1. Go ya ka Mateo 28:18-20, ke taelo efe yeo Jesu a ilego a e nea barutiwa ba gagwe?

KA MORAGO ga gore Jesu a tsošwe bahung, o ile a iponagatša go barutiwa ba gagwe bao ba bego ba bokane kua Galilea. Go be go na le selo se bohlokwa seo a bego a nyaka go ba botša sona. O be a nyaka go ba botša eng? O be a nyaka go ba nea taelo yeo e lego go Mateo 28:18-20.—Bala.

2. Re tlo araba dipotšišo dife sehlogong se?

² Taelo yeo Jesu a ilego a e nea ya go dira batho barutiwa e šoma le go bahlanka ba Modimo ka moka lehono. Ka gona, a re boledišaneng ka dipotšišo tše tharo tšeo di lego mabapi le kabelo yeo Jesu a re neilego yona. Sa pele, re swanetše go dira’ng ka ntle le go no ruta batho dilo tšeo Modimo a nyakago ba di dira? Sa bobedi, bagoeledi ka moka ka phuthegong ba ka thuša bjang morutwana wa Beibele go dira tšwelopele? Sa boraro, re ka thuša bjang bana babo rena le dikgaetšedi bao ba fodilego moyeng gore ba boele ba dire modiro wa go dira batho barutiwa?

3. Ke taelo efe yeo Jesu a ilego a e nea ge a be a re laela go dira batho barutiwa?

³ Ditaelo tšeo Jesu a ilego a di nea di kwagala gabotse. Re swanetše go ruta batho dilo tšeo a re laetšego tšona. Eupša go na le ntlha e bohlokwa yeo re sa swanelago go e lebala. Jesu ga se a re: ‘Le ba rute dilo tšohle tšeo ke le laetšego tšona.’ Eupša o itše: Le ba rute “go boloka dilo tšohle tšeo ke le laetšego tšona.” E le gore re kwe taelo ye ya Jesu, re swanetše go ruta morutwana seo a swanetšego go se dira le go mmontšha gore a se dire bjang. (Dit. 8:31) Ke ka baka la’ng re swanetše go dira seo?

4. Go boloka taelo go ra go re’ng? Nea mohlala.

 ⁴ Go “boloka” taelo go ra gore re swanetše go e kwa. Go bontšha kamoo re ka rutago motho go boloka goba go kwa dilo tšeo Jesu a re laetšego tšona, nagana ka mohlala wo. Motho yo a rutago yo mongwe go otlela o mo thuša bjang go latela melao ya tsela? Sa pele, o ruta motho yoo melao ya tsela yeo a swanetšego go e latela ge a otlela. Eupša e le gore a rute motho yoo go latela melao ya tsela, go na le selo se sengwe gape seo a swanetšego go se dira. O swanetše go sepela le motho yoo gomme a mmone ge a dutše a otlela e le gore a mo thuše go diriša seo a ithutilego sona. Re ka ithuta’ng mohlaleng wo?

5. (a) Go ya ka Johane 14:15 le Johane wa Pele 2:3, re swanetše go ruta barutwana ba Beibele go dira’ng? (b) Re ka thuša bjang batho bao re ithutago le bona go latela melao ya motheo ya Beibele?

⁵ Ge re ithuta Beibele le batho ba bangwe, re ba ruta seo Modimo a nyakago re se dira. Eupša ga se gwa swanela go no felela moo. Re swanetše go ba ruta le go diriša seo ba ithutago sona. (Bala Johane 14:15; 1 Johane 2:3.) Re ka ba bontšha ka mohlala wa rena kamoo ba ka dirišago melao ya motheo ya Beibele ge ba le sekolong, ge ba le mošomong goba ge ba itapološa. E bile re ka ba botša ka selo seo se ilego sa re diragalela go bontšha kamoo go latela melao ya Beibele go ilego gwa re šireletša kotsing goba kamoo go re thušitšego go dira phetho e botse. Ge re na le batho bao re ithutago le bona, re ka rapela Jehofa ra mo kgopela gore a ba thuše ka moya wa gagwe o mokgethwa.—Joh. 16:13.

