1, 2. (a) Batho ba bangwe ba re’ng ge ba botšwa gore Modimo o na le mokgatlo? (b) Re tlo ahlaahla’ng sehlogong se?

NA Modimo o na le mokgatlo? Batho ba bangwe ba ka re: “Ga go hlokagale gore o be setho sa mokgatlo o itšego gore o go hlahle. Selo feela se o se hlokago ke gore o rate Modimo.” Na dikgopolo tše bjalo di nepagetše? Histori e re botša’ng?

² Sehlogong se, re tlo ahlaahla bohlatse bjo bo bontšhago gore Jehofa, yena Modimo wa thulaganyo, ke Morulaganyi yo mogologolo. Le gona re tlo ahlaahla kamoo re swanetšego go arabela ka gona ge mokgatlo wa Jehofa o re nea tlhahlo. (1 Bakor. 14:33, 40) Lekgolong la pele la mengwaga C.E. le mehleng ya rena, Mangwalo a thušitše karolo ya lefaseng ya mokgatlo wa Jehofa go dira mošomo o mogolo kudu wa go bolela ditaba tše dibotse. Ka ge re diriša seo Beibele e se bolelago e bile re amogela tlhahlo e tšwago mokgatlong, diphuthego tša rena di hlwekile, di na le khutšo le botee.

3. Ke’ng se se go kgodišago gore Jehofa ke Morulaganyi yo mogologolo?

³ Dilo tše Modimo a di bopilego di hlatsela gore ke Morulaganyi  yo mogologolo. Beibele e re: “Jehofa o theile lefase ka bohlale. O tiišitše magodimo ka temogo.” (Die. 3:19) Re tseba feela “karolwana ya mediro ya gagwe,” e bile re “[kwele] feela mohebehebetšo wa taba ka yena!” (Jobo 26:14) Lega go le bjalo, tsebonyana yeo re nago le yona ka dipolanete, dinaledi le melalatladi ya dinaledi e re gapeletša go dumela gore dilo tše di lego kua magodimong di rulagantšwe ka bokgwari bjo bogolo. (Ps. 8:3, 4) Melalatladi ya dinaledi e na le dinaledi tše dimilionemilione, ka moka ga tšona di sepela lefaufaung ka _thulaganyo. Dipolanete tšona di dikologa letšatši ka thulaganyo go le bjalo ka ge eka di latela melao ya tsela! Go molaleng gore tsela e makatšago yeo legohle le rulagantšwego ka yona e re thuša go bona gore Jehofa, yena “yo a dirilego magodimo [le lefase] ka bohlale,” o swanelwa ke go retwa, go rapelwa le go hlankelwa.​—Ps. 136:1, 5-9.

4. Ke ka baka la’ng boramahlale ba paletšwe ke go araba batho dipotšišo tše ba nago le tšona?

⁴ Boramahlale ba utolotše dilo tše dintši ka legohle le ka lefase la rena, gomme ba re thušitše ka ditsela tše itšego bophelong. Eupša boramahlale ga ba kgone go araba dipotšišo tšeo batho ba bantši ba ipotšišago tšona. Ka mohlala, batho bao ba ithutago ka legohle ba ka se go botše gore go tlile bjang gore legohle le be gona, goba gore ke ka baka la eng batho le diphedi tše dingwe ba phela polaneteng ye. E bile batho ka bobona ga ba kgone go hlalosa gore go reng ba nyaka go phela ka mo go sa felego. (Mmo. 3:11) Ke ka baka la’ng batho ba na le dipotšišo tše dintši gakaakaa, eupša di se tša arabja? Lebaka le lengwe ke gore boramahlale ba bantši le ba bangwe ba ruta batho dilo tše di sa tšwego go Modimo, le gore dilo di itirile. Eupša Jehofa ka Pukung ya gagwe, o araba dipotšišo tšeo batho lefaseng ka moka ba ipotšišago tšona.

5. Melao ya tlhago e re thuša bjang?

⁵ Melao yeo e sa fetogego yeo Jehofa a e beetšego tlholo ya gagwe e re thuša go phela. Boramehlagase, batho ba go šoma ka diphaephe tša meetse, bahlami ba dilo, bafofiši ba difofane le dingaka​—ka moka ga bona ba thušwa ke melao ya tlholo go dira mešomo ya bona. Ka mohlala, dingaka di thušwa ke go tseba gore mebele ya batho e bopegile go swana. Ka baka leo, ga go hlokagale gore ngaka e hlwe e nyakana le pelo ya molwetši. E bile ka moka ga rena re hlompha melao ya tlhago. Ge motho a ka ganetšana le melao ya tlhago ya go swana le matlakgogedi, o tla itshola!

