1. Ke ka baka la’ng ka moka ga rena re hloka go kgothatšwa?

KA MOKA ga rena re hloka go kgothatšwa. Mohlomongwe letšatši le lengwe le le lengwe re a imelwa, ga re hwetše seo re se letetšego goba go na le dilo tšeo di re tshwenyago. Goba re ka ba re lebeletšane le mathata ao a tlišwago ke botšofadi, bolwetši goba go hlokofalelwa. Ba bangwe ba rena re a tlaišwa. Gohle mo re yago go tletše bošoro. Re kgodišegile gore “dinako tše [tše] di hlobaetšago tšeo go lego thata go lebeletšana le tšona” di re bontšha gore re phela “mehleng ya bofelo” le gore letšatši le lengwe le le lengwe le re batametša lefaseng le lefsa. (2 Tim. 3:1) Lega go le bjalo, go ka direga gore ke kgale re letetše gore dilo tšeo Jehofa a re tshepišitšego tšona di phethagale. E bile ge re sa dutše re letile, mathata a rena a oketšega le go feta. Ka gona, re ka hwetša kae kgothatšo?

2, 3. (a) Re tseba’ng ka Habakuku? (b) Ke ka baka la’ng re tlo ithuta puku ya Habakuku?

² Re tlo hwetša karabo ka go ithuta puku ya Habakuku. Le ge Beibele e sa re botše dilo tše dintši ka bophelo bja Habakuku le mošomo wa gagwe, puku ye e ka re kgothatša kudu. Go ka direga gore leina la gagwe le ra gore “Go Gokarela ka Lerato.” Polelwana ye e ka ba e šupa kamoo Jehofa a re gokarelago ka lerato goba kamoo bahlanka  ba gagwe ba dulago ba ithekgile ka yena ba sa boife selo. Habakuku o ile a botšiša Modimo dipotšišo tša bohlokwa kudu. Ka ge Jehofa a ile a nea Habakuku moya o mokgethwa gore a ngwale poledišano ye, ge e le gabotse Habakuku o ile a botšiša dipotšišo tšeo le rena re bego re ka di botšiša Modimo.​—Habak. 2:2.

³ Poledišano yeo Habakuku a bilego le yona le Jehofa ke yona feela yeo e re thušago go tseba ka moporofeta yo yoo a bego a tshwenyegile. Puku ya gagwe ke karolo ya “dilo tšohle tšeo di ilego tša ngwalwa e sa le pele” tšeo di bolokilwego ka Lentšung la Modimo e lego Beibele, “gore ka kgotlelelo ya rena le ka khomotšo e tšwago Mangwalong re be le kholofelo.” (Baroma 15:4) Puku ya Habakuku e ka hola yo mongwe le yo mongwe wa rena bjang? E ka re thuša go bona gore go bota Jehofa go bolela eng. Le gona, boporofeta bjo bja Habakuku bo re kgonthišetša gore re ka ba le khutšo ya monagano le ge re welwa ke mathata. Re naganne ka taba ye, anke re ithuteng puku ya Habakuku ka mo go tseneletšego.

4. Ke ka baka la’ng Habakuku a be a tshwenyegile?

⁴ Bala Habakuku 1:2, 3. Habakuku o phetše mehleng e thata le e boima kudu. O be a nyamile kudu ka gobane o be a phela le batho ba go rata bošoro. O be a ipotšiša gore: ‘Batho ba ba tlo kgaotša neng go dira dilo tše mpe? Ke ka baka la’ng Jehofa a tšea nako e telele gakaaka gore a dire se sengwe?’ Batho ba moo Habakuku a bego a dula gona ba be ba tletše go hloka toka e bile ba gatelela ba bangwe. O be a ikwa a se na mohola. Ka gona, nakong yeo e thata o ile a kgopela Jehofa gore a mo thuše. Go ka direga gore Habakuku o be a nagana gore Jehofa ga a na taba le setšhaba sa gagwe. Go be go bonagala eka Modimo o be a ka se rarolle mathata ao. Na o kgona go kwešiša maikwelo a mohlanka yo wa Modimo?

