1. Go opela go re thuša go dira’ng?

MONGWADI yo mongwe wa dikoša o kile a re: “Ge o ekwa mantšu, a go dira gore o nagane. Ge o ekwa mmino, o go dira gore o ikwe ka tsela e itšego. Eupša ge o opela, mantšu a koša a go kgoma pelo.” Ruri ga go na mantšu a mangwe ao a kgomago pelo go feta ao re a opelelago Tatago rena wa legodimong, Jehofa. Mantšu ao a re thuša go tumiša Jehofa le go bontšha gore re a mo rata. Ga go makatše ge go opela e le karolo e bohlokwa ya borapedi bja therešo, go sa šetšwe gore re opela re nnoši goba re bokane le bana babo rena.

2, 3. (a) Batho ba bangwe ba ka ikwa bjang ka go opelela godimo ge ba le dibokeng? (b) Re tlo araba dipotšišo dife sehlogong se?

² Wena o ikwa bjang ka go opelela godimo ge o le dibokeng? Na go go leša dihlong? Ditšong tše dingwe, banna ba ka ikwa ba tšhaba go opela ge ba le gare ga batho. Taba ye e ka ama phuthego ka moka, kudukudu ge e ba bagolo ba sa opele goba ba dira mešomo e mengwe mola ditho ka moka tša phuthego di opela.​—Ps. 30:12.

³ Ge e ba re tloga re lebelela go opela e le karolo ya borapedi bja rena, re ka se nyake go tšwela ka ntle ka nako ya go opela goba ra fetwa ke karolo ye ya bohlokwa. Ka baka leo, yo mongwe le yo mongwe wa rena o swanetše go ipotšiša gore: ‘Na ke lebelela bjang go opela ge ke le dibokeng? Nka dira bjang gore ke se sa tšhaba go opelela Jehofa  ka go hlaboša ke thabile ge ke le gare ga batho? Gona nka bontšha bjang maikwelo ge ke opelela Jehofa ke le dibokeng?’

4, 5. Isiraeleng ya bogologolo, go ile gwa dirwa dithulaganyo dife tše dikgolo tša go opela borapeding bja therešo?

⁴ Bahlanka ba botegago ba Jehofa ba be ba dutše ba diriša mmino go mo tumiša. Selo se re se lemogago ke gore ge Baisiraele ba bogologolo ba be ba hlankela Jehofa ka go botega, go opela e be e le selo se bohlokwa borapeding bja bona. Ka mohlala, ge Kgoši Dafida a be a lokišetša gore tempele e tle e neelwe go Jehofa, o ile a rulaganya Balefi ba 4 000 gore ba tle ba opelele Jehofa ditumišo. Gare ga bona, ba 288 ba be ‘ba tlwaeditšwe go opelela Jehofa, ka moka ga bona e le dikgwari.’​—1 Dikor. 23:5; 25:7.

⁵ Nakong ya ge tempele e be e neelwa, mmino le go opela di kgathile tema e bohlokwa kudu. Beibele e re botša gore: “Ya re gateetee ge baletši ba diphalafala le diopedi ba kwatša modumo o tee ge ba tumiša le go leboga Jehofa, le gateetee ge ba phagamiša modumo ka diphalafala, disimbala le ka diletšo tša mmino ba tumiša Jehofa, . . . letago la Jehofa [la tlala] ka ntlong ya Modimo wa therešo.” Ruri tiragalo yeo, e swanetše go ba e ile ya tiiša tumelo ya Baisiraele!​—2 Dikor. 5:13, 14; 7:6.

6. Hlalosa kamoo Nehemia a ilego a rulaganya mmino ka gona ge a be a eteletše Baisiraele pele kua Jerusalema.

⁶ Nehemia, yo a bego a eteletše pele Baisiraele bao ba bego ba botega bakeng sa go aga lefsa maboto a Jerusalema, o ile a rulaganya le gore Balefi ba bangwe ba tle ba opele le go letša diletšo tša mmino. Ge maboto ao a agilwego lefsa a Jerusalema a be a neelwa, tsela yeo Balefi ba bego ba opela ka yona e ile ya dira gore Baisiraele ba thabele tiragalo yeo le go feta. Ka nako yeo, go be go na le “dihlopha tše pedi tše dikgolo tša diopedi tša go leboga Modimo.” Diopedi tšeo di ile tša sepela ka mahlakore a go fapana, gomme tša kopana mabotong a kgauswi le tempele, gore di dire modumo wo batho ba kgole ba bego ba tla o kwa. (Neh. 12:27, 28, 31, 38, 40, 43) Ga go pelaelo gore Jehofa o ile a thaba kudu ge a ekwa barapedi ba gagwe ba mo tumiša ka go opela ba thabile.