6. Ke ka baka la’ng re swanetše go letela gore barapedi ba Jehofa ba be le thulaganyo?

⁶ Ruri legohle le rulagantšwe ka tsela e makatšago! Ka go re’alo, ga re makale ge Jehofa a nyaka gore barapedi ba gagwe ba be le thulaganyo. Ke ka baka leo a re neilego Beibele gore e re hlahle. Ge re ka no phela ntle le thušo ya mokgatlo wa Modimo le melao ya gagwe, re ka se thabe e bile re tla šulafalelwa ke bophelo.

7. Ke’ng se se bontšhago gore Beibele ke puku e rulagantšwego gabotse?

⁷ Beibele ga e no ba puku yeo e ngwadilwego ke Bajuda le Bakriste. Go e na le moo, ke puku e rulagantšwego gabotse​—yeo Modimo a e ngwadilego ka bokgwari bjo bogolo. Dipuku tša Beibele di a dumelelana. Sehlogo sa yona se thoma go Genesi go fihla go Kutollo, e lego go godiša bogoši bja Jehofa le go phethagatša morero wa gagwe ka lefase a diriša Mmušo woo Kgoši ya wona e lego Kriste, yena “peu” e holofeditšwego.​—Bala Genesi 3:15; Mateo 6:10; Kutollo 11:15.

8. Ke ka baka la’ng re ka re Baisiraele ba be ba rulagantšwe gabotse?

⁸ Setšhaba sa Isiraele ya bogologolo ke mohlala wa mokgatlo wa Jehofa. Ka mohlala,  ka tlase ga molao wa Moshe go be go na le “basadi bao ba bego ba hlankela ka tsela e rulagantšwego mojakong wa tente ya kopano.” (Ek. 38:8) Baisiraele ba be ba sepela ka thulaganyo e bile ba rwala taberenakele ka thulaganyo. Ka morago, Kgoši Dafida o ile a rulaganya Balefi le baperisita ka dihlopha. (1 Dikor. 23:1-6; 24:1-3) Le gona ge Baisiraele ba be ba ekwa Jehofa, ba be ba eba le thulaganyo, khutšo le botee.​—Doit. 11:26, 27; 28:1-14.

9. Ke’ng se se bontšhago gore phuthego ya Bokriste ya lekgolong la pele la mengwaga e be e rulagantšwe gabotse?

⁹ Phuthego ya lekgolong la pele la mengwaga e be e rulagantšwe gabotse gomme e holwa ke tlhahlo ya sehlopha se se bušago, seo mathomong se bego se bopša ke baapostola. (Dit. 6:1-6) Ka morago, bana babo rena ba oketšegilego ba ile ba thuša sehlopa se se bušago. (Dit. 15:6) Le gona diphuthego di be di newa keletšo le tlhahlo ka mangwalo ao a bego a ngwalwa ka tlhahlo ya Modimo, ao a bego a ngwalwa ke ditho tša sehlopa se se bušago goba bathuši ba sona. (1 Tim. 3:1-13; Tito 1:5-9) Diphuthego di be di holega bjang ge di be di latela tlhahlo ya sehlopha seo se bušago?

10. Mafelelo e be e eba afe ge diphuthego tša lekgolong la pele la mengwaga di be di latela ditaelo tša sehlopha se se bušago? (Bona seswantšho seo se lego mathomong a sehlogo.)

¹⁰ Bala Ditiro 16:4, 5. Bana babo rena bao ba bego ba rongwa ke sehlopha se se bušago ba be ba iša diphuthegong ‘ditaelo tšeo baapostola le bagolo bao ba lego Jerusalema ba bego ba dirile phetho ka tšona.’ Ge diphuthego di be di latela ditaelo tšeo, di be di “tšwela pele di matlafatšwa tumelong le go oketšega ka palo letšatši le letšatši.” Ke’ng seo pego ye ya Beibele e re rutago go se dira ka mokgatlong wa Modimo lehono?

11. Banna bao ba kgethilwego ba swanetše go arabela bjang tlhahlong yeo e tšwago mokgatlong wa Modimo?

¹¹ Ke’ng seo lehono ditho tša Komiti ya Lekala goba tša Komiti ya Naga, balebeledi ba tikologo le bagolo ba phuthego ba swanetšego go se dira ge ba hwetša taelo e tšwago mokgatlong wa Modimo? Puku ya Jehofa e re laela ka moka gore re mo kwe le go ikokobetša. (Doit. 30:16; Baheb. 13:7, 17) Baswayadiphošo le marabele ga ba nyakege ka mokgatlong wa Modimo, ka gobane ba ka senya diphuthego tša rena tše di nago le lerato, khutšo le botee. Ke therešo gore ga go na Mokriste yo a botegago yo a tla nyakago go bontšha moya wa go se hlomphe le wa borabele wa go swana le wa Dioterefe. (Bala 3 Johane 9, 10.) Ka gona re swanetše go ipotšiša gore: ‘Na ke tiiša tumelo ya Bakristegotee le nna? Na ke amogela kapela tlhahlo yeo re e newago ke bana babo rena bao ba etelelago pele le go e thekga?’

