1-2. (a) Ke’ng seo se ka re thušago gore re tšwele pele re kgotlelela mathata letšatši le letšatši? Hlalosa. (b) Re tlo ithuta ka’ng sehlogong se?

“GE KE nagana ka mathata ao ke fetilego go ona, ga ke nagane gore nkabe ke kgonne go a rwala ke nnoši.” Na o kile wa bolela mantšu a go swana le a? Ga go pelaelo gore ba bantši ba rena re kile ra a bolela. Mohlomongwe o ile wa a bolela ka morago ga gore o nagane kamoo o ilego wa kgotlelela ka gona ge o be o babja o šoro goba o hlokofaletšwe ke motho yo o mo ratago. Ge o nagana ka teko yeo o kilego wa lebeletšana le yona, o a bona gore o ile wa kgona go kgotlelela letšatši le letšatši ka ge Jehofa a ile a go thuša ka moya wa gagwe o mokgethwa gore o go nee “matla a fetago a tlwaelegilego.”—2 Bakor. 4:7-9.

² Le gona re hloka moya o mokgethwa gore o re thuše go ganetša moya wa lefase. (1 Joh. 5:19) Go oketša moo, re hloka matla a gore re lwantšhane le “madira a kgopo a moya.” (Baef. 6:12) Anke ga bjale re ithuteng ka ditsela tše pedi tšeo ka tšona moya o mokgethwa o ka re thušago go lebeletšana le mathata a. Ka morago ga moo, re tlo bolela ka seo re ka se dirago gore re holwe ka botlalo ke moya o mokgethwa.

3. Moya o mokgethwa o re nea le matla a go dira’ng?

³ Moya o mokgethwa o re nea matla a go phetha selo se sengwe le se sengwe seo re swanetšego go se dira go sa šetšwe diteko tšeo re lebeletšanego le tšona. Moapostola Paulo o ile a kgona go tšwela pele a hlankela Jehofa le ge a be a lebeletšane le diteko ka ge a be a ithekgile ka “matla a Kriste.” (2 Bakor. 12:9) Leetong la gagwe la bobedi la boromiwa, Paulo o ile a šoma ka thata go botša batho ditaba tše dibotse, gotee le go šoma ka thata gore a itlhokomele. O ile a dula kua Korinthe legaeng la Akhwila le Perisila. Akhwila le Perisila ba be ba šoma go dira ditente. Ka ge Paulo le yena a be a šoma  go dira ditente, matšatši a mangwe o be a fela a šoma le bona. (Dit. 18:1-4) Moya o mokgethwa o ile wa nea Paulo matla a gore a šome gore a itlhokomele gotee le go šoma go botša batho ditaba tše dibotse.

4. Go ya ka Bakorinthe ba Bobedi 12:7b-9, Paulo o ile a lebeletšana le teko ya mohuta mang?

⁴ Bala 2 Bakorinthe 12:7b-9. Ditemaneng tše, Paulo o be a era go re’ng ge a be a re o be a na le “mootlwa nameng?” Ge o ka hlaba ke mootlwa, o tlo kwa bohloko kudu. Ka gona Paulo o be a era gore o be a lebeletšane le teko e itšego e boima. O ile a bitša teko yeo gore ke “morongwa wa Sathane” yo a bego a dulela go mo ‘phasola’ (goba go mo itia). Mohlomongwe Sathane le batemona ba gagwe ga se bona bao ba ilego ba dira gore Paulo a be le mathata ao a bego a swana le mootlwa nameng ya gagwe. Eupša ge ba be ba lemoga gore Paulo o be a na le mathata, mohlomongwe ba ile ba leka go gakatša boemo ka go mo kweša bohloko. Seo se be se tlo swana le ge motho a sobeletša mootlwa nameng. Paulo o ile a dira’ng?

5. Jehofa o ile a araba bjang dithapelo tša Paulo?

⁵ Mathomong Paulo o be a nyaka gore Jehofa a tloše “mootlwa” woo. O itše: “Ke ile ka lopa Morena [Jehofa] ka makga a mararo . . . gore o tloge go nna.” Eupša le ge Paulo a ile a rapela Jehofa gantši, mootlwa woo ga se wa ka wa tloga. Na se se ra gore Jehofa ga se a ka a araba dithapelo tša Paulo? Aowa! O ile a di araba. Jehofa ga se a ka a tloša bothata bjoo Paulo a bego a na le bjona eupša o ile a mo nea matla a gore a kgone go bo kgotlelela. Jehofa o itše: “Matla a ka a phethagatšwa bofokoding.” (2 Bakor. 12:8, 9) Le gona Modimo o ile a thuša Paulo gore a dule a thabile le go ba le khutšo ya monagano!—Bafil. 4:4-7.

