1, 2. (a) Selo se bohlokwahlokwa go rena ke’ng? (b) Ke ditherešo dife tšeo re di tšeelago godimo, gona ka baka la’ng? (Bona diswantšho tše di lego ka mo godimo.)

SELO se bohlokwahlokwa go wena ke’ng? Na o be o ka nea motho yo mongwe selo seo gomme yena a go nea selo seo se se nago mohola? Go bahlanka ba Jehofa bao ba ineetšego, dikarabo tša dipotšišo tše di bonolo. Selo se bohlokwahlokwa go rena ke tswalano yeo re nago le yona le Jehofa, le gona re ka se dumelele selo le ge e le sefe se re tšeela yona. Le gona re tšeela godimo therešo ya Beibele ka ge e dira gore re be le segwera se sebotse le Tatago rena wa legodimong.—Bakol. 1:9, 10.

² Nagana feela ka dilo ka moka tšeo Mohlahli wa rena yo Mogolo a re rutago tšona ka Lentšung la gagwe e lego Beibele! O re utollela therešo ka seo leina la gagwe le se bolelago le dika tša gagwe tše dibotse. O re botša ka topollo, yeo a re neilego yona ka lerato a diriša Morwa wa gagwe e lego Jesu. Le gona Jehofa o re botša ka Mmušo wa Mesia, e bile o neile batlotšwa kholofelo ya go yo phela legodimong gomme “dinku tše dingwe” a di nea kholofelo ya go tlo phela Paradeiseng mo lefaseng. (Joh. 10:16) Go oketša moo, o re ruta kamoo re  swanetšego go itshwara ka gona. Re tšeela godimo ditherešo tše ka gobane di re thuša gore re batamele kgauswi le Mmopi wa rena. Di dira gore re bone gore re phelela eng.

3. Na Jehofa o nyaka gore re lefe tšhelete gore re reke therešo?

³ Jehofa ke Modimo yo a ratago go nea. Ge a bona gore motho o nyaka go tseba therešo, o mo thuša gore a e tsebe. Le gona Jehofa o re neile mpho ya mahala ka go romela Morwa wa gagwe yo a mo ratago kudu gore a tlo re hwela. Le ka mohla Modimo a ka se nyake gore re lefe tšhelete gore re tsebe therešo ka yena. Ka mohlala, ge monna yo a bitšwago Simone a be a nyaka go nea Petro tšhelete gore a mo thuše go ba le matla a go nea batho moya o mokgethwa, Petro o ile a mo sola. O itše: “Eka silifera ya gago e ka fedišwa le wena gobane o naganne gore o ka hwetša mpho e sa lefelelwego ya Modimo ka tšhelete.” (Dit. 8:18-20) Ka gona, taelo yeo e rego: “Reka therešo” e ra go re’ng?

4. Sehlogong se re tlo ithuta’ng mabapi le therešo?

⁴ Bala Diema 23:23. Re ka se hwetše therešo ka Lentšung la Modimo ntle le gore re dire maiteko. Re swanetše go ikemišetša go dira selo le ge e le sefe gore re e hwetše. Go etša ge mongwadi yo bohlale wa Diema a boletše, gateetee ge re “reka” goba re hwetša “therešo,” re swanetše go hlokomela gore re se e ‘rekiše,’ goba go e loba. Anke ga bjale re kweng gore go “reka” therešo go bolela eng, le gore re ka dira eng gore re e reke. Ke moka go tseba seo go tlo re thuša gore re tšeele godimo therešo ye le go feta gomme re kgonthišetše gore re ka se tsoge re e ‘rekišitše’ le ka mohla. Go etša ge re tlo bona, go reka therešo go bohlokwa go feta selo le ge e le sefe.

5, 6. (a) Na go a kgonega go reka therešo ntle le go lefa tšhelete? Hlalosa. (b) Therešo e re hola bjang?

⁵ Le ge selo e le mahala, go ka nyakega gore re dire maiteko gore re se hwetše. Lentšu la Seheberu leo le fetoletšwego e le “reka” go Diema 23:23, gape le ka bolela gore “hwetša.” Mantšu a ka bobedi a bolela go dira maiteko goba go nea motho selo se itšego gomme yena a go nea selo se itšego seo se nago le mohola. Re ka swantšha go reka therešo ka tsela ye: A re re mmarakeng ba bapatša dipanana tša mahala. Na dipanana tšeo di tla no itlela ka mohlolo ka lapeng la gago? Aowa. Re swanetše go dira maiteko gore re ye moo mmarakeng gore re yo di tšea. Na dipanana tšeo ke mahala? Ee, eupša re swanetše go lefa ka go dira maiteko le go diriša nako ya rena go ya mmarakeng. Ka mo go swanago, ga re hloke tšhelete gore re reke therešo. Lega go le bjalo, re swanetše go dira maiteko gore re e hwetše.

