1. Re ka fela re ikwa bjang ka baka la sebe seo re nago le sona?

“RURI ke motho yo a hlomolago pelo!” (Baroma 7:24) Lehono, ba bantši ba bahlanka ba Modimo ba botegago, ba ikwa go swana le Moapostola Paulo. Ka ge ka moka ga rena re belegwe re na le sebe, re ka ikwa re nyama ge re palelwa ke go kgahliša Jehofa. Bakriste ba bangwe bao ba ilego ba dira sebe se segolo, ba ikwa eka Jehofa a ka se tsoge a ba lebaletše.

2. (a) Psalme 34:22 e bontšha bjang gore bahlanka ba Modimo ga se ba swanela go ikwa ba imelwa ke dibe tša bona? (b) Sehlogong se re tlo bolela ka’ng? (Bona lepokisi leo le rego “ Na ke Dilo Tšeo re Ithutago Tšona Goba ke Diswantšhetšo?”)

² Eupša Mangwalo a re kgonthišetša gore ge e ba re tšhabela go Jehofa, ga se ra swanela go ikwa re imelwa ke dibe tša rena. (Bala Psalme 34:22.) Go tšhabela go Jehofa go bolela’ng? Re swanetše go dira’ng gore Jehofa a re gaugele le go re lebalela? Re tlo hwetša dikarabo ge re tlo ahlaahla ka tokišetšo yeo Jehofa a bego a e dirile Isiraeleng ya bogologolo ya mabapi le metse ya botšhabelo. Ke therešo gore tokišetšo yeo e be e le ka tlase ga Molao wa Moshe, woo o ilego wa tšeelwa legato ke molao wa Kriste ka Pentekoste ya ngwaga wa 33. Eupša re swanetše go gopola gore molao wo o be o etšwa go Jehofa. Ka gona, tokišetšo ye ya metse ya botšhabelo, e re thuša go bona kamoo Jehofa  a ikwago ka gona ka sebe, badiradibe le batho bao ba itsholago. Sa pele, a re boneng gore ke ka baka la’ng Jehofa a ile a dira gore go be le metse ya botšhabelo, le gore metse ye e be e šoma bjang?

3. Baisiraele ba be ba dira’ng ka motho yoo a bego bolaile yo mongwe ka boomo?

³ Jehofa o be a sa nyenyefatše dibe tša batho bao ba bego ba bolaile ba bangwe Isiraeleng ya bogologolo. O be a neile Baisiraele molao wa gore ge e ba motho a bolaile yo mongwe ka boomo, motho yoo o swanetše go bolawa ke monna yoo e bego e le wa leloko la kgauswi la gabo mohu. Monna yoo o be a bitšwa “molefeletši wa madi.” (Num. 35:19) Molao woo o be o bontšha gore mmolai yoo o be a swanetše go lefa ka bophelo bja gagwe, ka ge a bolaile motho yo a se nago molato. Ge mmolai yoo a be a ka se bolawe ka pela, o be a tla šilafatša naga yeo Jehofa a bego a ba neile yona, ya se sa ba e kgethwa. Ka baka la’ng? Ka gobane Jehofa o be a laetše gore: “Le se ke la šilafatša naga yeo le lego go yona; ka gobane madi ke ona a šilafatšago naga.”​—Num. 35:33, 34.

4. Baisiraele ba be ba dira’ng ka motho yo a bego a bolaile yo mongwe ka phošo?

⁴ Go thwe’ng ka motho yo a bego a bolaile yo mongwe ka phošo? Baisiraele ba be ba dira’ng ka yena? Le ge mmolai a tla be a bolaile motho ka phošo, o be a sa dutše a na le molato wa go bolaya motho yo a se nago molato. (Gen. 9:5) Eupša Jehofa o be a bontšha motho yo bjalo kgaugelo. O be a dirile gore go be le metse e tshela ya botšhabelo, yeo mmolai yoo a bego a ka tšhabela go o mongwe wa yona. Ge a le moo, o be a tla šireletšega. Mmolai yoo o be a swanetše go dula motseng woo go fihlela moperisita yo a phagamego a ehwa.​—Num. 35:15, 28.

