1, 2. (a) Kholofelo ya Bakriste ba therešo e fapana bjang le kholofelo ya batho ba lefase la Sathane? (b) Re tlo ahlaahla dipotšišo dife tša bohlokwa?

A KHOLOFELO e kgahlišago gakaakaang yeo Bakriste ba therešo ba nago le yona! Ka moka ga rena, go sa šetšwe gore re batlotšwa goba re “dinku tše dingwe,” re na le kholofelo ya go tlo bona Modimo a phethagatša morero wa gagwe wa mathomong gomme a kgethagatša leina la gagwe. (Joh. 10:16; Mat. 6:9, 10) Kholofelo yeo ke tokelo e kgolo yeo motho le ge e le ofe a ka ratago go ba le yona. Le gona re letetše go tlo hwetša bophelo bjo bo sa felego re le karolo ya “magodimo a mafsa” a Modimo, goba re le karolo ya ‘lefase la gagwe le lefsa.’ (2 Pet. 3:13) Ge re sa letetše seo, re rapelela gore batho ba Modimo ba tšwele pele ba atlega moyeng.

² Batho ba lefase la Sathane le bona ba na le kholofelo ya bona, eupša go ka direga gore ba ipotšiša ge e ba kholofelo yeo e tla tsoga e phethagetše. Ka mohlala, batho ba bantši bao ba petšhago ba ka ipotša gore ba tlo wina, eupša ga ba kgodišege ka seo. Ka lehlakoreng le lengwe, tumelo ya kgonthe ke “tebelelo e kgonthišeditšwego” ya seo Bakriste ba se holofetšego. (Baheb. 11:1) Eupša o ka ipotšiša gore:  ‘Nka kgodišega bjang gore seo ke se holofetšego se tla phethagala? Gona meputso ya go ba le tumelo e tiilego dilong tše ke di holofetšego ke efe?’

3. Tumelo ya Bakriste ba therešo e theilwe kae?

³ Ga re belegwe re na le tumelo; e bile ga re be le yona ka mohlolo. Moya o mokgethwa wa Modimo ke wona o dirago gore motho wa pelo e botse a be le tumelo. (Bagal. 5:22) Ga go na mo Beibele e rego Modimo o na le tumelo goba gore o a e hloka. Ka ge Jehofa e le Ramatlaohle e bile a le bohlale, ga go na selo seo se ka mo thibelago go phethagatša morero wa gagwe. Tatago rena wa legodimong o kgodišegile gore dilo tše dibotse tšeo a re holofeditšego tšona di tlo phethagala. Go yena go bjalo ka ge eka di šetše di phethagetše. Ke ka baka leo a rego: “Di diragetše!” (Bala Kutollo 21:3-6.) Tumelo ya Bakriste ba therešo e theilwe mantšung a gore Jehofa ke “Modimo yo a botegago,” yoo ka mehla a phethagatšago seo a se boletšego.​—Doit. 7:9.

4. Banna le basadi ba tumelo ba pele ga mehla ya Bokriste ba be ba na le tebelelo efe?

⁴ Baheberu kgaolo 11, e na le maina a banna le basadi ba 16 bao ba bego ba na le tumelo. Mongwadi wa puku ye yo a bego a buduletšwe ke Modimo o boletše ka bona le ba bangwe gore “ba ile ba hlatselwa gabotse ka baka la tumelo ya bona.” (Baheb. 11:39) Ka moka ga bona ba be ba na le “tebelelo e kgonthišeditšwego” ya gore Modimo o be a tla tšweletša “peu” e holofeditšwego gore e tlo pšhatla Sathane le go phethagatša morero wa Jehofa wa mathomong. (Gen. 3:15) Babotegi bao ba hwile pele “peu” e holofeditšwego, e lego Jesu Kriste, e ka bula tsela ya go ya legodimong. (Bagal. 3:16) Go sa šetšwe seo, re leboga gore dikholofetšo tša Jehofa ga di ke di pala. Batho bao ba tlo tsošwa bahung gomme ba thabela bophelo lefaseng la paradeise ba phethagetše.​—Ps. 37:11; Jes. 26:19; Hos. 13:14.

5, 6. Aborahama le lapa la gagwe ba ile ba dula ba nagana ka eng, gona ba ile ba dira’ng gore ba dule ba na le tumelo e tiilego? (Bona seswantšho seo se lego mathomong a sehlogo.)