6. Go ruta ba bangwe go kwa ditaelo tša Jesu go akaretša’ng?

⁶ Go ruta ba bangwe go kwa ditaelo tša Jesu go akaretša’ng? Re swanetše go thuša batho bao re ithutago le bona gore ba nyake go dira barutiwa. Batho ba bangwe bao re ithutago le bona ba ka ba ba boifa go botša batho ba bangwe ditaba tše dibotse. Ka gona ga se ra swanela go ba felela pelo ge re ba thuša go kwešiša ditherešo tša Beibele gakaone e le gore ba be le tumelo e tiilego. Seo se tla ba kgoma dipelo gomme sa dira gore ba nyake go botša ba bangwe ditaba tše dibotse. Re ka dira’ng go thuša batho bao re ithutago le bona gore ba nyake go botša batho ba bangwe ditaba tše dibotse?

7. Re ka thuša bjang motho yo re ithutago le yena Beibele gore a nyake go botša ba bangwe ditaba tše dibotse?

⁷ Re ka botšiša motho yoo re ithutago le yena dipotšišo tša go swana le gore: “Bophelo bja gago bo kaonafetše bjang ka ge o diriša seo o ithutago sona ka Beibeleng? Na o nagana gore ba bangwe le bona ba swanetše go kwa seo o ithutilego sona? O ka dira’ng gore o ba thuše?” (Die. 3:27; Mat. 9:37, 38) Bontšha motho yoo dipampišana tšeo di lego ka go Teaching Toolbox gomme o mo kgopele gore a kgethe tšeo a bonago batho ba gabo, bagwera goba batho bao a šomago le bona ba ka thabela go di bala. Mo nee dipampišana tše sego kae tša dipampišana tšeo. Itlwaetše le yena go mmontšha kamoo a ka neago batho pampišana ka bohlale. Ke therešo gore ge motho yo re ithutago le yena Beibele e šetše e le mogoeledi yo a sa kolobetšwago, re swanetše go ya le yena tšhemong e le gore re mo thuše.—Mmo. 4:9, 10; Luka 6:40.

8. Ke ka baka la’ng go le bohlokwa gore batho bao re ithutago le bona ba rate Modimo le baagišani ka mo go tseneletšego? (Bona le lepokisi leo le rego, “ Re ka Thuša Bjang Barutwana ba Beibele go Rata Modimo ka mo go Tseneletšego?”)

⁸ Dula o gopola gore Jesu o re laetše go ruta batho “go boloka dilo tšohle” tšeo a re laetšego tšona. Dilo tšeo di akaretša ditaelo tše pedi tše dikgolokgolo, e lego go rata Modimo le go rata moagišani. (Mat. 22:37-39) Ge re thuša motho yo re ithutago Beibele le yena go kwa ditaelo tše, seo se ra gore re mo thuša go bolela ditaba tše dibotse. Ke ka baka la’ng re re’alo? Ge e ba motho yoo a rata Modimo le batho ba bangwe,  seo se tla mo dira gore a nyake go bolela ditaba tše dibotse. Ke nnete gore batho ba bangwe bao re ithutago le bona Beibele ba ka kwa ba boifa go bolela ditaba tše dibotse. Eupša re ka ba kgonthišetša gore Jehofa o tla ba thuša gore mafelelong ba se sa tšhaba batho. (Ps. 18:1-3; Die. 29:25) Lepokisi leo le sepedišanago le sehlogo se, le bolela ka dilo tšeo re ka di dirago go thuša morutwana gore a rate Modimo ka mo go tseneletšego. Go oketša moo, phuthego e ka thuša bjang batho bao ba ithutago Beibele go rata Modimo le batho ba bangwe kutšwanyana?

