1, 2. (a) Ke moputso ofe woo bahlanka ba Modimo ba o letetšego? (b) Ke’ng seo se re thušago go dula re tsepeletše moputsong? (Bona seswantšho se se lego ka mo godimo.)

GO SWANA le moapostola Paulo, lehono Bakriste bao ba tloditšwego ka moya o mokgethwa ba na le kholofelo “ya go hwetša moputso wa pitšo ya godimo ya Modimo.” (Bafil. 3:14) Ba lebeletše pele go tlo buša le Jesu Kriste Mmušong wa gagwe wa legodimong le go dira gore batho ba boele ba phethagale. (Kut. 20:6) Ruri ye ke kholofelo e kgahlišago yeo ba nago le yona! Dinku tše dingwe le tšona di na le kholofelo e fapanego le ya batlotšwa. Di lebeletše pele go tlo hwetša moputso wa bophelo bjo bo sa felego. Ruri ye le yona ke kholofelo e kgahlišago!​—2 Pet. 3:13.

² Paulo o be a nyaka go thuša Bakristegotee le yena ba batlotšwa gore ba dule ba botega e le gore ba tle ba hwetše moputso. O ile a re go bona: “Tsepamišang menagano ya lena dilong tša legodimong.” (Bakol. 3:2) Ba be ba swanetše go dula ba gopola kholofelo e  bohlokwa yeo ba nago le yona ya go phela legodimong. (Bakol. 1:4, 5) Ke therešo gore go naganišiša ka ditšhegofatšo tšeo Jehofa a tlago go di nea bahlanka ba gagwe, go ba thuša gore ba dule ba tsepeletše moputsong, go sa šetšwe gore ba na le kholofelo ya tlo phela legodimong goba mo lefaseng.​—1 Bakor. 9:24.

3. Paulo o ile a lemoša Bakristegotee le yena ka dikotsi dife?

³ Le gona, Paulo o ile a lemoša Bakristegotee le yena ka dikotsi tšeo di ka ba paledišago go tlo hwetša moputso. Ka mohlala, o ile a ngwalela Bakriste ba Kolose a ba lemoša ka Bakriste ba maaka bao ba bego ba leka go dira gore Modimo a ba amogele ka go phetha Molao wa Moshe go e na le go dumela go Kriste. (Bakol. 2:16-18) Le gona, Paulo o ile a bolela ka dikotsi tšeo di lego gona le lehono, tšeo di ka re paledišago go tlo hwetša moputso. Ka mohlala, o ile a bolela kamoo re ka phemago go nagana ka dilo tše di sa hlwekago, kamoo re ka rarollago mathata le bana babo rena le kamoo re ka rarollago mathata a ka lapeng. Keletšo ye e sa šoma le go rena lehono. Ka gona, anke re ahlaahleng tše dingwe tša ditemošo tšeo di bontšhago lerato tšeo Paulo a di ngwaletšego Bakolose.

4. Ke ka baka la’ng dikganyogo tše di sa hlwekago di ka re palediša go hwetša moputso?

⁴ Ka morago ga gore Paulo a gopotše bana babo ka kholofelo ya bona e kgahlišago, o ile a ngwala gore: “Ka gona bolayang mekgwa ya lefase yeo e lego dithong tša mebele ya lena, e lego bootswa, go se hlweke, kganyogo e fošagetšego ya go robala ga monna le mosadi, kganyogo e gobatšago le megabaru.” (Bakol. 3:5) Dikganyogo tše di sa hlwekago di ka ba matla kudu, e bile di ka senya tswalano ya rena le Jehofa. Ngwanabo rena yo mongwe yo a ilego a ineela dikganyogong tše di sa hlwekago, ge a boa ka phuthegong o ile a bolela gore: “Ke be ke tseneletše dikganyogong tšeo moo e lego gore ke be ke se sa kgona go tšwa.”

