Ke belegwe ka 1948 kua Netherlands. Ngwageng o latelago, ka gešo re ile ra hudugela São Paulo, kua Brazil. Batswadi ba ka ba be ba rata kereke kudu, le gona re be re dula re bala Beibele ge re fetša go ja dijo tša thapama. Ka 1959, lapa la gešo le ile la tloga Brazil la hudugela United States, re be re dula lefelong leo le bitšwago Massachusetts.

Tate o be a šoma ka thata gore a re hlokomele. Ka gešo re ba seswai. O šomile mešomo ya go fapafapana. O be a šoma go rekiša dilo ka koloi, a šoma go dira ditsela le go šoma khamphaning ya difofane. Ge tate a be a hwetša mošomo khamphaning ya difofane, ka moka ga rena re ile ra thaba kudu ka gobane re be re tseba gore re tlo ya mafelong a go fapafapana.

Ge ke be ke sa tsena sekolo ke be ke fela ke ipotšiša gore: ‘Ke tlo dira’ng ge ke gola?’ Bagwera ba ka ba bangwe ba ile ba ya yunibesithi, mola ba bangwe ba ile ba yo tsenela bošole. Eupša nna ke be ke sa nyake go tsenela bošole ka gobane ke be ke sa rate go ngangišana e bile ke sa rate ntwa. Ke ile ka kgetha go ya yunibesithi gore ke se ke ka tsenela bošole. Eupša selo se segolo seo ke bego ke se nyaka e be e le go thuša batho ka gobane seo se be se tlo nthuša go tseba gore ke phelela eng.

Ge ke be ke le yunibesithi, ke ile ka kgahlwa ke thuto ya go hlalosa setšo le mekgwa ya batho ka gobane ke be ke nyaka go tseba gore bophelo bo thomile bjang. Barutiši ba be ba re ruta gore dilo di itirile e bile ba nyaka gore re dumele gore thuto yeo ke nnete. Eupša nna dilo tše dingwe ke be ke sa di tshepe ka gobane go be go se na bohlatse bja tšona.

Sekolong ba be ba sa re rute gore re be le me- kgwa e mebotse. Seo ba bego ba re botša sona, e be e le gore re swanetše go dira sohle seo re ka se kgonago gore re tle re phase gabotse. Ke be ke thabišwa ke go ba le bagwera ba ka meletlong e bile ke tsuba di-drugs. Eupša ke ile ka lemoga gore seo e be e no ba lethabo la nakwana. Ke ile ka ipotšiša gore: ‘Na ruri ye ke tsela yeo ke swanetšego go phela ka yona?’

Mafelelong ke ile ka ya toropong ya Boston ke moka ka tsena yunibesithi moo. Ge dikolo di tswalelwa ke be ke šoma gore ke kgone go ipatelela dithuto tša ka. Ke moka ka kopana le Hlatse ya Jehofa la mathomo, yeo le yona e bego e šoma moo. E ile ya ntlhalosetša ka boporofeta bjoo bo bolelago ka mabaka a šupa bjoo bo lego go Daniele kgaolo 4 gomme ya ntlhalosetša gore re phela mehleng ya bofelo. (Dan. 4:13-17) Ke ile ka lemoga gore ge nka tšwela pele ke boledišana le yona ka Beibele, ke tlo e tshepa ke moka ka fetoša tsela yeo ke bego ke phela ka yona. Ke ile ka thoma go dira sohle seo nka se kgonago gore ke bethiše Hlatse yeo ka moya.

Ge ke be ke le yunibesithi, ke ile ka tsena diklase tšeo di bego di tlo ntlwaetša gore ke ye ke ithaopele go yo šoma South Amerika. Ke be ke nagana gore go thuša batho bao ba hlokago go be go tlo dira gore ke thabele bophelo. Eupša ke ile ka lemoga gore le ge ke thuša batho ga ke bo thabele. Ke ile ka nyama gomme mo gare ga ngwaga, ka tlogela yunibesithi.

Ka May 1970 ke ile ka hudugela Amsterdam kua Netherlands gore ke yo šoma khamphaning ya difofane yeo tate a bego a šoma go yona. Mošomo woo o be o dira gore ke sepele kudu. Ke be ke eya dinageng tšeo di lego Afrika, Amerika, Yuropa, le Asia. Ka moragonyana ke ile ka lemoga gore naga e nngwe le e nngwe yeo ke yago go yona, batho ka moka ba na le mathata a magolo e bile ga ba kgone go a rarolla. Ke be ke sa dutše ke nyaka go tseba gore ke phelela eng gomme ke ile ka phetha ka gore ke boele United States gore ke tšwele pele ka dithuto tša ka yunibesithing ya Boston.

