1. Ke taelo efe yeo e bego e ka kgodiša batho ba Modimo gore ba be ba tlo lokollwa go Babilona o Mogolo, gona re tlo ahlaahla dipotšišo dife?

SEHLOGONG se se fetilego, re ithutile kamoo Bakriste ba botegago ba ilego ba ikhwetša ba le bokgobeng bja Babilona. Lega go le bjalo, se se kgahlišago ke gore ba be ba ka se be boemong bjoo sa ruri. Taelo ya Modimo yeo e rego “etšwang go yena batho ba ka” e be e ka se be le mohola ge nkabe go se na motho yo a bego a tla tšwa bokgobeng bja mmušo wa lefase wa bodumedi bja maaka. (Bala Kutollo 18:4.) Sehlogong se, re tlo ithuta gore batho ba Modimo ba lokologile neng ka mo go feletšego dinaleng tša Babilona! Eupša pele ga moo, re swanetše go araba dipotšišo tše di latelago: Barutwana ba Beibele ba ile ba dira eng gore ba eme ba tiile kgahlanong le Babilona o Mogolo pele ga 1914? Bana babo rena ba be ba fišega gakaaka’ng modirong wa boboledi nakong ya Ntwa ya Pele ya Lefase? Na Jehofa ke yena a išitšego batho ba gagwe bokgobeng bja Babilona o Mogolo e le gore a ba phošolle?

2. Barutwana ba Beibele ba mehleng ya pele ba ile ba dira phetho efe ka bodumedi bja maaka?

² Mengwaga e masome pele ga Ntwa ya Pele ya Lefase, Charles  Taze Russell le bašomigotee le yena ba ile ba lemoga gore mekgatlo ya Bojakane ga e rute ditherešo tša Beibele. Ke moka ba ile ba phetha ka go se sa šomišana le bodumedi bja maaka. Di tloga fase, ka November 1879, Zion’s Watch Tower e ile ya hlalosa ka go lebanya boemo bja bona ka go ngwala gore: “Kereke e nngwe le e nngwe yeo e ipolelago gore ke kgarebe e hlwekilego yeo e tlago go nyalwa ke Kriste, eupša e tšwela pele e gwerane le lefase (goba sebata) le go thekgwa ke lona, go ya ka mangwalo e bitšwa gore ke mogweba ka mmele,” e lego Babilona o Mogolo.​—Bala Kutollo 17:1, 2.

3. Ke’ng seo Barutwana ba Beibele ba ilego ba se dira ntle le go senya nako go bontšha gore ba be ba kwešiša gore ba swanetše go tšwa bodumeding bja maaka? (Bona seswantšho seo se lego mathomong a sehlogo.)

³ Banna le basadi ba go boifa Modimo ba ile ba tseba seo ba bego ba swanetše go se dira. Jehofa o be a ka se ba šegofatše ge ba be ba ka tšwela pele ba thekga mekgatlo ya bodumedi bja maaka. Ka gona, Barutwana ba Beibele ba bantši ba ile ba ngwalela dikereke tša bona mangwalo a gore ga ba sa le ditho tša tšona. Ba bangwe ba ile ba balela dikereke tša bona mangwalo ao. Bao ba ilego ba ganetšwa go a bala, ba ile ba romela ditho tša kereke dikopi tša ona. Ba be ba se sa nyaka go kwa selo ka bodumedi bja maaka! Mengwageng ya pele ga moo, go dira seo go be go tla ba tsenya mathateng a magolo. Eupša mafelelong a bo-1800, dinageng tše dintši Mmušo o be o se sa thekga dikereke. Ka ge badudi ba dinageng tšeo ba be ba se sa tšhaba go otlwa, ba ile ba bolela ka ditaba tša bodumedi ka bolokologi le go ganetša phatlalatša dithuto tša maaka tša dikereke.