5. Re ka itšhireletša bjang maemong a kotsi?

⁵ Go bohlokwa kudu gore re dule re itšhireleditše ge re lebeletšane le maemo ao a ka re dirago gore re tshele melao ya Modimo ya boitshwaro. Ka mohlala, go bohlokwa gore ge batho ba thoma go ratana ba ipeele mellwane tabeng ya go swaraswarana, go khisana le go dula moo ba sa bonwego ke batho. (Die. 22:3) Maemo a mangwe ao a ka dirago gore Mokriste a wele boitshwarong bjo gobogilego ke ge a tšere leeto ka mošomo goba ge Mokriste a šoma le motho wa bong bjo bo fapanego le bja gagwe. (Die. 2:10-12, 16) Ge o ka ikhwetša o le boemong bjoo, tsebiša batho bao o šomago le bona gore o Hlatse ya Jehofa, itshware gabotse le gona dula o gopola gore go bapala ka lerato go ka ba le mafelelo a kotsi. Le gona re swanetše go itlhokomela ge re nyamile goba re lewa ke bodutu. Dinakong tše bjalo re ka ikwa re nyaka motho yo a ka re dirago gore re ikwe re le bohlokwa. Re ka ba ra nyaka motho le ge e le ofe gore a re homotše. Ge e ba seo se ka go diragalela, kgopela thušo go Jehofa le go bana beno gore go se be le selo seo se ka go paledišago go tlo hwetša moputso.​—Bala Psalme 34:18; Diema 13:20.

6. Re swanetše go dula re gopola’ng ge go tliwa tabeng ya boithabišo?

⁶ E le gore re bolaye dikganyogo tše di sa hlwekago, re swanetše go gana boithabišo bjo bo sa hlwekago. Lehono dilo tše dintši tša boithabišo di bonagatša mekgwa ya go swana le ya batho ba Sodoma le Gomora. (Juda 7) Batho bao ba tšweletšago dilo tša go ithabiša, ba dira gore boitshwaro bjo bo gobogile bja tša thobalano bo bonagale bo se na bothata e bile bo se na ditlamorago tše bohloko. Ga se ra swanela go ineela gomme ra amogela boithabišo le ge e le bofe bjo Sathane a bo tšweletšago. Re swanetše go kgetha boithabišo bjo bo ka se re paledišego go hwetša moputso wa bophelo bjo bo sa felego.​—Die. 4:23.

7. Ke mathata afe ao a ka bago gona ka phuthegong ya Bokriste?

⁷ Ka moka ga rena re a dumela gore go ba karolo ya phuthego ya Bokriste ke tšhegofatšo. Ge re le dibokeng re ithuta lentšu la Modimo, e bile re thekgana ka lerato le bana babo rena. Se se re thuša gore dule re lebeletše pele moputsong wa bophelo bjo bo sa felego. Lega go le bjalo, ka dinako tše dingwe go se kwešišane magareng ga rena le bana babo rena go ka dira gore phuthego e se be le botee. Ge e ba re ka se rarolle mathata ao kapejana a ka baka dikgopi.​—Bala 1 Petro 3:8, 9.

8, 9. (a) Ke dika dife tšeo di ka re thušago go hwetša moputso wa bophelo bjo bo sa felego? (b) Ke’ng seo se ka re thušago gore re dire khutšo ge e ba Mokristegotee le rena a re kgopišitše?

⁸ Re ka dira’ng gore re se dumelele dikgopi di re palediša go tlo hwetša moputso? Paulo o ile a eletša Bakolose ka gore: “Le le bahlaolwa ba Modimo, ba bakgethwa le ba ba ratwago, aparang lerato leo le bonagatšago lešoko, botho, boikokobetšo, boleta le go se fele pelo. Tšwelang pele le kgotlelelana gomme le lebalelana ka bolokologi le ge e ba motho a na le lebaka la go ba le pelaelo ka yo mongwe. Go etša ge Jehofa a le lebaletše ka bolokologi, le lena le dire bjalo. Eupša ka godimo ga dilo tše ka moka, aparang lerato gobane ke setlemo se se phethagetšego sa botee.”​—Bakol. 3:12-14.

⁹ Go rata bana babo rena le go ba bontšha botho go ka re thuša go lebalelana. Ka mohlala, ge e ba mantšu goba ditiro tša Mokristegotee le rena di re kwešitše bohloko, le rena re ka leka go gopola dinako tšeo re ilego ra bolela goba ra dira dilo tšeo di ilego tša kgopiša ba bangwe. Na ga re leboge ge bana babo rena le dikgaetšedi ba ile ba re bontšha lerato le botho ka go re lebalela ge re be re ba kgopišitše? (Bala Mmoledi 7:21, 22.) Re leboga le go feta ge Kriste ka botho a ile a kgoboketša barapedi ba therešo gotee. (Bakol. 3:15) Ka moka ga rena re rapela Modimo o tee, re bolela molaetša o tee wa Mmušo wa Modimo, e bile mathata a mantši ao re kopanago le ona a a swana. Ge re lebalelana ka botho re dira gore ka phuthegong go be le botee, gomme se sa re thuša gore re dule re lebeletše pele moputsong wa bophelo bjo bo sa felego.