⁶ Bala Jesaya 55:1-3. Mantšu a Jehofa ao a begilwego ke Jesaya a re thuša go kwešiša seo se bolelwago ke go reka therešo. Ditemaneng tše, Jehofa o swantšha lentšu la gagwe le meetse, maswi le beine. Go swana le go nwa meetse ao a tonyago le ao a hlwekilego, mantšu a Modimo a therešo a a lapološa. Le gona, go no swana le ge maswi a thuša bana gore ba gole le go ba matlafatša, mantšu a Jehofa ao a nago le phepo, a a re matlafatša le go re thuša gore re gole moyeng. Go oketša moo, mantšu a Jehofa a swana le beine. Ka kgopolo efe? Beibele e tswalanya beine le go thaba. (Ps. 104:15) Ka gona ge Jehofa a re botša gore re ‘reke beine,’ o re kgonthišetša gore go phela ka mantšu a gagwe go tla dira gore re thabe. (Ps. 19:8) Ruri ye ke tsela e botse ya go bontšha mehola yeo re ka e hwetšago ge re ithuta le go diriša mantšu a Modimo a therešo! Re ka bapiša maiteko ao le tšhelete yeo re e lefago ge re reka selo se itšego. Ka gona, anke re boleleng ka dilo tše hlano tšeo re ka swanelwago ke go di dira gore re reke therešo.

7, 8. (a) Ke ka baka la’ng re swanetše go ipha nako e le gore re reke therešo? (b) Morutwana yo mongwe wa mofsa o ile a dira boikgafo bofe gore a reke therešo, gomme mafelelo e bile afe?

⁷ Nako. Mang le mang yo a nyakago go reka  therešo o swanetše go diriša nako ya gagwe. Go nyakega nako gore o theetše molaetša wa Mmušo wa Modimo, go bala Beibele le dikgatišo tšeo di theilwego go yona, go ba le thuto ya motho ka noši le go lokišeletša diboka gotee le go ya go tšona. Re swanetše go ‘reka’ nako yeo ka go tlogela go dira dilo tšeo di sego bohlokwa. (Bala Baefeso 5:15, 16.) Go ka tšea nako e kaaka’ng gore re tsebe gabotse dithuto tša motheo tša Beibele? Seo se ithekgile ka maemo a rena. Go ithuta ka bohlale bja Jehofa, ditsela tša gagwe le mediro ya gagwe ga go fele. (Baroma 11:33) Tokollo ya mathomo ya Morokami wa Seisemane e ile ya swantšha therešo le “letšobana.” E itše: “O se ke wa fo kgotsofatšwa ke gore o kgele letšobana letee la therešo. Ge nkabe le letee le be le lekane, gona a mangwe a ka be a se gona. Dula o tsoma a mangwe.” Ka gona re ka ipotšiša gore, ‘Matšobana a ka a therešo ke a makae?’ Le ge re ka phela ka mo go sa felego, re tlo dula re ithuta dilo tše dintši ka Jehofa. Lehono, selo se bohlokwa ke gore re diriše nako ya rena ka bohlale e le gore re reke therešo e ntši kamoo re ka kgonago. Ela hloko mohlala wo wa motho yoo e lego kgale a nyaka go tseba therešo.

⁸ Mariko, * e lego mofsa wa Mojapane o ile a ya New York City, U.S.A., gore a yo tsena sekolo gona. Ka nako yeo, o be a le mokgatlong wa bodumedi woo o bego o thomile mafelelong a bo-1950 kua Japane. Kgaetšedi yo mongwe wa mmulamadibogo o ile a kopana le Mariko a le tšhemong ka ntlo le ntlo. Ge Mariko a be a thoma go ithuta Beibele, o ile a thaba kudu moo a ilego a kgopela kgaetšedi yoo gore a ithute Beibele le yena gabedi ka beke. Le ge Mariko a be a dula a swaregile sekolong, e bile a šoma mošomo wa nakwana, gateetee o ile a thoma go ya dibokeng. Le gona o ile a tlogela go fetša nako e ntši dilong tšeo a bego a itapološa ka tšona e le gore a reke nako ya go ithuta therešo. Go dira boikgafo bjoo go ile gwa mo thuša gore a gole ka pela moyeng. Pele ngwaga o ka fela, o ile a kolobetšwa. Ka morago ga dikgwedi tše tshela, ka 2006, o ile a thoma go bula madibogo, e bile le gona bjale e sa le mmulamadibogo.

