1. Ke’ng seo re ithutago sona go Bakriste bao ba godilego?

 KA MOKA ga rena re hloka keletšo gore re dire diphetho tše bohlokwa bophelong. Re ka hwetša keletšo yeo go bagolo le go Bakriste ba bangwe bao ba godilego. Ge e ba e le ba bagolo kudu, ga se ra swanela go nagana gore keletšo ya bona e fetilwe ke nako. Jehofa o nyaka re ithuta go batho bao ba godilego. Ke kgale ba phela, ka gona ba na le phihlelo, ba a kwešiša e bile ba bohlale.—Jobo 12:12.

2. Re tlo boledišana ka’ng sehlogong se?

² Mehleng ya Beibele, Jehofa o ile a diriša banna bao ba godilego gore ba kgothatše batho ba gagwe le go ba hlahla. Nagana ka mohlala wa Moshe, wa Dafida le moapostola Johane. Ba phetše ka dinako tšeo di sa swanego e bile le maemo a bona a bophelo a be a sa swane. Ge ba be ba le kgauswi le go hlokofala, ba ile ba nea ba baswa keletšo e bohlale. Banna ba ka moka ba ile ba bontšha gore go kwa Modimo go bohlokwa. Jehofa o ile a dira gore mantšu a bona a ngwalwe ka Beibeleng gore a re hole lehono. Go sa šetšwe gore re ba bagolo goba ba banyenyane, re ka holwa ke keletšo ya bona. (Baroma 15:4; 2 Tim. 3:16) Sehlogong se, re tlo boledišana ka mantšu ao banna ba ba bararo ba a boletšego le seo re ka ithutago sona.

“LE TLO PHELA NAKO E TELELE”

3. Moshe o be a hlankela Modimo le Baisiraele ka ditsela dife?

³ Moshe o be a ineetše go Jehofa. E be e le moporofeta, moahlodi, moetapele le mongwadi. Moshe o be a ithutile dilo tše dintšhi bophelong. O ile a ntšha setšhaba sa Isiraele bokgobeng kua Egepeta le go bona mehlolo e mentšhi ya Jehofa. Jehofa  o ile a mo diriša go ngwala dipuku tše tlhano tša mathomo tša Beibele, a mo diriša go ngwala Psalme 90, mohlomongwe le Psalme 91. Go ka direga le gore ke yena a ngwadilego puku ya Jobo.

4. Ke bomang bao Moshe a ilego a ba kgothatša, gona ka baka la’ng?

⁴ Pele ga ge Moshe a ka hwa ge a be a na le mengwaga e 120, o ile a bitša setšhaba sa Isiraele gore a se gopotše ka dilo tšeo Jehofa a ba diretšego tšona. Ba bantšhi ba bona ge e be e sa le ba baswa, ba ile ba bona mehlolo yeo Jehofa a bego a e dira e bile ba be ba le gona nakong ya ge a otla Baegepeta. (Ek. 7:3, 4) Ba ile ba sepela nageng e omilego ge ba be ba tshela Lewatle le Lehwibidu le go bona ge Jehofa a be a fediša madira a Farao. (Ek. 14:29-31) Ge ba be ba le lešokeng, ba ile ba bona ge Jehofa a ba šireletša le go ba hlokomela. (Doit. 8:3, 4) Ga bjale ge Baisiraele ba le kgauswi le go tsena nageng ya kholofetšo, Moshe o ile a ba kgothatša la mafelelo. a

5. Mantšu a Moshe a mafelelo ao a lego go Doiteronomio 30:19, 20 a ile a kgonthišetša Baisiraele ka’ng?

⁵ Moshe o ba boditše go re’ng? (Bala Doiteronomio 30:​19, 20.) O ile a botša Baisiraele gore ba na le bokamoso bjo bo kgahlišago. Jehofa o be a tlo šegofatša Baisiraele gomme ba phela nako e telele nageng yeo a ba tshepišitšego yona. E be e tloga e le naga e botse le yeo e nago le dimela tše dintšhi. Ge Moshe a ba botša ka naga yeo, o ile a re le tlo hwetša “metse e mebotse le e megolo yeo le sego la e aga, dintlo tšeo di tletšego ka dilo tše dintšhi tše dibotse tšeo le sego la di šomela, didiba tšeo le sego la di epa, mašemo a diterebe le mehlare ya mehlware yeo le sego la e bjala.”​—Doit. 6:10, 11.