10, 11. (a) Ke ka baka la’ng mona o le kotsi? (b) Re ka dira’ng gore mona o se re thibele go tlo hwetša moputso wa bophelo bjo bo sa felego?

¹⁰ Mehlala ya ka Beibeleng e re gopotša gore mona o ka re palediša go hwetša moputso. Ka mohlala, Kaine o ile a jela ngwanabo e lego Abele mona gomme a feleletša a mmolaile. Kora, Dathane le Abirama ba ile ba jela Moshe mona gomme ba ganetša seo a bego a se dira. Le gona, Kgoši Saulo o ile a jela Dafida mona gomme a leka go mmolaya. Ke ka baka leo Beibele e rego: “Moo go lego lehufa le tshele, go tla ba le tlhakatlhakano le selo se sengwe le se sengwe se sebe.”​—Jak. 3:16.

¹¹ Ge e ba re ithuta go ba le lerato le botho, go ka se be bonolo gore re be le mona. Lentšu la Modimo le re: “Lerato ga le fele pelo e bile le botho. Lerato ga le hufege.” (1 Bakor. 13:4) E le gore re se be le mona, re swanetše go leka ka matla go lebelela dilo ka tsela yeo Modimo a di lebelelago ka yona, re lebelele bana babo rena le dikgaetšedi e le ditho tša mmele o tee, e lego phuthego ya Bokriste. Se se tla re thuša gore re rate bana babo rena, e lego seo se dumelelanago le keletšo ya Modimo e rego: “Ge e ba setho [se tee] se tagafatšwa, ditho tše dingwe ka moka di thaba le sona.” (1 Bakor. 12:16-18, 26) Ka baka leo, go e na le gore re jele ba bangwe mona ge ba hwetša ditšhegofatšo, re tla thaba le bona. Ela hloko mohlala wa morwa wa Kgoši Saulo e lego Jonathane. Ga se a ka a jela Dafida mona ge a be a kgethwa gore e be kgoši. Go e na le moo, o ile a mo kgothatša le go mo thekga. (1 Sam. 23:16-18) Ruri re swanetše go ekiša Jonathane ka go rata ba bangwe le go ba bontšha botho!

12. Re ka diriša keletšo efe ya Mangwalo yeo e tlago go re thuša go hwetša moputso re le lapa?

¹² Go diriša melao ya motheo ya Beibele le le lapa, go ka le thuša gore le be le khutšo le lethabo gomme gwa le thuša go tlo hwetša moputso. Ke keletšo efe ya Mangwalo yeo Paulo a ilego a e nea malapa a Bakriste a kua Kolose? O itše: “Lena basadi, ikokobeletšeng banna ba lena ka ge go swanela Moreneng. Lena banna, tšwelang pele le rata basadi ba lena gomme le se ke la ba galefela o šoro. Lena bana, kwang batswadi ba lena dilong tšohle gobane se se kgahliša kudu Moreneng. Lena botate, le se ke la befediša bana ba lena e le gore ba se nyame.” (Bakol. 3:18-21) Ga go pelaelo gore o tla dumela gore ge banna, basadi le bana ba diriša keletšo ye, ba tla holega.

13. Mosadi wa Mokriste a ka thuša bjang monna wa gagwe yo e sego Hlatse ya Jehofa gore a tle borapeding bja therešo?

¹³ Go thwe’ng ge e ba o le mosadi gomme o nagana gore monna wa gago yo e sego Hlatse ya Jehofa ga a go sware gabotse? Na o tla kaonefatša boemo ge o dula o e lwa le yena ka boitshwaro bja gagwe? Le ge o ka kgona go mo dira gore a dire seo wena o se nyakago, eupša na seo se tla mo dira gore e be Hlatse ya Jehofa? Ga se gantši seo se direga. Eupša ge e ba o hlompha bohlogo bja monna wa gago, o ka dira gore ka lapeng go be le khutšo, seo sa dira gore Jehofa a tumišwe; e bile o ka ba wa dira gore monna wa gago a tle borapeding  bja therešo; ka baka leo bobedi bja lena le ka hwetša moputso wa bophelo bjo bo sa felego.​—Bala 1 Petro 3:1, 2.