12. Ke diphetogo dife tšeo di dirilwego tseleng yeo bagolo le bahlanka ba bodiredi ba kgethwago ka yona?

¹² Nagana ka phetho ya malobanyana mo yeo e dirilwego ke Sehlopha se Bušago. Sehlogo sa “Dipotšišo tše Tšwago go Babadi” ka Morokaming wa November 15, 2014, se ile sa hlalosa diphetogo tša kamoo bagolo le bahlanka ba bodiredi ba kgethwago ka gona. Sehlogo seo se bontšhitše gore sehlopha se se bušago sa lekgolong la pele la mengwaga se ile sa nea balebeledi ba basepedi matla a go kgetha bagolo le bahlanka ba bodiredi. Ka go dumelelana le mokgwa woo, go tloga ka September 1, 2014, balebeledi ba tikologo ba be ba dutše ba kgetha bagolo le bahlanka ba bodiredi. Molebeledi wa tikologo o katanela go tseba banna bao bagolo ba ba boleletšego gomme a šoma le bona tšhemong ge maemo a dumela. Le gona ge e ba ngwanabo rena yo a boleletšwego a nyetše, molebeledi wa tikologo o hlahloba le lapa la  gagwe. (1 Tim. 3:4, 5) Sehlopha sa bagolo gotee le molebeledi wa tikologo ba hlahloba ka kelohloko ditshwanelego tša Mangwalo tša bahlanka ba bodiredi le bagolo.​—1 Tim. 3:1-10, 12, 13; 1 Pet. 5:1-3.

13. Re ka bontšha bjang gore re thekga tlhahlo ya bagolo?

¹³ Re swanetše go latela tlhahlo ya bagolo yeo e theilwego Beibeleng. Badiši ba bao ba botegago ka mokgatlong wa Modimo ba hlahlwa ke “mantšu a phelago,” goba a holago, ao a tšwago ka Pukung ya Modimo. (1 Tim. 6:3) Nagana ka seo Paulo a se boletšego ka batho ba go hloka thulaganyo ka phuthegong. Batho ba bangwe ba be ba “sa šome le gatee eupša ba tsenatsenana le seo se sa ba kgomego.” Go molaleng gore bagolo ba kile ba ba eletša eupša ba no tšwela pele ba gana keletšo. Phuthego e be e swanetše go dira’ng ka motho yo a bego a dira se? Paulo o ile a nea taelo yeo e rego: “Le dule le mo swaile gomme le tlogeleng go tlwaelana le yena.” Ga se gore keletšo yeo e be e le sehlogo, ka gore e be e re motho yoo a se swarwe eka ke lenaba. (2 Bathes. 3:11-15) Lehono, bagolo ba ka nea polelo ya temošo ka motho yo a ganago go lahla mokgwa o itšego woo o senyago phuthego leina, go swana le ge motho a ratana le motho yo e sego Hlatse. (1 Bakor. 7:39) Wena o arabela bjang ge bagolo ba nea polelo e bjalo? Ge o ekwa gore polelo yeo e bolela ka mang, na o tla tlogela go gwerana le motho yoo? Ge e ba o tloga o rata motho yoo gomme o thekga seo bagolo ba se dirago, o tla dira gore motho yoo a lahle mekgwa ya gagwe e mebe. ^[1]

14. Re ka thuša bjang gore phuthego e dule e hlwekile?

¹⁴ Re ka thuša gore phuthego e dule e hlwekile moyeng ka go latela tlhahlo yeo e lego ka Lentšung la Modimo. Nagana ka boemo bjo bo ilego bja tšwelela kua Korinthe ya bogologolo. Paulo o kile a šoma ka thata go bolela ditaba tše dibotse motseng wo, e bile o be a rata ‘bakgethwagotee’ le yena ba moo. (1 Bakor. 1:1, 2) Eupša o swanetše go ba a ile a kwa bohloko kudu ge a be a swanetše go rarolla bothata bja bootswa bjo bo bego bo amogelwa ka phuthegong yeo! Paulo o ile a laela bagolo gore ba gafele motho yo bjalo go Sathane​—ke gore, ba mo kgaole. E le gore ba boloke phuthego e hlwekile, bagolo bao ba be ba swanetše go tloša “komelo” gare ga bona. (1 Bakor. 5:1, 5-7, 12) Ge re thekga phetho ya bagolo ya go kgaola modirabobe yo a sa itsholego, re thuša gore phuthego e dule e hlwekile e bile mohlomongwe seo se ka thuša modiri yoo wa bobe gore a itshole le go kgopela Jehofa gore a mo lebalele.

