diswantšho goba go dira sebe se sengwe le se sengwe se segolo. Bajuda bao ba bego ba boela Isiraele e be e tla ‘ba ba bakgethwa’ go Modimo wa bona. (Doit. 7:6) Eupša seo ga se bolele gore bao ba bego ba tloga Babilona ba be ba sa swanela go dira diphetogo gore ba kgahliše Jehofa.

7. Ke diphetogo dife tšeo Bajuda ba bangwe ba bego ba swanetše go di dira? Nea mohlala.

⁷ Ka ge re boletše pejana, Bajuda ba bantši ba be ba belegetšwe Babilona, e bile ba bangwe ba be ba šetše ba tlwaetše tsela ya batho ba moo ya go nagana le ya go dira dilo. Ka morago ga mengwaga e mentši Bajuda ba mathomo ba boetše Isiraele, Esera o ile a lemoga gore Bajuda bangwe ba be ba nyetše basadi ba ditšhaba tšeo. (Ek. 34:15, 16; Esera 9:1, 2) Le gona ka morago, Mmuši Nehemia o ile a makatšwa ke go tseba gore bana bao ba belegetšwego Isiraele ga se ba ka ba ithuta le leleme la Bajuda. (Doit. 6:6, 7; Neh. 13:23, 24) Bana bao ba be ba ka ithuta bjang go rata le go tumiša Jehofa ge e ba ba sa kwešiše leleme la Seheberu, e lego leleme leo Lentšu la Modimo le bego le ngwadilwe ka lona? (Esera 10:3, 44) Bajuda bao ba be ba swanetše go dira diphetogo tše dikgolo. Eupša e le gore seo se kgonege, ba be ba swanetše go dula Isiraele moo borapedi bjo bo hlwekilego bo bego bo tsošološwa ganyenyane-ganyenyane.—Neh. 8:8, 9.

8. Ke ka baka la’ng dilo tšeo di diragetšego kgale di re kgoma lehono? (Bona seswantšho sa letlakala la ka ntle.)

 ⁸ Batho ba bangwe ba ka re: ‘Se se tloga se makatša, eupša na dilo tšeo di diragaletšego Bajuda nakong e fetilego di a re kgoma lehono?’ Ee, di a re kgoma, ka gobane dilo tšeo re di dirago, di ka swantšhwa le go sepela ‘Tseleng e Kgethwa.’ Go sa šetšwe gore re batlotšwa goba re ba “dinku tše dingwe,” re swanetše go dula re sepela ‘Tseleng e Kgethwa’ ka gobane e re iša paradeiseng ya moya, e bile e dira gore re tle re hwetše ditšhegofatšo tša Mmušo tša nakong e tlago. b (Joh. 10:16) Ga e sa le go tloga ka 1919, banna, basadi le bana ba dimilione ba tlogetše Babilona o Mogolo, e lego mmušo wa lefase wa bodumedi bja maaka, gomme ba thoma go sepela tseleng ye ya seswantšhetšo. Mohlomongwe o yo mongwe wa bona. Le ge tsela ye e thomile go sepelwa mengwaga e ka bago e 100 e fetilego, eupša ke kgale tsela ye e kgolo e thomile go lokišwa.

9. Jesaya 57:14 e re mošomo wa go lokišetša “Tsela e Kgethwa” o dirilwe bjang?

⁹ Jehofa o ile a kgonthišetša gore o tloša dilo tšeo di bego di ka šitiša Bajuda go sepela pele ba tloga Babilona. (Bala Jesaya 57:14.) Na le lehono go diregile se se swanago “Tseleng e Kgethwa”? Mengwaga e mentši pele ga 1919, Jehofa o ile a diriša banna bao ba bego ba mo hlompha kudu gore ba lokiše tsela ya go tšwa go Babilona o Mogolo. (Bapiša le Jesaya 40:3.) Ba ile ba lokišetša tsela, e lego tsela ya moya gore bao ba nago le dipelo tše di lokilego ba tšwe go Babilona o Mogolo ke moka ba tsene paradeiseng ya moya moo borapedi bjo bo hlwekilego bo tsošološitšwego. Mošomo wa go lokišetša tsela o be o akaretša’ng? A re boneng tše dingwe tša dilo tšeo di ilego tša dirwa ge go be go lokišetšwa tsela ye.