9. Ke ka ditsela dife motho yo a ithutago go otlela a ithutago dithuto tše bohlokwa?

⁹ Nagana gape ka mohlala wa motho yo a ithutago go otlela. Ge a dutše a otlela a na le motho yoo a mo rutago, ke bjang a tšwelago pele a ithuta dilo tše dingwe? O ithuta ka go theetša seo motho yoo a mo rutago go otlela a mmotšago sona le ka go lebelela batho ba bangwe bao ba otlelago gabotse. Ka mohlala, mohlahli a ka mmontšha mootledi yo mongwe yoo a dumelelago mootledi wa koloi e nngwe gore a tsene ka pele ga gagwe. Goba a ka mmontšha mootledi yo mongwe yoo ka botho a dirišago lebone la koloi go bontšha gore o arogela ka lehlakoreng lefe. Mehlala e bjalo e ruta motho yo a ithutago go otlela dithuto tše bohlokwa tšeo a ka di dirišago ge a otlela.

10. Ke’ng seo se tlago go thuša morutwana gore a dire tšwelopele?

¹⁰ Go no swana le motho yo a ithutago go otlela, ge morutwana wa Beibele a thoma go hlankela Jehofa ga a ithute feela go motho yo a ithutago le yena eupša o ithuta le mehlaleng e mebotse ya bahlanka ba bangwe ba Jehofa. Ka gona ke’ng seo se tlago go thuša barutwana ba Beibele gore ba dire tšwelopele? Ke go ba gona dibokeng tša rena. Ke ka baka la’ng re re’alo? Ka gobane seo ba tlago go se kwa ge ba le dibokeng se tla ba thuša go ithuta ka mo go oketšegilego, go matlafatša tumelo ya bona le go ba thuša go rata Modimo ka mo go tseneletšego. (Dit. 15:30-32) Le gona ge morutwana a le dibokeng, motho yo a ithutago Beibele le yena a ka mo tsebiša bana babo rena le dikgaetšedi bao ba nago le mathata ao a swanago le a gagwe. Morutwana o tla bona mehlala e mebotse ya bana babo rena le dikgaetšedi bao ba bontšhago lerato ka phuthegong. Nagana ka mehlala e latelago.

11. Morutwana a ka bona mehlala efe ka phuthegong, gona seo se ka mo kgoma bjang?

¹¹ A re re morutwana wa Beibele yoo e lego mma yo a se nago molekane, o bona kgaetšedi wa Mokriste yoo le yena e lego mma yo a se nago molekane. Morutwana yoo o kgomega kudu ge a bona kamoo kgaetšedi yo a dirago maiteko a go tla Holong ya Mmušo le bana ba gagwe ba banyenyane. Goba morutwana yo a thatafalelwago ke go tlogela go kgoga o tlwaelana le ngwanabo rena yoo a ilego a kgona go tlogela go kgoga. Ngwanabo rena yoo o botša morutwana yoo kamoo go rata Jehofa go ilego gwa mo dira gore a nyake go kwa melao ya Modimo. (2 Bakor. 7:1; Bafil. 4:13) Ka morago ga gore ngwanabo rena yoo a botše morutwana kamoo yena a ilego a kgona go tlogela go kgoga, o re go yena: “Le wena o ka kgona go tlogela go kgoga.” Morutwana yoo o ikwa a kgothatšegile gomme o a bona gore le yena a ka kgona go tlogela go kgoga. Goba a re re ngwanenyana wa mofsa yo a ithutago Beibele o bona kgaetšedi wa mofsa yoo a bonagalago a ipshina ka bophelo bja go ba Hlatse ya Jehofa e bile a thabela go thuša ba bangwe. Ge morutwana wa Beibele a bona kamoo kgaetšedi yo a dulago a thabile, le yena o nyaka go ithuta ka mo go oketšegilego gore a tsebe gore ke ka baka la eng kgaetšedi yo a dula a thabile.

12. Ke ka baka la’ng re ka re yo mongwe le yo mongwe ka phuthegong a ka dira selo se itšego go thuša barutwana ba Beibele?

