1, 2. (a) Jesu o ile a araba bjang ge Petro a mmotša gore a ikwele bohloko? (Bona seswantšho se se lego ka mo godimo.) (b) Ke ka baka la’ng Jesu a ile a mo araba ka tsela yeo?

MANTŠU a Jesu a ile a makatša barutiwa ba gagwe kudu. Ke ka baka la’ng a ile a ba makatša? Jesu o ile a ba botša gore e se kgale o tlo tlaišwa a ba a bolawa, eupša bona ba be ba nagana gore o be a tlo thoma go buša Isiraele. Ka baka leo, moapostola Petro o ile a botša Jesu gore: “Ikwele bohloko Morena; o ka se feleletše ka tsela ye le gatee.” Jesu o ile a araba ka gore: “Tloga mo pele ga ka, wena Sathane! O tšhitišo go nna, gobane o nagana dikgopolo tša batho, e sego tša Modimo.”​—Mat. 16:21-23; Dit. 1:6.

² Jesu o be a bontšha gore go na le phapano magareng ga dikgopolo tša Modimo le tša batho bao ba laolwago ke Sathane. (1 Joh. 5:19) Petro o be a kgothaletša Jesu go ba le moya wa boithati woo batho ba bantši ba nago le ona. Eupša Jesu o be a tseba gore yeo ga se tsela yeo Jehofa a naganago ka yona. O be a tseba gore Jehofa o be a nyaka gore a itokišeletše go tlo neela  mmele wa gagwe e le sehlabelo. Ke ka baka leo Jesu a ilego a gana dikgopolo tša Petro di sa tloga fase ka gobane o be a nyaka go thabiša Jehofa.

3. Ke ka baka la’ng go le thata go nagana bjalo ka Jehofa eupša go le bonolo go nagana bjalo ka batho ba lefase?

³ Rena re wela kae? Na re nagana dikgopolo tša Modimo goba tša lefase? Ke nnete gore re ka ba re phela ka go dumelelana le melao ya Modimo. Eupša potšišo ke gore re nagana dikgopolo tša mang? Na dilo tše re di naganago di sepedišana le dikgopolo tša Jehofa? Ga go bonolo go nagana go swana le Jehofa, ka baka leo go nyakega gore re šome ka thata. Eupša go bonolo kudu gore re nagane bjalo ka batho ba lefase. Ka gobane re dikologile ke batho bao ba laolwago ke moya wa lefase. (Baef. 2:2) Taba e nngwe yeo e dirago gore go be thata go gana dikgopolo tša lefase ke gore di a goketša. Seo se dira gore go be bonolo kudu go nagana bjalo ka batho ba lefase eupša go be thata go nagana bjalo ka Jehofa.

4. (a) Go tla direga’ng ka rena ge e ba re ka dumelela lefase gore le bope tsela yeo re naganago ka yona? (b) Re tlo ithuta’ng sehlogong se?

⁴ Ge re ka dumelela lefase gore le bope tsela yeo re naganago ka yona, re tlo thoma go ba le boithati le go rata go itaola. (Mar. 7:21, 22) Re swanetše go leka ka gohle go nagana “dikgopolo tša Modimo,” e sego “tša batho.” Sehlogo se se tlo re thuša kudu tabeng yeo. Re tlo ithuta gore ke ka baka la eng go nagana go swana le Jehofa go le bohlokwa e bile go sa re gatelele eupša go re hola. E bile re tlo ithuta gore re ka phema bjang go nagana bjalo ka batho ba lefase. Ke moka sehlogong se se latelago re tlo kwa kamoo Jehofa a naganago ka gona ka ditaba tše itšego le gore rena re ka mo ekiša bjang.

5. Ke ka baka la’ng batho ba bangwe ba sa nyake gore motho le ge e le ofe a hlohleletše tsela yeo ba naganago ka yona?

⁵ Batho ba bangwe ga ba nyake gore motho le ge e le ofe a hlohleletše tsela yeo ba naganago ka yona. Ba bolela gore: ‘Ke a inaganela ga ke ekiše motho.’ Ka mantšu a mangwe, ba ra gore ba itirela diphetho e bile ba na le tshwanelo ya go dira bjalo. Ga ba nyake go laolwa ke motho goba go swana le batho ba bangwe. *

6. (a) Jehofa o re neile tokologo ya go dira’ng? (b) Na go ba le tokologo go ra gore re ka itirela boithatelo?

