1-2. (a) Ke ka baka la’ng bao ba sa tšwago go nyalana ba swanetše go ithekga ka Jehofa? (Psalme 37:3, 4) (b) Re tlo ithuta’ng sehlogong se?

NA LE kgauswi le go nyalana goba le sa tšwa go nyalana? Ge e ba go le bjalo, ga go pelaelo gore o fela pelo ya gore o ipshine le motho wa gago yoo o mo ratago kudu. Ke nnete gore lenyalo le lengwe le le lengwe le na le mathata a lona. Le gona go na le diphetho tše bohlokwa tšeo bao ba sa tšwago go nyalana ba swanetšego go di dira. Tsela yeo le tlago go rarolla mathata le yeo le tlago go dira diphetho ka yona, e tla le thuša gore le thabele lenyalo la lena ka mengwaga e mentši goba le se le thabele. Ge e ba le ithekga ka Jehofa, le tlo kgona go dira diphetho tše dibotse, lenyalo la lena la tia gomme la thaba kudu. Eupša ge e ba le sa diriše melao ya motheo lenyalong la lena, seo se tla dira gore le be le mathata gomme la se sa thaba.—Bala Psalme 37:3, 4.

² Le ge sehlogo se se lebišitšwe go batho bao ba sa tšwago go nyalana, eupša se tlo bolela le ka mathata ao banyalani ka moka ba ka lebeletšanego le ona. Re tlo ithuta ka banna le basadi ba ka Beibeleng bao ba bego ba na le tumelo. Mehlala ya batho ba ba ka Beibeleng e re ruta dilo tšeo re ka di dirišago maphelong a rena, go akaretša le lenyalong. Le gona re tlo ithuta le ka mehlala ya banyalani ba bangwe ba mehleng ya rena.

3-4. Bao ba sa tšwago go nyalana ba ka kopana le mathata afe?

³ Batho ba bangwe ba ka kgothaletša bao ba sa tšwago go nyalana gore ba ipshine ka bophelo. Ka mohlala, batswadi le  ba bangwe ba leloko ba ka kgothaletša bao ba sa tšwago go nyalana gore ba be le bana ge ba se no nyalana, goba bagwera ba bona le ba leloko ba ka ba kgothaletša gore ba reke ntlo gomme ba e tlatše ka diphahlo tše dibotse.

⁴ Ge banyalani bao ba ka se hlokomele, ba ka dira diphetho tšeo di ka feleletšago di ba tsenya dikolotong tše dintši. Ke moka banyalani bao ba tlo swanelwa ke go šoma diiri tše dintši gore ba kgone go patela dikoloto tša bona. Le gona ge ba fetša nako e ntši ba le mošomong, ga ba sa tlo ba le nako e ntši ya go ithuta Beibele, ya borapedi bja lapa le ya go ya tšhemong. Banyalani bao ba ka lofa le dibokeng gore ba šome nako e oketšegilego gore ba kgone go hwetša tšhelete e ntši. E bile ba ka lofa diboka gore ba se ke ba felelwa ke mešomo ya bona. Ge ba ka dira seo, ba ka se kgone go ipshina ka go hlankela Jehofa ka mo go oketšegilego.

5. Mohlala wa Klaus le Marisa o go ruta’ng?

⁵ Go na le mehlala ya batho ba bantši yeo e bontšhago gore ge e ba mahumo a etla pele maphelong a rena re ka se thabe. Ekwa seo Klaus le Marisa ba ithutilego sona tabeng ye. * Ge ba sa tšwa go nyalana, ka moka ga bona ba be ba šoma gore ba kgone go ba le tšhelete e ntši. Eupša ba be ba ikwa ba sa kgotsofale. Klaus o re: “Re be re na le selo se sengwe le se sengwe seo re bego re se hloka, eupša re be re se ra ipeela dipakane tša go hlankela Jehofa ka mo go oketšegilego. Go no bolela nnete, re be re sa ipshine ka bophelo e bile re na le stress.” Mohlomongwe le lena le lemogile gore go etiša mahumo pele go ka se dire gore le thabe. Ge e ba go le bjalo, le se ke la nyama. Go nagana ka mehlala e mebotse ya batho ba bangwe go ka le thuša gore le dire diphetogo. A re thomeng pele ka go kwa gore banna bao ba nyetšego ba ka ithuta eng mohlaleng wa Kgoši Jehoshafate.