5. Re ithuta thuto efe ya bohlokwa ka pukung ya Habakuku? (Bona seswantšho seo se lego mathomong a sehlogo.)

⁵ Na Habakuku o ile a botšiša dipotšišo tše ka gobane a be a se sa bota Jehofa le dikholofetšo tša gagwe? Le gatee! Taba ya gore o ile a kgopela thušo go Jehofa e sego go motho yo mongwe e be e bontšha gore o be a sa na le tumelo. Eupša o be a sa kwešiše gore ke ka baka la eng Jehofa a tšea nako e telele gakaaka gore a rarolle mathata ao le gore ke ka baka la eng a mo dumelela a tlaišega. Jehofa o dumeletše Habakuku gore a ngwale dilo tšeo di bego di mo tshwenya gore A re rute thuto ye e bohlokwa: Gore re se tšhabe go mmotša dilo tšeo di re tshwenyago goba tšeo re sa di kwešišego. Ge e le gabotse o re kgothaletša gore re mo rapele re mmotše selo se sengwe le se sengwe seo se re tshwenyago. (Ps. 50:15; 62:8) Le gona, Diema 3:5 e re kgothaletša gore re ‘bote Jehofa ka dipelo tša rena ka moka’ gomme re se ke ra “ithekga ka tlhaologanyo ya [rena].” Ga go pelaelo gore Habakuku o be a tseba mantšu a gomme o ile a a diriša.

6. Ke ka baka la’ng go rapela go le bohlokwa?

⁶ Habakuku o ile a batamela kgauswi le Jehofa, yena Tatagwe le Mogwera wa gagwe yo a mmotago. Ga se a ka a ineela mathateng a gagwe gomme a ithekga ka tlhaologanyo ya gagwe. Eupša o ile a rapela gomme a botša Jehofa mathata a gagwe le kamoo a ikwago ka gona, ka go re’alo o re beetše mohlala o mobotse. Ge e le gabotse, Jehofa, yena Mokwi wa dithapelo, o re kgopela gore re bontšhe gore re a mmota ka go mo rapela gomme re mmotše mathata a rena. (Ps. 65:2) Ge re ka dira bjalo, re tla bona ge Jehofa a araba dithapelo tša rena. Le gona re tla bona lerato la gagwe ge a re homotša le ge a re hlahla. (Ps. 73:23, 24) Go sa šetšwe gore re lebeletšane le mathata afe, o tla re thuša gore re tsebe kamoo a ikwago ka gona ka mathata ao. Ge re rapela Jehofa ka go tšwa pelong, re bontšha gore re tloga re mmota.

7. Jehofa o ile a araba bjang Habakuku ge a be a mmotša mathata a gagwe?

⁷ Bala Habakuku 1:5-7. Ka morago ga gore Habakuku a botše Jehofa mathata a gagwe le dilo tšeo di bego di mo tshwenya, o swanetše go ba a ile a ipotšiša gore Jehofa o tla dira eng ka ona. Ka ge Jehofa e le Tate yo a nago le kwelobohloko le yo a kwešišago, ga se a ka a mo galefela. Modimo o be a tseba gore mohlanka yo wa gagwe o be a kwele bohloko e bile a nyamile. Jehofa ga se a ka a galefela Habakuku eupša o ile a mmotša seo a bego a tlo se dira go Bajuda bao ba bego ba sa botege. Go ka direga gore Habakuku e bile motho wa mathomo yoo Jehofa a ilego a mmotša gore bofelo bja mehla yeo bo be bo le kgauswi kudu.