Ge ke be ke boetše yunibesithi ke ile ka lemoga gore le gona moo ga ke hwetše dikarabo tša dipotšišo tšeo ke bego ke ipotšiša tšona ka bophelo. Ka ge ke be ke sa tsebe gore ke dire eng, ke ile ka kgopela morutiši wa ka gore a nkeletše. O ile a mmakatša ge a be a re: “O sa tsenela’ng sekolo?” “Ke ka baka la’ng o sa no tlogela?” Ke ile ka thabišwa ke keletšo ya gagwe gomme ka dira seo a bego a mpotša sona. Ke ile ka tlogela go ya yunibesithi gomme ka se sa hlwa ke boela moo.

Ka ge ke be ke sa tsebe gore ke phelela eng, ke ile ka phetha ka gore ke yo dula le sehlopha sa batho bao ba bego ba bonagala eka ba na le khutšo le lerato. Nna le bagwera ba ka ba bangwe re ile ra ya United States, go tloga moo ra ya Acapulco kua Mexico. Re ile ra dula le sehlopha sa batho bao ba bego ba se na molao e bile ba bonagala eka ba ipshina ka bophelo. Eupša ge ke be ke dula le bona, ke ile ka lemoga gore ke be ke sa thaba. Le gona ke ile ka bona gore batho ba bantši moo ga ba tshepege.

Ka nako yeo ke ile ka thoma ka seo ke bego ke nyaka go se dira ge ke be ke sa le ngwana. Ke be ke nyaka go sepela ka lewatleng, ke se monamedi wa sekepe feela, eupša ke le mootledi wa sona. Gore ke kgone go dira seo, ke be ke swanetše go ba le sekepe sa ka. Ka ge mogwera wa ka Tom a be a nyaka go dira se se swanago, re ile ra phetha ka gore re sepele le lefase ka sekepe re le ka moka. Ke be ke nyaka go hwetša sehlakahlaka se sebotsana moo ke bego ke tla ba kgole le melao yeo e bewago ke batho.

Nna le Tom re ile ra ya Arenys de Mar kgauswi le Barcelona kua Spain. Ge re fihla moo re ile ra reka sekepe sa botelele bja dimithara tše 9,4 seo se bitšwago Llygra. Re ile ra thoma go lokiša sekepe seo gore re kgone go šireletšega ge re sepela ka sona ka lewatleng. Re be re se na taba le gore moo re yago gona re fihla neng, ka gona re ile ra tloša entšene moo e dulago gona gomme ra bea meetse a mangwe a go nwa. Ka ge re be re nyaka go kgona go tšama re ema boemakepe, re ile ra reka mahuduo a mabedi a botelele bjoo bo dirago dimithara tše 5. Ka morago re ile ra namela sekepe sa rena gomme ra leba Seychelles, kua Indian Ocean. Re be re ipoditše gore re nyaka go ya bodikela bja Afrika le Cape of Good Hope, kua Afrika Borwa. E le gore re kgone go tseba mo re bego re eya gona, re be re diriša dinaledi, mebepe, dipuku le dilo tše dingwe. Ke ile ka makatšwa ke gore dilo tšeo di be di re thuša gore re bone moo re bego re eya gona.

Ka moragonyana, re ile ra lemoga gore sekepe sa rena sa kgale seo se bego se dirilwe ka dikota se be se se sa kgona go sepela ka lewatleng. Se be se na le lešoba gomme se tsenya meetse a dilithara tše 22 ka iri. Go no swana le ge ke boletše mathomong, ge go be go na le ledimo ke ile ka tšhoga kudu gomme ka rapela, le gona ke be ke na le nako e telele ke sa rapele. Ke ile ka tshepiša Modimo gore ge nka phologa mo ke tlo nyaka go mo tseba. Ledimo leo le ile la ema gomme ka thoma go dira seo ke bego ke se tshepišitše Modimo.

Ke ile ka thoma go bala Beibele ge ke be ke le lewatleng. E no nagana o le garegare ga lewatle la Mediterranean, o dikologilwe ke dihlapi tša mehutahuta. Bošego ke ile ka kgahlwa ke dinaledi tše dintši gomme ka napa ka kgodišega le go feta gore Modimo o na le taba le batho.

Ka morago ga dibeke tše sego kae re le ka lewatleng, re ile ra fihla boemakepeng bja Alicante kua Spain, moo re ilego ra rekiša sekepe seo gore re reke se sefsa. Go be go se bonolo gore re hwetše motho yoo a ka rekago sekepe seo ka baka la gore e be e le sa kgale, se se na entšene e bile se na le lešoba. Eupša yeo e be e le nako e botse ya gore ke ithute Beibele.

