1, 2. Ge tswalano ya rena le Jehofa e dutše e gola, re swanetše go ithuta go dira’ng? Nea mohlala.

A RE re ngwana yo monyenyane o newa mpho. Ke moka batswadi ba gagwe ba re go yena: “E re ke a leboga.” Ngwana yoo a ka no bolela mantšu ao ka gobane batswadi ba gagwe ba mmoditše gore a a bolele. Eupša ge a dutše a gola, o thoma go kwešiša tsela yeo batswadi ba gagwe ba naganago ka yona le gore go bohlokwa go leboga batho ba bangwe. Ga bjale ga a sa botšwa gore a leboge eupša o no leboga ka go tšwa pelong. Ka baka la’ng? Ka gobane ga bjale o tseba bohlokwa bja go leboga.

² Ka mo go swanago, ge re be re thoma go tseba therešo, re ile ra ithuta bohlokwa bja go kwa melao ya Jehofa. Eupša ge tswalano ya rena le Jehofa e dutše e gola, re ithuta ka mo go oketšegilego ka Jehofa, ra tseba dilo tšeo a di ratago le tšeo a sa di ratego gotee le kamoo a lebelelago ditaba tše di fapafapanego ka gona. Ge re ithuta go lebelela dilo go swana le Jehofa e bile re dira diphetho tše di dumelelanago le thato ya gagwe, re bontšha gore re nagana go swana le yena.

3. Ke ka baka la’ng ka dinako tše dingwe go ka ba thata go nagana go swana le Jehofa?

³ Le ge go ithuta go nagana go swana le Jehofa go kgahliša, ka dinako tše dingwe go ka ba thata ka gobane ga se ra phethagala. Ka  mohlala, re ka hwetša go le thata go kwešiša tsela yeo Jehofa a lebelelago go itshwara gampe ka tša thobalano, go rata dilo tše di bonagalago, modiro wa go ruta ba bangwe Beibele, go diriša madi gampe goba dilo tše dingwe. Ka gona, re ka thušwa ke’ng gore re tšwele pele re lebelela dilo go swana le Jehofa? Le gona go dira seo go swanetše go kgoma bjang dilo tšeo re di dirago gona bjale le tšeo re tlago go di dira nakong e tlago?

4. Mantšu a Paulo ao a rego: ‘Fetolang menagano ya lena’ a akaretša go dira’ng?

⁴ Bala Baroma 12:2. Lengwalong le moapostola Paulo o hlalosa seo re swanetšego go se dira gore re ithute go nagana go swana le Jehofa. Sehlogo se se fetilego se re thušitše go kwešiša gore e le gore re “[lese] go bopega ka sebopego sa tshepedišo ye ya dilo,” re swanetše go gana go amogela dikgopolo le mekgwa ya lefase. Eupša Paulo o boletše le gore re swanetše “go fetola menagano ya [rena].” Go dira bjalo go akaretša go ithuta Lentšu la Modimo e le gore re kwešiše dikgopolo tša gagwe, re naganišiše ka tšona, ke moka re dumelelanye dikgopolo tša rena le tša Modimo.

5. Na go na le phapano magareng ga go ithuta le go no kga ka godimo ge re bala? Hlalosa.

⁵ Go ithuta ga se go no kga ka godimo ge re bala goba go no thalela dikarabo tša dipotšišo. Ge re ithuta re lebelela gore seo re ithutago sona se re botša eng ka Jehofa, ditsela tša gagwe le kamoo a naganago ka gona. Re leka go kwešiša gore ke ka baka la eng Modimo a re laela gore re dire dilo tše itšego gomme tše dingwe a re laela gore re se ke ra di dira. Le gona re swanetše go itlhahloba gore re bone gore ke diphetogo dife tšeo re swanetšego go dira maphelong a rena le tseleng yeo re naganago ka yona. Ke nnete gore go ka no se kgonege gore re naganišiše ka dintlha tše ka moka nako e nngwe le e nngwe ge re ithuta. Eupša re tla holega ge re ka fetša nako re naganišiša ka seo re se badilego. Re ka dira seo ka go dira gore nako yeo re e fetšago re bala e lekane le nako yeo re e fetšago re naganišiša.​—Ps. 119:97; 1 Tim. 4:15.

6. Go direga’ng ge re naganišiša ka Lentšu la Modimo?

⁶ Ge re naganišiša ka Lentšu la Modimo ka mehla, go direga selo se itšego se se kgahlišago. Re ‘itlhatselela’ goba re ikgodiša gore tsela ya Jehofa ya go dira dilo e phethagetše. Re thoma go lebelela dilo ka tsela yeo a di lebelelago ka yona, ke moka ra nagana go swana le yena. Menagano ya rena e a ‘fetoga’ gomme ra thoma go nagana ka tsela e fapanego. Ganyenyane-ganyenyane re tla thoma go nagana go swana le Jehofa.