8. Ke ka baka la’ng karabo ya Jehofa e ile ya tlaba Habakuku?

⁸ Jehofa o ile a botša Habakuku gore kgauswinyane o be a tla rarolla mathata ao. O be a le kgauswi le go otla batho bao ba babe le ba šoro. Ge Jehofa a be a re dilo tšeo di tlo direga “mehleng ya lena,” o be a bontšha gore o tla otla Bajuda bao ba bego ba sa botege nakong ya ge moporofeta Habakuku a sa phela goba nakong ya ge Bajuda bao sa phela. Karabo ya Jehofa e be e se yeo Habakuku a bego a e letetše. Seo Jehofa a mmoditšego sona se be se bontšha gore batho ba be ba tlo tšwela pele ba tlaišega nageng ka moka ya Juda. Bakaladea (goba Bababilona) ba be ba na le dipelo tše mpe e bile ba le sehlogo, ba le šoro go feta setšhaba sa gabo Habakuku, seo se bego se tseba melao ya Jehofa. Ke ka baka la’ng Jehofa a be a ka diriša setšhaba se sehlogo go otla setšhaba sa gagwe? Wena o be o tla arabela bjang ka morago ga gore o kwe karabo ye ya Modimo?

9. Habakuku o ile a botšiša Modimo dipotšišo dife tše dingwe?

⁹ Bala Habakuku 1:12-14, 17. Le ge Habakuku a be a tseba gore Jehofa o tlo diriša Bababilona go ahlola le go otla batho ba babe ba mehleng ya gagwe, eupša o be a sa tlabegile. Lega go le bjalo, ka boikokobetšo o ile a bolela gore Jehofa e tla dula e le “Leswika” la gagwe. (Doit. 32:4; Jes. 26:4) Habakuku o ile a tšwela pele a tshepa gore Modimo o na le lerato e bile ke yo botho. Se se ile sa mo dira gore a se tšhabe go botšiša Jehofa dipotšišo tše bjalo ka tše: ‘Ke ka baka la’ng o dumelela maemo a Juda gore a mpefale le go feta? Ke ka baka la’ng o sa a rarolle kapejana? Ke ka baka la’ng o dumelela batho ba gago ba tlaišega le go feta? Ke ka baka la’ng o “homola” ge batho ba kgopo ba tlaiša batho ba gago?’ Ke therešo gore Jehofa ke “Mokgethwa,” le gona ‘mahlo a gagwe a sekile kudu moo a ka se kego a lebelela bobe.’

10. Ke ka baka la’ng ka dinako tše dingwe re ka ikwa go swana le Habakuku?

¹⁰ Ka dinako tše dingwe re ka ikwa go swana le Habakuku. Le rena re theetša Jehofa. Ka ge re mmota, re ithuta Lentšu la gagwe gomme seo se dira gore re mo tshepe le go feta. Re kwa mokgatlo wa Modimo ge o re ruta dilo tšeo a re tshepišitšego tšona. Lega go le bjalo, re sa dutše re ka ipotšiša gore, ‘Mathata a rena a tlo fela neng?’ Re ka ithuta’ng go seo Habakuku a ilego a se dira ka morago ga gore a boledišane le Jehofa?

11. Habakuku o be a ikemišeditše go dira’ng ka morago ga gore a theetše Jehofa?

¹¹ Bala Habakuku 2:1. Poledišano yeo Habakuku a bilego le yona le Jehofa e ile ya mo dira gore a ikwe a se sa belaela. Ka gona o ile a ikemišetša go leta Jehofa a kgodišegile gore o tla rarolla mathata. Ge a be a re o tla leta, o be a sa no bolela feela eupša o be a tloga a ikemišeditše go dira seo ka gobane o ile a bušeletša mantšu ao gape. O ile a re o tla “leta mehla ya tlalelo ka  setu.” (Habak. 3:16) Bahlanka ba bangwe ba botegago ba Modimo le bona ba ile ba se fele pelo. Ka gona ba re beetše mohlala o mobotse wa go se fele pelo le wa go tšwela pele re letile Jehofa gore a tle a fediše mathata.​—Mika 7:7; Jak. 5:7, 8.