¹² Ge barutwana ba Beibele ba thoma go tseba bana babo rena le dikgaetšedi bao ba botegago,  ba ithuta mehlaleng ya bona gore taelo ya Jesu ya gore re rate Modimo le moagišani e bolela eng. (Joh. 13:35; 1 Tim. 4:12) Le gona ka ge re šetše re bone, morutwana wa Beibele a ka ithuta go bagoeledi ba bangwe bao ba nago le mathata ao a swanago le a gagwe. Morutwana yoo o ithuta go bagoeledi bao gore a ka kgona go dira diphetogo tšeo a swanetšego go di dira e le gore a tle a be morutiwa wa Jesu. (Doit. 30:11) Yo mongwe le yo mongwe ka phuthegong a ka thuša barutwana ba Beibele go dira tšwelopele. (Mat. 5:16) Wena o dira maiteko afe go kgothatša barutwana ba Beibele bao ba tlago dibokeng?

13-14. Jesu o ile a swara bjang baapostola ba gagwe nakong ya ge ba be ba nyamile?

¹³ Re nyaka go thuša bana babo rena le dikgaetšedi bao ba fodilego moyeng gore ba boele ba kwe taelo ya Jesu ya gore re dire batho barutiwa. Tsela yeo Jesu a ilego a swara baapostola ba gagwe ge ba be ba nyamile e re bontšha seo le rena re ka se dirago lehono.

¹⁴ Pejana ga ge Jesu a ka bolawa, baapostola “ba gagwe ka moka ba [ile ba] mo tlogela ba tšhaba.” (Mar. 14:50; Joh. 16:32) Jesu o ile a swara baapostola ba gagwe bjang nakong ya ge ba be ba nyamile? Kapejana ka morago ga gore Jesu a tsošwe bahung, o ile a botša balatedi ba gagwe gore: “Le se ke la boifa! Eyang le begele bana bešo [gore ke tsošitšwe bahung].” (Mat. 28:10a) Jesu ga se a ka a ngala baapostola ba gagwe. Le ge bona ba be ba mo tlogetše o ile a no tšwela pele a ba bitša “bana bešo.” Go no swana le Jehofa, Jesu o be a na le kgaugelo e bile a lebalela ba bangwe.—2 Dikg. 13:23.

15. Re ikwa bjang ka bana babo rena bao ba tlogetšego go botša ba bangwe ditaba tše dibotse?

¹⁵ Le rena re tshwenyegile kudu ka bao ba tlogetšego go botša ba bangwe ditaba tše dibotse. Batho ba ke bana babo rena le dikgaetšedi gomme re a ba rata! Re sa gopola kamoo bana babo rena ba le dikgaetšedi ba ilego ba šoma ka thata ba šomela Jehofa. Ba bangwe ba bona ba hlanketše Jehofa ka mengwaga e mentši. (Baheb. 6:10) Re tloga re ba gopola! (Luka 15:4-7) Re ka ekiša Jesu bjang go bontšha bana babo rena ba gore re tloga re na le taba le bona?

16. Re ka bontšha bjang gore re tshwenyegile ka bana babo rena le dikgaetšedi bao ba fodilego moyeng?

¹⁶ Ba meme go tla dibokeng. Tsela e nngwe yeo Jesu a ilego a kgothatša baapostola ba gagwe ge ba be ba nyamile e bile ka go ba biletša sebokeng se itšego. (Mat. 28:10b; 1 Bakor. 15:6) Le rena lehono re ka kgothatša bana babo rena le dikgaetšedi bao ba fodilego moyeng ka go ba mema gore ba tle dibokeng ge e ba e le gore ba tlogetše go dira bjalo. Re a tseba gore re ka swanelwa ke go ba mema gantšinyana pele ba ka tla. Re tlo thaba kudu ge ba ka tla, go no swana le ge Jesu a ile a thaba kudu ge barutiwa ba gagwe ba ile ba tla sebokeng seo a bego a ba bileditše sona.—Bapiša le Mateo 28:16 le Luka 15:6.