6. Ke ka baka la’ng Modimo a ile a dumelela ditšhaba tše dingwe di fenya Baisiraele?

⁶ Moshe o ile a lemoša Baisiraele. Ba be ba swanetše go kwa ditaelo tša Jehofa gore ba kgone go tsena nageng yeo a ba tshepišitšego yona. Moshe o ile a ba kgothaletša gore ba “kgethe bophelo” ka go theetša Jehofa le go dula ba mo kgomaretše. Eupša Baisiraele ba ile ba se kwe keletšo yeo. Ka gona, Modimo o ile a dumelela Baasiria gore ba fenye Baisiraele, ke moka ka morago a dumelela le Bababilona gore ba ba fenye le go ba iša bothopša.​—2 Dikg. 17:6-8, 13,14; 2 Dikor. 36:15-17, 20.

7. Ke’ng seo re ka ithutago sona go mantšu ao Moshe a a boletšego? (Bona le seswantšho.)

⁷ Seo re ithutago sona. Go kwa go a šireletša. Go swana le Baisiraele bao ba bego ba le kgauswi le go tsena nageng ya kholofetšo, le rena re kgauswi le go tsena lefaseng le leswa leo Modimo a le tshepišitšego, e bile re tlo bona ge a le fetoša go ba paradeise. (Jes. 35:1; Luka 23:43) Diabolo le matemona a gagwe ba tla be ba se gona. (Kut. 20:2, 3) Go tla be go se sa na bodumedi bja maaka bjo bo šitišago batho go hlankela Jehofa. (Kut. 17:16) Mebušo yeo e gatelelago batho e tla be e se gona. (Kut. 19:19, 20) Paradeiseng go tla be go se na marabele. (Ps. 37:10, 11) Batho lefaseng ka moka ba tla be ba ekwa melao e lokilego ya Jehofa yeo e dirago gore go be le khutšo le botee. Batho ba tla be ba ratana e bile ba tshepana. (Jes. 11:9) Bophelo bo tla be bo kgahliša kudu. Sa go kgahliša le go feta ke gore, ka ge re tla be re ekwa Jehofa, re tlo phela ka mo go sa felego.​—Ps. 37:29; Joh. 3:16.

8. Go naganišiša ka bophelo bjo bo sa felego go ile gwa thuša bjang moromiwa yo mongwe? (Juda 20, 21)

 ⁸ Ge re ka dula re nagana ka bophelo bjo bo sa felego bjo Modimo a bo tshepišitšego, re tlo kgona go mo hlankela go sa šetšwe mathata ao re ka kopanago le ona. (Bala Juda 20, 21.) Tshepišo yeo e ka kgona go re thuša go lebeletšana le mafokodi ao re nago le ona. Ngwanabo rena yo e bego e le kgale e le moromiwa kua Afrika yo a bego a tshwenywa ke bofokodi bjo itšego o boletše gore: “Ke ile ka lemoga gore bothata bjo ke nago le bjona, bo ka tla bja ntšhitiša go hwetša bophelo bjo bo sa felego, ka gona ke ile ka dira sohle se nka se kgonago gore ke lwantšhane le bjona le go kgopela Jehofa gore a nthuše. Ruri Jehofa o ile a nthuša gore ke fenye.”