15. Re ka dira’ng gore ka phuthegong go dule go na le khutšo?

¹⁵ Go na le bothata bjo bongwe bjo bo bego bo swanetše go lokišwa kua Korinthe. Bana babo rena ba bangwe ba be ba išana dikgorong tša tsheko. Paulo o ile a ba botšiša potšišo e matla yeo e rego: “Ke ka baka la’ng le sa upše la dumela go fošetšwa?” (1 Bakor. 6:1-8) Seo se a direga le lehono. Maemong a mangwe, bana babo rena ba ile ba hloyana ka baka la go wa ga kgwebo yeo e ilego ya dira gore go lobje ditšhelete goba mohlomongwe le go radiiwa. Ba bangwe ba ile ba iša bana babo bona dikgorong tša tsheko, eupša Puku ya Modimo e re thuša go bona gore go kaone go loba dilo go e na le go goboša leina la Modimo goba go senya khutšo ka phuthegong. ^[2]Ge re nyaka go rarolla mathata a magolo le dikgohlano, re swanetše go latela keletšo ya Jesu. (Bala Mateo 5:23, 24; 18:15-17.) Ge re dira bjalo, re dira gore lapa la barapedi ba Jehofa le dule le na le botee.

16. Ke ka baka la’ng re ka letela gore batho ba Modimo ba be le botee?

¹⁶ Puku ya Jehofa e re botša lebaka leo re swanetšego go letela gore batho ba gagwe ba  be le botee. Mopsalme yo mongwe o opetše ka gore: “Bona gore ke mo gobotse le mo go kgahlišago gakaakang ge bana ba motho ba dudišana ka botee!” (Ps. 133:1) Ge Baisiraele ba be ba ekwa Jehofa, ba be ba eba le thulaganyo le botee. Ge Modimo a be a bolela e sa le pele ka boemo bja nakong e tlago bja batho ba gagwe o ile a re: “Ke tla ba dira gore ba be le botee bjalo ka mohlape ka lešakeng.” (Mika 2:12) Go oketša moo, Jehofa o ile a bolela e sa le pele ka moporofeta Tsefanya gore: “Ke tla nea merafo leleme le le sekilego [e lego therešo ya Mangwalo], e le gore ka moka e bitše leina la Jehofa gomme e mo direle ka botee.” (Tsef. 3:9) Ruri re leboga tokelo ye e kgolo ya go hlankela Jehofa ka botee!

17. E le gore phuthego e dule e na le botee e bile e hlwekile, bagolo ba swanetše go dira’ng ge motho a dirile sebe?

¹⁷ E le gore phuthego e dule e na le botee e bile e hlwekile, bagolo ba swanetše go rarolla ditaba tša boahlodi kapelapela le ka lerato. Paulo o be a tseba gore Modimo ga a kgahlwe ke motho yo a no bolelago gore o a mo rata, le gore ga A kwane le badirabobe. (Die. 15:3) Ka baka leo, Paulo ga se a ka a dikadika go ngwala lengwalo la Bakorinthe ba Pele, e lego lengwalo le matla le le lerato. Lengwalo la Bobedi la Bakorinthe, leo Paulo a le ngwadilego dikgwedi tše itšego ka morago ga la pele, le bontšha gore phuthego yeo e be e lokišitše mathata a yona ka gobane bagolo ba be ba latetše tlhahlo ya gagwe. Ge Mokriste a ka gata kgato e fošagetšego pele a lemoga, banna ba kgethilwego ba swanetše go leka go mmušetša tseleng ka boleta.​—Bagal. 6:1.

18. (a) Keletšo yeo e lego ka Lentšung la Modimo e thušitše diphuthego tša lekgolong la pele la mengwaga ka ditsela dife? (b) Re tlo ahlaahla’ng sehlogong se se latelago?

¹⁸ Go molaleng gore keletšo e botse yeo e lego ka Pukung ya Modimo e ile ya thuša Bakriste ba lekgolong la pele la mengwaga kua Korinthe le mafelong a mangwe gore ba dule ba hlwekile, ba na le khutšo le botee ka diphuthegong tša bona. (1 Bakor. 1:10; Baef. 4:11-13; 1 Pet. 3:8) Seo se ile sa thuša bana babo rena le dikgaetšedi ba mehleng yeo go dira wa go tlala seatla modirong wa boboledi. Ke ka baka leo Paulo a bego a ka bolela gore ditaba tše dibotse “di [boletšwe] tlholong yohle yeo e lego tlase ga legodimo.” (Bakol. 1:23) Lehono, re kgona go botša batho lefaseng ka moka ka merero e kgahlišago ya Modimo ka gobane re karolo ya mokgatlo wo o nago le botee. Sehlogo se se latelago se tlo re nea bohlatse bjo bongwe bja gore re hlompha Beibele le gore re ikemišeditše go tumiša Mmuši Morena Jehofa.​—Ps. 71:15, 16.