9, 10. (a) Go reka therešo go kgoma bjang tsela yeo re lebelelago dilo tšeo di bonagalago? (b) Ke dilo dife tšeo kgarebe e nngwe e ilego ya di tlogela, gona e ikwa bjang ka seo?

⁹ Dilo tše di bonagalago. E le gore re reke therešo, re ka swanelwa ke go tlogela mešomo ya maemo yeo re e šomago. Ge Jesu a be a kgopela Petro le Andrea bao ba bego ba šoma go rea dihlapi gore e be “barei ba batho,” ba ile ba “tlogela malokwa a bona.” (Mat. 4:18-20) Ke nnete gore ba bantši ba bao ba ithutago therešo lehono ba ka se no tlogela mešomo ya bona. Ba swanetše go šoma gore ba hlokomele malapa a bona. (1 Tim. 5:8) Lega go le bjalo, batho bao ba ithutago therešo ba swanetše go fetoša tsela yeo ba lebelelago dilo tše di bonagalago le go fetoša dilo tšeo di tlago pele maphelong a bona. Jesu o boletše se gabotse ge a be a re: “Tlogelang go ipolokela matlotlo lefaseng. . . . Go e na le moo, ipolokeleng matlotlo legodimong.” (Mat. 6:19, 20) Ka mohlala, nagana ka seo kgarebe e nngwe yeo e bitšwago Maria e ilego ya se dira.

¹⁰ Maria o be a rata go raloka golf le pele a ka thoma go tsena sekolo. O ile a tšwela pele a kaonefatša bokgoni bja gagwe bja go raloka golf ge a be a le sekolong sa sekontari gomme mafelelong a hwetša sebaka sa go ya yunibesithi ntle le go lefa sente. Golf e be e le bophelo bja gagwe, le gona pakane ya gagwe e be e le gore a tle a thabele bophelo bja maemo e le moraloki wa golf wa go tuma. Ke moka Maria o ile a thoma go ithuta Beibele, gomme a rata ditherešo tšeo a bego a ithuta tšona. O ile a kgahlwa ke diphetogo tšeo therešo e mo thušitšego gore a di dire bophelong bja gagwe. O itše: “Ge ke be ke dutše ke fetoša bophelo bja ka gore ke phele ka melao ya Beibele, ke be ke thaba kudu.” Maria o ile a bona gore  go be go ka se kgonege gore a dire dilo tša moya le tša nama ka nako e tee. (Mat. 6:24) O ile a tlogela pakane yeo e bego e le kgale a ipeetše yona ya go ba moraloki wa golf wa go tuma. Eupša mafelelo a gore a reke therešo ke ao a kgahlišago. Ga bjale ke mmulamadibogo e bile o thabela bophelo bjo a bo hlalosago e le “bophelo bjo bo thabišago kudu le bjo bo nago le morero.”

11. Ge re reka therešo, batho ba bangwe bao re ba ratago ba ka dira’ng?

¹¹ Bagwera le ba leloko. Ge re kgetha go phela ka therešo ya Beibele, seo se ka dira gore re se sa fetša nako e ntši le bagwera le ba leloko. Jesu o re thušitše go kwešiša lebaka la seo ge a be a rapelela balatedi ba gagwe ka gore: “Ba kgethagatše ka therešo; lentšu la gago ke therešo.” (Joh. 17:17) Polelwana “ba kgethagatše” e ka bolela le gore “ba arole.” Ge re amogela therešo, re aroganywa le batho ba lefase le ka gobane ga re sa phela go swana le bona. Batho ba thoma go re lebelela ka tsela e fapanego ka gobane boitshwaro bja rena bo fetogile e bile re phela ka melao ya therešo ya Beibele. Le ge re ka leka ka gohle gore re dule re na le tswalano e botse le bagwera le ditho tša lapa, ba bangwe ba ka thoma go se sa re rata goba ba ganetša bodumedi bja rena. Seo ga se re makatše ka gobane Jesu o itše: “Ka kgonthe manaba a motho e tla ba batho ba lapeng la gabo.” (Mat. 10:36) Le gona o ile a re kgodiša gore mehola ya go reka therešo ke e megolo kudu go feta tefo le ge e le efe yeo re ka e lefago.​—Bala Mareka 10:28-30.

