Paul: Ka November 1985, re be re thabile kudu ge re be re lebile Liberia, yeo e lego ka Bodikela bja Afrika go ya kabelong ya rena ya mathomo ya boromiwa. Sefofane sa rena se ile sa ema nageng ya Senegal. Mosadi wa ka o ile a re go nna: “E se kgale re tla be re tsena Liberia.” Go ile gwa ba le tsebišo yeo e rego: “Bao ba yago Liberia fologang sefofane. Re ka se kgone go ya moo ka gobane go na le batho bao ba lekago go thopa mmušo.” Re ile ra fetša matšatši a lesome re dutše le baromiwa ba bangwe kua Senegal, re ekwa ditaba tša gore batho ba bantšhi ba a bolawa e bile mmušo ga o dumelele batho gore ba tšwe ka magaeng a bona bošego.

Anne: Re batho bao ba dulago ba ntšhitše mahlo dinameng. Ge e le gabotse, ke be ke tsebja ke le motho yo a lego šedi kudu go tloga ke sa le ngwana. Ka dinako tše dingwe ke tšhaba le go tshela tsela! Eupša re be re ikemišeditše go fihla Liberia.

Paul: Nna le Anne re goletše lefelong le tee, kua bodikela bja naga ya England. Batswadi ba ka le mmago Anne ba be ba dula ba re kgothaletša gore re tsenele tirelo ya nako e tletšego. Re ile ra ba babulamadibogo ka morago ga gore re fetše sekolo. Batswadi ba rena ba be ba re thekga, e bile ba duma gore re fetše maphelo a rena re le tirelong ya nako e tletšego. Ge ke be ke na le mengwaga e 19, ke ile ka ya Bethele, gomme Anne le yena o ile a tla ka morago ga gore re nyalane ka 1982.

Anne: Re be re rata Bethele, eupša re be re nyaka go hlankela mo go nago le tlhokagalo. Ka ge re be re šoma le batho bao e ilego ya ba baromiwa, seo se ile sa dira gore le rena re tloge re nyaka go ya tlhokagalong. Re ile ra rapela ka taba yeo bošego bjo bongwe le bjo bongwe ka mengwaga e meraro. Ka gona re ile ra thaba kudu ge ka 1985, re be re hwetša taletšo ya go ya klaseng ya bo 79 ya Sekolo sa Gilead. Ka morago ga gore re aloge, re ile ra abelwa go yo hlankela nageng ya Liberia.

Paul: Re ile ra namela sefofane sa mathomo sa go tloga Senegal se e ya Liberia. Batho ba be ba tšhogile, e bile ba se ba dumelelwa go tšwa ka dintlong tša bona bošego. Batho ba be ba dula ba tšhogile ka gona le ge koloi e be e ka dira lešatanyana ba be ba goelela e bile ba tšhaba. Bošego bjo bongwe le bo bongwe re be re bala dikarolo tše itšego tša Dipsalme gore di re thuše go iša maswafo fase. Eupša re be re tloga re rata  kabelo ya rena. Mosadi wa ka o be a dula a e ya tšhemong gomme nna ke šoma Bethele le ngwanabo rena John Charuk. a Ke ithutile dilo tše dintšhi go yena ka gobane o feditše nako a le Liberia. Le gona o be a tseba mathata ao bana babo rena le dikgaetšedi ba kopanago le ona.

Anne: Bana babo rena le dikgaetšedi ba dirile gore re rate naga ya Liberia di sa tloga fase. Ba be ba le botho, ba batamelega e bile ba rata Jehofa. Re ile ra gwerana le bona kudu gomme ba feleletša ba le bjalo ka lapa la gabo rena le leswa. Ba ile ba re nea dikeletšo le go re kgothatša. Tšhemo ya gona e be e kgahliša. Beng ba dintlo ba be ba sa nyake re sepela ka pela. Batho ba be ba dula ba bolela ka Beibele go gongwe le go gongwe mo ba lego gona. Seo se be se dira gore go be bonolo go boledišana le bona. Re be re na le batho ba bantšhi bao re ithutago le bona Beibele, e bile re sa kgone go ba bona ka moka. Re be re tloga re thabela go šoma tšhemo moo.