“O TLA DIRA KA BOHLALE”

9. Dafida o ile a lebeletšana le mathata afe bophelong bja gagwe?

⁹ Dafida e be e le kgoši yeo e swarago batho gabotse. E be e le seopedi, a tseba go reta, e le mohlabani e bile e le moporofeta. O ile a kopana le mathata a mantšhi. O ile a fetša mengwaga e mentšhi a tšhabela Kgoši Saulo yo a bego a na le mona. Ka morago ga gore Dafida a be kgoši, o ile a swanelwa ke go tšhaba ka gobane morwa wa gagwe Abesalomo o be a nyaka go mo tšeela bogoši. Go sa šetšwe mathata ao Dafida a ilego a kopana le ona le dilo tšeo a bego a palelwa ke go di dira, o ile a dula botegela Modimo bophelong bja gagwe ka moka. Jehofa o ile a mo hlalosa e le “monna yo a kwanago le pelo ya [gagwe.]” Go bohlokwa gore re kwe keletšo ya Dafida.​—Dit. 13:22; 1 Dikg. 15:5.

10. Ke ka baka la’ng Dafida a ile a eletša morwa gagwe Solomone pele e ka ba kgoši?

¹⁰ Nagana ka keletšo yeo Dafida a ilego a e nea morwa wa gagwe Solomone yo a bego a tlo mo hlatlama. Jehofa o be a kgethile Solomone gore a age tempele yeo batho ba bego ba tlo tumiša Jehofa go yona. (1 Dikor. 22:5) Solomone o be a tlo ba le mošomo o montšhi e bile o be a tlo hloka gore Jehofa a mo thuše go etelela setšhaba pele. A re kweng seo Dafida a ilego a mmotša sona.

11. Dafida o ile a nea Solomone keletšo efe, gona seo se a se boletšego se ile sa phethagala bjang? ( 1 Dikgoši 2:2, 3) (Bona le seswantšho.)

¹¹ Ke’ng seo Dafida a se boletšego? (Bala 1 Dikgoši 2:2, 3.) Dafida o ile a botša morwa wa gagwe gore ge a ka kwa Jehofa o tla atlega bophelong. Dilo di ile tša sepelela Solomone gabotse ka mengwaga e mentšhi. (1 Dikor. 29:​23-25) O ile a aga tempele e kgolo a ba a ngwala le dipuku tše dintšhi tša Beibele. O ile a tuma ka baka la bohlale bja gagwe le mahumo. (1 Dikg. 4:34) Eupša go etša ge Dafida a boletše, Solomone o be a tla atlega ge feela a ka dula a ekwa Jehofa Modimo. Ka maswabi,  ka morago Solomone o ile a thoma go hlankela medimo e šele. Jehofa o ile a se sa thekga Solomone le go mo nea bohlale bjo bo bego bo mo thuša go etelela batho pele.—​1 Dikg. 11:9, 10; 12:4.

12. Re ka ithuta’ng mantšung ao Dafida a a boletšego?

¹² Ke’ng seo re ithutago sona? Go kwa go dira gore re atlege. (Ps. 1:1-3) Jehofa ga se a tshepiša go re nea dilo ka moka tšeo Solomone a bego a na le tšona. Eupša ge re ka kwa Modimo, o tlo re nea bohlale gomme ra kgona go dira diphetho tše dibotse. (Die. 2:6, 7; Jak. 1:5) Melao ya gagwe ya motheo e ka re thuša ge re swanetše go kgetha mošomo, go kgetha ge e ba re tla tšwetša dithuto pele, boithabišo le tsela yeo re dirišago tšhelete ka yona. Bohlale bjo Jehofa a re neago bjona, bo tlo re thuša gore re se ke ra gobala. (Die. 2:10, 11) Re tlo kgona go ba le bagwera ba ba botse. E bile Jehofa o re nea keletšo yeo e re thušago gore re kgone go ba le malapa a thabilego.