7, 8. (a) Jehofa o lebelela bjang dilo tše di bonagalago? (Bona diswantšho tšeo di lego mathomong a sehlogo.) (b) Ge e ba re lebelela dilo go swana le Jehofa, ke’ng seo ka mehla e tla bago sa bohlokwa go rena?

⁷ Dilo tšeo re di naganago ga di kgome feela tsela yeo re ikwago ka yona eupša di kgoma le ditiro tša rena. (Mar. 7:21-23; Jak. 2:17) A re ithuteng ka mehlala e sego kae gore re kgone go kwešiša taba ye gakaone. Ka mohlala, Diebangedi di re bontšha gabotse kamoo Jehofa a ikwago ka gona ka dilo tše di bonagalago. Ge Modimo a be a kgetha batho bao e bego e tlaba batswadi ba Morwa wa gagwe, o ile a kgetha batho bao ba bego ba se na sa bona. (Lef. 12:8; Luka 2:24) Ka morago ga gore Jesu a belegwe, Maria o ile “a mo latša legopong, gobane ba be ba se na phapoši lefelong la baeti.” (Luka 2:7) Ge nkabe Jehofa a be a nyaka, o be a ka kgonthišetša gore Morwa wa gagwe o belegelwa lefelong le lengwe le le kaone kudu. Eupša selo sa bohlokwa kudu go yena e be e le gore Jesu a godišetšwe lapeng leo a bego a tla hlokomelwa moyeng le go godišwa gabotse.

⁸ Go tšwa pegong ye ya Beibele, re kgona go bona kamoo Jehofa a lebelelago dilo tše di bonagalago. Batswadi ba bangwe ba nyaka gore bana ba bona ba be le dilo tše dintši tše di bonagalago,  gaešita le ge seo se ka dira gore tswalano ya bona le Jehofa e senyege. Eupša go molaleng gore selo sa bohlokwa kudu go Jehofa ke tswalano ya rena le yena. Na o lebelela dilo go swana le Jehofa? Ditiro tša gago di bontšha’ng?​—Bala Baheberu 13:5.

9, 10. Re ka bontšha bjang gore re lebelela dilo go swana le Jehofa ge go tliwa tabeng ya go kgopiša ba bangwe?

⁹ Mohlala o mongwe ke tsela yeo Modimo a lebelelago taba ya go kgopiša ba bangwe. Jesu o itše: “Mang le mang yo a kgopišago yo mongwe wa ba banyenyane ba bao ba ntumelago, go be go ka ba kaone ge lwala la go swana le leo le dikološwago ke pokolo le be le ka tlemelelwa molaleng wa gagwe gomme a lahlelwa ka lewatleng.” (Mar. 9:42) Mantšu a a bontšha gore Jesu o be a sa tšeele fase taba ya go kgopiša ba bangwe. Ka ge Jesu a ile a ekiša semelo sa Tatagwe ka mo go phethagetšego, re ka kgodišega gore Jehofa le yena o ikwa ka mo go swanago ka motho le ge e le ofe yoo a kgopišago yo mongwe wa balatedi ba Jesu ka go se naganele ba bangwe.​—Joh. 14:9.

¹⁰ Na re lebelela dilo go swana le Jehofa le Jesu? Na re nagana go swana le bona? Ditiro tša rena di bontšha’ng? Ka mohlala, a re re o rata mohuta o itšego wa diaparo goba go itokiša ka tsela e itšego. O tla dira’ng ge e ba o lemoga gore dilo tšeo di ka kgopiša ba bangwe ka phuthegong goba tša dira gore ba bangwe ba be le dikganyogo tše di fošagetšego? Na tsela yeo o ratago bana babo rena le dikgaetšedi e tla dira gore o pheme go itokiša le go apara ka tsela yeo o e ratago?​—1 Tim. 2:9, 10.

11, 12. Go lebelela dilo tše mpe ka tsela yeo Modimo a di lebelelago ka yona gotee le go ba le boitshwaro go tla re thuša bjang gore re se ke ra dira dilo tše mpe?

¹¹ Mohlala wa boraro ke gore Jehofa o hloile go se loke. (Jes. 61:8) Jehofa o a tseba gore ka ge re se ra phethagala ka dinako tše dingwe re nagana dilo tše di fošagetšego, eupša o re kgothaletša gore re hloye dilo tše mpe. (Bala Psalme 97:10.) Ge re naganišiša ka mabaka ao a dirago gore Jehofa a hloye dilo tše mpe, seo se tlo re thuša gore re lebelele dilo go swana le yena gomme sa re thuša le go gana go dira dilo tše mpe.