Go bala Beibele go nthušitše go bona gore ke yona feela yeo e ka re thušago gore re dule re thabile. Ke ile ka makatšwa ke dilo tšeo Beibele e bego e di ruta tšeo di bontšhago gore batho ba swanetše go dula ba hlwekile e bile ba itshwara gabotse gomme ka ipotšiša gore ke ka baka la eng nna le batho ba bangwe bao re ipitšago gore ke rena Bakriste re sa itshware ka tsela yeo Beibele e bolelago ka yona.

Ke be ke ikemišeditše go fetoša bophelo bja ka gomme ke ile ka tlogela go tsuba di-drugs. Ke ile ka nagana gore go swanetše go ba go na le batho bao ba phelago ka melao ya ka Beibeleng gomme ke ile ka nyaka go kopana le bona. Ke ile ka rapela ka lekga la bobedi, ke moka ka kgopela Modimo gore a nthuše go ba hwetša.

Ke be ke bona eka go bohlokwa gore ke tsene kerekeng e nngwe le e nngwe go fihla ke hwetša kereke yeo e lego ya nnete. Ge ke be ke sepela diterateng tša Alicante, ke ile ka bona dikereke tše dintši. Ka ge bontši bja tšona di be di na le medingwana ya diswantšho, ke ile ka lemoga gore ga se dikereke tša nnete.

Ka Sontaga se sengwe mosegare ke be ke dutše lefelong leo ke bego ke kgona go bona boemakepe ka moka gomme ke bala lengwalo la Jakobo 2:1-5 leo le bontšhago gore ga se ra swanela go rata batho ka gobane ba humile. Ge ke be ke boela morago, ke ile ka bona moago o mongwe wo e kego ke kereke woo o bego o ngwadilwe gore “Holo ya Mmušo ya Dihlatse tša Jehofa” kgaufsi le lebati la ona.

Ka ge ke be ke nyaka go bona gore batho bao ba be ba tlo ntshwara bjang, ke ile ka tsena ka Holong ya Mmušo ke sa apara dieta, ke na le ditedu tše dikgolo e bile ke apere diaparo tša go kgeiga. Motho yoo a bego a amogela baeng o ile a nkiša kgauswi le mokgekolo yo mongwe gore ke dule le yena gomme mokgekolo yoo a nthuša go bula mangwalo. Ka morago ga diboka, ke ile ka makala ge batho ka moka ba tlo ntumediša. Monna yo mongwe o ile a mmema ka lapeng la gagwe gore re tlo boledišana ka Beibele. Eupša ka ge ke be ke tseba gore ke be ke se ka tšwa ke fetša go e bala, ke ile ka mmotša gore, “ke tla go botša ge ke na le nako.” Ge nako e dutše e eya, ke ile ka thoma go ya dibokeng ka mehla.

Ka morago ga dibeke tše sego kae, ke ile ka etela monna yola wa go mmema. Ke moka o ile a araba dipotšišo tša ka a diriša Beibele. Ka morago ga beke, o ile a mpha peke yeo e bego e tletše ka diaparo tše dibotse kudu. O ile a mpotša gore mong wa diaparo tšeo o be a golegilwe ka gobane a be a latela melao ya Beibele ya gore re ratane gomme a sa nyake go ya ntweng. (Jes. 2:4; Joh. 13:34, 35) Ga bjale ke be ke kgodišegile gore ke hweditše seo ke bego ke se nyaka, e lego batho bao ba dulago ba hlwekile e bile ba itshwara gabotse go ya le ka moo Beibele e bolelago! Ke be ke se sa nyaka go hwetša sehlakahlaka se sebotsana, eupša ke be ke nyaka go ithuta ka mo go tseneletšego ka Beibele. Ka gona ke ile ka boela Netherlands.

Go ntšere matšatši a mane gore ke fihle toropong ya Groningen, kua Netherlands. Ge ke fihla moo ke ile ka swanelwa ke go nyaka mošomo gore ke kgone go itlhokomela. Ke ile ka fihla lebenkeleng le lengwe leo go šongwago ka mapolanka gomme ka fiwa dipampiri tša mmereko gore ke di tlatše. Bjale go be go na le potšišo e nngwe yeo e bego e botšiša gore ke tsena kereke efe. Ke ile ka re ke nna yo mongwe wa “Dihlatse tša Jehofa.” Ge  molaodi wa lebenkele leo a bona gore ke Hlatse ya Jehofa, sefahlego sa gagwe se ile sa fetoga. O itše: “Ke tla go founela.” Eupša ga se a ka a mphounela.