Paul: Ka 1989, ge dilo di be di sa re sepelela gabotse, go ile gwa thoma selo se sengwe seo se tšhošago e lego ntwa ya bana ba thari. Ka di 2 tša July 1990, marabele a ile a thopa tikologo yeo e bego e le kgauswi le Bethele. Ka dikgwedi tša tharo, re ile ra palelwa ke go boledišana le batho bao ba bego ba le kgole, bao ba akaretšago ba malapa a gabo rena le bana ba bo rena bao ba lego ntlongkgolo. Dilo di be di hlakahlakane, dijo di hlaela e bile basadi ba katwa. Dilo tšeo di bego di direga nageng yeo di tšere mengwaga e 14.

Anne: Batho ba ditšo tše dingwe ba be ba elwa e bile ba bolayana. Batho bao ba bego ba swere dithunya, ba be ba apara diaparo tše sa tlwaelegago, ba ebela mebileng e bile ba tsena le ka dintlong tša batho gomme ba tšea dilo tšeo ba di nyakago. Batho bao ba be ba lebelela go bolaya batho ba bangwe e se selo. Ba be ba hlatlaganya ditopo go gongwe le go gongwe, le kgauswi le Bethele. Go ile gwa bolawa le Dihlatse tša Jehofa, go akaretša le baromiwa ba bangwe ba babedi.

Bana babo rena ba ba bangwe ba be ba bea maphelo a bona kotsing ka go uta Dihlatse tša ditšo tše dingwe tšeo batho ba bego ba nyaka go di bolaya. Bana babo rena ba Bethele le baromiwa ba ile ba dira se se swanago. Kua Bethele Dihlatse tše dingwe tšeo di bego di tšhabile magaeng a tšona di be di robala ka diphapošing tša ka tlase mola ba bangwe ba dula le rena ka diphapošing tša ka godimo. Le rena re ile ra ikhwetša re dula le lapa la batho ba šupago ka phapošing ya rena.

Paul: Letšatši le lengwe le lengwe batho bao ba be ba tsena ka Bethele go bona ge e ba re utile batho. Re be rena le batho ba bane ba go leta, ba babedi ba be ba ema lefasetereng mola ba babedi ba ema keiting.  Ge bana babo rena bao ba lego keiting ba iša matsogo ka pele, re be re tseba gore ga go na bothata. Ge ba ka iša matsogo ka morago, bao ba lego lefasetereng ba be ba tseba gore kotsi e etla ke moka ba kitima gore ba ute bana babo rena.

Anne: Ka letšatši le lengwe bana babo rena ba ile ba palelwa ke go thibela batho bao ba bego ba elwa gore ba se ke ba tsena ka Bethele. Nna le kgaetšedi yo mongwe re ile ra itswalelela ka phapošing ya go hlapela gomme ra ikuta. Kgaetšedi yoo o ile a tsena lefelong le le nyenyane gomme a ikuta go lona. Batho bao ba ile ba ntšhala morago ge ke be ke eya phapošing ya ka godimo ba swere dithunya. Ba ile ba nyaka go bula lebati ka kgang. Paul o ile a re go bona: “Mosadi wa ka o sa le ntlwaneng.” Ge ke be ke tswalela lebati la moo kgaetšedi yoo a bego a iphihlile gona, go ile gwa ba le lešatanyana gomme ka thoma go thothomela. Ke ile ka lemoga gore ge nka bulela batho ba gomme ba lemoga gore ke tšhogile, ke tlo ba mathateng. Ke ile ka rapela ka pelong gomme ka kgopela Jehofa gore a nthuše. Ke ile ka bula lebati gomme ka ba dumediša ke išitše maswafo fase. Yo mongwe wa bona o ile a nkgorometša a tsena ke moka a hlakahlakanya dilo. O be a sa tshepe gore a se a hwetša selo. Yena gotee le batho bao a bego a sepela le bona ba ile ba phuruphutša diphapoši, gomme ba se hwetše selo.