5. Tokišetšo ya metse ya botšhabelo e re ruta’ng ka Jehofa?

⁵ Jehofa ke yena a dirilego gore go be le metse ya botšhabelo. Ke ka baka leo a ilego a botša Joshua gore: “Bolela le bana ba Isiraele, o re: ‘Ikgetheleng metse ya botšhabelo.’” Metse yeo e be e ‘kgethagaditšwe.’ (Josh. 20:1, 2, 7, 8) Ka ge Jehofa a ile a hlaola metse yeo gore e dirišwe ke batho bao ba bolailego ba bangwe ka phošo, re ka ipotšiša gore: Tokišetšo ye e re thuša bjang go bona tsela yeo Jehofa a re bontšhago kgaugelo? Lehono se se re thuša bjang mabapi le go tšhabela go Jehofa?

6, 7. (a) Hlalosa kamoo banna ba bagolo ba bego ba ahlola molato wa motho yoo a bego a bolaile yo mongwe ka phošo. (Bona seswantšho seo se lego mathomong a sehlogo.) (b) Ke ka baka la’ng mmolai a be a swanetše go ya go banna ba bagolo?

⁶ Ka morago ga gore Moisiraele a bolaye motho ka phošo, o be a swanetše go ema mojakong wa kgoro ya motse woo a tšhabetšego go wona, gomme a “bolele taba ya gagwe a theeditšwe ke banna ba bagolo.” Banna bao ba be ba swanetše go mo amogela gabotse. (Josh. 20:4) Ka morago ga nako e itšego, banna bao ba be ba swanetše go mmušetša motseng wo a bolaetšego motho gona, gomme banna ba bagolo ba moo ba be ba swanetše go ahlola molato wa gagwe. (Bala Numeri 35:24, 25.) Ka morago ga gore ba bone gore mmolai yoo ka nnete o be a bolaile motho ka phošo, ba be ba mmušetša motseng wa botšhabelo.

⁷ Ke ka baka la’ng mmolai a be a swanetše go bolela le banna ba bagolo? Se se be se thuša phuthego ya Isiraele gore e dule e hlwekile le gore mmolai yoo a gaugelwe ke Jehofa. Seithuti se sengwe se ngwadile gore ge mmolai yoo a be a ka se ye go banna ba bagolo, “o be a ipea kotsing.” Se okeditše ka gore: “O be a tlo ba kotsing ya go bolawa ka gobane a be a sa diriše tokišetšo yeo Jehofa a e dirilego ya gore a šireletšege.” Motho yoo o be a ka newa thušo, eupša o be a swanetše go ya go banna ba bagolo gomme a dire seo ba mmotšago sona. Ge e ba a be a ka se tšhabele go o mongwe wa metse ya botšhabelo, motho wa leloko la kgauswi la gabo mohu o be a dumeletšwe go mmolaya.

8, 9. Ke ka baka la’ng Mokriste yo a dirilego sebe se segolo a swanetše go ya go bagolo gore ba mo thuše?

 ⁸ Lehono, Mokriste yoo a dirilego sebe se segolo o swanetše go ya go bagolo e le gore ba mo thuše gore a boele a be le tswalano e botse le Jehofa. Ke ka baka la’ng se se le bohlokwa? Lebaka la pele ke gore, Jehofa ke yena a kgethilego bagolo gore ba ahlole melato ya batho bao ba dirilego dibe tše dikgolo. (Jak. 5:14-16) Lebaka la bobedi ke gore, bagolo ba thuša badiradibe gore ba dule ba na le tswalano e botse le Jehofa le gore ba se ke ba boeletša dibe tšeo ba di dirilego. (Bagal. 6:1; Baheb. 12:11) Lebaka la boraro ke gore, bagolo ba tlwaetšwa kamoo ba ka kgonthišetšago badiradibe gore Jehofa o ba lebaletše, le gore ga se ba swanela go ikwa ba na le molato goba ba kwešwa bohloko ke diphošo tša bona. Jehofa o bitša banna bao gore ke “lefelo la go utela ledimo.” (Jes. 32:1, 2) Na ruri se ga se re bontšhe gore Jehofa o a re gaugela?