4. Nakong ya Ntwa ya Pele ya Lefase, go be go direga’ng magareng ga batho ba Modimo le Babilona o Mogolo?

⁴ Barutwana ba Beibele ba ile ba kwešiša gore ga se gwa lekana go fo botša ba leloko, bagwera le ditho tša kereke gore ba tlogela bodumedi bja maaka. Batho lefaseng ka moka ba be ba swanetše go tseba seo Babilona o Mogolo e lego sona​—gore ke bodumedi bja mogweba-ka-mmele! Ka baka leo, magareng ga December 1917 le mathomong a 1918, Barutwana ba Beibele ba dikete tše sego kae ba ile ba šoma ka mafolofolo go nea batho ba 10 000 000 dikopi tša pampišana ya sehlogo se se rego “Go wa Babilona o Mogolo” ke bohlatse bjo matla bja gore Bojakane bo a šišimiša. Bjalo ka ge o ka nagana, baruti ba ile ba galefa o šoro; eupša ka sebete Barutwana ba Beibele ba ile ba tšwela pele ka mošomo wo wa bohlokwa. Ba be ba ikemišeditše go kwa “Modimo [e le] mmuši yo re swanetšego go mo kwa go e na le go kwa batho.” (Dit. 5:29) Re phetha ka gore’ng? Re phetha ka gore go e na le go bolela gore Barutwana ba Beibele ba be ba le bokgobeng bja Babilona o Mogolo nakong ya Ntwa ya Pele ya Lefase, ba be ba lokologa go bjona gomme ba thuša batho go dira se se swanago.

5. Ke’ng se se hlatselago gore bana babo rena ba be ba fišega modirong wa boboledi nakong ya Ntwa ya Pele ya Lefase?

⁵ Mengwageng e fetilego, re be re dumela gore Jehofa o ile a galefela batho ba gagwe ka gobane ba ile ba tšwafa modirong wa boboledi nakong ya Ntwa ya Pele ya Lefase. Ka baka leo, re ile ra phetha ka gore Jehofa o ile a dumelela Babilona o Mogolo gore e ba thope ka nakwana. Eupša bana babo rena le dikgaetšedi ba botegago bao ba bego ba hlankela Modimo ka 1914 go ya go 1918, ka morago ba ile ba bontšha gore ka ge e be e le balatedi ba Morena, ba be ba dira se ba ka se kgonago go fišega modirong wa boboledi. Go na le bohlatse bjo matla bjo bo tiišetšago taba yeo. Go tseba histori ya Barutwana ba Beibele go re thušitše go kwešiša gabotse tše dingwe tša ditiragalo tšeo di begilwego ka Beibeleng.

6, 7. (a) Barutwana ba Beibele ba ile ba swanelwa ke go fenya mathata afe nakong ya Ntwa ya Pele ya Lefase? (b) Nea mehlala yeo e bontšhago gore Barutwana ba Beibele ba be ba fišega.

 ⁶ Ge e le gabotse, Barutwana ba Beibele ba mehleng ya Ntwa ya Pele ya Lefase (1914-1918) ba ile ba kgona go botša batho ba bantši molaetša wa Modimo. Lega go le bjalo, go be go na le dilo tše mmalwa tšeo di bego di ba thatafaletša go dira mošomo woo. Re tlo ahlaahla tše pedi tša tšona. Sa pele, mošomo o mogolo mehleng yeo e be e le go nea batho dikgatišo tše di theilwego Beibeleng. Ge Mmušo o be o thibela puku ya The Finished Mystery mathomong a 1918, bana babo rena ba ile ba thatafalelwa ke go ya tšhemong. Ka nako yeo ba be ba sa kgone go nea bohlatse ba diriša Beibele feela, ka gona ba be ba ithekgile ka puku ya The Finished Mystery gore e ba bolelele le batho. Bothata bja bobedi e bile go tšwelela ga bolwetši bjo kotsi bja Spanish Influenza ka 1918. Go phatlalala ga bolwetši bjoo bjo kotsi go ile gwa dira gore bagoeledi ba tšhabe go boledišana le batho. Eupša ka ntle le mathata a le a mangwe, Barutwana ba Beibele ba ile ba dira sohle se ba ka se kgonago go tšwetša pele modiro wa boboledi.

⁷ Ka 1914 feela, Barutwana ba Beibele ba sego kae ba ile ba bontšha batho ba fetago ba 9 000 000 filimi ya “Photo-Drama of Creation.” Terama ye, go etša ge e be e bitšwa bjalo, e be e le filimi ya go ba le diswantšho tše di sepelago, mmino le diselaete tša mebalabala tša galase. E be e na le diswantšho tša go tloga ge Modimo a thoma go bopa motho go ba go fihla mafelelong a Pušo ya Kriste ya Nywaga e Sekete. E ile ya phetha mošomo o mogolo ka nako yeo. Na o be o tseba gore palo ya batho bao ba bonego filimi ye ka 1914 feela e feta palo ya bagoeledi ba Mmušo lefaseng ka moka lehono? Dipego tše dingwe di bontšha gore ka 1916, batho ba 809 393 ba bile gona dibokeng kua United States, gomme ka 1918 palo yeo ya oketšega gomme ya ba 949 444. Ruri Barutwana bao ba Beibele ba be ba fišega!