Paul: Re feditše dikgwedi tše mmalwa re se na dijo tše di lekanego. Eupša gantšhi borapedi bja Bethele bo be bo swana le “dijo tša rena tša mesong.” Re be re tseba gore go bala le go ithuta Beibele go tlo re nea matla ao re a hlokago gore re kgone go kgotlelela letšatši le lengwe le le lengwe.

Re be re tseba gore ge re ka tšwa go yo nyaka dijo le meetse, bana babo rena bao re ba utilego ba be ba ka bolawa. Gantšhi Jehofa o be a re nea dilo tšeo re di hlokago ka nako yeo re di hlokago ka yona. Jehofa o be a dula a re hlokometše e bile a re thuša gore re dule re išitše maswafo fase.

Ge dilo di be di senyega le go feta, go ithuta Beibele go be go re nea matla. Bana babo rena le dikgaetšedi ba bantšhi ba ile ba swanelwa ke go tšhaba magaeng a bona gore ba itšhireletše. Eupša go sa šetšwe dilo tšeo ka moka, ba be ba dula ba na le tumelo e bile ba išitše maswafo fase. Ba bangwe ba boletše gore go ba ka gare ga ntwa yeo go be go “ba tlwaetša go tlo lebeletšana le masetlapelo a magolo.” Bagolo le bana babo rena ba baswa ba be ba dira sohle seo ba ka se kgonago gore ba thuše bana babo bona le dikgaetšedi. Bana babo rena le dikgaetšedi bao ba tšhabetšego mafelong a mangwe ba be ba thušana, e bile ba bolela ditaba tše dibotse moo ba tšhabetšego gona. Ba ba be ba diriša selo se sengwe le se sengwe seo ba bego ba se hwetša ka sethokgweng gore ba age Diholo tša Mmušo le go swara diboka. Go dira dilo tšeo go be go thuša bana babo rena gore ba dule ba hlankela Jehofa. Ge re be re ile go thuša bana babo rena ka dijo, diaparo le dilo tše dingwe tšeo ba di hlokago, ba be ba kgopela gore re ba nee dilo tša go ya tšhemong go ena le go ba nea diaparo. Go bona seo go ile gwa re kgothatša kudu. Batho ba ile ba theetša ditaba tše dibotse le ge ba be ba na le mathata e bile ba tšhogile. Ba be ba kgona go bona gore Dihlatse tša Jehofa di a ratana, di  a thušana e bile di dula di thabile go sa šetšwe mathata ao di bego di na le ona. (Mat. 5:​14-16) Mafolofolo ao bana babo rena ba bego ba na le ona a go bolela ditaba tše dibotse a ile a dira gore batho ba bangwe bao ba bego ba elwa ba feleletše e le bana baba rena.

Paul: Re ile ra swanelwa ke go tloga nageng ka nakwana ka makga a mararo, gomme ka makga a mabedi re ile ra tloga ngwaga ka moka. Kgaetšedi yo mongwe wa moromiwa o ile a bolela gore: “Ge re be re le Gilead, ba ile ba re ruta gore re swanetše gore re rate bana babo rena le dikgaetšedi bao ba lego kabelong yeo re lego go yona, gomme re ile ra dira bjalo. Ka gona go tlogela bana ba bo rena ba le ka tlase ga maemo a, go ile gwa re kweša bohloko!” Re thabela gore re ile ra kgona go thuša bana babo rena ba Liberia re le dinageng tše dingwe tša kgauswi.