10-11. Mošomo wa go gatiša le wa go fetolela Beibele o thušitše bjang gore batho ba tsebe Beibele? (Bona le seswantšho.)

¹⁰ Go gatiša. Beibele e be e ngwalwa ka letsogo go fihla lekgolong la bo-15 la mengwaga. Mošomo wo o be o tšea nako, le gona dikopi tša Beibele di be di sa hwetšagale gabonolo e bile di tura kudu. Eupša ge metšhene ya go gatiša e hwetšagala, Beibele e ile ya gatišwa ka bontši ke moka batho ba thoma go e hwetša gabonolo.

¹¹ Go fetolela. Beibele e be e hwetšagala ka Selatine ka mengwaga e mentši, e lego leleme leo le bego le kwešišwa ke batho bao ba rutegilego feela. Ge mošomo wa go gatiša o thoma go ata, batho bao ba hlomphago Modimo ba ile ba thoma go fetolela Beibele ka maleme ao a bolelwago ke batho bao ba tlwaelegilego. Ga bjale babadi ba be ba kgona go bapetša seo baruti ba bego ba ba ruta sona le seo ge e le gabotse Beibele e se rutago.

12-13. Nea mohlala wa kamoo barutwana ba Beibele bao ba botegago ba lekgolong la bo-19 la mengwaga, ba ilego ba pepentšha dithuto tša bodumedi bja maaka.

¹² Dikgatišo tšeo di theilwego Beibeleng. Barutwana ba Beibele bao ba lego šedi ba ile ba ithuta dilo tše dintši go seo ba bego ba se bala ka Lentšung la Modimo. Baruti ba be ba galefišwa ke ge barutwana ba Beibele ba ruta batho ba bangwe ka seo ba ithutilego sona. Ka mohlala, lekgolong la bo-19 la mengwaga, barutwana bao ba botegago ba ile ba thoma go phatlalatša dipampišana tšeo di bego di pepentšha dithuto tša maaka tša dikereke.

¹³ Ka bo-1835, monna yo a bego a rata Modimo yoo a bitšwago Henry Grew, o ile a gatiša pampišana yeo e bego e bolela ka boemo bja bahu. Ka pampišaneng yeo, o ile a hlatsela gore Mangwalo a bontšha gore go se hwe ke  mpho e tšwago go Modimo, e sego boemo bjoo re belegwago re na le bjona, go etša ge dikereke tše dintši di ruta. Ka 1837, moruti yo a bitšwago George Storrs, o ile a topa pampišana yeo ge a be a sepela ka terene. O ile a e bala ke moka a kgodišega gore o hweditše therešo e bohlokwa. O ile a botša ba bangwe ka seo a ithutilego sona. Ka 1842, o ile a nea tatelano ya dipolelo tše matla tša sehlogo seo se rego: “An Inquiry—Are the Wicked Immortal?” Motho yo mongwe yoo a ilego a ithuta dilo tše dintši go George Storrs, e be e le mofsa yo a bitšwago Charles Taze Russell.

14. Ngwanabo rena  Russell le bašomigotee le yena ba ile ba holwa bjang ke seo ba bangwe ba se dirilego gore ba ba lokišetše tsela? (Bona le seswantšho.)

¹⁴ Ngwanabo rena  Russell le bašomigotee le yena ba ile ba holwa bjang ke seo ba bangwe ba se dirilego gore ba ba lokišetše tsela? Ge ba be ba ithuta, ba be ba diriša dipuku tša go dira nyakišišo le diphetolelo tše dingwe tša Beibele tšeo di ilego tša tšweletšwa pele ga mehla ya bona. Le gona, ba ile ba holwa ke nyakišišo ya Beibele yeo e dirilwego ke banna ba go swana le Henry Grew, George Storrs le ba bangwe. Ngwanabo rena Russell le bašomigotee le yena, ba ile ba lokiša tsela ka go tšweletša dipuku le dipampišana tše di bolelago ka dilo tšeo di lego ka Beibeleng.