⁹ Ba bantši ba bahlanka ba Modimo ba ile ba ikwa ba imologile ka morago ga gore ba ye go bagolo gore ba ba thuše. Ka mohlala, ngwanabo rena yo a bitšwago Daniel, o ile a dira sebe se segolo gomme a fetša dikgwedi tše mmalwa a tšhaba go botša bagolo ka sebe seo. O re: “Ka morago ga gore go fete nako e telele ka tsela ye, ke be ke nagana gore go ka se sa kgonega gore bagolo ba nthuše. Lega go le bjalo, ke be ke dula ke tšhogile gore ka letšatši le lengwe dibe tša ka di tla utologa. Le gona, ka mehla ge ke rapela Jehofa ke be ke ikwa ke gapeletšega go thoma pele ka go kgopela tshwarelo ka sebe seo ke se dirilego.” Mafelelong Daniel o ile a yo kgopela thušo go bagolo. Ge a lebelelela morago o re: “Go bolela nnete ke be ke tšhaba go ya go bagolo. Eupša ka morago ga gore ke ba botše, ke ile ka ikwa eka ke rotšwe morwalo o boima magetleng a ka. Ga bjale ke kgona go rapela Jehofa go se na seo se ntšhitišago.” Lehono Daniel o na le letswalo le lebotse e bile ke mohlanka wa bodiredi.

10. Ke selo sefe seo motho yo a bego a bolaile yo mongwe ka phošo a bego a swanetše go se di dira gore a gaugelwe ke Jehofa?

¹⁰ Motho yo a bolailego yo mongwe ka phošo o be a swanetše go dira se sengwe gore Jehofa a mo gaugele. O be a swanetše go tšhabela motseng wa  kgauswi wa botšhabelo. (Bala Joshua 20:4.) Ga go pelaelo gore mmolai o be a ka se dikadike go tšwa motseng woo; ka gobane bophelo bja gagwe bo be bo ithekgile ka gore a tšhabele go o mongwe wa metse yeo. Se se be se bolela gore o be a swanetše go loba dilo tša gagwe tše dintši. O be a swanetše go tlogela mošomo wa gagwe, legae la gagwe e bile o be a ka se sa kgona go etela dinaga tše dingwe—go fihlela ge moperisita yo a phagamego a ehwa. * (Num. 35:25) Eupša go dira bjalo go be go tla mo thuša. Ge mmolai a be a ka tloga motseng wa botšhabelo pele moperisita yo a phagamego a ehwa, seo se be sa tla bontšha gore ga a na taba le gore o bolaile motho yo mongwe gomme seo sa bea bophelo bja gagwe kotsing.

11. Motho yo a itsholago a ka bontšha bjang gore ga a tšeele fase tebalelo ya Jehofa?

¹¹ Le lehono, gore modiradibe a gaugelwe ke Jehofa go na le dilo tšeo a swanetšego go di dira. O swanetše go tlogela go dira dibe, e sego feela tše dikgolo, eupša a pheme le dilo tše dinyenyane tšeo di ka mo dirago gore a feleletše a dirile dibe tše dikgolo. Moapostola Paulo o ile a hlalosa dilo tšeo Bakriste ba kua Korinthe ba ilego ba di dira go bontšha gore ba be ba itshola dibeng tša bona. O ngwadile gore: “Bonang kamoo go nyamišwa ga lena ka tsela ya Modimo go tšweleditšego boikemišetšo bja lena bjo bogolo ka gona, ee, go itlhatswa leina, kgalefo, poifo, tlhologelo, phišego le go lokišwa ga phošo!” (2 Bakor. 7:10, 11) Ge re dira sohle seo re ka se kgonago go tlogela dibe tšeo re bego re di dira, re bontšha Jehofa gore re nyamišwa ke dibe tša rena, e bile ga re no nagana gore o gapeletšega go re lebalela dibe.