6. (a) Jehofa a ka araba bjang dithapelo tša rena? (b) Mangwalo ao a lego mo serapeng a go matlafatša bjang?

⁶ Go swana le Paulo, na o kile wa kgopela Jehofa gore a tloše bothata bjo itšego bjo o nago le bjona? Mohlomongwe o ile wa lopa Jehofa gantši, eupša bothata bjoo bja se tloge goba bja gola. Na seo se ile sa dira gore o tshwenyege ka gore go ka ba go na le phošo yeo o e diretšego Jehofa? Ge e ba go le bjalo, gopola mohlala wa Paulo. Go etša ge Jehofa a ile a araba dithapelo tša Paulo, ga go pelaelo gore le wena o tla go araba. Jehofa a ka no se tloše bothata bjo o nago le bjona, eupša a ka diriša moya o mokgethwa go go nea matla ao o a hlokago gore o kgotlelele teko yeo. (Ps. 61:3, 4) Ke therešo gore mathata a ka go ‘lahlela fase,’ eupša Jehofa a ka se go tlogele.—2 Bakor. 4:8, 9; Bafil. 4:13.

7-8. (a) Moya o mokgethwa o swana bjang le moya o fokago? (b) Moapostola Petro o ile a hlalosa bjang kamoo moya o mokgethwa o šomago ka gona?

⁷ Ke tsela efe e nngwe yeo moya o mokgethwa o re thušago ka yona? Re ka swantšha moya o mokgethwa le moya o fokago. Sekepe se ka diriša moya wo o fokago gore se kgone go fihla mo se yago gona se šireletšegile le ge go na le madimo ka lewatleng. Ka mo go swanago, le ge re na le mathata, moya o mokgethwa o re thuša go tšwela pele re hlankela Jehofa go fihlela re tsena lefaseng le lefsa.

⁸ Ka ge moapostola Petro e be e le morei wa dihlapi, o be a tseba mo gontši ka go sesiša dikepe. Ka gona ga go makatše gore ge a be a hlalosa kamoo moya o mokgethwa o šomago ka gona, o ile a diriša polelwana yeo go bonagalago e be e tswalana le go sesiša dikepe. O ngwadile gore: “Boporofeta ga se bja ka bja tlišwa ke go rata ga motho, eupša batho ba boletše se se tšwago go Modimo ge ba be ba šušumetšwa ke moya o mokgethwa.” Lentšu la Segerika leo le fetoletšwego e le “šušumetšwa” le ra gore “go išwa.”—2 Pet. 1:21.

9. Petro o be a nyaka gore batho ba nagane ka’ng ge a be a re batho bao ba ngwadilego Beibele ba be ba “šušumetšwa” ke moya o mokgethwa?

⁹ Petro o be a nyaka gore batho ba nagane ka’ng ge a be a re batho bao ba ngwadilego Beibele ba be ba “šušumetšwa” ke moya o mokgethwa? Luka yoo a ngwadilego puku ya Ditiro, o ile a diriša lentšu leo le nyakilego le swana le le la Segerika ge  a be a hlalosa sekepe seo se ‘išwago’ ke moya moo se yago gona. (Dit. 27:15) Seithuti se sengwe sa Beibele se re ge Petro a be a re bangwadi ba Beibele ba be ba “šušumetšwa” ke moya o mokgethwa, o ile a diriša polelwana yeo e bego e tla dira gore batho ba nagane ka go sesiša dikepe. Ge e le gabotse Petro o be a era gore go etša ge sekepe se išwa ke moya moo se yago gona, le bangwadi ba Beibele ba thušitšwe ke moya o mokgethwa go ngwala Beibele. Sona seithuti seo se boletše le gore: “Bangwadi ba Beibele ba be ba swana le dikepe tšeo di phurolotšego diseila tša tšona. Ba be ba ikemišeditše go dira modiro woo moya o mokgethwa o bego o ba hlahla gore ba o dire.” Jehofa o ile a kgatha tema ya gagwe. O ile a nea bangwadi bao ba Beibele moya o mokgethwa. Bangwadi ba Beibele le bona ba ile ba kgatha tema ya bona. Ba ile ba latela tlhahlo ya moya o mokgethwa.

10-11. Ke megato efe e mebedi yeo re swanetšego go e gata e le gore moya o mokgethwa o re hlahle? Nea mohlala.

¹⁰ Ke therešo gore lehono Jehofa ga a sa diriša moya wa gagwe go thuša batho go ngwala dipuku tša Beibele. Eupša o sa diriša moya woo go hlahla bahlanka ba gagwe. Jehofa o sa dutše a kgatha tema ya gagwe. Re ka dira’ng go kgonthišetša gore moya o mokgethwa o tšwele pele o re hlahla? Re swanetše go dira sohle seo re ka se kgonago gore re kgathe tema ya rena. Re ka dira seo bjang?