12. Ke dilo dife tše dingwe tšeo re ithutago tšona go Habakuku?

¹² Re ithuta’ng go seo Habakuku a ilego a se dira? Sa pele, re ithuta gore go sa šetšwe gore re welwa ke mathata afe, ga se ra swanela go tlogela go rapela Jehofa. Sa bobedi, re ithuta gore re swanetše go theetša seo Jehofa a re botšago sona a diriša Lentšu la gagwe le mokgatlo wa gagwe. Sa boraro, re ithuta gore re swanetše go leta Jehofa re sa fele pelo, re kgodišegile gore o tla rarolla mathata a rena ka nako ya gagwe. Ge e ba re bolela le Jehofa ka mehla e bile re mo theetša ka go se fele pelo go swana le Habakuku, le rena re tla ba le khutšo ya monagano gomme seo se tla re thuša gore re kgotlelele. Kholofelo ya rena e tla re thuša gore re se ke ra fela pelo, e lego seo se tlago go re thuša gore re thabe le ge re lebeletšane le mathata. Kholofelo e dira gore re kgodišege gore Tatago rena wa legodimong o tla gata mogato.​—Baroma 12:12.

13. Re hwetša kgonthišetšo efe e botho go Habakuku 2:3?

¹³ Bala Habakuku 2:3. Jehofa o ile a thabišwa ke gore Habakuku o be a ikemišeditše go leta. Ramatlaohle o be a bona gabotse mathata ao Habakuku a bego a lebeletšane le wona. Ka gona, Modimo o ile a mo kgothatša ka go mo kgonthišetša ka lerato le ka botho gore o tla mo araba. Kgauswinyane o be a tla imologa mathateng a gagwe ka moka. Ka mantšu a mangwe Modimo o be a re go Habakuku: “O se ke wa fela pelo, wena ntshepe. Ke tlo go araba le ge go bonagala eka ke a diega!” Jehofa o ile a mo gopotša gore o na le nako yeo a e beilego ya go phethagatša dilo tšeo a di tshepišitšego. Ka gona o ile a kgothatša Habakuku gore a dule a letile. Mafelelong, moporofeta yo o be a ka se itshole gore o ile a leta.

14. Re swanetše go ikemišetša go dira’ng ge re lebeletšane le mathata?

¹⁴ Ge re ka leta Jehofa ka go se fele pelo gomme ra theetša seo a re botšago sona re tla kgodišega gore o tla re thuša e bile seo se tla re thuša go se tshwenyege kudu le ge re na le mathata a magolo. Jesu o re kgothaletša gore re se ke ra dula re naganne ka “dinako goba mehla” yeo Modimo a sego a tšwa a re utollela yona. (Dit. 1:7) Ka baka leo, anke re se ke ra fela matla eupša re lete re ikokobeditše, re na le tumelo e bile re sa fele pelo, re diriša gabotse nako yeo re nago le yona ka go dira sohle seo re ka se kgonago go hlankela Jehofa.​—Mar. 13:35-37; Bagal. 6:9.

15, 16. (a) Ke dikholofetšo dife tše di kgahlišago tšeo di lego ka pukung ya Habakuku? (b) Dikholofetšo tše di dira gore re kgodišege ka eng?

¹⁵ Jehofa o tshepiša batho ba go loka bao ba mmotilego gore: “Ge e le moloki o tla phela ka go botega ga gagwe,” le gore “lefase le tla tlala go tseba letago la Jehofa.” (Habak. 2:4, 14) Ruri bao ba botago Modimo ba sa fele pelo ba tla hwetša moputso wa bophelo!

