1-2. Ke mathata afe ao re ka kopanago le ona?

 JESU o ile a nea papišo ya mohlologadi yo a bego a dula a kgopela moahlodi gore a mo thuše go hwetša toka. Ga go pelaelo gore barutiwa ba Jesu ba ile ba kwešiša papišo yeo, ka gobane le bona ba be ba sa swarwe gabotse. (Luka 18:​1-5) Le rena papišo yeo re a e kwešiša ka gobane ka dinako tše dingwe re fela re sa swarwe gabotse.

² Lehono batho ba kgetholla ba bangwe e bile ga ba na tekatekano, ka gona ga re makale ge ka dinako tše dingwe re sa swarwe gabotse. (Mmo. 5:8) Ga se ra letela gore bana babo rena goba dikgaetšedi ba se ke ba re swara gabotse, eupša seo se ka direga. Re a tseba gore bana babo rena le dikgaetšedi ga ba lwe le rena. Ga se ba phethagala. Re ka ithuta dilo tše dintšhi tseleng yeo Jesu a ilego a arabela ka gona ge baganetši ba gagwe ba kgopo ba be ba sa mo sware gabotse. Ge e ba re sa felele batho bao ba re ganetšago pelo, gona go ra gore re ka dira seo se swanago le go bana babo rena le dikgaetšedi. Jehofa o ikwa bjang ge e ba batho bao ba re ganetšago goba bana babo rena le dikgaetšedi ba sa re sware gabotse? Na o na le taba le rena?

3. Jehofa o ikwa bjang ge re sa swarwe gabotse, gona ka baka la’ng?

³ Jehofa o na le taba le tsela yeo re swarwago ka yona. “O rata dilo tša go loka.” (Ps. 37:28) Jesu o re kgonthišetša gore Jehofa o tla “dira gore toka e dirwe . . . ka bjako” ka nako ya  maleba. (Luka 18:​7, 8) Go se kgale o tlo tloša dilo ka moka tšeo di re kwešago bohloko le tšeo di dirago gore re tlaišege.—Ps. 72:​1, 2.

4. Jehofa o re thuša bjang lehono?

⁴ Re swanetše go letela nako yeo Jehofa a tlago go fediša mathata ao re nago le ona ka moka. (2 Pet. 3:13) Gona bjale o a re thuša ge re sa swarwe gabotse. O re ruta le gore re swanetše go itshwara bjang ge re sa swarwe gabotse. Tsela e nngwe yeo a dirilego seo ka yona, ke ka go romela Morwa wa gagwe yoo re ka ekišago mohlala wa gagwe. O diriša Beibele go re nea keletšo yeo e ka re thuša ge batho ba bangwe ba sa re sware gabotse.

O SWANETŠE GO DIRA’NG GE O SA SWARWE GABOTSE?

5. Ke ka baka la’ng re swanetše go hlokomela tsela yeo re itshwarago ka yona ge re sa swarwe gabotse?

⁵ Re ka kwa bohloko le go nyama ge re sa swarwe gabotse. (Mmo. 7:7) Bahlanka ba bangwe ba Jehofa bao ba botegago ba bjalo ka Jobo le Habakuku, le bona ba ile ba ikwa ka tsela yeo. (Jobo 6:​2, 3; Habak. 1:​1-3) Le ge go tlwaelegile gore re ikwe ka tsela yeo, re swanetše go ba šedi gore re se ke ra senya ditaba le go feta.

6. Re ithuta’ng mohlaleng wa Abesalomo? (Bona le seswantšho.)

⁶ Re ka nyaka go itefeletša ge e ba motho yo mongwe a sa re sware gabotse goba a sa sware motho yo re mo ratago gabotse. Go itefeletša go ka gakatša ditaba. Nagana ka mohlala wa morwa wa Kgoši Dafida e lego Abesalomo. O ile a galefa kudu ka morago ga gore Aminone a kate kgaetšedi ya gagwe e lego Thamara. Molao wa Moshe o be o dumelela gore Aminone a bolawe ka baka la seo a se dirilego. (Lef. 20:17) Le ge go kwagala gore ke ka baka la’ng Abesalomo a be a galefile, o be a se a swanela go itšeela molao matsogong.—2 Sam. 13:20-23, 28, 29.