¹² Ge re ka ithuta go lebelela dilo tše mpe go swana le Jehofa, seo se tlo re thuša go bona gore dilo tše itšego di fošagetše le ge Beibele e sa re botše ka go lebanya. Ka mohlala, go bina ga motho a dutše diropeng tša motho yo mongwe ke mokgwa o gobogilego woo o thomago go tlwaelega. Ba bangwe ba ka ipotša gore mokgwa woo ga o na bothata, ba bolela gore seo ba se dirago ga se swane le go ba le thobalano. * Eupša Modimo o ikwa bjang ka ditiro tše bjalo? Gopola gore Jehofa o šišimišwa ke selo se sengwe le se sengwe se sebe. Anke re lekeng ka gohle go sepelela kgole le dilo tše mpe ka go ithuta go ba le boitshwaro gotee le go hloya seo Jehofa a se hloilego.​—Baroma 12:9.

13. Go nagana e sa le pele ka tsela yeo Jehofa a lebelelago dilo ka yona go ka kgoma bjang diphetho tšeo re tlago go di dira nakong e tlago?

¹³ Ge re ithuta, re swanetše go nagana ka tsela yeo Jehofa a lebelelago dilo ka yona, ka gobane seo se ka re thuša gore re dire diphetho tše dibotse nakong e tlago. Ge re ka dira bjalo, re ka se ikhwetše re le tlalelong ge re kopana le boemo bjo bo nyakago gore re dire phetho kapejana. (Die. 22:3) Ela hloko e mengwe ya mehlala ya ka Beibeleng.

14. Re ithuta’ng tabeng ya gore Josefa o ile a gana ge mosadi wa Potifara a be a mo goketša gore a robale le yena?

¹⁴ Josefa o ile a bontšha gore o be a naganne e sa le pele ka tsela yeo Jehofa a lebelelago taba ya  gore banyalani ba botegelane. O ile a bontšha se ka go gana kapejana ge mosadi wa Potifara a be a mo goketša gore a robale le yena. (Bala Genesi 39:8, 9.) Go oketša moo, tsela yeo a ilego a araba mosadi wa Potifara e be e bontšha gore o be a nagana go swana le Modimo. O itše: “Nka dira bjang bobe bjo bjo bogolo gakaakaa gomme ka direla Modimo sebe?” Wena o ka dira’ng ge o kopana le maemo a bjalo? O tla dira’ng ge motho yo o šomago le yena a thoma go bontšha gore o a go kganyoga? Goba o tla dira’ng ge o ka romelwa melaetša ya thobalano goba diswantšho tša batho ba sa aparago? * Ge e ba re šetše re ithutile ka tsela yeo Jehofa a lebelelago dilo tšeo ka yona e bile re šetše re dirile phetho ya seo re tlago go se dira ge teko e tšwelela, go tla ba bonolo kudu gore re dire se se nepagetšego.

15. Re ka dira’ng gore re dule re botegela Jehofa go swana le Baheberu ba bararo?

¹⁵ Ga bjale a re lebeleleng mohlala wa Baheberu ba bararo e lego, Shaderaka, Meshaka le Abedinego. Ge Kgoši Nebukadinetsara a be a laela gore ba rapele seswantšho seo a bego a se dirile, ba ile ba gana ba tiišitše. Go gana ga bona ba tiišitše go be go bontšha gore ba be ba kile ba ipha nako ya go naganišiša ka seo ba swanetšego go se dira gore ba botegele Jehofa. (Ek. 20:4, 5; Dan. 3:4-6, 12, 16-18) O tla dira’ng ge motho yo a go hirilego a ka go kgopela gore o ntšhe moneelo wa moletlo o itšego wo o sepedišanago le bodumedi bja maaka? Go e na le gore o letele gore maemo a a tšwelele pele, go re’ng gona bjale o sa naganišiše ka tsela yeo Jehofa a lebelelago maemo a bjalo ka yona? Ke moka ge maemo a bjalo a tšwelela, go tla ba bonolo gore o bolele le go dira se se nepagetšego go swana le Baheberu bao ba bararo.

16. Go kwešiša gabotse tsela yeo Jehofa a lebelelago dilo ka yona go tla re thuša bjang go itokišeletša boemo bja tšhoganetšo bja tša kalafo?

