1. Ke ka baka la’ng re ka re re phela dinakong tšeo di kgahlišago kudu?

 RE PHELA dinakong tšeo di kgahlišago kudu! Letšatši le lengwe le lengwe re bona boporofeta bja Beibele bo phethagala. Ka mohlala, re bona “kgoši ya lebowa” le “kgoši ya borwa” di lwela go ba le matla mo lefaseng. (Dan. 11:40) Re bona le ditaba tše dibotse tša Mmušo wa Modimo di bolelwa ka botlalo lefaseng ka moka moo batho ba dimilione ba arabelago gabotse. (Jes. 60:22; Mat. 24:14) E bile re hwetša dijo tše dintšhi tša moya “ka nako ya maleba.”—Mat. 24:​45-47.

2. Ke’ng seo re ka kgodišegago ka sona, gona ke’ng seo re swanetšego go se tseba?

² Jehofa o re thuša go kwešiša gabotse ditiragalo tšeo di tlago go direga nakong e tlago. (Die. 4:18; Dan. 2:28) Re ka kgodišega gore ge masetlapelo a magolo a thoma, re tla be re tseba dilo ka moka tšeo re swanetšego go di tseba tšeo di tlago go re thuša go kgotlelela le go dula re na le botee. Re swanetše go dumela gore go na le dilo tše dingwe tšeo re ka se di tsebego ka bokamoso. Sehlogong se re tlo kwa gore ke ka baka la’ng re ile ra kaonefatša kwešišo ya rena ka tše dingwe tša ditiragalo tšeo. Ke moka ra kwa ka tše dingwe tšeo re di tsebago ka bokamoso le ka tsela yeo Tatago rena wa legodimong a tlago go dira dilo ka yona.

 SEO RE SA SE TSEBEGO

3. Ke ka baka la’ng re be re dumela gore batho bao ba sa dumelego go Modimo ba tlo fedišwa nakong ya Haramagedone, gona ke ka baka la’ng re be re dumela seo?

³ Nakong e fetilego, re ile ra bolela gore ge masetlapelo a magolo a thoma, ga go na motho yo a sa lokago yo a tlago go ba le tumelo go Jehofa le go phologa Haramagedone. Re boletše bjalo ka ge re be re nagana gore pego ya Meetsefula e be e le karolo ya boporofeta. Ka mohlala, re be re nagana gore ka ge Jehofa a ile a tswalela lebati la areka ge Meetsefula a thoma, o tla dira bjalo ge masetlapelo a magolo a thoma gomme gwa se be le batho ba babe bao ba phologago.—Mat. 24:​37-39.

4. Na re lebelela pego ya Meetsefula e le karolo ya boporofeta? Hlalosa.

⁴ Na re ka re seo se ilego sa direga nakong ya Meetsefula se be se bontšha seo se tlago go direga nakong e tlago? Aowa. Ka baka la’ng? Gobane seo ga se seo Beibele e se bolelago. a Le ge Jesu a ile a bapetša “mehla ya Noa” le nakong ya go ba gona ga gagwe, o be a sa bolele gore pego ya Meetsefula e be e bontšha seo se tlago go direga nakong e tlago, go swana le ge e ka Jehofa o tswalela lebati la areka. Se ga se bolele gore re ka se ithute se sengwe go pego ya Noa le Meetsefula.

5. (a) Noa o ile a dira’ng pele ga Meetsefula? (Baheberu 11:7; 1 Petro 3:20) (b) Tsela yeo Noa a ilego a bolela ditaba tše dibotse ka yona e swana bjang le yeo rena re bolelago ka yona?

⁵ Ge Noa a be a ekwa molaetša wa Jehofa  wa temošo, o ile a bontšha tumelo ka go aga areka. (Bala Baheberu 11:7; 1 Petro 3:20.) Ka mo go swanago, ge batho ba ekwa ditaba tše dibotse tša Mmušo wa Modimo ba swanetše go tšea kgato. (Dit. 3:​17-20) Petro o ile a re Noa e be e le “mmoledi wa toko.” (2 Pet. 2:5) Eupša ka ge re boletše sehlogong se se fetilego, ga re tsebe ge e ba Noa a ile a ba thulaganyo ya go bolela le motho yo mongwe le yo mongwe pele ga Meetsefula. Lehono re swaregile ka go bolela ditaba tše dibotse lefaseng ka moka e bile re dira seo ka mafolofolo. Le ga go le bjalo re ka no se kgone go bolela le motho yo mongwe le yo mongwe ka ditaba tše dibotse pele bofelo bo fihla. Ka baka la’ng?

6-7. Ke ka baka la’ng re ka re ga go kgonege gore re botše motho yo mongwe le yo mongwe ditaba tše dibotse pele bofelo bo fihla?