7. Jesu o bontšhitše bjang bohlokwa bja go opela dibokeng tša Bokriste?

⁷ Ge go be go hlongwa phuthego ya Bokriste, mmino o ile wa tšwela pele e le karolo e bohlokwa borapeding bja therešo. Ge Jesu a be a thoma Selalelo sa Morena bošegong bjo bohlokwa kudu historing, o ile a opela dikopelo le barutiwa ba gagwe.​—Bala Mateo 26:30.

8. Bakriste ba lekgolong la pele la mengwaga ba re beetše mohlala ofe wa go opela borapeding bja rena?

⁸ Bakriste ba lekgolong la pele la mengwaga ba ile ba re beela mohlala wa go tumiša Modimo ka go opela ba le gotee. Gaešita le ge ba be ba bokana malapeng a batho, seo se be se sa ba thibele go opelela Jehofa ditumišo. Jehofa o ile a laela moapostola Paulo go ngwalela bana babo ba Bakriste gore: “Tšwelang pele le rutana le go kgothatšana ka dipsalme, ditumišo tša go tumiša Modimo, dikopelo tša moya tšeo di opelwago ka lešoko, le opelela Jehofa dipelong tša lena.” (Bakol. 3:16) Dikopelo tšeo di lego ka pukung ya rena ya dikopelo ke “dikopelo tša moya tšeo di opelwago ka lešoko” goba, ka go leboga. Ke tše dingwe tša dijo tša moya tšeo re di newago ke “mohlanka yo a botegago le wa temogo.”​—Mat. 24:45.

9. (a) Ke’ng seo se ka dirago gore batho ba bangwe ba se opele ka go hlaboša ba thabile ge ba le dibokeng le dikopanong? (b) Re swanetše go opelela bjang Jehofa ditumišo, gona ke bomang bao ba swanetšego go etelela pele? (Bona seswantšho seo se lego mathomong a sehlogo.)

⁹ Go thwe’ng ge e ba go opela go se gwa tlwaelega ka lapeng la geno, setšong sa geno, goba mo o dulago gona? Ka ge lehono go na le thekinolotši, o ka ipshina ka go theetša diopedi tša go  tuma. Lega go le bjalo, o ka ikwa o lewa ke dihlong goba o swaba ge o bapetša lentšu la gago le mantšu a diopedi tšeo. Eupša seo ga se sa swanela go šitiša boikarabelo bja gago bja go opelela Jehofa ditumišo. Go e na le moo, swarela puku ya gago ya dikopelo godimo, o tsoše hlogo gomme o opele ka maikwelo le go tšwa pelong! (Esera 3:11; bala Psalme 147:1.) Lehono, Diholong tša Mmušo tše dintši, go bontšhwa mantšu a dikopelo sekirining, e lego seo se re thušago go opela ka go hlaboša. Selo se sengwe seo se thabišago ke gore ga bjale lenaneo la Sekolo sa Bodiredi sa Mmušo sa bagolo le akaretša go opela dikopelo tša Mmušo. Se se gatelela bohlokwa bja gore bagolo ke bona ba swanetšego go etelela pele ge re opela dibokeng tša Bokriste.

10. Ke’ng seo re swanetšego go se gopola ge e ba re tšhoga go opelela godimo?

¹⁰ Selo se sengwe seo se dirago gore batho ba bantši ba se ke ba opelela godimo ke letšhogo. Ba ka ba ba tšhoga gore ba tlo kwagala ba nnoši goba ba šaetša koša. Lega go le bjalo, re swanetše go dula re gopola gore, ka moka ga rena re dira diphošo ge re bolela. (Jak. 3:2) Eupša seo ga se re thibele go bolela. Ka gona ga se ra swanela go dumelela mantšu a rena ao a šaetšago a re šitiša go tumiša Jehofa ka dikopelo.

11, 12. Ditšhišinyo tše dingwe tša go kaonefatša tsela yeo re opelago ka yona ke dife?