⁶ Sa go kgahliša ke gore le ge re swanetše go nagana go swana le Jehofa, seo ga se bolele gore re ka se itirele diphetho. Bakorinthe ba Bobedi 3:17 e re “moo moya wa Jehofa o lego gona, go na le tokologo.” Jehofa o re neile tokologo ya go ikgethela gore re ba batho ba mohuta mang. Re ka kgetha gore re rata eng le gore re dira eng. Jehofa o re bopile re na le tokologo yeo. Eupša se ga se bolele gore re ka no itirela boithatelo. (Bala 1 Petro 2:16.) Jehofa o nyaka gore re diriše Lentšu la Gagwe ge re kgetha magareng ga se sebotse le se sebe. Na Jehofa o a re gatelela goba o nyaka gore re holege?

7, 8. Na ge Jehofa a re kgopela gore re nagane go swana le yena o a re gatelela? Nea mohlala.

⁷ Nagana ka papišo ye. Batswadi ba leka ka gohle go ruta bana ba bona mekgwa e mebotse. Ba ba ruta go botega, go šoma ka thata le go naganela batho ba bangwe. Ge batswadi ba dira bjalo ga se gore ba gatelela  bana ba bona. Eupša ba ba thuša gore ge ba godile e tle e be batho ba bakaone. Ge bana bao ba godile gomme ba se sa dula le batswadi ba bona, ba tla be ba na le tokologo ya go itirela diphetho. Ge ba ka tšwela pele ba phela ka tsela yeo batswadi ba bona ba ba godišitšego ka yona, ba tla dira diphetho tše dibotse. Seo se tla ba thuša go phema mathata a mantši.

⁸ Go swana le motswadi yo lerato, Jehofa le yena o nyaka go bona bana ba gagwe ba thabela bophelo. (Jes. 48:17, 18) Ke ka baka leo a re neago melao ya motheo ya kamoo re swanetšego go itshwara ka gona le kamoo re swanetšego go swara batho ba bangwe ka gona. Jehofa o nyaka gore re ithute go nagana go swana le yena le go phela ka melao ya gagwe. Jehofa ga a re gatelele eupša seo a nyakago re se dira se tlo hola rena. (Ps. 92:5; Die. 2:1-5; Jes. 55:9) Go kwa Jehofa go tlo re thuša go dira diphetho tše dibotse le go ba batho ba bakaone ke moka ra thabela bophelo. (Ps. 1:2, 3) Ruri go nagana go swana le Jehofa go tla re hola kudu!

9, 10. Ke bjang dikgopolo tša Jehofa di fetago kgole tša batho ba lefase?

⁹ Dikgopolo tša Jehofa di feta kgole tša batho ba lefase. Le ke lebaka le lengwe leo le dirago gore re nyake go nagana go swana le Jehofa. Batho ba lefase ba nea dikeletšo mabapi le ditaba tša lapa, tša mošomo le gore batho ba itshware bjang le ditaba tše dingwe. Eupša dikeletšo tša bona tše dintši ga di sepedišane le dikgopolo tša Jehofa. Ka mohlala, gantši ba hlohleletša batho gore ba be le boithati. E bile ba re thobalano pele ga lenyalo ga se phošo. Ba kgothaletša banyalani gore ge ba na le mathata le ge e le a go se kwagale, ba arogane goba ba hlalane e le gore ba thabe. Dikeletšo tša mohuta wo ga di dumelelane le Beibele. Ka ge Beibele e le ya kgale, na se se ra gore dikeletšo tša yona ga di na mohola gomme tša batho ba lefase ke tšona di nago le mohola?

¹⁰ Jesu o itše: “Bohlale bo hlatselwa ka mediro ya bjona gore bo lokile.” (Mat. 11:19) Le ge batho ba lefase ba kaonefaditše thekinolotši, ba palelwa ke go rarolla mathata a magolo ao a dirago gore re se thabe, a bjalo ka dintwa, kgethollo, bohodu le a mangwe. E bile ba re thobalano pele ga lenyalo ga se phošo. Eupša batho ba bantši ba a dumela gore dikeletšo tše ga di thuše ka selo le gore di senya le go feta ka ge di thuba malapa, di baka malwetši le mathata a mangwe. Eupša Bakriste bao ba naganago go swana le Jehofa, ba na le malapa ao a thabilego. Le gona ba phetše gabotse ka ge ba itshwara gabotse e bile ba thabela go ba le khutšo le Bakristegotee le bona lefaseng ka moka. (Jes. 2:4; Dit. 10:34, 35; 1 Bakor. 6:9-11) Na o a bona gore dikgopolo tša Jehofa di feta kgole tša batho ba lefase?