Anne: Ka May 1996, re ile ra tloga Bethele ka koloi ya mokgatlo e na le dipampiri tše bohlokwa. Re be re nyaka go ya toropong e nngwe ya kgauswinyana le Bethele, yeo e bego e bolokegile. Tikologo yeo re bego re le go yona e ile ya hlaselwa. Batho bao ba bego ba elwa ba ile ba thiba tsela, ba thuntšhetša godimo ke moka ba re emiša, ba ntšha ba bararo ba rena ka koloing gomme ba e tšea Paul a le ka gare ga yona. Re ile ra šala moo re tšhogile. Paul o ile a boa. O be a etšwa madi hlogong, re be re maketše re ipotšiša gore go direga’ng, re nagana gore ba mo thuntšhitše. Re ile ra lemoga gore ge e ba gole bjalo o be a ka se kgone go sepela. Motho yo mongwe o ile a mo gobatša ge a mo ntšha ka koloing. Re no leboga gore o be a gobetše ga nyenyane.

Go be go na le koloi ya mašole yeo e bego e tletše ka batho bao ba tšhogilego. Re ile ra leka go tsena kamoo koloing yeo eupša ra se lekane. Ka gona re ile re no itshwarelela ka ntle ga yona. Mootledi o ile a tloga ka lebelo gomme ra nyaka go wa. Re ile ra mo kgopela gore a eme, eupša o be a tšhogile gomme a se re kwe. Re ile ra fihla moo re yago gona eupša re lapile, re tšhogile e bile re thothomela.

Paul: Diaparo tša rena di be di na le ditšhila e bile di kgeigile, re maketše gore sa phela. Re ile ra robala nageng kgauswi le sefofane seo se bego se na le mašoba a dikolo. Gomme letšatši le le latelago sa re iša nageng ya Sierra Leone. Re ile ra leboga gore re sa phela eupša re be re tshwenyegile ka bana babo rena le dikgaetšedi.

Anne: Re ile ra fihla Bethele ya kua Freetown, Sierra Leone, re bolokegile gomme bana babo rena ba ile ba re hlokomela. Eupša ke ile ka thoma go nagana ka dilo tšeo di ilego tša direga. Letšatši le lengwe le le lengwe ke be ke tšhoga, ke nagana le gore selo se se mpe se ka ntiragalela e bile ke sa kgone go nagana gabotse. Bošego ke be ke etšwa kudumela, ke thothomela e bile ke thatafalelwa ke go hema. Paul o be a ntshwara ka letsogo gomme re rapela. Re be re opela dikopelo tša Mmušo go fihlela ke se sa thothomela. Go be go bonagala o ka re ke hlakana hlogo e bile ke se sa nyaka go hlankela ke le moromiwa.

Nka se tsoge ke lebetše seo se diragetšego ka morago. Yona bekeng yeo re ile ra hwetša dimakasine tše pedi. Makasine o mongwe e be e le Phafoga ya seisemane ya June 8, 1996. E be e na le sehlogo seo se rego: “Coping With Panic Attacks.” Sehlogo seo se nthušitše go kwešiša gore go be go direga’ng ka nna. Makasine o mongwe e be e le Morokami wa May 15, 1996, woo o bego o na le sehlogo seo se rego: “Ba Hwetša Kae Matla a Bona?” Morokami woo o be o na le seswanthšo sa serurubele seo se gobetšego. Sehlogo seo se ile sa re bapetša le serurubele seo se kgonago go tšwela pele se fofa le ge maphego a sona a gobetše. Se ile sa bontšha gore le ge re ka ikhwetša re se na matla ka baka la dilo tše mpe tšeo di re diragaletšego maphelong a rena, Jehofa a ka re thuša gore re tšwele pele re thuša ba bangwe. Ke ile ka bona gore Jehofa o dirile gore ke hwetše thušo yeo ke bego ke e hloka ka nako ya maleba. (Mat. 24:45) Go dira nyakišišo le go boloka dikgatišo tšeo go nthušitše kudu. Ge nako e dutše eya ke ile ka thoma go kaonefala.