¹¹ Nagana ka mohlala wo. E le gore mosesiši wa sekepe a holwe ke moya o fokago, o swanetše go dira dilo tše tše pedi. Sa pele, o swanetše go bea sekepe sa gagwe moo moya o fokago gona. Ge e le gabotse, sekepe sa gagwe se ka se ye felo ge e ba a ka no se tlogela boemakepeng moo e lego kgole le mo moya o fokago gona. Sa bobedi, o swanetše go phurolla ka mo go feletšego diseila tša sekepe sa gagwe. Go molaleng gore le ge moya o ka foka, sekepe sa gagwe se ka se ye felo ge e ba diseila di se tša tlala moya. Ka mo go swanago, re tlo kgona go tšwela pele re hlankela Jehofa ge feela re thušwa ke moya o mokgethwa. E le gore moya woo o re thuše, go na le dilo tše pedi tšeo re swanetšego go di dira. Sa pele, re swanetše go dira dilo tšeo moya wa Modimo o re laelago gore re di dire. Sa bobedi,  re swanetše go dira bjalo ka ge eka re phurolla diseila tša rena ka botlalo, ka go dira sohle seo re ka se kgonago go dira dilo tšeo Jehofa a re laelago gore re di dire. (Ps. 119:32) Ge re ka gata megato ye, moya o mokgethwa o tla re thuša gore re tšwele pele re hlankela Jehofa go fihlela lefaseng le lefsa go sa šetšwe mathata ao re lebeletšanago le ona.

12. Ga bjale re tlo ithuta ka’ng?

¹² Go fihla ga bjale re ithutile ka ditsela tše pedi tšeo moya o mokgethwa o re thušago ka tšona. Re ithutile gore moya o mokgethwa o re nea matla e bile o re thuša gore re dule re botegela Jehofa ge re dutše re lebeletšane le diteko. Le gona moya o mokgethwa o a re hlahla e bile o re thuša gore re dire mošomo wo Jehofa a re neilego wona, gomme seo sa dira gore re tle re hwetše bophelo bjo bo sa felego. Ga bjale re tlo ithuta ka dilo tše nne tšeo re swanetšego go di dira e le gore re holwe ka botlalo ke moya o mokgethwa.

13. Go ya ka Timotheo wa Bobedi 3:16, 17, Beibele e ka re thuša bjang, gona rena re swanetše go dira’ng?

¹³ Sa pele, ithute Lentšu la Modimo. (Bala 2 Timotheo 3:16, 17.) Lentšu la Segerika leo le fetoletšwego e le “buduletšwe ke Modimo,” ge le fetolelwa lentšu ka lentšu le ra gore “hemetšwe ke Modimo.” Ka gona Modimo o ile a diriša moya wa gagwe go hemela goba go tsenya dikgopolo tša gagwe ka menaganong ya bangwadi ba Beibele. Ge re bala Beibele e bile re naganišiša ka seo re se badilego, dikgopolo tša Modimo di tsena ka menaganong ya rena gomme tša kgoma dipelo tša rena. Dikgopolo tšeo di dira gore re fetoše maphelo a rena gomme re phele ka tsela yeo e kgahlišago Modimo. (Baheb. 4:12) Eupša e le gore re holwe ka botlalo ke moya o mokgethwa, re swanetše go ipha nako ya go bala Beibele ka mehla le go naganišiša ka mo go tseneletšego ka seo re se badilego. Ke moka selo se sengwe le se sengwe seo re se bolelago le go se dira se tla dumelelana le Lentšu la Modimo.

14. (a) Ke ka baka la’ng re ka re dibokeng tša Bokriste ke moo moya wa Modimo o fokago gona? (b) Ke’ng seo se ka re thušago gore re holwe ka botlalo ke moya o mokgethwa ge re le dibokeng?

¹⁴ Sa bobedi, hlankela Modimo le Bakristegotee le wena. (Ps. 22:22) Ge e le gabotse, dibokeng tša Bokriste ke moo moya wa Modimo o fokago gona. (Kut. 2:29) Ke ka baka la’ng re re’alo? Ka gobane ge re bokane le Bakristegotee le rena, re rapelela moya o mokgethwa gore o be le rena, re opela dikoša tšeo di theilwego Lentšung la Modimo, e bile re theetša dipolelo tšeo di theilwego Beibeleng tšeo di newago ke bana babo rena bao ba kgethilwego ka moya o mokgethwa. Le gona wona moya woo, o thuša dikgaetšedi go lokišetša dikabelo tša tšona le go di nea. Eupša e le gore re holwe ka botlalo ke moya o mokgethwa, re swanetše go lokišetša gabotse gore re kgone go araba ge re le dibokeng. Ka go re’alo, ge re le dibokeng re tla kgona go holwa ke moya o mokgethwa go no swana le sekepe seo se thušwago ke moya o fokago ge diseila tša sona di phurolotšwe gabotse.