Ke ile ka ya lebenkeleng le lengwe leo go šongwago ka mapolanka gomme ka botšiša mong wa lebenkele leo ge e ba a hloka thušo. O ile a re ke mmontšhe dipampiri tšeo di bontšhago gore ke tsene sekolo le bohlatse bjoo bo bontšhago gore nkile ka šoma. Ke ile ka mmotša gore ke be ke šoma go dira dikepe tšeo di bego di dirwa ka mapolanka. Ke ile ka makala ge a be a re, “o tle o thome go šoma lehono. Eupša o swanetše go latela molao wa ka. Ga ke nyake gore o bake mathata ka mo lebenkeleng la ka ka gore ke nna yo mongwe wa Dihlatse tša Jehofa, e bile ke phela go ya le ka melao ya Beibele.” Ke ile ka makala ge a be a mpotša seo, gomme ka napa ka re: “Le nna ke yo mongwe wa Dihlatse tša Jehofa.” Ka ge ke be ke na le meriri e metelele le ditedu, o ile a bona gore ga se nna Hlatse ya Jehofa. Ke moka a re: “Ke tlo thoma go ithuta Beibele le wena!” Ke ile ka dumela ke thabile. Ka gona ke ile ka bona gore ke ka baka la eng mong wa lebenkele le la le lengwe a se a ka a mphounela. Jehofa o be a araba dithapelo tša ka. (Ps. 37:4) Ke ile ka šoma lebenkeleng la ngwanabo rena yoo ka ngwaga o tee, gomme a nthuta Beibele. Ke moka ka kolobetša ka January 1974.

Ka morago ga kgwedi ke ile ka thoma go bula madibogo gomme seo sa dira gore ke dule ke thabile. Kgweding e latelago ke ile ka hudugela Amsterdam gore ke ye ke thekge sehlopha sa leleme la Sepanishi seo se bego se sa tšwa go thongwa. Ga go na selo seo se bego se nthabiša go feta ge ke be ke ruta batho Beibele ka leleme la Sepanishi le la Sepotokisi! Ka May 1975 ke ile ka kgethwa gore ke be mmulamadibogo yo a kgethegilego.

Ka letšatši le lengwe, kgaetšedi yo a bitšwago Ineke yoo e bego e le mmulamadibogo yo a kgethegilego, o ile a tliša thuto ya gagwe dibokeng yeo e bego e etšwa Bolivia gore a tle a e tsebiše batho ba go bolela Sepanishi. Nna le Ineke re ile ra thoma go ngwalelana mangwalo gore re tsebane gakaone gomme ka morago, ra lemoga gore re be re na le dipakane tša go swana. Re ile ra nyalana ka 1976 gomme ra tšwela pele re hlankela re le babulamadibogo bao ba kgethegilego go fihla ka 1982 ge re be re laletšwa gore re tle klaseng ya bo-73 ya sekolo sa Gilead. Re ile ra thaba kudu ge re be re fiwa kabelo ya gore re yo hlankela ka bohlabela bja Afrika kua Kenya, Mombasa ka mengwaga e mehlano! Ka 1987, re ile ra abelwa gore re yo hlankela Tanzania, moo modiro wa rena wa go bolela ditaba tše dibotse o kilego wa thibelwa. Re ile ra dula moo ka mengwaga e 26 gomme ka morago ra boela Kenya.

Go thuša batho bao ba thabelago go kwešiša Beibele go ile gwa dira gore nna le mosadi wa ka re thabe kudu. Ka mohlala, ke ile ka thabišwa ke gore motho wa mathomo yoo ke ilego ka ithuta Beibele le yena ke monna yo mongwe yo a tšwago Mombasa yoo ke ilego ka kopana le yena ge ke be ke ruta batho Beibele lefelong la batho bohle. Ke ile ka mo fa dikgatišo tše pedi, ke moka a mpotšiša gore: “Ge ke fetša go di bala ke dire’ng?” Bekeng e latelago, ke ile ka thoma go bala le yena puku ya O ka Phela ka mo go sa Felego Paradeiseng mo Lefaseng, yeo e bego e sa tšwa go gatišwa ka Seswahili. Monna yoo o ile a kolobetšwa ngwageng o latelago, ke moka a ba mmulamadibogo wa ka mehla. Ga e sa le go tloga ka nako yeo, yena le mosadi wa gagwe ba thušitše batho ba e ka bago ba 100 gore ba ineele go Jehofa le go kolobetšwa.

Ge ke be ke thoma go tseba gore ke phelela eng, ke ile ka ikwa go swana le motho yo a tšamago a rekiša yoo a ilego a hwetša perela e bohlokwa kudu gomme a se nyake go e loba. (Mat. 13:45, 46) Ke be ke nyaka go fetša bophelo bja ka ka moka ke thuša batho gore ba tsebe gore ba phelela eng. Nna le mosadi wa ka re ile ra bona gore Jehofa o thuša batho ba gagwe go tseba gore ba phelela eng.