Paul: Ka mehla re be re thaba kudu ge re boela Liberia. Ka 2004, re be re na le mengwaga e ka bago e 20 re le kabelong ya rena. Ntwa e be e fedile. Bana babo rena ba be ba itokišeletša go aga goba go lokiša meago ya lekala. Eupša re ile ra hwetša kabelo e mpsha.

Go be go se bonolo go amogela kabelo yeo. Re be re rata bana babo rena le dikgaetšedi ba Liberia kudu gomme re sa nyake go ba tlogela. Ka ge re ile ra tlogela malapa a gabo rena gomme ra ya Gilead, re ile ra amogela kabelo yeo gomme ra bona kamoo Jehofa a bego a re šegofatša ka gona. Re ile ra leba nageng ya Ghana.

 Anne: Re ile ra lla kudu ge re tloga nageng ya Liberia. Ngwanabo rena Frank, yo a godilego, o ile a re botša gore: “Le seke la tshwenyega ka rena!” Ke moka o ile a tšwela pele ka gore: “Re a tseba gore le re rata kudu eupša le swanetše go tshwenyega ka kabelo ya lena e mpsha yeo le e neilwego ke Jehofa. Ka gona, le swanetše go tshwenyega ka bana babo lena ba mo le yago.” Mantšu ao a ngwanabo rena a ile a re kgothatša kudu, le go dira gore re fele pele ya go ya kabelong ya rena moo re sa tsebego batho ba bantšhi e bile le naga ya gona re sa e tsebego gabotse.

Paul: Ga se gwa re tšea nako gore re rate bana babo rena ba kua Ghana. Dihlatse tše Jehofa e be e le tše dintšhi moo. Re ithutile dilo tše dintšhi tseleng yeo bana babo rena le dikgaetšedi ba bego ba hlankela Jehofa ka yona. Ka morago ga gore re hlankele Ghana ka mengwaga e 13 re ile ra hwetša kabelo e nngwe. Re ile ra kgopelwa gore re hlankele ofising ya lekala la Kenya. Le ge re ile ra gopola bana babo rena ba dikabelong tše di fetilego, re ile ra kgona go rata le go tlwaela bana babo rena ba Kenya. Mo Kenya le gona go na le mošomo o mogolo wo o swanetšego go dirwa wa go bolela ditaba tše dibotse.

Anne: Mo bophelong ke ile ka kopana le maemo a mantšhi a thata ao ka dinako tše dingwe a bego a dira gore ke tšhoge kudu. Ge re phela mafelong a kotsi re ka dula re tšhogile e bile re imetšwe. Jehofa a ka se no re phološa ka mohlolo. Ge nka no kwa medumo ya sethunya ke tšhoga kudu e bile ke thoma le go thothomela. Ke ile ka ithuta go tshepa Jehofa le ditsela tšeo a di dirišago go re thuša. E bile ke ithutile gore ge re ka dula re ithuta, re rapela re eya dibokeng le tšhemong, Jehofa o tlo re thuša gore re dule re le dikabelong tša rena.

Paul: Batho ba bangwe ba ka botšiša gore: “Le ikwa bjang ka kabelo ya lena?” Dinaga di ka ba botse le go kgahliša eupša dilo di ka fetoga ka ponyo ya leihlo. Ka gona ke’ng seo re se ratago go feta naga yeo re lego go yona? Ke bana babo rena le dikgaetšedi. Le ge re e tšwa mafelong a sa swanego, ka moka ga rena re rata Jehofa. Re be re nagana gore re romelwa kabelong e itšego gore re kgothatše bana ba bo rena, eupša ge e le gabotse bona ba kgothatša rena.

Nako e nngwe le e nngwe ge re huduga, re lemoga gore re na le lapa gohle mo re yago gona. Go ba ka phuthegong go dira gore re dule re šireletšegile. Re kgodišegile gore ge re ka dula re ithekgile ka Jehofa o tlo re nea dilo tšohle to re di hlokago.—Bafil. 4:13.