7. Mopsalme o ile a nagana’ng ge a bona bahlanka ba Jehofa ba sa swarwe gabotse?

⁷ Ka dinako tše dingwe re ka ipotšiša ge e ba re swanetše go tšwela pele re dira dilo tše dibotse ge re bona batho bao ba sa swarego ba bangwe gabotse ba ipshina ka bophelo. Mopsalme o ile a bona dilo di sepelela batho ba kgopo gabotse le ge ba be ba sa sware bahlanka ba Jehofa gabotse. O boletše gore: “Ba babe ke bona ba, bao ba dulago ba iketlile.” (Ps. 73:12) O ile a nyamišwa ke go bona batho ba sa swarwe gabotse gomme a bona eka  go hlankela Jehofa ga go sa na mohola ke moka a bolela gore: “Ge ke be ke leka go kwešiša se, ke be ke tshwenyega.” (Ps. 73:​14, 16) O ile a bolela le gore: “Ge e le nna, ke nyakile ke aroga, ke nyakile ke thelela.” (Ps. 73:2) Selo sa mohuta woo se ile sa diragalela le ngwanabo rena yo mongwe yoo re tla mmitšago Alberto.

8. Go ile gwa direga’ng ge ngwanabo rena yo mongwe a be a sa swarwe gabotse?

⁸ Alberto o ile a latofatšwa ka go utswa ditšhelete tša phuthego. Se se ile sa dira gore a lahlegelwe ke ditokelo tšeo a bego a na le tšona e bile batho ba bangwe ka phuthegong bao ba bego ba tseba ka taba ye ba ile ba se sa mo hlompha. Alberto o re: “Ke be ke galefile e bile ke hlakahlakane.” O ile a dumelela tsela yeo a ikwago ka yona e senya segwera sa gagwe le Jehofa a ba a tlogela le go ya dibokeng ka mengwaga e mehlano. Phihlelo ye e bontšha seo se ka diregago ge e ba re ka galefišwa ke go se swarwe gabotse.

EKIŠA MOHLALA WA JESU KRISTE

9. Jesu o ile a kgotlelela’ng? (Bona le seswantšho.)

⁹ Jesu o re beetše mohlala o mobotse wa kamoo re ka itshwarago ka gona ge re sa swarwe gabotse. Nagana ka tsela yeo batho ba  bantšhi ba ilego ba mo swara ka gona, go akaretša le batho ba gabo. Batho ba gabo bao ba bego ba sa hlankele Jehofa, ba be ba nagana gore o hlakane hlogo. Baetapele ba bodumedi ba ile ba mo latofatša ka gore o dirišana le batemona gomme madira a Baroma a mo kwera, a mo tlaiša ke moka mafelelong a mmolaya. (Mar. 3:21,22; 14:55; 15:16-20, 35-37) Ge dilo tše ka moka di direga, Jesu ga se a ka a itefeletša. Ke’ng seo re ithutago sona mohlaleng wa gagwe?

10. Jesu o ile a thušwa ke’ng gore a kgotlelele ge a be a sa swarwe gabotse? (1 Petro 2:21-23)

¹⁰ Bala 1 Petro 2:21-23. a Jesu o re beetše mohlala o mobotse kudu wo re ka o ekišago. O be a tseba nako ya go bolela le ya go homola. (Mat. 26:62-64) Ga se a ka a ikemelela nako e nngwe le e nngwe ge a latofatšwa. (Mat. 11:19) Ge a be a bolela ga se a ka a roga batho bao ba mo latofatšago go ba go ba tšhošetša. O ile a kgona go itshwara ka gobane o ile a “Ikgafela Yo a ahlolago ka go loka.” Jesu o be a tseba gore tsela yeo Jehofa a lebelelago dilo ka yona, e bohlokwa kudu. O be a tseba gore Jehofa o tla mo thuša ka nako ya maleba.

