NA O thatafalelwa ke go ba le thuto ya motho ka noši ka mehla le go ipshina ka yona? Ka moka ga rena re fela le ikwa bjalo. Eupša re kgopela gore o nagane ka dilo tšeo o di dirago letšatši le lengwe le le lengwe, tše bjalo ka go hlapa. Ka dinako tše dingwe o ka ikwa o sa nyake go hlapa eupša ge o ka ikgapeletša wa hlapa o tlo ikwa o lapologile! Ka mo go swanago, go ithuta le gona go ka re lapološa. (Baef. 5:26) O ka thušwa ke’ng go ithuta?

• Dira lenaneo. Go ithuta Beibele ka mehla go bohlokwa kudu. (Bafil. 1:10) E le gore o se ke wa lebala go ithuta, bea lenaneo la gago mo o ka kgonago go le bona. Goba o ka bea alamo yeo e ka go gopotšago.

• Kgetha nako le mokgwa woo o ka go thušago go ithuta. Na o kgona go ithuta nako e telele monagano wa gago o sa lelere? Goba na o kgona go ithuta ka nako e kopana gantšhinyana mo bekeng? Ke wena o itsebago gabotse. Ge o dira lenaneo la gago gopola gore ke’ng seo se go šomelago. Ge e ba o ikwa o sa nyake go ithuta ge nako yeo e fihla, hle ikgapeletše. O ka no ithuta ka metsotso e lesome. O ka ithuta dilo tše dintšhi ka yona nako yeo e kopana. Mafelelong o ka hwetša o feditše nako e telele o ithuta.​—Bafil. 2:13.

• Kgetha e sa le pele dilo tšeo o ka thabelago go ithuta tšona. Ge e ba o tseba dilo tšeo o tlago go ithuta tšona e sa le pele, o tla be o diriša nako ya gago gabotse. (Baef. 5:16) Ngwala dihlogo tšeo o ka nyakago go ithuta tšona. Ge okare o bala wa ba le potšišo, e ngwale fase e le gore o tle o kgone go ithuta ka yona nakong e tlago.

• Fetofetoga le maemo. O seke wa dula o ikgapeletša go ithuta nako e telele goba go ithuta ka seo o bego o se kgethile. Selo sa bohlokwa ga se gore o ithuta neng, nako e kaakang goba ka eng eupša selo sa bohlokwa ke gore o ithute beke e nngwe le e nngwe.

Ge re ithuta ka mehla re holega kudu. Re tlo ba le segwera se tiilego le Jehofa, ra hlalefa e bile ra dula re lapologile.​—Josh. 1:8.