6. Kgoši Jehoshafate o ile a diriša bjang molao wa motheo wo o lego go Diema 3:5, 6 ge a be a lebeletšane le bothata bjo bogolo?

⁶ Lena banna bao le nyetšego, na le fela le imelwa ke maikarabelo a lena? Ge e ba go le bjalo, le ka ithuta mohlaleng wa Kgoši Jehoshafate. Ka ge Jehoshafate e be e le kgoši, o be a swanetše go kgonthišetša gore setšhaba ka moka se dula se šireletšegile! O ile a dira seo bjang? Jehoshafate o ile a dira sohle seo a se kgonago gore a šireletše batho ba gagwe. O ile a matlafatša metse ya Juda gomme a kgoboketša mašole ao a fetago 1 160 000. (2 Dikor. 17:12-19) Ka moragonyana, Jehoshafate o ile a kopana le bothata bjo bogolo. Madira a mantši a Baamoni, Bamoaba le banna ba dithabeng tša Seire, ba ile ba tšhošetša Jehoshafate, lapa la gagwe le batho ba gagwe. (2 Dikor. 20:1, 2) Jehoshafate  o ile a dira’ng? O ile a kgopela Jehofa gore a mo thuše le go mo fa matla. O ile a dira seo se bolelwago ke molao wa motheo wo o lego go Diema 3:5, 6. (Bala.) Thapelo ya Jehoshafate ya boikokobetšo yeo e lego go Dikoronika tša Bobedi 20:5-12, e bontšha gore o be a tshepa Jehofa kudu. Jehofa o ile a araba thapelo ya Jehoshafate bjang?

7. Jehofa o ile a araba thapelo ya Jehoshafate bjang?

⁷ Jehofa o ile a araba thapelo ya Jehoshafate ka go roma Jahasiele wa Molefi gore a bolele le yena. Jehofa o itše: “Itokišeng, emang pho gomme le bone ge Jehofa a le phološa.” (2 Dikor. 20:13-17) Gantši ge go iwa ntweng, madira ka moka a be a swanetše go lwa go e na le go ema! Eupša mantšu ao a be a sa tšwe go batho, a be a etšwa go Jehofa. Ka ge Jehoshafate a be a tshepa Modimo kudu, o ile a dira seo a bego a mmoditše sona. Ge Jehoshafate le batho ba gagwe ba ile go kopana le manaba a bona, ka pele ga madira a gagwe o be a beile diopedi tšeo di bego di se tša swara ditšhoša e bile di sa tsebe ntwa gabotse. Jehofa o ile a lwela Jehoshafate gomme a fenya manaba a gagwe.—2 Dikor. 20:18-23.

8. Banna bao ba nyetšego ba ka ithuta’ng go Jehoshafate?

⁸ Lena banna bao le nyetšego, le ka ithuta mohlaleng wa Jehoshafate. Le na le maikarabelo a go hlokomela malapa a lena le go kgonthišetša gore a dula a šireletšegile. Ge o na le mathata o ka bona eka o ka kgona go a rarolla ka bowena. Eupša o se ke wa ithekga ka matla a gago. Go e na le moo, rapela o nnoši gomme o kgopele Jehofa gore a go thuše, o be o rapele le mosadi wa gago. Nyaka thušo ya Jehofa ka go bala Beibele le dikgatišo tšeo di theilwego Beibeleng tšeo di tšweleditšwego ke mokgatlo wa rena gomme o diriše seo o se balago. Ba bangwe ba ka no se dumelelane le diphetho tšeo o di dirago tšeo o di theilwego Beibeleng gomme ba ka ba go botša gore ke tša bošilo. Ba ka go botša le gore tšhelete le dilo tše dingwe tšeo o di rekago di tla šireletša lapa la gago. Eupša o ka gopola mohlala wa Jehoshafate, yoo a ilego a bontšha gore o tshepa Jehofa ka diphetho tšeo a ilego a di dira. Jehofa ga se a ka a mo tlogela ka ge a be a botega le wena a ka se go tlogele. (Ps. 37:28; Heb. 13:5) Banyalani ba ka dira’ng go kgonthišetša gore ba dula ba thabile?