11. Moshe o be a nagana go swana le mang, gona seo se bile le mafelelo afe?

¹¹ Bahlanka ba Jehofa ba mehleng ya ge Beibele e sa ngwalwa, ba be ba dumela gore dikgopolo tša Jehofa di feta kgole tša batho ba lefase. Ka mohlala, Moshe “o ile a rutwa ka bohlale ka moka bja Baegipita,” eupša o ile a kgopela gore Jehofa a mo nee “pelo e bohlale.” (Dit. 7:22; Ps. 90:12) O ile a ba a kgopela Jehofa gore: “Hle ntsebiše ditsela tša gago.” (Ek. 33:13) Ka ge Moshe a ile a lwela go nagana go swana le Jehofa, Jehofa o ile a mo diriša kudu go phetha merero ya Gagwe. O ile a ba a mo nea tokelo ya go ba gare ga batho ba bohlokwa kudu bao go bolelwago ka bona ka Beibeleng.​—Baheb. 11:24-27.

12. Paulo o be a diriša’ng ge a be a dira diphetho tše dikgolo?

¹² Moapostola Paulo o be a le bohlale e  bile a rutegile. E bile go ka direga gore o be a tseba maleme a mabedi. (Dit. 5:34; 21:37, 39; 22:2, 3) Eupša Paulo o be a sa diriše bohlale bja lefase ge a be a dira diphetho. Go e na le moo, o be a diriša Lentšu la Modimo. (Bala Ditiro 17:2; 1 Bakorinthe 2:6, 7, 13.) Ka baka leo, Paulo o ile a ipshina kudu ka go botša batho ditaba tše dibotse gomme a letela go tlo hwetša moputso o mogolo kudu.​—2 Tim. 4:8.

13. Ke mang a nago le boikarabelo bja go ithuta go nagana go swana le Jehofa?

¹³ Ruri dikgopolo tša Modimo di feta kgole tša batho ba lefase. Ge re ka phela ka go dumelelana le dikgopolo tša Jehofa re tlo thaba kudu gomme dilo tša re sepelela gabotse. Eupša Jehofa ga a gapeletše motho gore a nagane go swana le yena. “Mohlanka yo a botegago le wa temogo” le bagolo, le bona ga ba gapeletše motho go kwa Jehofa. (Mat. 24:45; 2 Bakor. 1:24) Mokriste yo mongwe le yo mongwe o na le boikarabelo bja go ithuta go nagana go swana le Jehofa. Re ka dira seo bjang?

14, 15. (a) Re swanetše go naganišiša ka eng ge e ba re nyaka go nagana go swana le Jehofa? (b) Go ya ka Baroma 12:2, ke ka baka la’ng re swanetše go phema go nagana dilo tša lefase? Nea mohlala.

¹⁴ Baroma 12:2 e re: “Lesang go bopega ka sebopego sa tshepedišo ye ya dilo, eupša fetogang ka go fetola menagano ya lena, e le gore le itlhatselele thato e botse le e amogelegago le e phethegilego ya Modimo.” Temana ye e bontšha gabotse gore go sa šetšwe gore re be re lebelela dilo bjang pele re ithuta therešo, go a kgonega gore re fetoge gomme re di lebelele go swana le Jehofa. Ke nnete gore leabela goba dilo tšeo di ilego tša re diragalela, di ka ba di bopile tsela yeo re naganago ka yona. Eupša monagano o kgona go fetoga. Lega go le bjalo, gore o fetoge, go ithekgile ka seo re se dumelelago se tsena ka menaganong ya rena le gore re fetša nako e ntši re nagana ka eng. Ge re ka naganišiša ka tsela yeo Jehofa a naganago ka yona, re tla bona gore dikgopolo tša gagwe di tloga di nepagetše. Ge re ka dira bjalo, re tlo lebelela dilo go swana le Jehofa.

¹⁵ Eupša e le gore re kgone go nagana go swana le Jehofa re swanetše go “lesa go bopega ka sebopego sa tshepedišo ye ya dilo.” Re swanetše go leka ka gohle go tlogela go nagana ka dilo tšeo Jehofa a di hloilego. Nagana ka mohlala wo: Ge motho a nyaka go phela gabotse mmeleng o swanetše go ja dijo tša phepo. Eupša ge a ka no tšwela pele a eja dijo tša go hloka phepo a ka se phele gabotse mmeleng. Ka mo go swanago, re ka se holege ge e ba re fepa menagano ya rena ka dilo tša moya gotee le ka dilo tša lefase.