⁶ Nagana ka seo Jesu a se boletšego ka tsela yeo re bego re tlo bolela ditaba tše dibotse ka yona. O ile a bolela e sa le pele gore ditaba tše dibotse “di tla bolelwa lefaseng ka moka gore e be bohlatse go ditšhaba tšohle.” (Mat. 24:14) Boporofeta bjoo bo phethagala lehono go feta le ge e le neng pele. Molaetša wa Mmušo o hwetšagala ka maleme a fetago a 1 000, e bile wepesaete ya jw.org e dira gore batho bantšhi lefaseng ba kgone go hwetša ditaba tšeo.

⁷ Jesu o ile a botša balatedi ba gagwe gore ba ka se “fetše tikologo ya metse,” goba go bolela le motho yo mongwe le mongwe pele a etla go ahlola batho. (Mat. 10:23; 25:​31-33) Mantšu ao a Jesu a tlo phethagala le mehleng ya rena. Lehono batho ba bantšhi ga ba kgone go hwetša ditaba tše dibotse ka ge modiro wa rena o thibetšwe dinageng tša gabo bona. Go oketša moo, go belegwa bana bantšhi letšatši le lengwe le lengwe. Re dira sohle seo re ka se kgonago gore re botše “batho ba ditšhaba tšohle, meloko yohle le maleme ohle” ditaba tše dibotse. (Kut. 14:6) Tabakgolo ke gore re ka se kgone go botša batho ka moka ditaba tše dibotse pele bofelo bo fihla.

8. Re ka ipotšiša potšišo efe ka dikahlolo tša nakong e tlago? (Bona le diswantšho.)

⁸ Re ka ipotšiša gore: Go tlo direga’ng ka batho bao ba sa kago ba hwetša sebaka sa go kwa ditaba tše dibotse pele masetlapelo a magolo a thoma? Jehofa le Morwa wa gagwe ba tlo ba ahlola bjang? (Joh. 5:​19, 22, 27; Dit. 17:31) Lengwalo la sehlogo se le re Jehofa “ga a rate gore go fedišwe le ge e le mang.” Eupša o rata gore “bohle ba fihlelele boitsholo.” (2 Pet. 3:9; 1 Tim. 2:4) Le ge re tseba dilo tše, re kwešiša gore Jehofa ga se a hlwa a re botša gore go tlo direga’ng ka batho bao ba sa kago ba hwetša sebaka sa go kwa ditaba tše dibotse. Jehofa ga a gapeletšege go re botša dilo ka moka tšeo a di dirilego goba tšeo a tlago go di dira.

9. Jehofa o re boditše’ng a diriša Beibele?

⁹ Jehofa o dirišitše Beibele go re botša dilo tše dingwe tšeo a tlago go di dira. Ka mohlala, Beibele e re botša gore Jehofa o tlo tsoša batho “ba sa lokago,” bao ba sa kago ba hwetša sebaka sa go ithuta ka ditaba tše dibotse le go fetoša maphelo a bona. (Dit. 24:15; Luka 23:​42, 43) Se se dira gore re ipotšiše dipotšišo tše dingwe tša bohlokwa.

10. Ke dipotšišo dife tše dingwe tšeo re ka ipotšišago tšona?

¹⁰ Na batho ka moka bao ba tlago go hlokofala nakong ya masetlapelo a magolo ba tlo fedišetšwa sa ruri ba se na kholofelo ya tsogo? Mangwalo a bolela ka mo go kwagalago gore batho bao ba lwantšhanago le Jehofa le madira a gagwe, ba tlo fedišwa ka Haramagedone gomme ba se tsošwe. (2 Bathes.  1:​6-10) Bjale go tlo direga’ng ka batho bao ba tlo hlokofalago ka baka la malwetši, dikotsi goba ba bolawa ke batho ba bangwe? (Mmo. 9:11; Sak. 14:13) Na ba bangwe ba batho ba ba ka ba gare ga “ba sa lokago” bao ba tlago go tsošwa lefaseng le leswa? Ga re tsebe.

SEO RE SE TSEBAGO

11. Modimo o tlo lebelela’ng ge a ahlola batho nakong ya Haramagedone?

¹¹ Go na le dilo tšeo re di tsebago tšeo di tlago go direga nakong e tlago. Ka mohlala, nakong ya Haramagedone re a tseba gore batho ba tlo ahlolwa go ya le kamoo ba bego ba swara bana babo Kriste ka gona. (Mat. 25:40) Batho bao ba ahlotšwego e le dinku, e tlo ba bao ba bontšhitšego gore ba be ba thekga batlotšwa le Kriste. E bile re tseba le gore ba bangwe ba bana babo Kriste ba tla be ba sa le mo lefaseng ge masetlapelo a magolo a thoma gomme ba tlo ya legodimong ka morago ga gore Haramagedone e thome. Ge bana babo Jesu ba sa le mo lefaseng, go ka direga gore batho ba bantšhi ba dipelo tše di lokilego, ba be le sebaka sa go ba thekga le go šoma le bona. (Mat. 25:​31, 32; Kut. 12:17) Ke ka baka la’ng go tseba se go le bohlokwa?

