1-2. Ke mešomo efe yeo e dirwago ke bagolo?

 GE E BA o na le nako e itšego o le mohlanka wa bodiredi, o ka ba o šetše o thomile go šoma ka thata gore o swanelege go ba mogolo. O ka dira’ng gore o swanelege bakeng sa “modiro [wo] o mobotse”?​—1 Tim. 3:1.

² Ke mešomo efe yeo mogolo a e dirago? O etelela pele tšhemong, o šoma ka thata go dira maeto a bodiši le go ruta e bile o kgothatša ba bangwe ka phuthegong ka seo a se bolelago le seo a se dirago. Ke ka baka leo Beibele e bitšago bagolo gore ke “dimpho.”​—Baef. 4:8.

3. Ngwanabo rena a ka dira’ng gore a hlankele e le mogolo? (1 Timotheo 3:1-7; Tito 1:5-9)

³ O ka dira eng gore o swanelege go hlankela bjalo ka mogolo? Go swanelega go ba mogolo ga go swane le go hwetša mošomo. Gore o hwetše mošomo, o swanetše gore o be le bokgoni bjo itšego bjo mongmošomo a bo nyakago. Eupša gore o be mogolo, o swanetše go ba le dika tše itšego tšeo go bolelwago ka tšona ka Beibeleng. Dika tšeo go bolelwa ka tšona go 1 Timotheo 3:1-7 le Tito 1:5-9. (Bala.) Sehlogong se, re tlo kwa ka tše dingwe tša dika tšeo, e lego: Tsela yeo motho a tumilego ka yona ka ntle le ka gare ga phuthego, go bea mohlala o mobotse bjalo ka hlogo ya lapa le go ikemišetša go hlankela phuthego.

 GO BA LE BOTUMO BJO BO BOTSE

4. “Go hloka bosodi” go bolela’ng?

⁴ E le gore o swanelege go ba mogolo, o swanetše go “hloka bosodi,” e lego seo se bolelago gore o swanetše go ba yo a tsebegago gabotse ka phuthegong. Go oketša moo, o swanetše go “hlatselwa gabotse ke batho ba ka ntle ga phuthego.” Batho bao ba sa hlankelego Jehofa ba ka no se dumelelane le dilo tšeo o di dumelago eupša ga se ba swanela go ipotšiša ge e ba o botega goba o itshwara gabotse. (Dan. 6:4, 5) Ipotšiše gore, ‘Na ke itshwara gabotse ge bana bešo ba le gona le ge ba se gona?’

5. O ka dira’ng go bontšha gore o “rata go loka”?

⁵ Ge e ba o “rata go loka,” o tlo dula o lebelela dika tše dibotse tšeo batho ba bangwe ba nago le tšona e bile wa ba reta ka seo. O thabela go direla batho ba bangwe dilo tše dibotse le go dira sohle seo o ka se kgonago go ba thuša. (1 Bathes. 2:8) Ke ka baka la’ng go le bohlokwa gore bagolo ba be le seka se? Ka gobane ba diriša nako ya bona e ntšhi go hlokomela phuthego le go phetha maikarabelo ao ba nago le ona. (1 Pet. 5:1-3) Le ge ba na le mošomo o montšhi, ba thabišwa ke go hlankela bana ba bo bona.​—Dit. 20:35.

6. O ka “amogela baeng” ka ditsela dife? (Baheberu 13:2, 16; bona le seswantšho.)

⁶ O bontšha gore o “amogela baeng” ge o direla batho ba bangwe dilo tše dibotse, go akaretša le bao e sego bagwera ba gago ba kgauswi. (1 Pet. 4:9) Nyakišišo e nngwe ge e hlalosa motho yo a amogelago baeng e re: “O amogela motho yo mongwe le yo mongwe ka gagwe e bile o dula a ikemišeditše go thuša le batho bao a sa ba tsebego.” Ipotšiše gore, ‘Na ke tsebega ka go amogela baeng?’ (Bala Baheberu 13:2, 16.) Motho wa go amogela baeng o swara batho ka moka gabotse, e ka ba batho bao ba se nago sa bona goba bao ba šomago ka thata, ba bjalo ka balebeledi ba tikologo le bao ba tlago go nea dipolelo phuthegong ya gabo bona.​—Gen. 18:2-8; Die. 3:27; Luka 14:13, 14; Dit. 16:15; Baroma 12:13.

