1. Moapostola Paulo o be a ikwa bjang ka bahlanka ba bodiredi?

 BAHLANKA ba bodiredi ba dira mešomo e bohlokwa ka phuthegong. Moapostola Paulo o be a bona bana bao ba botegago ba le bohlokwa. Ka mohlala, ge moapostola Paulo a be a ngwalela Bakriste ba kua Filipi, o ile a dumediša bahlanka ba bodiredi le bagolo.​—Bafil. 1:1.

2. Ngwanabo rena yo a bitšwago Luis o ikwa bjang ka kabelo ya gagwe ya go ba mohlanka wa bodiredi?

² Bana babo rena ba baswa goba ba bagolo bao ba kolobeditšwego, ba thabela go ba bahlanka ba bodiredi. Ka mohlala, ngwanabo rena Devan o bile mohlanka wa bodiredi a na le mengwaga e 18. Mola ngwanabo rena yo a bitšwago Luis, a ile a kgethwa gore e be mohlanka wa bodiredi ge a be a na le mengwaga ya ka godimo ga e 50. Luis o be a ikwa go swana le bahlanka ba bangwe ba bodiredi, ka gona o ile a bolela gore: “Ke thabela go ba mohlanka wa bodiredi, ka gobane ke kgona go bontšha bana babo rena le dikgaetšedi ka phuthegong gore ke a ba rata.”

3. Re tlo araba dipotšišo dife sehlogong se?

³ Ge e ba o le ngwanabo rena yo a kolobeditšwego gomme o se mohlanka wa bodiredi, o ka dira’ng gore o be mohlanka wa bodiredi? O ka thušwa ke’ng gore o swanelege? Gona ke dika dife tšeo o swanetšego go ba le tšona e le gore o swanelege? Sehlogong se re tlo kwa dikarabo tša dipotšišo tše. Eupša a re thomeng pele ka go kwa gore mošomo wa mohlanka wa bodiredi ke eng.

 MOŠOMO WA MOHLANKA WA BODIREDI KE’NG?

4. Mohlanka wa bodiredi o šoma go dira’ng? (Bona le seswantšho.)

⁴ Mohlanka wa bodiredi ke ngwanabo rena yo a kolobeditšwego yo a kgethilwego ke moya o mokgethwa gore a thuše bagolo ka phuthegong. Bahlanka ba bangwe ba bodiredi ba hlankela e le bahlanka ba tšhemo le go thuša bagoeledi go hwetša dikgatišo tše lekanego. Ba bangwe ba thuša ka go hlwekiša Holo ya Mmušo le go e hlokomela. Mola ba bangwe e ka ba bahlokomedi le go thuša ka tša medumo le dibidio ge re le dibokeng. Mešomo yeo ba e dirago e bohlokwa kudu. Bahlanka ba bodiredi ke banna bao ba ratago Jehofa le go phela ka melao ya gagwe. Le gona ba rata bana babo bona le di kgaetšedi kudu. (Mat. 22:37-39) Ngwanabo rena yo a kolobeditšwego a ka dira’ng gore e be mohlanka wa bodiredi?

5. O ka dira’ng gore o be mohlanka wa bodiredi?

⁵ Beibele e re botša gore e le gore ngwanabo rena a swanelege go ba mohlanka wa bodiredi o swanetše go ba le dika tša mohuta mang. (1 Tim. 3:8-10, 12, 13) Ge o nyaka go ba mohlanka wa bodiredi, ithute ka dika tšeo gomme o šome ka thata gore o be le tšona. Eupša o swanetše go tseba gore ke ka baka la’ng o nyaka go ba mohlanka wa bodiredi.

KE KA BAKA LA’NG O NYAKA GO BA MOHLANKA WA BODIREDI?

6. Ke eng seo se ka go thušago gore o nyake go ba mohlanka wa bodiredi? (Mateo 20:28; Bona le seswantšho sa letlakala la ka ntle.)

⁶ Jesu o re beetše mohlala o mobotse, ka gobane dilo ka moka tšeo a bego a di dira di be di bontšha gore o be a rata Jehofa le batho ba bangwe. O be a dira le mešomo e mengwe yeo batho ba bangwe ba bego ba e nyatša. (Bala Mateo 20:28; Joh. 13:5, 14, 15) Ge e ba le wena o rata Jehofa le batho ba bangwe, Jehofa o tlo go thuša gore o swanelege go ba mohlanka wa bodiredi.​—1 Bakor. 16:14; 1 Pet. 5:5.