¹¹ Mohlomongwe re tšhoga go opela ka gobane re sa tsebe gore re opele bjang. Eupša, go na le dilo tše bonolo tšeo di ka re thušago go kaonefatša tsela yeo re opelago ka yona. *

¹² O ka ithuta go opelela godimo ka lentšu le matla ka go hema ka tsela e swanetšego. Go no swana le ge mohlagase o dira gore lebone le tuke, go hema gabotse go dira gore o kgone go ntšha lentšu ge o bolela goba ge o opela. O swanetše go opelela godimo go no swana le ge o bolela, goba go feta ge o bolela. (Bala ditšhišinyo tšeo di lego ka pukung ya Holwa ke Thuto ya Sekolo sa Bodiredi sa Pušo ya Modimo, matlakala 181 go ya go 184,  ka tlase ga sehlogwana se se rego “Laola Mohemo wa Gago ka mo go Swanetšego.”) Ge le e le gabotse, ge go tliwa tabeng ya go opelela Jehofa ditumišo, Mangwalo a fela a re botša gore re “[goelele] ka lethabo.”​—Ps. 33:1-3.

13. Hlalosa kamoo re ka kaonefatšago tsela yeo re opelago ka yona.

¹³ Nakong ya borapedi bja lapa goba thutong ya gago ya motho ka noši, leka se: Kgetha e nngwe ya dikopelo tšeo o di ratago ka pukung ya rena ya dikopelo. Bala mantšu a kopelo yeo ka lentšu la godimo, le matla le le mafolofolo. Ke moka, o diriša modumo o swanago wa lentšu, goga moya gomme o bolele mantšu a lefoko le tee, o sa buše moya. Bjale, o diriša modumo o swanago wa lentšu, goga moya ke moka o opelele lefoko leo godimo ka mafolofolo o sa buše moya. (Jes. 24:14) Lentšu la gago le tla tšwa gabotse, e lego seo se nyakegago. Seo se se ke sa go tšhoša goba sa go leša dihlong.

14. (a) Go ahlamiša molomo go ka re thuša bjang ge re opela? (Bala lepokisi le le rego “ Kamoo o ka Kaonefatšago Tsela Yeo o Opelago ka Yona.”) (b) Wena o thušitšwe ke ditšhišinyo dife go kaonefatša lentšu la gago ge o opela?

¹⁴ O ka se kgone go ntšha lentšu le le kwagalago ge e ba o sa bule molomo wa gago ka moka. Tšhišinyo e nngwe ke gore o ahlamiše molomo go feta ge o bolela. Ke’ng seo o swanetšego go se dira ge e ba o nagana gore o na le lentšu la fase goba la godimo kudu leo o sa kgonego go le laola? O ka hwetša ditšhišinyo tše di ka go thušago ka bothata bjo ka pukung ya Holwa ke Thuto ya Sekolo sa Bodiredi sa Pušo ya Modimo, letlakala 184, lepokising le le rego, “Go Fenya Mathata a Itšego.”

15. (a) Go ile gwa dirwa tsebišo efe sebokeng sa ngwaga le ngwaga sa 2016? (b) Mabaka a mangwe ao a dirilego gore go tšweletšwe puku e mpsha ya dikopelo ke afe?

¹⁵ Ka 2016, sebokeng sa ngwaga le ngwaga sa Watch Tower Bible and Tract Society of Pennsylvania, batho ba be ba thabile ge ngwanabo rena Stephen Lett wa Sehlopha se Bušago a be a tsebiša gore e se kgale, puku e mpsha ya dikopelo e nago le sehlogo se rego: ‘Opelela Jehofa o Thabile’ e tla dirišwa dibokeng. Ngwanabo rena Lett o ile a bolela gore le lengwe la mabaka a gore dikopelo tše di kaonefatšwe ke gore di sepedišane le mantšu a lego ka go Phetolelo ya Lefase le Lefsa ya Mangwalo a Makgethwa e kaonefaditšwego.  Se se ile sa dira gore mantšu a mangwe ao a bego a se sa sepedišana le Beibele e mpsha ya Phetolelo ya Lefase le Lefsa, a tlošwe goba a kaonefatšwe. Go oketša moo, go ile gwa tsenywa dikopelo tše difsa tša mabapi le modiro wa rena wa boboledi le tša go leboga sehlabelo sa Jesu sa topollo. Le gona, ka ge go opela e le karolo e bohlokwa borapeding bja rena, Sehlopha se Bušago se ile sa phetha ka gore se tšweletše puku ya maemo a godimo, yeo e tla swanago le letlalo la Beibele ya Phetolelo ya Lefase le Lefsa e kaonefaditšwego.