14. Monna wa Mokriste o swanetše go dira’ng ge e ba mosadi wa gagwe yo e sego Hlatse ya Jehofa a sa mo hlomphe?

¹⁴ Go thwe’ng ge e ba o le monna gomme o nagana gore mosadi wa gago yo e sego Hlatse ya Jehofa ga a go hlomphe? Na go mo kgadimotša le go mmontšha gore boss ke mang, go tla mo dira gore a go hlomphe kutšwanyana? Ga go bjalo le gatee! Jehofa o letetše gore o diriše bohlogo bja gago gabotse, e le ge o ekiša Jesu. (Baef. 5:23) Jesu o diriša bohlogo bja gagwe ka phuthegong ka lerato le ka go se fele pelo. (Luka 9:46-48) Ge monna a ekiša mohlala wa Jesu a ka dira gore mosadi wa gagwe e be morapedi wa Jehofa.

15. Monna wa Mokriste o bontšha bjang gore o rata mosadi wa gagwe?

¹⁵ Beibele e botša banna gore: “Tšwelang pele le rata basadi ba lena gomme le se ke la ba galefela o šoro.” (Bakol. 3:19) Monna yo a ratago mosadi wa gagwe, o theetša dikgopolo tša mosadi wa gagwe le go mo kgonthišetša gore o tšeela godimo seo a se bolelago. (1 Pet. 3:7) Le ge e se ka mehla moo a kgonago go dira seo mosadi wa gagwe a se kgopelago, eupša ge a mo theetša o tla kgona go dira diphetho tše dibotse. (Die. 15:22) Monna yo a ratago mosadi wa gagwe ga a mo gapeletše gore a mo hlomphe, go e na le moo o šomela tlhompho yeo ka go swara mosadi wa gagwe gabotse. Gantši monna yo a ratago mosadi wa gagwe le bana ba gagwe o ba le lapa leo le thabilego, le leo le hlankelago Jehofa gabotse. Mafelelong, seo se tla dira gore ba tle ba hwetše moputso wa bophelo bjo bo sa felego.

16, 17. Ge e ba o le mofsa o ka dira’ng gore o se kwatišwe ke tsela yeo batswadi ba gago ba go eletšago ka yona?

¹⁶ Go thwe’ng ge e ba o le mofsa gomme o nagana gore batswadi ba gago bao e lego Dihlatse tša Jehofa ga ba go kwešiše e bile ba a go gatelela? Seo se ka go nyamiša, e bile se ka go dira gore o nagane gore go hlankela Jehofa ga go thuše ka selo. Eupša ge o dumelela go nyama go go tlogediša go hlankela Jehofa, e se kgale o tla lemoga gore ga go na motho yo a go ratago kudu go feta batswadi ba gago ba Bakriste le bana beno ka phuthegong.

¹⁷ Ge e ba batswadi ba gago ba sa nka ba go phošolla, na o ka se ipotšiše ge e ba ba tloga ba go rata? (Baheb. 12:8) Mohlomongwe o kwatišwa ke tsela yeo batswadi ba gago ba go phošollago ka yona. Go e na le go tshwenyega ka tsela yeo ba go phošollago ka yona, leka go bona lebaka la gore ba go phošolle. Ka gona iša maswafo fase gomme o leke go se kwatišwe ke go phošollwa. Lentšu la Modimo le re: “Mang le mang yo a ikhomolelago o bohlalehlale, gomme motho wa temogo o na le moya o fodilego.” (Die. 17:27) Ipeele pakane ya gore o be motho a godilego monaganong, yo a amogelago keletšo ka moya o boleta gomme o ithute go yona go sa šetšwe tsela yeo o e newago ka yona. (Die. 1:8) Go ba le batswadi ba Bakriste bao ba tlogago ba rata Jehofa, ke tšhegofatšo. Ba tla go thuša gore o tle o hwetše moputso wa bophelo bjo bo sa felego.

18. Ke ka baka la’ng o fela pelo ya go tlo hwetša moputso wa bophelo bjo bo sa felego?

¹⁸ Ka moka ga rena re fela pelo ya go tlo hwetša moputso wo Jehofa a re tshepišitšego wona, go sa šetšwe gore ke wa go phela ka mo go sa felego legodimong goba mo lefaseng. Moputso wo Jehofa a re holofeditšego wona ke wa kgonthe, ka gobane re o holofeditšwe ke Mmopi wa legodimo le lefase. Ge Modimo a bolela ka lefase la Paradeise o re: “Lefase le tla tlala tsebo ya Jehofa.” (Jes. 11:9) Ka nako yeo, motho yo mongwe le yo mongwe yo a tla bego a dula mo lefaseng, o tla rutwa ke Modimo. Ruri wo ke moputso woo re swanetšego go lwela go o hwetša! Ka gona dula o gopola seo Jehofa a re holofeditšego sona, le gona anke go se be le selo seo se go thibelago go tlo hwetša moputso wo!