12. Monna yo mongwe wa Mojuda o ile a lefa tefo efe gore a reke therešo?

¹² Aaron, e lego rakgwebo wa Mojuda, o ile a rutwa go tloga e sa le yo monyenyane gore leina la Modimo ga le bitšege. Eupša Aaron o be a nyaka go tseba therešo. O ile a thaba kudu ge Hlatse e nngwe ya Jehofa e mmontšha gore ka go kopanya ditumanoši tše itšego go ditumammogo tše nne tša Seheberu tša leina la Modimo, mmiletšo e tlo ba “Jehofa.” O ile a thaba kudu gomme a ya sinagogeng gore a yo botša baruti seo a ithutilego sona. Ba ile ba arabela ka tsela yeo Aaron a bego a se a e letela. Go e na le gore ba thabe le yena ka gore o ithutile selo se sefsa ka leina la Modimo, ba ile ba mo tshwela ka mare gomme ba mo raka. Lapa la gabo le ile la se sa mo swara gabotse. O ile a tšwela pele a reka therešo gomme ya ba Hlatse ya Jehofa yeo e nago le sebete bophelo bja gagwe ka moka. Go swana le Aaron, re swanetše go dula re tseba gore ge re ithuta therešo, tswalano ya rena le ba leloko le bagwera e ka fetoga.

13, 14. Re swanetše go dira diphetogo dife tseleng yeo re naganago ka yona le kamoo re itshwarago ka gona ge e ba re nyaka go reka therešo? Nea mohlala.

¹³ Tsela yeo re naganago ka yona le kamoo re itshwarago ka gona. E le gore re amogele therešo gomme re phele ka melao ya boitshwaro ya Beibele, re swanetše go fetoša tsela yeo re naganago ka yona le yeo re itshwarago ka yona. Ela hloko seo Petro a se ngwadilego mabapi le diphetogo tšeo, o itše: “Bjalo ka bana ba ba kwago, lesang go bopša ke dikganyogo tše le bego le na le tšona pele ge le be le hloka tsebo, eupša . . . ebang ba bakgethwa boitshwarong bja lena ka moka.” (1 Pet. 1:14, 15) Batho ba bantši motseng wa Korinthe ba be ba se na boitshwaro. Ka gona batho bao ba bego ba nyaka go reka therešo ba be ba swanetše go dira diphetogo tše dikgolo maphelong a bona. (1 Bakor. 6:9-11) Ka mo go swanago, le lehono batho ba bantši ba tlogetše boitshwaro bjo bobe e le gore ba reke therešo. Petro o ile a tšwela pele a gopotša Bakriste ba mehleng ya gagwe gore: “Nako yeo e fetilego e lekane gore le ka be le dirile thato ya ba ditšhaba ge le be le tšwela pele ditirong tša boitshwaro bjo bo hlephilego, dikganyogong tše di sa laolegego, go nweng ka mo go feteletšego, menyanyeng ya mašata, diphadišanong tša go nwa le borapeding bja medimo ya diswantšho bjo bo šišimišago.”​—1 Pet. 4:3.

¹⁴ Ka mohlala, Devynn le Jasmine ba feditše  mengwaga e mentši e le matagwa. Le ge Devynn a be a na le bokgoni bja go boloka dipego tša ditšhelete tša kgwebo, botagwa bja gagwe bo be bo dira gore a phele a rakilwe mošomong. Jasmine yena o be a tumile ka go ba ntwadumela. Ka letšatši le lengwe ge Jasmine a be a sepelasepela tseleng a tagilwe, o ile a kopana le Dihlatse tša Jehofa tše pedi tša baromiwa. Baromiwa bao ba ile ba mo kgopela go ithuta le yena Beibele, eupša bekeng e latetšego ge ba fihla ka lapeng la Devynn, ba ile ba hwetša Jasmine le Devynn ba tagilwe. Ba be ba sa nagane gore baromiwa bao ba be ba tloga ba tshwenyegile ka bona moo e lego gore ba ka tla ka lapeng la bona. Eupša ge baromiwa bao ba boela gape go bona, ba ile ba hwetša maemo a fetogile. Go tloga thutong ya bona ya Beibele ya mathomo, Jasmine le Devynn ba ile ba ba barutwana ba Beibele ba mafolofolo gomme ba diriša seo ba ithutago sona. Pele dikgwedi tše tharo di ka fela, ba ile ba phetha ka gore ba tlogele go nwa bjala gomme ka moragonyana ga moo ba ngwadiša lenyalo la bona semolao. Batho ka moka ba ile ba tseba ka diphetogo tšeo ba di dirilego gomme seo sa dira gore ba bangwe moo motseng ba ithute ka Modimo.