7. Ke ka baka la’ng ngwanabo rena a se a swanela go nyaka go ba mohlanka wa bodiredi e le gore o retwe ke batho ba bangwe?

⁷ Lehono batho ba bantšhi ba rata batho bao ba šomago ka thata gore ba phale ba bangwe eupša bahlanka ba Jehofa ga ba bjalo.  Ngwanabo rena yo a ratago batho ba bangwe go swana le Jesu a ka se nyake go ba le matla e le gore a laole ba bangwe goba go nyaka go ba le maemo. Ge e ba motho wa go rata maemo goba go laola batho ba bangwe a ka kgethwa ka phuthegong, o tlo gana go dira mešomo e mengwe yeo e bonagalago e nyatšega. O tlo bona mešomo yeo e swanetše go dirwa ke ba bangwe. (Joh. 10:12) Jehofa a ka se tsoge a šegofaditše maiteko a motho yoo a iponago a le bohlokwa e bile a nagana gore o phala batho ba bangwe.​—1 Bakor. 10:24, 33; 13:4, 5.

8. Jesu o ile a eletša baapostola ba gagwe ka’ng?

⁸ Balatedi ba bangwe ba Jesu ba ile ba nyaka ditokelo tše itšego e le gore ba be le maemo. Nagana ka seo moapostola Johane le Jakobo ba ilego ba se dira. Ba ile ba kgopela Jesu gore a ba nee maemo a bohlokwa Mmušong wa gagwe. Jesu ga se a kgahlwa ke seo ba ilego ba se dira. Ke ka baka leo a ilego a botša baapostola ba gagwe ka moka gore: “Mang le mang yo a nyakago go ba yo mogolo gare ga lena e swanetše go ba modiredi wa lena, gomme mang le mang yo a nyakago go ba wa pele gare ga lena e swanetše go ba mohlanka wa bohle.” (Mar. 10:35-37, 43, 44) Bana babo rena bao ba nyakago go ba bahlanka ba bodiredi ka gobane ba nyaka go thuša ba bangwe ba tlo hola phuthego.​—1 Bathes. 2:8.

O KA THUŠWA KE’NG GORE O NYAKE GO HLANKELA BA BANGWE?

9. O ka thušwa ke’ng gore o šome ka thata e le gore o swanelege?

⁹ Re a tseba gore o rata Jehofa e bile o nyaka go hlankela ba bangwe. Eupša o hwetša o sa nyake go dira mešomo yeo e dirwago ke bahlanka ba bodiredi. Bjale o ka thušwa ke’ng gore o dire mešomo yeo ba e dirago? Nagana gore o tlo thaba bjang ge o thuša bana beno le dikgaetšedi. Jesu o boletše gore: “Go na le lethabo le legolo go neeng go feta go amogeleng.” (Dit. 20:35) Jesu o be a phelela seo a se bolelago. O be a thabela go thuša batho ba bangwe. Le wena o ka swana le yena.

10. Jesu o bontšhitše bjang gore o be a thabela go thuša batho ba bangwe? (Mareka 6:31-34)

¹⁰ A re boneng kamoo Jesu a bego a thabela go thuša batho ba bangwe ka gona. (Bala Mareka 6:​31-34.) Ka letšatši le lengwe Jesu le baapostola ba gagwe ba be ba lapile. Ba be ba e ya lefelong leo go se nago motho gore ba khutše. Eupša lešaba leo le bego le nyaka gore Jesu a le rute le ile la ba fihlela pele mo ba bego ba e ya gona. Jesu a ka ba a ile a gana go ba ruta. Ka gobane yena le baapostola ba gagwe “ba be ba se na nako ya go iketla gaešita le go ja dijo.” Goba a ka ba a ile a gomiša lešaba leo ka morago ga go le botša dilo tše sego kae. Eupša ka ge a be a rata batho, “o ile a thoma go ruta lešaba leo dilo tše dintšhi.” O ile a fetša nako e ntšhi a ruta lešaba leo. (Mar. 6:35) Jesu o be a sa gapeletšege go ruta lešaba leo, eupša “o ile a le šokela.” O be a nyaka go ba ruta ka gobane a ba rata. Jesu o be a thabišwa ke go hlankela batho ba bangwe.