7. Mogolo a ka bontšha bjang gore ‘ga a rate tšhelete’?

⁷ “O se ke wa rata tšhelete.” Ga se wa swanela go kitimiša mahumo. Go sa šetšwe gore o na le sa gago go ba wa diila, go hlankela  Jehofa ke selo seo se tlago pele bophelong bja gago. (Mat. 6:33) O diriša nako ya gago, matla a gago le dilo tšeo o nago le tšona go hlankela Jehofa, go hlokomela lapa la gago le go thuša phuthego. (Mat. 6:24; 1 Joh. 2:15-17) Ipotšiše gore: ‘Na ke lebelela bjang tšhelete? Na ke kgotsofalela dilo tše bohlokwa tšeo ke nago le tšona? Goba na ke kitimiša go ba le tšhelete e ntšhi le go leka go huma?’​—1 Tim. 6:6, 17-19.

8. O ka bontšha bjang gore o “lekanetše mekgweng” e bile o na le “boitshwaro”?

⁸ Go ba yo a “lekanetšego mekgweng” le go kgona “go itshwara,” go ra gore o dira dilo gabotse bophelong e bile o kgetha boithabišo gabotse. Se se akaretša o phema go ja kudu, go nwa kudu, go apara le go itokiša ka tsela e feteletšego. Ga o phele go swana le batho bao ba sa hlankelego Jehofa. (Luka 21:34; Jak. 4:4) O dula o išitše maswafo fase le ge batho ba bangwe ba sa go sware gabotse. Ga o “setagwa” e bile ga o tsebege o le motho yo a nwago kudu. Ipotšiše gore, ‘Na tsela yeo ke phelago ka yona e bontšha gore ke lekanetše mekgweng e bile ke na le boitshwaro?’

9. Go “hlaphogelwa monaganong” le go ba le “thulaganyo” go akaretša’ng?

⁹ Ge e ba o “hlaphogetšwe monaganong,” o naganišiša ka melao ya motheo ya Beibele pele o dira dilo. O naganišiša ka melao ya motheo ya Beibele gomme ya go thuša go dira diphetho tše di kaone. Ga o no dira diphetho ka lepotlapotla. O kgonthišetša gore o tseba ditaba ka botlalo. (Die. 18:13) Seo se tlo go thuša gore o dire diphetho tše bohlale tšeo di sepedišanago le melao ya motheo ya Beibele. Ge o na le “thulaganyo,” o kgona go beakanya dilo gabotse e bile o swara nako. O tsebega o le motho yo a botegago e bile o latela tlhahlo. Dika tše di tlo go thuša gore o tume gabotse. Ga bjale a re kweng gore ke’ng seo se ka go thušago gore o kgone go beela lapa la gago mohlala o mobotse.

GO BEELA LAPA LA GAGO MOHLALA O MOBOTSE

10. Monna a ka “okamela bjang ba lapa la gagwe ka tsela e botse”?

¹⁰ Ge e ba o le hlogo ya lapa gomme o nyaka go ba mogolo, tsela yeo lapa la gago le tumilego ka yona e ka dira gore o swanelege goba o se ke wa swanelega. Ka gona, o swanetše gore o “okamele lapa la [gago] ka mokgwa o mobotse.” O swanetše go tsebega o le hlogo ya lapa yeo e nago le lerato le maikarabelo. O swara borapedi bja lapa, o netefatša gore lapa la gago le ba gona dibokeng ka mehla e bile le ya tšhemong. Ke baka la’ng seo se le bohlokwa? Moapostola Paulo o ile a ngwala gore: “Ge e ba ruri motho a sa kgone go okamela ba lapa la gagwe, o tla hlokomela bjang phuthego ya Modimo?”​—1 Tim. 3:5.