12. Mokriste a ka swanelwa ke go loba’ng e le gore a gaugelwe ke Jehofa?

¹² Ke dilo dife tšeo Mokriste a ka swanelwago ke go di loba e le gore Jehofa a mo gaugele. O swanetše go ikemišetša go loba dilo tšeo a di ratago kudu ge e ba di tla mo dira gore a dire sebe. (Mat. 18:8, 9) Ge e ba bagwera ba gago ba go tutueletša go dira dilo tšeo di sa kgahlego Jehofa, na o tla kgaogana le bona? Ge e ba o sa kgone go laola tsela yeo o nwago bjala ka yona, na o tla phema maemo ao a ka dirago gore o nwe kudu? Ge e ba o thatafalelwa ke go laola dikganyogo tša thobalano, na o tla phema go bogela dimubi, go tsena diwepesaeteng le go dira dilo tše dingwe tšeo di ka go dirago gore o be le dikganyogo tša thobalano? Gopola gore ge e ba o dira maiteko a go dula o botegela Jehofa, o ka se itshole. Ga go na selo seo se kwešago bohloko kudu go feta go se sa amogelwa ke Jehofa. Eupša sa go thabiša kudu ke go ikwa o ratwa ke Jehofa yo a nago le “botho [bja] go iša mehleng ya neng le neng.”​—Jes. 54:7, 8.

13. Na mmolai o be ka ikwa a thabile e bile Jehofa a mo šireleditše ge a le motseng wa botšhabelo? Hlalosa.

¹³ Gateetee ge mmolai a fihlile motseng wa botšhabelo, o be a šireletšega. Ge Jehofa a be a bolela ka metse yeo o itše: “E tla ba botšhabelo bja lena.” (Josh. 20:2, 3) Jehofa o be a sa nyake gore mmolai a ahlolwe gabedi ka molato o tee; le molefeletši wa madi o be a se a swanela go tsena motseng wa botšhabelo gore a bolaye mmolai yoo. Le gona mmolai o be a se a swanela go tšhoga gore o tla bolawa. Ge a be a le motseng wa botšhabelo, Jehofa o be a mo šireletša. Motse wo wa botšhabelo e be e se kgolego. Ge mmolai a be a le motseng wo, o be a kgona go šoma, go thuša batho ba bangwe le go hlankela Jehofa ka khutšo. Ee, ge mmolai a be a le motseng woo, o be a kgona go phela bophelo bjo bo nago le morero e bile a thabile.

14. Mokriste yo a itshotšego dibeng tša gagwe a ka kgodišega ka’ng?

¹⁴ Ba bangwe ba bahlanka ba Jehofa bao ba ilego ba dira dibe tše dikgolo, eupša ka morago ba itshola, ba sa ikwa ba tshwenya ke sebe sa bona. Le gona ba bangwe ba ikwa eka Jehofa a ka se tsoge a lebetše sebe sa bona. Ge e ba o ikwa ka tsela yeo, hle kgodišega gore ge Jehofa a go gaugetše ka go go lebalela, o ka ikwa o šireletšegile. Daniel  yo go boletšwego ka yena mathomong o hlatsela seo. Ka morago ga gore bagolo ba mo thuše gore a boele a be le tswalano e botse le Jehofa, o ile a re: “Ke ile ka ikwa ke imologile. Ka morago ga gore molato wa ka o ahlolwe gabotse, ke ile ka ikwa ke se sa na le molato. Ge Jehofa a go lebaletše, o go lebaletše. Go etša ge a ile a bolela, o tšea maima a gago a a lahlela kgole le wena. O ka se sa ikwa o imetšwe gape.” Gateetee ge mmolai a le motseng wa botšhabelo, o be a se a swanela go ikwa a tšhoga gore molefeletši wa madi o tla mo latelela gomme a mmolaya. Ka mo go swanago, ge Jehofa a re lebaletše sebe sa rena, ga se ra swanela go boifa gore o tla dula a re gopotša sebe seo, goba go re ahlolela sona gape.​—Bala Psalme 103:8-12.