8. Tumelo ya bana babo rena e ile ya tiišwa bjang nakong ya ntwa ya pele ya lefase?

⁸ Nakong ya ntwa ya pele ya lefase, bana babo rena ba ile ba šoma ka thata go tiiša tumelo ya Barutwana ba Beibele bao ba bego ba gašane gohle le go ba kgothatša. Seo se ile sa thuša Barutwana ba Beibele go tšwela pele ka modiro wa boboledi. Richard H. Barber, yo a bego a fišega ka nako yeo, o gopola ka gore: “Re ile ra kgona go dula re na le balebeledi ba basepedi ba  sego kae le go dira gore batho ba hwetše Merokami. Re ile ra kgona le go romela Merokami kua Canada le ge mmušo wa moo o be o thibetše seo. Ke bile le tokelo ya go romela bana babo rena ba bantši dikopi tša puku ya The Finished Mystery ka poso, ka ge mmušo o be o ba amogile tšona. Ngwanabo rena Rutherford o ile a kgopela gore re rulaganye dikopano tša selete metseng e mmalwa ka bodikela bja United States gomme re romele diboledi gore di yo kgothatša bana babo rena.”

9. (a) Ke ka baka la’ng batho ba Modimo ba be ba swanetše go phošollwa magareng ga 1914 le 1919? (b) Ke’ng seo phošollo yeo e bego e sa se bolele?

⁹ Ga se dilo ka moka tšeo Barutwana ba Beibele ba bego ba di dira magareng ga 1914 le 1919 di bego di nepagetše go ya ka Mangwalo. Le ge bana babo rena bao ba be ba botega, go na le mo ba bego ba sa kwešiše seo se bolelwago ke go ikokobeletša babuši. (Baroma 13:1) Ka baka leo, ba bangwe ba be ba tšea karolo dintweng. Ka mohlala, ge mopresidente wa United States a be a laela gore ka May 30, 1918, batho ka moka ba rapelele khutšo, Morokami o ile wa kgothaletša Barutwana ba Beibele gore le bona ba dire seo. Bana babo rena ba bangwe ba ile ba thekga mmušo ka ditšhelete gore ntwa e atlege, e bile ba sego kae ba bona ba ile ba ya le ntweng ka dithunya. Lega go le bjalo, re tla ba re dira phošo ge re ka phetha ka gore Modimo o dumeletše ba išwa bothopša bja Babilona o Mogolo ka gobane a be a nyaka go ba phošolla le go ba laya. Go e na le moo, ba be ba tseba gabotse gore ba swanetše go tšwa bodumeding bja maaka, gomme nakong ya Ntwa ya Pele ya Lefase, ba be ba šetše ba thomile go tšwa go bjona ka mo go feletšego.​—Bala Luka 12:47, 48.

10. Barutwana ba Beibele ba be ikwa bjang ka go bolaya batho?

¹⁰ Le ge Barutwana ba Beibele ba be ba sa kwešiše dilo ka moka mabapi le go se tšee lehlakore dintweng go swana le rena lehono, ba be ba tseba gore Beibele e re re se ke ra bolaya batho. Ka gona gaešita le bana babo rena ba sego kae bao ba ilego ba lwa Ntwa ya Pele ya Lefase, ba ile ba gana go diriša dithunya tšeo ba bego ba di swara. Ba bangwe ba bao ba ilego ba gana go thuntšha batho ba ile ba emišwa ka pele ntweng, morero e le gore ba bolawe.

11. Balaodi ba bagolo ba ile ba dira’ng ge Barutwana ba Beibele ba be ba gana go ya ntweng?

¹¹ Ga go pelaelo gore Diabolo o ile a galefa kudu ge bana babo rena ba be ba gana go tšea karolo ntweng, gaešita le ge ba be ba se na tsebo e ntši ka ditaba tše. Ka baka leo, Diabolo o ile a dira gore “maanomabe ao [a] a logago a be molaong.” (Ps. 94:20) Ge Mohlankedi yo Mogolo wa Mašole e lego James Franklin Bell wa Sešole sa U.S. a be a boledišana le Ngwanabo rena J. F. Rutherford le Ngwanabo rena W. E. Van Amburgh, o ile a utolla gore Kgoro ya Toka ya U.S. e lekile go hloma molao wa gore bao ba ganago go ya ntweng ba ahlolelwe lehu. Ge e le gabotse, o be a bolela ka Barutwana ba Beibele. Mohlankedi Bell o ile a botša Ngwanabo rena Rutherford a galefile gore: “Molao woo o foloditše ka gobane [Mopresidente wa U.S.] e lego Wilson a o ganne; eupša re a tseba gore re tlo le swara kae, e bile re tlo le swara!”