11-12. Tsela yeo ba lapa la ngwanabo rena ba itshwarago ka yona e ka mo kgoma bjang ge a nyaka go ba mogolo? (Bona le seswantšho.)

¹¹ Ge e ba o le tate, o swanetše go ba o na le “bana bao ba ikokobetšago, bao ba sa tšeego dilo gabohwefo le gatee.” O swanetše go ba ruta le go ba tlwaetša ka lerato. Re a tseba gore bana ka moka ba swanetše go thaba le go fela ba e ba le nako ya go bapala. Eupša ge o ka ba tlwaetša, ba tlo kwa, ba hlompha le go itshwara gabotse. O swanetše go dira sohle seo o ka se kgonago go thuša bana ba gago gore ba gwerane le Jehofa, ba phele ka melao ya motheo ya Beibele le gore ba feleletše ba kolobeditšwe.

¹² Go ba le “bana bao ba sa latofatšwego ka go ba bao ba gobogilego goba bao ba rabelago.” Go ka direga’ng ka tate ge e ba ngwana yo a dulago le yena ka gae gomme a kolobeditšwe  a ka dira sebe se segolo? Ge e ba tate yoo a be a sa tlwaetše ngwana wa gagwe le go mo kgala, a ka se swanelege go ba mogolo.​—Bona Morokami wa October 15, 1996, letl. 21, dir. 6-7.

GO THUŠA PHUTHEGO

13. O ka bontšha bjang gore o “lekalekane” e bile ga o “dire boithatelo”?

¹³ Bana babo rena bao ba nago le dika tša Bokriste ba bohlokwa kudu ka phuthegong. Motho yo a “lekalekanego” o dira gore go dule go na le khutšo. Ge e ba o nyaka go tsebja o le yo a lekalekanego, theetša ge ba bangwe ba hlalosa kamoo ba bonago dilo ka gona. Ge e ba le le sebokeng, o ka thekga ditšhišinyo tšeo ba bangwe ba di neago ge e ba di sa thulane le melao ya motheo ya Beibele. Go se gapeletše gore dilo di dirwe ka tsela yeo wena di nyakago ka yona, go bontšha gore ga o dire boithatelo. O a tseba gore go bohlokwa gore o theetše batho ba bangwe. (Gen. 13:8, 9; Die. 15:22) Ga o “ntwadumela” goba “sefelapelwana.” Seo se ra gore ga o na lenyatšo e bile ga o ngangišane le batho ba bangwe. Ka ge o phegelela khutšo, o ba wa mathomo wa go lokiša ditaba ge go na le mathata. (Jak. 3:17, 18) Mantšu a gago a botho a ka dira gore le batho ba bangwe go akaretša le bao ba le ganetšago ba be bonolo.​—Baa. 8:1-3; Die. 20:3; 25:15; Mat. 5:23, 24.

14. Go ba yo a sa tšwago go “sokologa” le go “botega” go bolela’ng?

¹⁴ Ngwanabo rena yo a sa tšwago go “sokologa” a ka se swanelege go ba mogolo. Le ge go sa nyakege gore o fetše mengwaga e mentšhi o kolobeditšwe, go nyakega nakwana e itšego gore o be Mokriste yo a godilego moyeng. Pele o ka kgethwa gore o be mogolo, o swanetše go bontšha gore o ekiša Jesu ka go ba le boikokobetšo le go se felele Jehofa pelo. (Mat. 20:23; Bafil. 2:5-8) O ka bontšha gore o a “botega” ka go ithekga ka Jehofa le melao ya gagwe ya go loka le go latela tlhahlo  yeo a re neago yona a diriša mokgatlo wa gagwe.​—1 Tim. 4:15.