16, 17. Ke diphetogo dife tšeo di dirilwego ka pukung e mpsha ya dikopelo?

¹⁶ E le gore go be bonolo go diriša puku ye ya ‘Opelela Jehofa o Thabile,’ dihlogo tša yona di latelantšwe go ya ka go swana ga tšona le go swana ga dikagare tša tšona. Ka mohlala, dikopelo tša mathomo tše 12 di bolela ka Jehofa, dikopelo tše 8 tša go latela di bolela ka Jesu le topollo, le dikopelo tše dingwe di beakantšwe ka tsela yeo. Mathomong a puku ye, go na le tatelano ya dihlogo. Tatelano ye e thuša kudu, kudukudu ge ngwanabo rena a nyaka go kgetha kopelo bakeng sa polelo ya phatlalatša.

¹⁷ E le gore batho ka moka ba kgone go opela go tšwa pelong, mantšu a mangwe a ile a fetošwa gore molaetša wa dikopelo o kwagale gabotse. Pukung ye, go ntšhitšwe mantšu a kgale gomme gwa tsenywa ao a tsebjago kudu lehono, e lego seo se dirago gore go be bonolo go opela mantšu a dikopelo. Ka mohlala, e be e le mo go swanetšego gore go fetošwe sehlogo se se rego, “Šireletša Pelo ya Gago,” gore e be “Re Šireletša Dipelo tša Rena.” Ke ka baka la’ng re re’alo? Ke ka gobane ge motho a be a opela mantšu a kopelo ye, o be a kwagala eka o laela batho ba bangwe seo ba swanetšego go se dira. Se se be se ka dira gore batho bao ba thabelago molaetša wa Beibele, dikgaetšedi, bana le bafsa bao ba lego dibokeng, dikopanong tše dinyenyane le tše dikgolo ba ikwe ba se ba lokologa ge ba opela mantšu a kopelo ye. Ka baka leo, sehlogo sa kopelo ye se ile sa kaonefatšwa gomme mantšu a yona a fetošwa ganyenyane.

18. Ke ka baka la’ng re swanetše go itlwaetša dikopelo tšeo di lego ka pukung e mpsha ya dikopelo? (Bona mongwalo wa ka tlase.)

¹⁸ Bontši bja dikopelo tšeo di lego ka pukung ya ‘Opelela Jehofa o Thabile’ di bjalo ka dithapelo. Ge o opela dikopelo tše, o ka botša Jehofa ka mokgwa wo o ikwago ka gona. Dikopelo tše dingwe di tla re thuša gore re “hlohleletšaneng leratong le medirong e mebotse.” (Baheb. 10:24) Re swanetše go tseba mantšu a yona, ka mokgwa wo e opelwago ka gona le ka tsela yeo e fetofetogago ka yona. O ka dira seo ka go theetša dikopelo tša Mmušo tšeo bana babo rena le dikgaetšedi ba di opelago, tšeo di lego go jw.org. Ge o ka itlwaetša dikopelo tšeo o sa le gae, o tla kgona go di opela ka mafolofolo le ka go tšwa pelong. *

19. Batho ka moka ka phuthegong ba ka tumiša Jehofa bjang?

¹⁹ Dula o gopola gore go opela ke karolo e bohlokwa kudu borapeding bja rena. Ge re opela re bontšha Jehofa gore re mo rata kudu e bile re leboga dilo tšeo a re diretšego tšona. (Bala Jesaya 12:5.) Ge o opela ka go hlaboša o thabile go tšwa pelong, o tlo beela ba bangwe mohlala gomme wa dira gore le bona ba nyake go opela go swana le wena. Ga go pelaelo gore bohle ka phuthegong—ba banyenyane, ba bagolo le bao ba sa tšwago go thoma go kopanela le rena—ba ka opela le rena ge re tumiša Jehofa ka dikopelo. Ka gona o se ke wa lešwa dihlong ke go bontšha maikwelo ge o opelela Jehofa. Go e na le moo, diriša mantšu a mopsalme ao a rego: “[Opelela] Jehofa.” Ee, opela ka go hlaboša o thabile.​—Ps. 96:1.