12, 13. (a) Ke ka baka la’ng bana babo rena ba seswai ba ile ba ahlolelwa mengwaga e mentši kgolegong? (b) Na go golegwa ga bona go ile gwa dira gore ba se kwe Jehofa? Hlalosa.

¹² Balaodi ba bagolo ba ile ba kgona go swara Barutwana ba Beibele. Baemedi ba Mokgatlo wa Watch Tower e lego Ngwanabo rena Rutherford, Ngwanabo rena Van Amburgh le ba bangwe ba tshelelago ba ile ba golegwa. Ge moahlodi a be a bolela kahlolo ya bona o itše:  “Mošomo wa bodumedi bja banna ba o kotsikotsi go feta mašole a Jeremane ao e lego manaba a rena. . . Ga se feela gore ba lwa le balaodi ba Mmušo le lekgotla la sešole, eupša ba bile ba lwa le baruti ba dikereke ka moka. Ba swanetše go otlwa o šoro.” (Faith on the March, yeo e ngwadilwego ke A. H. Macmillan, letl. 99) Ruri ba ile ba otlwa o šoro! Barutwana bao ba seswai ba Beibele ba ile ba ahlolelwa mengwaga e mentši kgolegong ya mmušo kua Atlanta, Georgia. Eupša ge ntwa e fedile, ba ile ba lokollwa gomme melato ya bona ya phumolwa.

¹³ Le ge bana babo rena bao ba seswai ba be ba le kgolegong, ba ile ba kgomarela ka go tia seo ba ithutilego sona Mangwalong. Lengwalong leo ba le ngwaletšego mopresidente wa United States, leo go lona ba bego ba kgopela go fokoletšwa mengwaga yeo ba e ahloletšwego go dula kgolegong, ba itše: “Thato ya Morena go etša ge e boletšwe ka Mangwalong e re, ‘O se ke wa bolaya,’ ka baka leo setho le ge e le sefe sa mokgatlo wa [International Bible Students] seo se ineetšego go Morena seo se ka tshelago molao woo, Modimo a ka se se šegofatše, e bile o tlo se fediša. Ka baka leo, ditho tša mokgatlo wo di ka se tsoge di bolaile batho ba bangwe ka go rata.” Ruri mantšu a a bontšha sebete! Go molaleng gore bana babo rena ba be ba sa nyake go tšea lehlakore dintweng.

14. Hlalosa ka Mangwalo seo se diragetšego go tloga ka 1914 go fihla ka 1919.

¹⁴ Maleaki 3:1-3 e re botša ka nako ya go tloga ka 1914 go ya mathomong a 1919 ge “barwa ba Lefi” bao ba tloditšwego ba be ba tlo hlwekišwa. (Bala.) Nakong yeo, Jehofa Modimo, e lego “Morena wa therešo,” a na le Jesu Kriste, yena ‘motseta wa kgwerano,’ ba ile ba tla tempeleng ya moya go hlahloba bao ba hlankelago go yona. Ka morago ga gore batho ba Jehofa ba phošollwe le go hlwekišwa, ba ile ba swanelega go amogela kabelo e mpsha tirelong ya Modimo. Ka 1919, Jesu o ile a kgetha “mohlanka yo a botegago le wa temogo” gore a nee ba ntlo ya gagwe dijo tša moya. (Mat. 24:45) Ga bjale batho ba Modimo ba be ba tšwile go Babilona o Mogolo. Ga e sa le go tloga ka nako yeo, Jehofa ka botho o thušitše batho ba gagwe go tseba thato ya gagwe ka mo go oketšegilego le go mo rata kudu. Ruri ba leboga ditšhegofatšo tša gagwe! ^[1]

15. Re swanetše go dira’ng ka tokologo yeo Jehofa a re neilego yona?

¹⁵ Ruri go thabiša kudu gore batho ba Modimo ba lokolotšwe bokgobeng bja Babilona o Mogolo! Maiteko a Sathane a go fediša Bakriste ba therešo mo lefaseng a paletšwe o šoro. Lega go le bjalo, ga se ra swanela go lahlegelwa ke morero wa tokologo yeo Jehofa a re neilego yona. (2 Bakor. 6:1) Batho ba dimilionemilione ba sa dutše ba le bokgobeng bja bodumedi bja maaka. Re swanetše go ba thuša go tšwa go bjona. Re ka kgona go ba thuša. Ka gona, anke re direng sohle se re ka se kgonago go ekiša bana babo rena ba mehleng ya pele go thuša batho go tšwa go Babilona o Mogolo!