13. Kgaetšedi Carmen o ile a thušwa ke’ng gore a atlege bophelong?

¹³ Kgaetšedi Carmen, yo a dulago Mozambique, o be a nagana gore go rutega go tlo dira gore a atlege. O ile a ya yunibesithi gomme a ithutela go hlama le go aga. O re: “Ke be ke rata seo ke bego ke ithuta sona. Eupša go be go nyakega matla le nako e ntšhi. Ke be ke eya sekolong go tloga ka 7:30 mesong go fihla ka 6:00 thapama. Ke be ke sa kgone go ba gona dibokeng ka mehla gomme seo se be se senya segwera sa ka le Jehofa. Ke ile ka lemoga gore nka se kgone go hlankela marena a mabedi.” (Mat. 6:24) O ile a rapela ka boemo bjoo bja gagwe gomme a dira nyakišišo ka dikgatišong tša rena. O oketša ka gore: “Ka morago ga gore mma le bagolo ba nkeletše, ke ile ka phetha ka gore ke tlogele yunibesithi gomme ka hlankela Jehofa ka nako e tletšego. Ke ile ka kgona go dira diphetho tše kaone, e bile ga ke itshole le gatee.”

14. Molaetša o mogolo wa Moshe le Dafida e be e le eng?

¹⁴ Moshe le Dafida ba be ba rata Jehofa kudu e bile ba holwa ke go mo kwa. Mantšung a bona a mafelelo, ba ile ba kgothaletša batheetši ba bona gore ba ekiše mohlala wa bona ka go dula ba ekwa Jehofa Modimo wa bona. Ba ile ba lemoša batheetši ba bona gore bao ba ka tlogelago go hlankela Jehofa a ka se sa  ba thekga e bile ba ka se hwetše dilo tšeo a ba tshepišitšego tšona. Keletšo yeo ya bona e a re hola le lehono. Mengwaga e mentšhi ka morago, mohlanka yo mongwe wa Jehofa o ile a bontšha gore go bohlokwa go botegela Modimo.

“LEBAKA LE LEGOLO LA GO THABA”

15. Go ile gwa direga’ng bophelo bja moapostola Johane?

¹⁵ Johane e be e le moapostola yo Jesu Kriste a bego a mo rata. (Mat. 10:2; Joh. 19:26) Johane o be a dula a na le Jesu bodireding, a bona mehlolo yeo Jesu a bego a e dira e bile o be a dula a na le yena dinakong tša mathata. O be a le gona ge Jesu a bolawa a ba a mmona ka morago ga gore a tsošwe. O ile a bona ge phuthego ya Bokriste ya lekgolong la pele la mengwaga e be e gola go tloga go sehlopha se senyenyane sa batho bao ba botegago go fihla ge ditaba tše dibotse di “boletšwe tlholong yohle yeo e lego ka tlase ga legodimo.”—​Bakol. 1:23.

16. Ke bomang bao ba holwago ke mangwalo a Johane?

¹⁶ Nakong ya ge Johane e le mokgalabje, o ile a ba le tokelo ya go ngwala puku ya Kutollo. (Kut. 1:1) Johane o ile a ngwala le puku yeo e bitšwa ka yena. O ngwadile le mangwalo a mangwe a mararo. Ge Johane a be a ngwala lengwalo la boraro, o be a le ngwalelwa Mokriste yo bitšwago a bitšwago Gayo, yo a bego a mo rata kudu. (3 Joh. 1) Go ka direga gore ka nako yeo go be go na le Bakriste ba bantšhi bao le bona Johane a bego a ba lebelela e le bana ba gagwe. Se mokgalabje yo, yoo a botegago a ilego a se ngwala, se ile sa kgothatša balatedi ba Jesu ka moka go fihla le lehono.