12-13. Batho ba bangwe ba ka dira’ng ge ba bona “Babilona o Mogolo” a fedišwa? (Bona le diswantšho.)

¹² Ka morago ga gore masetlapelo a magolo a thome, go ka direga gore ba bangwe ge ba bona “Babilona o Mogolo” a fedišwa, ba gopole gore Dihlatse tša Jehofa di ile tša bolela gore seo se tlo direga. Na ge ba bangwe ba bona se se direga, ba ka dira diphetogo gomme ba ba le tumelo go Jehofa?—Kut. 17:5; Hesek. 33:33.

¹³ Gopola gore go ile gwa direga eng kua Egepeta mehleng ya Moshe. Batho ba bantšhi bao e bego e se Baisiraele, ba ile ba tloga Egepeta ba sepela le Baisiraele. Ba bangwe ba bona ba ka ba ba ile ba thoma go ba le tumelo ge ba bona Dikotlo tše Lesome tšeo Moshe a bego a bolela ka tšona di direga. (Ek. 12:38) Selo se swanago se ka direga ka morago ga gore Babilona o Mogolo a fedišwe. Na re ka nyamišwa ke gore batho ba ba no bontšha tumelo ka motsotso wa mafelelo? Ga go bjalo!  Re nyaka go ekiša Tatago rena wa legodimong, e lego “Modimo yo a gaugelago le yo a šokelago, yo a sa galefego kapela, yo a nago le lerato le legolo gomme selo se sengwe le se sengwe seo a se bolelago e lego nnete.” b—Ek. 34:6.

14-15. Na gore motho a tle a phele go ya go ile go ithekgile ka gore o hwile neng goba o dula kae? Hlalosa. (Psalme 33:​4, 5)

¹⁴ Ka dinako tše dingwe re na le go kwa batho ba bangwe ba re, “Go kaone gore batho ba gešo bao ba sa hlankelego Jehofa, ba hlokofale pele masetlapelo a magolo a thoma e le gore ba tle ba kgone go tsošwa.” Motho yo mongwe le yo mongwe o nyaka go bona ba gabo ba phologa. Eupša gopola gore bokamoso bja motho, ga bo ithekge ka gore o hlokofetše neng. Jehofa ke moahlodi yo a phethagetšego. O ahlola batho gabotse le ka toko. (Bala Psalme 33:​4, 5.) Re ka tshepa gore “moahlodi wa batho lefaseng ka moka” o tla ahlola batho gabotse.—Gen. 18:25.

¹⁵ Taba ya gore motho o swanelega go phela go ya go ile ga se ya ithekga ka gore o dula kae. Go tla ba go sa kwagale go phetha ka gore Jehofa o tla ahlola batho ba dimilione gore ke “dipudi” mola batho bao ba dula mafelong ao molaetša wa Mmušo o sa kago wa fihla go ona. (Mat. 25:46) Moahlodi wa go loka wa batho lefaseng ka moka, o na le taba le batho bao ba sa kago ba kwa ditaba tše dibotse. Ga re tsebe gore Jehofa o tlo dira dilo bjang nakong ya masetlapelo a magolo. Mohlomongwe  batho bao ba tlo ba le sebaka sa go ithuta ka Jehofa, le go ba le tumelo go yena ge a tla be a kgethagatša leina la gagwe pele ga ditšhaba ka moka.—Hesek. 38:16.

16. Re ithutile’ng ka Jehofa? (Bona le seswantšho.)

¹⁶ Ge re dutše re ithuta Beibele, re a bona gore Jehofa o tšeela bophelo bja batho godimo. O gafile Morwa wa gagwe gore batho ba be le tebelelo ya go phela ka mo go sa felego. (Joh. 3:16) Ka moka ga rena re bone kamoo Jehofa a re ratago ka gona. (Jes. 49:15) O tseba yo mongwe le yo mongwe wa rena ka leina. Ge e le gabotse, Jehofa o tseba selo se sengwe le se sengwe ka rena, le ge re ka hlokofala, o tlo tsoša yo mongwe le yo mongwe wa rena kamoo a bego a le ka gona! (Mat. 10:​29-31) Re kgodišegile gore Jehofa o tlo ahlola motho yo mongwe le yo mongwe gabotse ka ge a le bohlale, a lokile e bile a na le kwelobohloko.—Jak. 2:13.

17. Re tlo boledišana ka’ng sehlogong se se latelago?

¹⁷ Ka morago ga go bala ka boitsebišo bjo bo kaonefaditšwego, re kgona go bona gore go bolela ditaba tše dibotse go bohlokwa kudu. Ke ka baka la’ng re re’alo? Gona ke’ng seo se dirago gore re tšwele pele re bolela ditaba tše dibotse ka mafolofolo? Re tlo araba dipotšišo tše sehlogong se se latelago.