¹⁶ Go nagana e sa le pele ka bohlokwa bja go dula re botega go ka re thuša ge re swanetše go kgetha kalafo e itšego ge re le maemong a tšhoganetšo. Le ge re ikemišeditše go se dumele go tšhelwa madi goba dikarolo tša wona tše dikgolo tše nne, dikalafo tše dingwe tšeo di akaretšago go dirišwa ga madi di nyaka motho a dira phetho yeo e theilwego melaong ya motheo ya Beibele yeo e bontšhago kamoo Jehofa a lebelelago dilo ka yona tabeng ye. (Dit. 15:28, 29)  Nako e botse ya go naganišiša gabotse ka taba ye ga se ge o le sepetlele, ka gobane ka nako yeo o tla be o ekwa dihlabi e bile o swanetše go dira phetho kapelapela. Gona bjale ke nako e botse ya gore o dire nyakišišo, o tlatše karata ya gago ya madi yeo e bontšhago dikgetho tša gago ke moka o bolele le ngaka ya gago. *

17-19. Ke ka baka la’ng go le bohlokwa gore gona bjale re ithute kamoo Jehofa a lebelelago dilo ka gona? Nea mohlala.

¹⁷ Sa mafelelo, nagana kamoo Jesu a ilego a araba Petro kapejana ka gona ge Petro a be a mo nea keletšo e sego bohlale. Petro o ile a re: “Ikwele bohloko Morena.” Go bonagala Jesu a kile a naganišiša kudu ka seo Modimo a nyakago a se dira le go naganišiša ka Mangwalo ao a bego a bolela ka bophelo bja gagwe le lehu la gagwe. Go naganišiša ka dilo tšeo go ile gwa mo nea matla a gore a dule a botegela Jehofa le go neela bophelo bja gagwe e le sehlabelo bakeng sa rena ka moka.​—Bala Mateo 16:21-23.

¹⁸ Lehono Modimo o nyaka gore batho ba gagwe ba be le tswalano e botse le yena e bile ba dire sohle seo ba ka se kgonago go botša ba bangwe ditaba tše dibotse. (Mat. 6:33; 28:19, 20; Jak. 4:8) Batho ba bangwe bao ba ipotšago gore ba a re thuša ba ka leka go re šitiša, go swana le ge Petro a ile a leka go šitiša Jesu. Ka mohlala, o tla dira’ng ge e ba motho yo a go hirilego a nyaka go go nea maemo a godimo mošomong le go go okeletša mogolo, eupša wa lemoga gore maemo ao a tlo go šitiša go ya dibokeng le tšhemong? Goba o tla dira’ng ge e ba o tsena sekolo gomme o newa sebaka sa gore o tloge gae o ye lefelong le lengwe gore o yo tšwetša pele dithuto tša gago? Na ka nako yeo e tla ba gona o rapelago, o dirago nyakišišo, o boledišanago le ba lapa la geno goba mohlomongwe le bagolo, ke moka ya ba gona o dirago phetho? Ke ka baka la’ng gona bjale o sa ithute gore Jehofa o lebelela bjang ditaba tšeo gomme o nagane go swana le yena? Ge o ka dira bjalo, nakong e tlago ge o lebana le maemo ao, o ka no se lekege kudu. O tla tseba seo o swanetšego go se dira, ka gobane o tla ba o šetše o dirile phetho ya go dula o hlankela Jehofa.

¹⁹ Mohlomongwe o ka nagana ka maemo a mangwe ao a ka tšwelelago kapejana o sa a letela. Ke therešo gore re ka se kgone go itokišeletša boemo bjo bongwe le bjo bongwe bjo bo ka tšwelelago. Eupša ge nakong ya thuto ya motho ka noši re ka naganišiša ka tsela yeo Jehofa a lebelelago dilo, re tla kgona go gopola le go diriša seo re ithutilego sona ge re lebana le boemo bjo itšego. Ka gona ge re ithuta, a re lekeng ka gohle go ithuta kamoo Jehofa a lebelelago dilo ka gona gomme re di lebelele go swana le yena. E bile re leke go nagana kamoo go lebelela dilo go swana le yena go ka re thušago go dira diphetho tše dibotse gona bjale le nakong e tlago.

20, 21. (a) Ke ka baka la’ng re tlo thabela go ba le tokologo lefaseng le lefsa? (b) Re ka dira’ng gore re thabele bophelo gona bjale?

²⁰ Re fela pelo ya go tlo phela lefaseng le lefsa. Ba bantši ba rena re na le kholofelo ya go tlo phela ka mo go sa felego lefaseng la Paradeise. Ge Mmušo wa Modimo o tla be o buša, batho ba ka se sa welwa ke mathata. Gaešita le ka nako yeo, batho ba tla be ba sa na le tokologo ya go ikgethela. Motho yo mongwe le yo mongwe o tla dira dikgetho go ya ka seo a se ratago.

²¹ Eupša tokologo yeo e tla be e lekanyeditšwe. Baloki ba tla hlahlwa ke melao ya Jehofa le tsela ya gagwe ya go nagana ge ba kgetha magareng ga se se lokilego le se se sa lokago. Seo se tla tliša khutšo gomme sa re thabiša kudu. (Ps. 37:11) Gona bjale re ka thaba ge re ka katanela go nagana go swana le Jehofa.