17. Go ya ka mantšu ao a lego go 3 Johane 4, ke’ng seo se dirago gore re thabe?

¹⁷ Ke’ng seo Johane a se ngwadilego? (Bala 3 Johane 4.) Johane o ile a ngwala gore o be a thaba kudu ge a be a bona bana babo le dikgaetšedi ba ekwa melao ya Modimo. Nakong ya ge Johane a ngwala lengwalo la boraro, go be go na le ba bangwe ka phuthegong bao ba bego ba ruta dithuto tša maaka le go baka dikarogano. Eupša ba bangwe ba ile ba tšwela pele ba “sepela tseleng ya nnete.” Ba be ekwa Jehofa e bile ba “phela ka melao ya gagwe.” (2 Joh. 4, 6) Bakriste ba bao ba botegago, ga se ba thabiša Johane feela eupša ba ile ba thabiša le Jehofa.​—Die. 27:11.

18. Re ka ithuta’ng go mantšu ao Johane a a boletšego?

¹⁸ Seo re ithutago sona. Go botega go dira gore re thabe. (1 Joh. 5:3) Ka mohlala, re a  thaba ge re tseba gore re thabiša pelo ya Jehofa. O a thaba ge a bona re gana diteko tšeo di lego gona mo lefaseng gomme re ekwa seo Beibele e re botšago sona. (Die. 23:15) Barongwa le bona kua legodimong ba a thaba. (Luka 15:10) Le rena re a thaba ge re bona Bakriste gotee le rena ba botega le ge ba na le mathata le diteko. (2 Bathes. 1:4) Ge tshepedišo ye e fihla mafelelong, re tlo kgotsofatšwa ke go tseba gore re ile ra dula re botegela Jehofa le ge re be re phela lefaseng leo le laolwago ke Sathane.

19. Ke’ng seo kgaetšedi yo a bitšwago Rachel a se boletšego ka go ruta batho ka Jehofa? (Bona le seswantšho.)

¹⁹ Re thaba kudu ge re ruta batho ba bangwe ka Jehofa. Kgaetšedi Rachel, yo a dulago Dominican Republic, o re go ruta batho ba Modimo ke tokelo e kgolo kudu. Ge a bolela ka batho bao a ithutago le bona o re: “Ke thaba kudu ge ke bona batho bao ke ba rutago ba rata Jehofa, ba ithekga ka yena, e bile ba fetola tsela yeo ba phelago ka yona gore ba mo kgahliše. Lethabo leo le feta dilo ka moka tšeo ke di dirago gore ke hwetše nako ya go ba ruta.”

HOLWA KE MANTŠU AO A BOLETŠWEGO KE BANNA BAO BA BOTEGAGO

20. Re swana le Moshe, Dafida le Johane ka ditsela dife?

²⁰ Moshe, Dafida le Johane ba phetše mehleng yeo e sa swanego le ya rena e bile ba ile ba lebeletšana le maemo ao a sa swanego le a rena. Eupša go na le dilo tše dintšhi tšeo re swanago le bona ka tšona. Ba be ba hlankela Modimo wa nnete go swana le rena. Go swana le bona, le rena re rapela Jehofa e bile re ithekga ka yena gore a re thuše le go re hlahla. Re kgodišegile gore Jehofa o šegofatša bao ba mo kwago.

21. Jehofa o tlo re šegofatša bjang ge re ka kwa keletšo ya Moshe, Dafida le Johane?

²¹ A re direng sohle seo re ka se kgonago gore re naganišiše ka mantšu a mafelelo ao banna bao ba botegago ba a boletšego gomme re kwe ditaelo tšeo Jehofa a re neago tšona. Ke moka, re tlo atlega dilong ka moka tšeo re di dirago. Ge re ka dira bjalo re tlo kgona go phela ka mo go sa felego. (Doit. 30:20) E bile re tlo thabišwa ke go kgahliša Tatago rena wa legodimong, yo a dirago dilo ka moka tšeo a di tshepišitšego go feta ka tsela yeo re naganago ka yona.​—Baef. 3:20.