11. Ke’ng seo se ka re thušago go tseba tsela yeo re swanetšego go bolela ka yona? (Bona le diswantšho.)

¹¹ Ge motho yo mongwe a sa re sware gabotse, re ka ekiša Jesu ka go hlokomela dilo tšeo re di bolelago. Ka dinako tše dingwe go ka no nyakega gore re se ke ra bolela selo ka ge taba yeo e se e kgolo. Goba re ka no kgetha go homola gore re se senye ditaba le go feta. (Mmo. 3:7; Jak. 1:19, 20) Ka dinako tše dingwe re ka no swanelwa ke go bolela gore  re ikemelele goba re emele ditumelo tša rena. (Dit. 6:1, 2) Ge e ba re bolela, re swanetše go dira sohle seo re ka se kgonago gore re dule re išitše maswafo fase le go bontšha tlhompho.​—1 Pet. 3:15. b

12. Re ka dira’ng gore re ikgafele “Yo a ahlolago ka go loka”?

¹² Re ka ekiša Jesu ka go “ikgafela Yo a ahlolago ka go loka.” Ge e ba batho ba bangwe ba sa re ahlole gabotse goba ba sa re sware gabotse, re ka kgodišega gore Jehofa ke yena a tsebago seo se diragetšego. Go dira bjalo go tlo re thuša gore re kgone go kgotlelela ka gobane re tla be re tseba gore mafelelong Jehofa o tlo lokiša dilo. Ge e ba re tlogelela dilo ka matsogong a Jehofa, re tlo tlogela go dula re galefile goba go swara sekgopi. Go swara sekgopi go tlo dira gore re dule re nyamile, gwa re palediša go dira dilo tše dibotse le go senya segwera sa rena le Jehofa.​—Ps. 37:8.

13. Ke’ng seo se ka re thušago go kgotlelela ge re sa swarwe gabotse?

¹³ Re ka se kgone go dira dilo ka moka tšeo Jesu a di dirilego. Ka dinako tše dingwe re ka bolela goba ra dira dilo tšeo re ka itsholelago tšona ka morago. (Jak. 3:2) E bile ka dinako tše dingwe, re ka palelwa ke go kgotlelela ge re sa swarwe gabotse. Ge e ba seo se ka direga, kgodišega gore Jehofa o tseba ditaba ka botlalo. Le Jesu o a kwešiša gore o ikwa bjang ka gobane le yena o ile a se swarwe gabotse. (Heb. 4:15, 16) Le ge Jehofa a ile a romela Jesu mo lefaseng gore a re beele mohlala, o re nea le keletšo yeo e re thušago gore re kgone go kgotlelela ge re sa swarwe gabotse. A re boleleng ka ditemana tše pedi go Baroma kgaolo 12 tšeo di ka re thušago.

“ŠUTHELELANG KGALEFO YA MODIMO”

14. Go “šuthelela kgalefo ya Modimo” go bolela’ng? (Baroma 12:19)

¹⁴ Bala Baroma 12:19. Moapostola Paulo o ile a kgothaletša Bakriste gore ba “[šuthelele] kgalefo ya Modimo.” Re šuthelela kgalefo ya Jehofa ka go mo dumelela gore a dire phetho ya gore o tla tliša toka neng le gona bjang. Ka morago ga gore ngwanabo rena yo a bitšwago John a se swarwe gabotse, o ile a re: “Ke ile ka swanelwa ke go laola tsela yeo ke ikwago ka yona gore ke se ke ka dira dilo tšeo di fošagetšego. Lengwalo la Baroma 12:19, le nthušitše gore ke se ke ka fela pelo le gore ke tshepe Jehofa.”