11. Jesu o bontšhitše bjang gore o be a na le taba le lešaba leo a bego a le ruta? (Bona le seswantšho.)

¹¹ Jesu ga se a no ruta lešaba feela, eupša o ile a le thuša le ka dilo tše dingwe. O ile a direla batho bao dijo ka mohlolo gomme a kgopela barutiwa ba gagwe gore ba ba fe tšona. (Mar. 6:41) O rutile barutiwa ba gagwe gore ba hlankele batho ba bangwe. O bontšhitše gore mešomo ya go swana le ye, yeo gantšhi e dirwago ke bahlanka ba bodiredi e bohlokwa kudu. Barutiwa ba Jesu ba ile ba thaba  kudu ge ba be ba mo thuša go nea lešaba dijo gomme ba bona “bohle ba [eja] ba khora.” (Mar. 6:42) Mohlala wo o re bontšha gore Jesu o be a tšea batho ba bangwe ba le bohlokwa kudu. Ge a be a le mo lefaseng o be a phelela batho ba bangwe. (Mat. 4:23; 8:16) Jesu o be a thabišwa ke go ruta ba bangwe le go ba thuša ka dilo tšeo ba di hlokago. Le wena o tlo thaba kudu, ge o ka šoma ka thata gore o be mohlanka wa bodiredi gomme wa thuša ba bangwe.

12. Ke ka baka la’ng o se wa swanela go nagana gore ga o na mohola ka phuthegong?

¹² O seke wa nyama ge o bona gore go na le dilo tše dingwe tšeo o sa di kgonego. Go na le dilo tše dingwe tšeo o ka thušago ka tšona ka phuthegong. Kgopela Jehofa a go thuše go kwešiša mantšu ao a lego go 1 Bakorinthe 12:​12-30. Mantšu ao Paulo a a boletšego, a re bontšha gore mohlanka yo mongwe le yo mongwe wa Jehofa o na le seo a ka se dirago go thuša ka phuthegong. O se ke wa nyama ge e ba gona bjale o sa swanelege go ba mohlanka wa bodiredi. Dira sohle seo o ka se kgonago go hlankela Jehofa le go thuša bana beno le dikgaetšedi. Kgodišega gore bagolo ba tseba dilo tšeo o di kgonago le gore ba tlo go fa dikabelo tšeo ba tsebago gore o tlo kgona go di phetha.​—Baroma 12:4-8.

13. Ke dika dife tšeo mohlanka wa bodiredi a swanetšego go ba le tšona?

¹³ Nagana ka se: Dika tšeo Beibele e hlalosago gore mohlanka wa bodiredi o swanetše go ba le tšona, ke tšeo Bakriste ka moka ba swanetšego go ba le tšona. Mokriste yo mongwe le yo mongwe o swanetše go ba le segwera se se tiilego le Jehofa, a thabele go thuša ba bangwe le go phela ka tsela yeo e thabišago Jehofa. Se se ra gore o šetše o na le dika tše dingwe tšeo di ka go thušago go re o swanelege go ba mohlanka wa bodiredi. Bjale ke dilo dife tšeo di ka go thušago gore o swanelege?

O KA DIRA’NG GORE O SWANELEGE?

14. Go ba “šedi” go bolela’ng? (1 Timotheo 3:8-10, 12)

¹⁴ A re boneng dika tše dingwe tšeo go bolelwago ka tšona go 1 Timotheo 3:8-10, 12. (Bala.) Mohlanka wa bodiredi o swanetše go ba “šedi.” Ka mantšu a mangwe o swanetše go itshwara ka tsela yeo batho ba bangwe ba ka kgonago go mo hlompha. Se ga se bolele gore o se ke wa batamelega goba o palelwe ke  go sega le batho ba bangwe. (Mmo. 3:1, 4) Eupša o swanetše go tšeela mošomo wa gago godimo. Ge batho ba bangwe ba tseba gore o a tshepega e bile ba ka ithekga ka wena, ba tlo go hlompha.

15. Go se be “temepedi” le go se nyake go ikhola “ka megabaru” go bolela’ng?

¹⁵ ‘O seke wa ba temepedi.’ O swanetše go bolela nnete le go botega. O swanetše go dira dilo tšeo o tshepišitšego ba bangwe gore o tla di dira, e bile o seke wa radia batho ba bangwe. (Die. 3:32) ‘O se be yoo ka megabaru o nyakago ditsela tša go ikhola.’ O swanetše go botega ge o dira tša kgwebo le ba bangwe le tsela yeo o dirišago tšhelete ka yona. O ka se diriše segwera seo o nago le sona le bana beno ka phuthegong go ikhola le gore o dire tšhelete.

16. (a) Go se ineele beineng e ntšhi go bolela’ng? (b) Go ba le “letswalo le le hlwekilego” go bolela’ng?