16. Re swanetše go itšhireletša go eng?

¹⁶ Na go a kgonega gore re pheme dikgopolo tša lefase ka mo go feletšego? Aowa, ga go kgonege ka gobane re phela mo lefaseng. Ka gona re tlo fela re ekwa dikgopolo tša lefase. (1 Bakor. 5:9, 10) Gaešita le ge re le tšhemong, re kwa batho ba bolela dilo tše di fošagetšego le dithuto tša maaka. Le ge go sa kgonege gore re pheme ditaba tša mohuta wo ka mo go feletšego, ga se ra swanela go naganišiša ka tšona goba go di dumela. Go swana le Jesu re swanetše go gana dikgopolo tša Sathane di tloga fase. E bile maemong a mantši re ka kgona go itšhireletša gore re se fetelwe ke dikgopolo tša lefase.​—Bala Diema 4:23.

17. Re ka dira’ng gore re se nagane go swana le batho ba lefase?

¹⁷ Re swanetše go hlokomela gore re gwerana le batho ba mohuta mang. Beibele e re lemoša gore ge e ba re ka gwerana le batho bao ba sa hlankelego Jehofa, mekgwa ya  bona e tlo re fetela. (Die. 13:20; 1 Bakor. 15:12, 32, 33) Le gona, re swanetše go ba šedi ge re kgetha dilo tše re ithabišago ka tšona. Ge re sa ithabiše ka dilo tšeo di “iphagamišetšago tsebo ya Modimo,” tše bjalo ka dilo tšeo di kgothaletšago thuto ya gore dilo di itirile, bošoro goba boitshwaro bjo bobe, re tla ba re bontšha gore ga re nyake go laolwa ke dikgopolo tša lefase.​—2 Bakor. 10:5.

18, 19. (a) Ke ka baka la’ng re swanetše go ba šedi kudu gore re se nagane go swana le batho ba lefase re sa lemoge? (b) Re swanetše go ipotšiša dipotšišo dife, gona ka baka la’ng?

¹⁸ Ka dinako tše dingwe, re ka nagana go swana le batho ba lefase re sa lemoge. Ka gona re swanetše go ba šedi. Ka mohlala, ditabeng go ka begwa taba e itšego ka tsela yeo e ka dirago gore o feleletše o thekga mokgatlo o itšego wa dipolotiki. Le gona mananeo a itšego a ka kgothaletša gore batho ba lwele go fihlelela dilo tša maemo. Dimubi tše dingwe le dipuku tše itšego di kgothaletša batho gore ba be le boithati goba ba rate ba malapa a gabo bona ka mo go feteletšego. Eupša dikgopolo tše bjalo di thulana le seo Mangwalo a se bolelago ge a re rena le malapa a rena re tla thaba kudu ge e ba re rata Jehofa go feta dilo ka moka. (Mat. 22:36-39) Le gona, ditori tše dingwe tša bana di ka bonagala di se na bothata eupša di ka ba di kgothaletša boitshwaro bjo bobe.

¹⁹ Taba ya gore re gane dikgopolo tša lefase ga e re gore ke phošo go ithabiša. Re swanetše go ipotšiša gore: ‘Na re kgona go ba šedi gore re se ke ra nagana go swana le batho ba lefase re sa lemoge? Na re ba šedi kudu ge re kgetha dilo tšeo rena goba bana ba rena ba di balago, ba di theetšago goba ba di bogelago? Na re leka go ruta bana ba rena tsela yeo Jehofa a naganago ka yona gore ba kgone go gana dikgopolo tša lefase?’ Ge re ka tseba phapano magareng ga dikgopolo tša Jehofa le tša lefase, re ka kgona go phema “go bopega ka sebopego sa tshepedišo ye ya dilo.”

20. Ke’ng seo se tlago go bontšha ge e ba re bopša ke dikgopolo tša Modimo goba tša lefase?

²⁰ O se ke wa lebala gore go na le methopo e mebedi ya ditaba. Methopo yeo ke Jehofa le lefase la Sathane. Ke mang a bopago dikgopolo tša gago? Di bopša ke mothopo woo wena o kgethago go hwetša ditaba go wona. Ge e ba re dumelela dikgopolo tša lefase di bopa menagano ya rena re tlo thoma go dira dilo go swana le batho ba lefase. Ke ka baka leo go lego bohlokwa kudu gore re be šedi ge re kgetha dilo tšeo re di bogelago, re di balago, re di theetšago goba re naganago ka tšona.

21. Re tlo ithuta’ng sehlogong se se latelago?

²¹ Ka ge re boletše sehlogong se, e le gore re nagane go swana le Jehofa, ga se ra swanela go no gana dikgopolo tša lefase. Eupša e bile re swanetše go iphepa ka dikgopolo tša Jehofa, re leke ka gohle go nagana go swana le yena. Sehlogo se se latelago se tlo re thuša go bona kamoo re ka dirago seo.