15. Go ile gwa direga dilo dife tše bohlokwa ka 1919?

¹⁵ Ka 1919, batho ba Modimo ba ile ba tšwa go Babilona o Mogolo. Wona ngwageng woo “mohlanka yo a botegago le wa temogo,” o ile a thoma go šoma gore a kgone go thuša batho ba dipelo tšeo di lokilego gore ba sepele ‘Tseleng e Kgethwa.’ (Mat. 24:45-47) Re leboga batho bao ba ilego ba šoma ka thata go lokiša tsela nakong e fetilego gore bao ba tlago go sepela moo tseleng yeo e kgolo, ba tle ba ithute ka mo go oketšegilego ka Jehofa le ka dilo tšeo a nyakago go di dira. (Die. 4:18) Le gona ba be ba ka phela ka go dumelelana le dilo tšeo a di nyakago. Jehofa o be a se a letela gore batho ba gagwe ba no dira diphetogo ka yona nako yeo. Ka gona, ile a ba thuša gore  ba fetoge ge nako e dutše e eya. (Bona lepokisi leo le rego: “ Jehofa o Thuša Batho ba Gagwe Gore ba Fetoge Ganyenyane-ganyenyane.”) Ka moka ga rena re tlo thaba kudu ge re kgona go kgahliša Modimo ka tšohle tšeo re di dirago!—Bakol. 1:10.

16. Ke mošomo ofe wo o dirilwego go lokišetša “Tsela e Kgethwa” ga e sa le go tloga ka 1919? (Jesaya 48:17; 60:17)

¹⁶ Tsela e nngwe le e nngwe e swanetše go dula e hlokomelwa. Ga e sa le go tloga ka 1919, mošomo wa go lokišetša “Tsela e Kgethwa” o ile wa no tšwela pele gore batho ba bantši ba kgone go ithuta ke moka ba tšwe go Babilona o Mogolo. Mohlanka yo a kgethilwego yo a botegago le wa temogo o ile a tšwela pele a šoma, ke moka ka 1921, o ile a lokolla dikgatišo tša go ithuta Beibele go thuša batho gore ba ithute ditherešo tša ka Beibeleng. Go ile gwa phatlalatšwa dikopi tše e ka bago tše 6 000 000 tša kgatišo e bitšwago The Harp of God ka maleme a 36, gomme batho ba bantši ba ile ba ithuta therešo ka yona. Ga bjale re na le kgatišo e mpsha e bitšwago, O ka Thabela Bophelo go ya go Ile! Mo mehleng ye ya bofelo, Jehofa o diriša mokgatlo wa gagwe go dula a re nea dijo tša moya e le go re thuša gore re kgone go tšwela pele re sepela ‘Tseleng e Kgethwa.’—Bala Jesaya 48:17; 60:17.

17-18. “Tsela e Kgethwa” e re iša kae?

¹⁷ Re ka re nako le nako ge motho a amogela thuto ya Beibele, o hwetša sebaka sa go sepela ‘Tseleng e Kgethwa.’ Ba bangwe ba no sepela ka tsela ye e kgolo ka nakwana ke moka ba e tlogela. Ba bangwe ba ikemišeditše go dula ba sepela ka yona go fihla mafelelong. Tsela ye e felela kae?

¹⁸ Bao ba nago le kholofelo ya go phela legodimong, “Tsela e Kgethwa” e ba iša “paradeiseng ya Modimo” legodimong. (Kut. 2:7) Bao ba nago le kholofelo ya go tlo phela mo lefaseng tsela ye e kgolo e tlo dira gore ba phethagale ka morago ga mengwaga e sekete. Ge e ba lehono o sepela tseleng yeo e kgolo, o se ke wa lebelela morago. Le gona, o se ke wa e tlogela go fihlela o tsena lefaseng le lefsa! Eka le ka sepela gabotse mo tseleng ye.”