¹⁶ ‘O se ke wa ineela beineng e ntšhi.’ Ga se wa swanela go nwa kudu goba gore batho ba bangwe ba go tsebe o enwa kudu. O be le “letswalo le le hlwekilego.” O swanetše go phela ka melao ya Jehofa. Le ge o ka fela o dira diphošo, o tlo thabišwa ke go ba le segwera se se botse le Jehofa.

17. Ngwanabo rena a ka dira’ng go bontšha gore o a tshepega ge a ‘lekolwa go bona ge e ba a swanelega’? (1 Timotheo 3:10; Bona le seswantšho.)

¹⁷ ‘A lekolwe pele mabapi le ge e ba a swanelega.’ Bagolo ba tla bona gore o a tshepega e bile o kgona go phetha dikabelo tšeo ba go neilego tšona gabotse. Ge bagolo ba go nea kabelo e itšego, latela tlhahlo yeo ba go neago yona le tlhahlo yeo mokgatlo o go neago yona. Kwešiša gabotse seo o swanetšego go se dira, le go tseba gore o swanetše go se dira neng. Ge o dutše o dira dikabelo tša gago gabotse, bana babo rena le dikgaetšedi ka phuthegong ba tlo bona gore o a tshepega. Bagolo ba swanetše go tlwaetša bana babo rena bao ba kolobeditšwego. (Bala 1 Timotheo 3:10.) Na ka phuthegong ya gabo lena go na le baswa goba bana bao ba kolobeditšwego? Na ba bea mohlala o mobotse ka go ba le thuto ya motho ka noši? Na ba lokišetša diboka gabotse le go araba? Na ba ya tšhemong? Ge e ba ba dira dilo tšeo, le ka ba nea dikabelo tšeo ba ka di kgonago. Ge e ba le ka dira bjalo, le tlo kgona go ba lekola go bona ge e ba ba swanelega. Ge mengwaga e ba dumelela, ba ka kgethwa gore e be bahlanka ba bodiredi.

18. Go se be le seo o “latofatšwago ka sona” go bolela’ng?

 ¹⁸ A go se be le seo o “latofatšwago ka sona.”  O se ke wa latofatšwa ka go dira dilo tše mpe. Ka dinako tše dingwe Bakriste ba ka latofatšwa ka maaka. Jesu o ile a latofatšwa ka maaka e bile o boletše le gore balatedi ba gagwe le bona ba be ba tlo latofatšwa ka maaka. (Joh. 15:20) Eupša ge o ka ekiša Jesu wa dula o itshwere gabotse, o tlo tuma gabotse ka phuthegong.​—Mat. 11:19.

19. Beibele e ra go re’ng ge e re monna o swanetše go ba le mosadi o tee?

¹⁹ ‘A be monna yo a nago le mosadi o tee.’ Ge e ba o nyetše, o swanetše go kwa taelo ya Jehofa ya gore o be le mosadi o tee. (Mat. 19:3-9) Monna wa Mokriste ga se a swanela go dira bohlotlolo, o swanetše go dula a botegela mosadi wa gagwe. (Heb. 13:4) O se ke wa kgahlegela basadi ba bangwe.​—Jobo 31:1.

20. Monna o swanetše go hlokomela bjang lapa la gagwe?

²⁰ ‘A okamele lapa la gagwe gabotse.’ Ge e ba o le hlogo ya lapa, o swanetše go tšeela godimo maikarabelo a gago. Swara borapedi bja lapa ka mehla. Eya tšhemong le ba lapa la gago. Thuša bana ba gago gore ba be le segwera se se botse le Jehofa. (Baef. 6:4) Monna yo a hlokomelago lapa la gagwe gabotse o bontšha gore a ka kgona go hlokomela phuthego.​—Bapetša le 1 Timotheo 3:5.

21. Ge e ba o se mohlanka wa bodiredi o ka dira’ng?

²¹ Ge e ba o se mohlanka wa bodiredi, naganišiša ka seo o ithutilego sona sehlogong se e bile o kgopele Jehofa gore a go thuše. Ithute gore o swanetše go dira’ng gore o swanelege go ba mohlanka wa bodiredi gomme o šome ka thata. Nagana kamoo o ratago Jehofa le bana beno le dikgaetšedi ka gona. Nagana le kamoo o ka ba thušago ka gona. (1 Pet. 4:8, 10) Šoma ka thata gore o be mohlanka wa bodiredi e le gore o tle o thabišwe ke go hlankela bana beno le dikgaetšedi. Jehofa o tlo šegofatša maiteko a gago a go nyaka go ba mohlanka wa bodiredi.—Bafil. 2:13.