JESU o kile a re: “Go na le lethabo le legolo go neeng go feta go amogeleng.” (Dit. 20:35) Taba ye e šoma gape le go tswalano ya rena le Jehofa. Ke ka baka la’ng re re’alo? Jehofa o re neile dimpho tše dintši tšeo di dirago gore re thabe, eupša re ka thaba kudu ge re ka nea Jehofa mpho. Re ka mo nea mpho efe? Diema 3:9 e re: “Godiša Jehofa ka dilo tša gago tše bohlokwa.” ‘Dilo tša rena tše bohlokwa’ ke’ng? Ke nako ya rena, ditalente, matla goba bokgoni gotee le dilo tša rena tšeo di bonagalago. Ge re ka diriša dilo tše go thekga borapedi bja Jehofa, re tla be re mo nea mpho gomme seo se tla dira gore re thabe kudu.

Ge go tliwa tabeng ya dilo tše di bonagalago, ke’ng seo se ka re thušago gore re se ke ra lebala go nea Jehofa mpho? Moapostola Paulo o ile a botša Bakriste ba Korinthe gore ba “boloke se sengwe [goba tšhelete] ka thoko,” gore ba tle ba neele. (1 Bakor. 16:2) O ka hwetša kae ditaba ka botlalo tša mabapi le mekgwa yeo e dirišwago go ntšha moneelo lefelong la mo o dulago? Bona lepokisi leo le lego ka mo tlase.

Dinageng tše dingwe ga go kgonege gore re romele mokgatlo moneelo re diriša Inthanete. Eupša ditaba tše di oketšegilego mabapi le mekgwa e mengwe ya go ntšha moneelo di hwetšagala karolong ya go ntšha meneelo go jw.org. Dinageng tše dingwe, ge o le karolong yeo, go na le moo go arabjago dipotšišo tšeo batho ba bantši ba di botšišago mabapi le go ntšha meneelo.