9. Moporofeta Jesaya le mosadi wa gagwe e be e le batho ba mohuta mang?

⁹ Selo se bohlokwa kudu go moporofeta Jesaya le mosadi wa gagwe e be e le go hlankela Jehofa. Jesaya e be e le moporofeta, mohlomongwe mosadi wa gagwe le yena e be e le moporofeta ka gobane o be a bitšwa “moporofeta wa mosadi.” (Jes. 8:1-4) Go hlankela Jehofa go be go etla pele bophelong bja Jesaya le mosadi wa gagwe. Ruri ba beetše banyalani mohlala o mobotse lehono!

10. Go ithuta ka boporofeta go ka thuša bjang banyalani gore ba oketše nako yeo ba e fetšago ba hlankela Jehofa?

¹⁰ Banyalani lehono ba ka dira gore Jehofa a tle pele maphelong a bona ka go dira sohle seo ba ka se kgonago gore ba mo hlankele. Ba ka tiiša tumelo ya bona go Jehofa ka go ithuta boporofeta bja ka Beibeleng ba le gotee le go bona gore bo phethagala bjang. (Tito 1:2) Le gona ba ka ipotšiša gore ba ka dira eng gore ba tšee karolo go phethagatšeng boporofeta bjo itšego bja ka Beibeleng.  Ka mohlala, ba ka tšea karolo go phethagatša boporofeta bjo Jesu a boletšego ka bjona bja gore ditaba tše dibotse di tlo bolelwa lefaseng ka moka pele bofelo bo etla. (Mat. 24:14) Ge banyalani ba bona gore boporofeta bjoo ba ithutilego ka bjona bo a phethagala, ba tlo nyaka go oketša nako yeo ba e fetšago ba hlankela Jehofa.

11. Perisila le Akhwila ba be ba kgona go dira’ng, gona ka baka la’ng?

¹¹ Bafsa bao ba sa tšwago go nyalana ba ka ithuta go Perisila le Akhwila, e lego banyalani ba Bajuda bao ba bego ba dula motseng wa Roma. Ka morago ga gore ba kwe ditaba tše dibotse ka Jesu, e ile ya ba Bakriste. Ke nnete gore ba be ba kgotsofalela seo ba bego ba na le sona. Eupša nakong ya ge Mmuši Kelaudio a be a laela gore Bajuda ka moka ba tloge Roma dilo di ile tša fetoga. E no nagana gore Akhwila le Perisila ba ile ba ikwa bjang. Ba be ba tlo swanelwa ke go tloga lefelong leo ba bego ba le tlwaetše gore ba yo dula lefelong le lengwe le go thoma kgwebo ya bona ya go dira ditente ka lefsa. Na dilo tše ka moka di be di tlo dira gore ba se sa etiša Mmušo wa Modimo pele? Mohlomongwe o ka ba o tseba karabo ya potšišo ye. Ge Akhwila le Perisila ba be ba fihla Korinthe ba ile ba šomišana le moapostola Paulo go matlafatša bana babo bona le go ba thuša. Ka morago, ba ile ba ya metseng e mengwe moo go bego go na le tlhokagalo gore ba yo bolela ditaba tše dibotse moo. (Dit. 18:18-21; Baroma 16:3-5) Ba be ba dula ba swaregile e bile ba ipshina ka go hlankela Jehofa ba le gotee!