17. Re swanetše go dira’ng ge motho yo a fodilego moyeng a etla dibokeng?

¹⁷ Ba amogele gabotse. Jesu o ile a dira gore barutiwa ba gagwe ba ikwe ba amogelegile ge a be a tlo kopana le bona, ga se a ka a letela gore bona ba tle go yena eupša yena o ile a ya go bona gomme a bolela le bona. (Mat. 28:18) Re swanetše go dira’ng ge ngwanabo rena goba kgaetšedi yo a fodilego moyeng a etla Holong ya Mmušo? Re swanetše go ya go yena gomme re mo amogele gabotse, re se ke ra emela gore yena a tle go rena. Mathomong re ka tshwenyega ka gore ga re tsebe gore re tla reng go motho yoo. Re ka no mmotša gore re thabile kudu go mmona, eupša re se ke ra bolela dilo tšeo di tla mo lešago dihlong.

18. Re ka kgothatša bjang bagoeledi bao ba fodilego moyeng?

¹⁸ Ba kgothatše. Go ka direga gore barutiwa ba Jesu ba be ba nagana gore ba ka se kgone go bolela  ditaba tše dibotse lefaseng ka moka. Jesu o ile a kgothatša balatedi ba gagwe ka go ba botša gore: “Ke na le lena matšatši ka moka.” (Mat. 28:20) Na seo se ile sa kgothatša barutiwa ba gagwe? Ee, se ile sa ba kgothatša ka gobane kapejana ka morago ga moo, ba be ba swaregile ka go “ruta [batho] e bile ba tsebatša ditaba tše dibotse.” (Dit. 5:42) Bagoeledi bao ba fodilego moyeng le bona ba nyaka go kgothatšwa. Ba ka ba ba boifišwa ke go thoma go botša ba bangwe ditaba tše dibotse gape. Re ka ba kgonthišetša gore ba ka se dire modiro wo ba nnoši. Re ka sepela le bona ge ba thoma go bolela ditaba tše dibotse gape. Ga go pelaelo gore ba tlo thaba kudu ge re ba thuša gore ba boele ba bolele ditaba tše dibotse gape. Ge re bontšha batho bao ba fodilego moyeng gore e sa le bana babo rena le dikgaetšedi, ba ka thoma go hlankela Jehofa gape gomme phuthego ka moka e tlo thaba.

19. Re ikemišeditše go dira’ng, gona ka baka la’ng?

¹⁹ Re swanetše go tšwela pele re bolela ditaba tše dibotse go fihlela neng? Go fihlela Modimo a fediša lefase le la Sathane. (Mat. 28:20) Na re tla kgona go tšwela pele re bolela ditaba tše dibotse go fihlela ka nako yeo? Re ikemišeditše go dira bjalo. Re ikemišeditše go diriša nako ya rena, matla a rena le tšhelete ya rena gore re hwetše “bao ba nago le tshekamelo e swanetšego ka bophelo bjo bo sa felego.” (Dit. 13:48) Ge re dira seo, re ekiša Jesu. O ile a re: “Dijo tša ka ke gore ke dire thato ya yo a nthomilego le go phetha [goba go fetša] modiro wa gagwe.” (Joh. 4:34; 17:4) Le rena re nyaka go dira sona seo. Re nyaka go fetša go dira modiro wo Jesu a re neilego wona. (Joh. 20:21) Le gona re nyaka gore ba bangwe go akaretša le bao ba fodilego moyeng, ba kgotlelele modirong wo gotee le rena.—Mat. 24:13.

20. Go ya ka Bafilipi 4:13, ke’ng seo se re thušago go dira modiro wo Jesu a laetšego gore re o dire?

²⁰ Nnete ke gore ga go bonolo go dira modiro wo Jesu a re laetšego gore re o dire. Eupša ga re dire modiro wo re nnoši. Jesu o re tshepišitše gore o tla ba le rena. Ge re dira modiro wo re “bašomigotee le Modimo” e bile re šoma “gotee le Kriste,” ka gona Jehofa le Jesu ba a re thuša go dira modiro wo. (1 Bakor. 3:9; 2 Bakor. 2:17) Ka baka leo re ka kgona go o dira. Ruri ke tokelo e kgolo e bile go a re thabiša go dira modiro wo le go thuša ba bangwe gore le bona ba o dire!—Bala Bafilipi 4:13.