¹⁶ Ge o bala Habakuku 2:4 ka lekga la mathomo, o ka no kwa eka kholofetšo yeo go bolelwago ka yona moo e no ba mantšu feela. Eupša moapostola Paulo o ile a bona kholofetšo ye ya Jehofa e le bohlokwa kudu moo a ilego a tsopola temana ye ka makga a mararo! (Baroma 1:17; Bagal. 3:11; Baheb. 10:38) Re ka kgodišega gore le ge re ka ba le mathata, ge e ba re dula re botegela Jehofa e bile re na le tumelo go yena, re tlo bona dikholofetšo tša gagwe di phethagala. Jehofa o nyaka gore re dule re naganne ka bokamoso bjo a re tshepišitšego bjona.

17. Puku ya Habakuku e re nea kgonthišetšo efe?

 ¹⁷ Puku ya Habakuku e ruta batho ka moka bao ba phelago mehleng ye ya bofelo thuto e bohlokwa kudu. Jehofa o holofetša go nea motho yo mongwe le yo mongwe yo a mmotegelago bophelo bjo bo sa felego. Go sa šetšwe gore re welwa ke diteko goba mathata afe, anke re tšweleng pele re matlafatša tumelo ya rena le go dula re bota Modimo. Jehofa o ile a diriša Habakuku go re kgonthišetša gore o tla re thekga le go re imolla mathateng a rena. Jehofa o nyaka gore re mmote le gore re lete ka go se fele pelo nako yeo a e beilego ya gore Mmušo wa Modimo o tle o buše mo lefaseng. Ka nako yeo, mo lefaseng go tla be go tletše batho bao ba mo hlankelago, bao ba thabilego le ba boleta.​—Mat. 5:5; Baheb. 10:36-39.

18. Mantšu a Jehofa a ile a kgoma Habakuku bjang?

¹⁸ Bala Habakuku 3:16-19. Mantšu a Jehofa a ile a kgoma Habakuku kudu. O ile a naganišiša ka dilo tše di makatšago tšeo Jehofa a ilego a di direla batho ba gagwe nakong e fetilego. Seo se ile sa matlafatša tsela yeo a botago Modimo ka yona. O be a tseba gore kgauswinyane Jehofa o tla dira se sengwe ka mathata ao! Seo se ile sa kgothatša moporofeta yo le ge a be a tseba gore a ka no tšwela pele a tlaišega ka nakwana. Habakuku o ile a se sa belaela eupša a ba le tumelo ya gore Jehofa o tla mo phološa. O ile a bolela mantšu ao a sa lebalegego a go bontšha gore o be a tloga a na le kgodišego. Diithuti tše dingwe di nagana gore temana 18 e ra gore, “Ke tla taboga ke thabile Moreneng; ke tla dikologa ke thabetše Modimo.” Ye ke thuto e bohlokwa kudu go rena ka moka. Jehofa ga se a no re tshepiša dilo tše di kgahlišago feela, eupša o re kgonthišetša gore o tla phethagatša dilo tšeo.

19. Re ka dira’ng gore re hwetše kgothatšo yeo Habakuku a ilego a e hwetša?

¹⁹ Molaetša o bohlokwa wo o lego ka pukung ya Habakuku ke wa gore re bote Jehofa. (Habak. 2:4) Re ka kgona go bota Jehofa le go dula re mmota ge e ba re ka matlafatša tswalano ya rena le yena (1) ka go dula re rapela gomme re mmotša dilo ka moka tšeo di re tshwenyago; (2) ka go kwa Lentšu la Gagwe le go latela tlhahlo le ge e le efe yeo re e newago ke mokgatlo wa Gagwe; le (3) ka go leta Jehofa re sa fele pelo e bile re botega. Se ke seo Habakuku a ilego a se dira. Le ge a ile a thoma go ngwala puku ya gagwe a nyamile, o ile a feleletša a na le kgodišego e bile a thabile. Anke re lateleng mohlala wa gagwe e le gore le rena re kgone go kwa ge Tatago rena e lego Jehofa a re gokarela ka lerato! Ruri ye ke kgothatšo e bohlokwa yeo re ka e hwetšago lefaseng le leo le tletšego ka mathata!