12. Ke ka baka la’ng banyalani ba swanetše go ipeela dilo tšeo ba nyakago go di fihlelela ge ba hlankela Jehofa?

¹² Lehono banyalani ba ka ekiša Perisila le Akhwila ka go etiša Mmušo wa Modimo pele maphelong a bona. Batho bao ba ratanago ba swanetše go boledišana ka dilo tšeo ba nyakago go di fihlelela ge ba hlankela Jehofa pele ba ka nyalana. Ka gona, ge banyalani ba dira diphetho e bile ba leka ka thata go fihlelela dilo tšeo ba ipeetšego tšona gore ba hlankele Jehofa ba le ka moka, Jehofa o tlo  ba thuša. (Mmo. 4:9, 12) A re boneng mohlala wa Russell le Elizabeth. Russell o re: “Pele re nyalana re ile ra boledišana ka dilo tšeo re nyakago go di fihlelela gore re hlankele Jehofa.” Elizabeth o re: “Re ile ra boledišana gore ge re tlo tšea diphetho re šetše re nyalane, re kgonthišetše gore ga di re šitiše go fihlelela dilo tšeo re ipeetšego tšona gore re hlankele Jehofa.” Russell le Elizabeth ba ile ba kgona go ya tlhokagalong Micronesia.

13. Go ya ka Psalme 28:7, go tlo direga’ng ka bao ba tshepago Jehofa?

¹³ Go swana le Russell le Elizabeth, banyalani ba bantši ba dirile sohle seo ba ka se kgonago gore ba phele bophelo bjo bonolo e le gore ba kgone go fetša nako ya bona e ntši ba botša batho ditaba tše dibotse. Ge banyalani ba ipeela dilo tšeo ba nyakago go di dira gore ba hlankele Jehofa, le go dirišana gore ba di fihlelele, mafelelo e tla ba a mabotse kudu. Le gona, ba tlo bona gore Jehofa o a ba hlokomela, tsela yeo ba mo tshepago ka yona ya oketšega gomme ba thaba kudu.—Bala Psalme 28:7.

14. Moapostola Petro le mosadi wa gagwe ba bontšhitše bjang gore ba tshepa mantšu ao a lego go Mateo 6:25, 31-34?

¹⁴ Banyalani ba ka ithuta mohlaleng wa moapostola Petro le mosadi wa gagwe. Ka morago ga dikgwedi tše e ka bago tše tshela go ya go ngwaga moapostola Petro a kopane le Jesu, o ile a swanelwa ke go dira phetho e bohlokwa. Petro o be a iphediša ka kgwebo ya go rea dihlapi. O ile a swanelwa ke go nagana ka mosadi wa gagwe ge Jesu a be a mo kgopela gore a mo latele. (Luka 5:1-11) Petro o ile a kgetha go sepela le Jesu gore a yo ruta ba bangwe ditaba tše dibotse. O ile a dira phetho e botse. Le gona re na le mabaka ao a kwagalago a gore mosadi wa gagwe o ile a mo thekga. Beibele e bontšha gore ka morago ga gore Jesu a tsošwe bahung, Petro o be a fela a sepela le mosadi wa gagwe. (1 Bakor. 9:5) Ka ge e be e le mosadi wa Mokriste yoo a bego a bea mohlala o mobotse, seo se ile sa dira gore Petro a eletše banna le basadi ba Bakriste a lokologile. (1 Pet. 3:1-7) Ga go pelaelo gore Petro le mosadi wa gagwe ba ile ba tshepa seo Jehofa a re tshepišitšego sona ge a be a re o tlo re hlokomela ge re ka etiša Mmušo wa gagwe pele maphelong a rena.—Bala Mateo 6:25, 31-34.