15. Moya o mokgethwa o re thuša bjang ge re ruta batho ka Modimo?

¹⁵ Sa boraro, ruta batho ka Modimo. Ge re diriša Beibele go ruta batho le go ba botša ka Modimo, re dumelela moya o mokgethwa gore o re thuše. (Baroma 15:18, 19) Eupša e le gore o holwe ke moya o mokgethwa ka botlalo, o swanetše go dula o ruta batho ka Modimo gomme o diriše Beibele nako e nngwe le e nngwe ge go kgonega. Dipoledišano tša mohlala tšeo di lego ka Pukwaneng ya Seboka sa Bophelo bja Rena le Bodiredi di ka go thuša gore o kgone go boledišana le batho gabotse ge o ba ruta ka Modimo.

16. Tsela ya go lebanya yeo e ka re thušago go hwetša moya o mokgethwa ke efe?

¹⁶ Sa bone, rapela Jehofa. (Mat. 7:7-11; Luka 11:13) Tsela ya go lebanya yeo re ka hwetšago moya o mokgethwa ke ka go rapela Jehofa gomme re mo kgopele wona. Ga go na selo seo se ka thibelago dithapelo tša rena gore di fihle go Jehofa, goba go re thibela go hwetša mpho ya Modimo ya moya o mokgethwa, e ka ba kgolego le ge e le efe goba  Sathane. (Jak. 1:17) Re swanetše go rapela bjang gore re holwe ka botlalo ke moya o mokgethwa? E le gore re hwetše karabo, anke re hlahlobišišeng ka botlalo taba ya thapelo ka go ithuta ka papišo yeo e hwetšagalago feela Ebangeding ya Luka. *

17. Re ithuta’ng ka thapelo papišong ya Jesu yeo e lego go Luka 11:5-9, 13?

¹⁷ Bala Luka 11:5-9, 13. Papišo ye ya Jesu e bontšha kamoo re swanetšego go rapelela moya o mokgethwa ka gona. Monna yo go bolelwago ka yena papišong ye o ile a hwetša seo a bego a se rapelela “ka baka la go phegelela ga gagwe ka sebete.” Ga se a ka a tšhaba go kgopela mogwera wa gagwe thušo gaešita le ge e be e le bošegogare. * Jesu o rile papišo ye e re ruta’ng ka thapelo? O rile: “Tšwelang pele le kgopela gomme le tla newa; tšwelang pele le tsoma gomme le tla hwetša; tšwelang pele le kokota gomme le tla bulelwa.” Ka gona re ithuta’ng tabeng ye? Re ithuta gore e le gore moya o mokgethwa o re thuše, re swanetše go o rapelela ka go phegelela.

18. Go ya ka papišo ya Jesu, ke ka baka la’ng re ka kgodišega gore Jehofa o tla re nea moya wa gagwe o mokgethwa?

¹⁸ Papišo ya Jesu e re thuša gape go kwešiša gore ke ka baka la eng Jehofa a tla re nea moya o mokgethwa. Monna yo go bolelwago ka yena papišong ye o be a nyaka go hlokomela moeng wa gagwe gabotse. O be a ikwa a swanetše go nea moeng yoo wa gagwe dijo yo a bego a tlile bošegogare, eupša o be a se na selo. Jesu o rile moagišani wa gagwe o ile a mo nea senkgwa ka gobane a ile a mo kgopela sona a phegeletše ka sebete. Jesu o be a re ruta’ng ka papišo ye? O be a re thuša go bona gore ge e ba motho yo a sego a phethagala a kgona go nea moagišani wa gagwe thušo ge a mo kgopela a phegeletše, ruri ga go pelaelo gore Tatago rena wa legodimong o tla nea bao ba mo kgopelago moya o mokgethwa ka go phegelela! Ka gona re ka kgodišega gore Jehofa o tla araba dithapelo tša rena ge e ba re mo kgopela gore a re nee moya o mokgethwa.—Ps. 10:17; 66:19.

19. Ke ka baka la’ng re ka kgodišega gore re tla kgona go kgotlelela mathata?

¹⁹ Re ka kgodišega gore re tla kgona go kgotlelela mathata gaešita le ge Sathane a sa kgaotše go re hlasela. Ke ka baka la’ng re ka kgodišega? Ka gobane moya o mokgethwa o re thuša ka ditsela tše tše pedi. Sa pele, o re nea matla ao re a hlokago e le gore re kgone go kgotlela mathata. Sa bobedi, o re nea matla a gore re tšwele pele re hlankela Jehofa go fihla re tsena lefaseng le lefsa. Anke re ikemišetšeng go holwa ka botlalo ke moya o mokgethwa!