15. Ke tefo efe e boima yeo re ka swanelwago ke go e lefa e le gore re reke therešo, gona ka baka la’ng?

¹⁵ Meetlo le mekgwa yeo e sego ya thewa Mangwalong. Go tlogela meetlo le mekgwa yeo e sego ya thewa Mangwalong ke tefo e nngwe e boima yeo re ka swanelwago ke go e lefa gore re reke therešo. Le ge ba bangwe ba ka hwetša go le bonolo gore ba tlogele mekgwa yeo, ba bangwe ba ka dikadika go tlogela mekgwa yeo ka gobane ba tšhaba ditho tša malapa a gabo bona, bao ba šomago le bona le bagwera ba bona. E bile ba bangwe ba ka tšhoga kudu, kudukudu ge e ba moetlo woo o akaretša go hlompha bahu bao e lego ba leloko. (Doit. 14:1) Mehlala ya batho bao ba ilego ba bontšha sebete e ka re thuša gore re dire diphetogo tšeo di nyakegago. Nagana kamoo ba bangwe ba badudi ba Efeso ba ilego ba bontšha sebete lekgolong la pele la mengwaga.

16. Bakriste ba bangwe kua Efeso ba ile ba dira’ng e le gore ba reke therešo?

¹⁶ Motse wa Efeso o be o tumile ka go ba le batho bao ba dirago maleatlana. Batho bao e bego e sa tšwa go ba Bakriste, bao ba bego ba dira maleatlana ba ile ba dira’ng gore ba tlogele mekgwa ye yeo e sego ya Mangwalo gore ba reke therešo? Beibele e hlalosa ka gore: “Ba bantši ba bao ba bego ba dira malea ba kgobokanya dipuku tša bona gomme ba di fiša pele ga mang le mang. Ba bala theko ya tšona ka moka gomme ba hwetša di bitša ditsekana tša silifera tše dikete tše masomehlano (50 000). Ka gona lentšu la Jehofa la tšwela pele le gola ka tsela e matla e bile le fenya.” (Dit. 19:19, 20) Bakriste bao ba botegago ba ile ba fiša dipuku tšeo tša go tura gomme ba hwetša ditšhegofatšo tšeo di sa bapišwego le selo.

17. (a) Ke dilo dife tšeo re ka swanelwago ke go di dira gore re reke therešo? (b) Re tlo araba dipotšišo dife sehlogong seo se latelago?

¹⁷ Wena o lefile eng gore o reke therešo? Ka moka ga rena re diriša nako ya rena gore re reke therešo. Ba bangwe ba tlogetše dilo tša bona tša manobonobo. Le gona, ba bangwe ga ba sa na tswalano e botse le ba leloko le bagwera. Ba bantši ba dirile diphetogo tseleng yeo ba bego ba nagana ka yona le go fetoša boitshwaro bja bona gomme ba tlogetše meetlo le mekgwa yeo e sego ya thewa Mangwalong. Eupša go sa šetšwe gore go boima gakaakang, re kgodišegile gore therešo ya Beibele ke yona e bohlokwa kudu go feta selo le ge e le sefe. E re nea lehumo le bohlokwahlokwa, e lego tswalano e botse le Jehofa. Ge re naganišiša ka ditšhegofatšo tšeo re bago le tšona ge re tseba therešo, re ka bona go sa kgonege gore go ka ba le motho yo a nyakago go e rekiša. Seo se ka direga bjang, le gona re ka phema bjang go dira phošo yeo e kgolo? Re tlo araba dipotšišo tše sehlogong seo se latelago.