15, 16. Taba ya gore Jesu o lefile topollo le gore ke Moperisita yo a Phagamego, e go kgonthišetša bjang gore Jehofa o tla go bontšha kgaugelo?

¹⁵ Ge e le gabotse, rena re na le lebaka le legolo la go feta leo Baisiraele ba bego ba na le lona la go dumela gore Jehofa o a gaugela. Ka morago ga gore Paulo a hlalose gore o be a sa kgone go dira dilo ka moka tšeo Jehofa a di ratago, o itše: “A go lebogwe Modimo ka Jesu Kriste Morena wa rena!” (Baroma 7:25) Ka gona, go sa šetšwe gore Paulo o be a tlaišwa ke go se phethagale le dibe tšeo a di dirilego nakong e fetilego—tšeo a itsholetšego tšona—o be a kgodišegile gore Jehofa o mo lebaletše dibe tša gagwe a diriša Jesu. Ka ge Jesu a lefile topollo, o dira gore matswalo a rena a hlweke gomme re ikwe re na le khutšo. (Baheb. 9:13, 14) Le gona ka ge e le Moperisita wa rena yo a Phagamego, “o kgona le go phološa ka mo go feletšego bao ba batamelago Modimo ka yena, gobane o phela ka mehla gore a ba phophothele.” (Baheb. 7:24, 25) Ge e ba kua Isiraeleng moperisita yo a phagamego a be a kgonthišetša Baisiraele gore dibe tša bona di be di tla lebalelwa, gona Jesu yo e lego Moperisita yo a Phagamego, o re kgonthišetša le go feta ‘gore re tla hwetša kgaugelo gotee le botho bjo bogolo bja Modimo e le gore re thušwe ka nako e swanetšego.’​—Heb. 4:15, 16.

¹⁶ Ka gona, e le gore Jehofa a go šireletše, eba le tumelo sehlabelong sa Jesu Kriste. O se ke wa nagana gore mohola wa sehlabelo sa Jesu o thuša batho ge e le ba bantši. Go e na le moo, eba le tumelo ya gore sehlabelo se se thuša le wena. (Bagal. 2:20, 21) Eba le tumelo ya gore topollo e dira gore Jehofa a go lebalele dibe tša gago. Eba le tumelo ya gore topollo e go nea kholofelo ya go tlo phela ka mo go sa felego. Jehofa o go file sehlabelo sa Jesu e le mpho.

17. Ke ka baka la’ng o nyaka go tšhabela go Jehofa?

¹⁷ Taba ya gore Jehofa o be a dirile gore kua Isiraeleng go be le metse ya botšhabelo, e re bontšha gore o na le kgaugelo. Ka go dira tokišetšo ye, Jehofa o be a sa fo bontšha gore bophelo ke bjo bokgethwa, eupša gape o be a re bontšha tsela e botse yeo bagolo ba re thušago ka yona ge re dirile dibe, seo boitsholo bja kgonthe bo se bolelago le gore ge Jehofa a re lebaletše o re lebaletše. Na o tšhabela go Jehofa? Ga go na mo o ka tšhabelago gona ntle le go tšhabela go Jehofa. (Ps. 91:1, 2) Sehlogong se se latelago, re tlo ithuta kamoo metse ya botšhabelo e ka re thušago go ekiša dika tše dibotse tša Jehofa e lego toka le kgaugelo.