15. Phihlelo ya Tiago le Esther e go ruta’ng?

¹⁵ Ge e ba le na le mengwaga e sego kae le nyalane, le ka dira’ng gore le oketše nako yeo le e fetšago le hlankela Jehofa? Tsela e nngwe ke ka go bala diphihlelo tša banyalani ba bangwe. Ka mohlala, le ka bala dihlogo tšeo di rego “Ba Ile ba Ikgafa ka go Rata.” Dihlogo tše di ile tša thuša Tiago le Esther, e lego banyalani bao ba tšwago Brazil gore ba kgone go ya tlhokagalong. Tiago o re: “Ge re dutše re bala ka diphihlelo tša kamoo Jehofa a thušago bahlanka ba gagwe gona bjale, le rena re be re nyaka go bona ge Jehofa a re thuša.” Ka 2014, ba ile ba ya tlhokagalong kua Paraguay moo batho ba tšhemong yeo ba bolelago Sepotokisi. Esther o re: “Re rata kudu lengwalo la Baefeso 3:20. Re bone mantšu a lengwalo le a phethagala ka makga a mantši ge re hlankela Jehofa.” Lengwalong leo, Paulo o ile a kgonthišetša Baefeso gore Jehofa o tlo re direla dilo tše dintši kudu go feta tšeo re mo kgopetšego tšona. Ke nnete gore dilo tšeo Modimo a bego a ba tshepišitše  tšona di ile tša phethagala ka makga a mantši!

16. Bafsa bao ba sa tšwago go nyalana ba ka hwetša kae keletšo ge ba nyaka go oketša nako yeo ba e fetšago ba hlankela Jehofa?

¹⁶ Bafsa bao ba sa tšwago go nyalana ba ka holwa ke diphihlelo tšeo ba di hwetšago go bao ba ilego ba ithuta go ithekga ka Jehofa. Banyalani ba bangwe ba ka ba ba feditše nako e telele ba le tirelong ya nako e tletšego. Ke ka baka la’ng le sa ba kgopele keletšo ge e ba le nyaka go oketša nako yeo le e fetšago le hlankela Jehofa? Ye ke e nngwe ya ditsela tšeo di bontšhago gore le tshepa Jehofa. (Die. 22:17, 19) Bagolo le bona ba ka thuša bafsa bao ba sa tšwago go nyalana gore ba ipeele dilo tšeo ba nyakago go di dira le go di fihlelela ge ba hlankela Jehofa.

17. Ke’ng seo se ilego sa diragalela Klaus le Marisa, gona phihlelo ya bona e re ruta’ng?

¹⁷ Ka dinako tše dingwe re ka ipotša gore re nyaka go oketša tsela yeo re e fetšago re hlankela Jehofa eupša dilo tša fetoga re sa letela. Nagana ka mohlala wa Klaus le Marisa bao re boletšego ka bona pejana. Ka morago ga ge ba na le mengwaga e meraro ba nyalane, ba ile ba ya lekaleng la Finland go yo ithaopela go aga. Eupša ba ile ba botšwa gore ba tlo dula moo dikgwedi tše tshela feela. Mathomong ba be ba nyamile eupša ka moragonyana ga moo, ba ile ba memiwa gore ba tle ba ithute leleme la Searama. Gona bjale ba ipshina ka go hlankela Jehofa ba le nageng e nngwe yeo go bolelwago leleme leo. Ge Marisa a gopola seo se ilego sa ba diragalela o re: “Ke be ke tšhaba go dira selo seo ke sa kago ka se dira, le gona ke be ke swanetše go tshepa Jehofa ka mo go feletšego. Eupša ke bone gore Jehofa o be a dula a re thuša re sa nagana. Ka morago ga gore re ye re rute batho ditaba tše dibotse nageng e nngwe, ke ile ka thoma go ithekga ka Jehofa kudu.” Mohlala wo o bontšha gore ge o ka ithekga ka Jehofa ka mo go feletšego, o tla dula a go šegofatša.

18. Banyalani ba ka dira’ng gore ba dule ba ithekgile ka Jehofa?

¹⁸ Lenyalo ke mpho yeo e tšwago go Jehofa. (Mat. 19:5, 6) Jehofa o nyaka banyalani ba thabela mpho yeo. (Die. 5:18) Lena banyalani ba bafsa, na le ka lebelela gore le fetša nako ya lena e ntši le dira’ng? Na le dira sohle seo le ka se kgonago go leboga mpho yeo Jehofa a le filego yona? Rapelang Jehofa. Nyakang melao ya motheo ya Beibele yeo e tlago go le thuša go ya ka maemo a lena. Ke moka le diriše keletšo yeo Jehofa a le neago yona. Le ka kgodišega gore le tlo thaba ge le ka dula le ithekgile ka Jehofa le go mo etiša pele maphelong a lena!