O ile a ba botša gore: “Dikgoši tša ditšhaba di di buša ka thata gomme bao ba nago le matla go tšona ba bitšwa bahlankedi ba setšhaba. Fela ga go bjalo go lena.”​—Luka 22:25, 26.

Bahlankedi ba setšhaba bao Jesu a bego a bolela ka bona e be e le bomang? Mengwalokgwaro, ditšhelete tša tšhipi le dingwalwa tše dingwe di bontšha gore Bagerika le Baroma ba be ba tlwaetše go hlompha banna ba go tuma le babuši ka go ba bitša ka direto tše bjalo ka Euergetes goba bahlankedi ba setšhaba. Banna ba go tuma le babuši ba be ba bitšwa ka direto tšeo ka gobane ba be ba thušitše setšhaba ka tsela e itšego.

Dikgoši tše mmalwa di be di bitšwa ka sereto sa bahlankedi ba setšhaba. Ka mohlala, babuši ba bangwe ba Egipita bao ba bego ba bitšwa ka sereto se e be e le Ptolemy III Euergetes (mo e ka bago ka 247-222 B.C.E.) le Ptolemy VIII Euergetes II (mo e ka bago ka 147-117 B.C.E.). Babuši ba bangwe ba Roma e lego Julius Caesar (48-44 B.C.E.) le Augustus (31 B.C.E.–14 C.E.) le bona ba be ba bitšwa ka sereto seo. Kgoši ya Judea e lego Heroda yo Mogolo le yena o be a bitšwa ka sereto se. Go ka direga gore Heroda o hweditše sereto se ka gobane a ile a rekela setšhaba sa gagwe korong nakong ya ge se be se wetšwe ke tlala e bile a ile a nea badiidi diaparo.

Go ya ka seithuti sa Beibele sa Jeremane e lego Adolf Deissmann, batho ba bantši ba be ba tlwaetše go diriša sereto sa bahlankedi ba setšhaba. Seithuti seo se ile sa bolela gore mehleng ya kgale batho ba be ba tlwaetše go diriša sereto sa bahlankedi ba setšhaba mo e lego gore ge o be o ka nyaka mengwalokgwaro yeo e nago le sereto seo, go be go le bonolo kudu go e hwetša.

Jesu o be a era go re’ng ge a be a botša barutiwa ba gagwe gore: “Fela ga go bjalo go lena”? Na Jesu o be a sa nyake barutiwa ba gagwe ba thuša setšhaba goba ba tshwenyega ka batho ba bangwe? Aowa, ga go bjalo. Jesu o be a tshwenyegile feela ka gore batho bao ba na le maikemišetšo afe ge ba thuša ba bangwe.

Nakong ya ge Jesu a be a le mo lefaseng, bahumi ba be ba ntšha meneelo ya go thekga dipapadi, go dira diphaka le go aga ditempele e bile ba thuša ka dilo tše dingwe. Eupša ba be ba dira dilo tšeo gore ba tume, ba retwe ke batho le gore batho ba tle ba ba boutele. Kgatišo e nngwe e re: “Dilo tšeo bahlankedi ba setšhaba ba bego ba neela ka tšona ke mohlala o mobotse wa go rata go nea, eupša bothata ke gore ba neela ka gobane ba nyaka go atlega dipolotiking.” Jesu o be a sa nyake barutiwa ba gagwe ba e ba le moya wo wa boithati le wa go nyaka go retwa ke batho.

Mengwaga e mmalwa ka morago ga moo, moapostola Paulo o ile a gatelela taba ya go ba le maikemišetšo a mabotse ge re nea. O ile a ngwalela badumedigotee le yena ba Korinthe gore: “Anke yo mongwe le yo mongwe a dire feela kamoo a phethilego ka gona pelong ya gagwe, e sego ka go kgokgona goba ka go gapeletšwa, gobane Modimo o rata monei yo a neago ka go hlalala.”​—2 Bakor. 9:7.