15. Ke ka baka la’ng go le bohlokwa go letela Jehofa gore a lokiše mathata?

¹⁵ Re holega kudu ge re dumelela Jehofa a re thuša go lokiša ditaba. Go dira bjalo, go tlo re thuša gore re se ke ra imelwa le go hlakahlakana ka baka la go leka go lokiša mathata ao re tsebago gore re ka se kgone go a lokiša. Jehofa o ikemišeditše gore thuša. O re botša gore: “Tefetšo ke ya ka, ke tla lefetša.” Ge e ba re tshepa gore Jehofa ‘o tla re lefetša,’ gona re tla kgona go se dule re galefile ka gobane re a tseba gore Jehofa o tlo dira selo seo se lokilego. Go dira bjalo go ile gwa thuša ngwanabo rena John yo re boletšego ka yena pejana. O itše: “Ge e ba ke tlogela Jehofa gore a nthuše, gona o tlo dira bjalo ka tsela e kaone kudu.”

“TŠWELA PELE O FENYA BOBE KA BOTSE”

16-17. Go rapela go ka re thuša bjang gore re “tšwele pele re fenya bobe ka botse”? (Baroma 12:21)

¹⁶ Bala Baroma 12:21. Moapostola Paulo o ile a eletša Bakriste ka gore, “tšwela pele o fenya bobe ka botse.” Nakong ya ge Jesu a ruta a le thabeng o itše: “Tšwelang pele le  rata manaba a lena le go rapelela bao ba le tlaišago.” (Mat. 5:44) Le yena o ile a dira sona seo. Nagana kamoo Jesu a ilego a kwa bohloko ka gona ge madira a Baroma a be a mo kokotela koteng ya tlhokofatšo. Re ka nagana le gore o ile a kwa bohloko bjang ge a be a kgotleletše go gobošwa le go se swarwe gabotse.

¹⁷ Jesu o ile a dula a na le lerato e bile a tshepa Jehofa le ge a be a tlaišega. Go ena le gore a roge madira ao, o ile a rapela ka gore: “Tate ba lebalele gobane ga ba tsebe seo ba se dirago.” (Luka 23:34) Ge e ba re rapelela bao ba re tlaišago, re ka se dule re ba galefetše goba re ba hloile e bile seo se tlo dira le gore re ba lebelele gabotse.

18. Go rapela go thušitše bjang ngwanabo rena Alberto le John go kgotlelela ge ba be ba sa swarwe gabotse?

¹⁸ Go rapela go ile gwa thuša bana babo rena ba babedi bao re boletšego ka bona pejana bao ba bego ba sa swarwe gabotse. Ngwanabo rena Alberto o re: “Ke be ke dula ke rapelela bana bešo bao ba bego ba sa ntshware gabotse. Ke ile ka kgopela Jehofa gore a nthuše gore ke tlogele go nagana kudu ka seo se diragetšego.” Re thabela gore ga bjale, Alberto o boetše o hlankela Jehofa ka go botega. Ngwanabo rena John yena o re: “Ke ile ka rapelela ngwanešo yo a nkwešitšego bohloko ka makga a mantšhi. Go rapela go nthušitše gore ke tlogele go mo ahlola le gore ke dule ke na le khutšo ya monagano.”

19. Re swanetše go dira’ng ge re sa emetše tshepedišo ye ya dilo gore e fihle bofelong? (1 Petro 3:8, 9)

¹⁹ Ge feela re sa le mo tshepedišong ye ya dilo, re tlo no fela re swarwa gampe. Ga se ra swanela go tlogela go rapela Jehofa le go mo kgopela gore a re thuše go kgotlelela mathata ao re nago le ona ka moka. Eka re ka ekiša tsela yeo Jesu a ilego a itshwara ka yona le go tšwela pele re diriša keletšo yeo re e hwetšago ka Lentšung la Modimo. Ge re dira bjalo, re ka kgodišega gore Jehofa o tlo re šegofatša kudu.​—Bala 1 Petro 3:​8, 9.