15. Na mogolo o swanetše go ba le bokgoni bja bolela phatlalatša gore e be mogolo yo mokaone? Hlalosa.

¹⁵ Beibele e bontšha gore bagolo ba swanetše go ba le “bokgoni bja go ruta.” Na se ra gore o swanetše go ba seboledi sa phatlalatša seo se nago le bokgoni kudu? Aowa. Bagolo ba bantšhi ba kgona go ruta tšhemong le go dira maeto a bodiši le ge ba sa kgone go bolela phatlalatša. Lega go le bjalo, o swanetše go lwela go dula o kaonefatša bokgoni bja go ruta. O ka thušwa ke’ng gore o kgone go ruta?

16. O ka dira’ng gore o be le bokgoni bja go ruta? (Bona le seswantšho.)

¹⁶ “Swarelela ka go tia lentšung le le botegago.” E le gore o kgone go ba le bokgoni bja go ruta, ithekge ke Lentšu la Modimo ge o ruta phatlalatša le ge o nea keletšo. Bala Beibele le dikgatišo tša rena ka mehla. (Die. 15:28; 16:23) Ge o dutše o ithuta, bona kamoo o ka dirišago keletšo ya Mangwalo ka gona. Ge o ruta, leka go fihlelela dipelo tša bao ba go theeditšego. O ka kgona go ba morutiši yo mokaone ge o ka kgopela bagolo ba bangwe gore ba go thuše le go go nea keletšo. (1 Tim. 5:17) Bagolo ba swanetše gore ba “kgothatše” bana babo bona le dikgaetšedi e bile ka dinako tše dingwe ba swanetše gore ba eletše le go ba “kgala.” Ka mehla bagolo ba swanetše go dula ba le botho. Ge e ba o le botho e bile o na le lerato le go ithekga ka Lentšu la Modimo ge o ruta, o tlo kgona go ruta gabotse ka gobane o tla be o ekiša Morutiši yo Mogolo e lego Jesu.​—Mat. 11:28-30; 2 Tim. 2:24.

DULA O ŠOMA KA THATA

17. (a) Ke’ng seo se ka thušago bahlanka ba bodiredi gore ba tšwele pele ba šoma ka thata? (b) Bagolo ba swanetše go nagana ka’ng ge ba hlahloba bana babo rena bao ba swanetšego go kgethwa? (Bona lepokisi leo le rego “ Eba le Boikokobetšo ge o Hlahloba ba Bangwe.”)

¹⁷ Ka morago ga gore bahlanka ba bangwe ba ba bodiredi ba ithute ka dilo tšeo ba swanetšego  go di dira gore ba hlankele e le bagolo, ba ka ipona ba sa swanelege. Eupša gopola gore Jehofa ga se a letela gore bagolo e be batho bao ba phethagetšego. (1 Pet. 2:21) E bile moya wa Jehofa o mokgethwa ke ona o tlago go go thuša gore o kgone go swanelega. (Bafil. 2:13) Na go na le seka seo o bonago okare o swanetše go šomela go sona? Rapela Jehofa gore a go thuše. Dira nyakišišo o be o kgopele yo mongwe wa bagolo gore a go thuše kamoo o ka kaonefatšago ka gona.

18. Bahlanka ba bodiredi ka moka ba kgothaletšwa gore ba dire’ng?

¹⁸ Eka ka moka ga rena re ka tšwela pele re lwela go ba le dika tšeo re boletšego ka tšona sehlogong se. (Bafil. 3:16) Ge e ba o le mohlanka wa bodiredi, leka go swanelega go ba mogolo. Kgopela Jehofa gore a go thuše go tšwela pele o mo hlankela le go thuša bana beno ka phuthegong. (Jes. 64:8) Eka Jehofa a ka go thuša gore o swanelege go hlankela o le mogolo.