⁵ Ge Baheberu 11:13 e bolela ka ba bangwe ba bao ba phetšego pele ga mehla ya Bokriste e re: “Ka moka ba ile ba hwa ba na le tumelo, gaešita le ge dikholofetšo di se tša phethagala mehleng ya bona, eupša ba di bone di le kgole ba di amogela.” Yo mongwe wa batho bao ke Aborahama. Na o ile a dula a nagana ka kholofetšo e kgahlišago ya go phela ka mo go sa felego ge go tla be go buša “peu” e holofeditšwego? Jesu o ile a nea karabo e kwagalago potšišong yeo ge a be a botša baganetši ba gagwe gore: “Aborahama tatago lena o ile a thabišwa kudu ke kholofelo ya go bona mehla ya ka, o ile a e bona a thaba.” (Joh. 8:56) Go bjalo le ka Sara, Isaka, Jakobo le ba bangwe ba bantši bao ba ilego ba dula ba naganne ka Mmušo wa Modimo wa nakong e tlago, “woo mohlami le moagi wa wona e lego Modimo.”​—Baheb. 11:8-11.

⁶ Aborahama le lapa la gagwe ba ile ba dira’ng gore ba dule ba na le tumelo e tiilego? Go ka direga gore ba ile ba ithuta ka Modimo ka go theetša babotegi ba bogologolo, ka dipono, goba ka go bala dingwalwa tše di ka botwago tša mehleng ya bona. Sa bohlokwa le go feta ke gore ba ile ba se lebale seo ba ithutilego sona gomme ba dumela dikholofetšo tša Modimo le go phela ka melao ya gagwe ba ba ba naganišiša ka dilo tšeo. Ka ge ba be ba na le tumelo e tiilego dikholofetšong tša Modimo, banna le basadi ba ba ile ba kgona go kgotlelela mathata le ge e le afe le go dula ba botegela Modimo.

7. Ke dilo dife tšeo ka lerato Jehofa a re neilego tšona gore re be le tumelo, gona ke’ng seo rena re swanetše go se dira?

⁷ E le gore tumelo ya rena e dule e tiile, ka lerato Jehofa o re neile Lentšu la gagwe le le feletšego e lego Beibele. Gore re ‘thabe’ le go “atlega,” re swanetše go bala Lentšu la Modimo ka mehla, ge go kgonega re le bale letšatši le letšatši. (Ps. 1: 1-3; bala Ditiro 17:11.) Ke moka, go swana le barapedi ba Jehofa ba pele ga mehla ya Bokriste, re swanetše go dula re naganišiša ka dikholofetšo tša Modimo le go phela ka melao ya gagwe. Le gona, Jehofa o re nea dijo tše dintši kudu tša moya a diriša “mohlanka yo a botegago le wa temogo.” (Mat. 24:45) Ka go re’alo, ge re ka diriša seo re ithutago sona, re tla swana le bahlanka ba kgale ba Jehofa ba botegago bao ba bego ba na le “tebelelo e kgonthišeditšwego” ka kholofelo ya bona ya Mmušo.

8. Thapelo e ka tiiša bjang tumelo ya rena?

⁸ Thapelo le yona e thušitše bahlanka ba Modimo ba pele ga mehla ya Bokriste gore ba dule ba na le tumelo e tiilego. Tumelo ya bona e be e tia ge ba be ba bona Modimo a araba dithapelo tša bona. (Neh. 1:4, 11; Ps. 34:4, 15, 17; Dan. 9:19-21) Le rena re ka botša Jehofa matshwenyego a rena, re tseba gore o tla re kwa gomme a re nea matla a go kgotlelela ka lethabo. Le gona ge Modimo a araba dithapelo tša rena, tumelo ya rena e tia le go feta. (Bala 1 Johane 5:14, 15.) Ka ge tumelo e le se sengwe sa dika tše di enywago ke moya o mokgethwa, re swanetše go ‘tšwela pele re kgopela’ Modimo gore a re nee moya woo, go etša ge Jesu a re kgothaleditše go dira bjalo.​—Luka 11:9, 13.

9. Ge re rapela, ke bomang gape bao re swanetšego go ba rapelela?

⁹ Lega go le bjalo, ga se ra swanela go rapela Modimo ge feela re nyaka thušo go yena. Jehofa “o re diretše dilo tše dintši tše di makatšago” tše re “palelwago ke go di anega,” tšeo re ka mo lebogago tšona le go mo tumiša ka tšona letšatši le letšatši. (Ps. 40:5) Le gona, dithapelo tša rena di swanetše go bontšha gore re “[dula re] gopola ba ba lego ditlemong tša kgolego bjalo ka ge eka [re] golegilwe le bona.” E bile re swanetše go rapelela bana babo rena lefaseng ka moka, kudukudu “bao ba etelelago pele gare ga [rena].” Ruri re a thaba ge re bona Jehofa a araba dithapelo tše bjalo!​—Baheb. 13:3, 7.

10. Ke bahlanka bafe ba Modimo bao ba ilego ba gana go se botege, gona ba thušitšwe ke’ng gore ba dule ba botega?

¹⁰ Go Baheberu kgaolo 11, moapostola Paulo o hlalosa mathata ao a ilego a kgotlelelwa ke bahlanka ba bantši ba Modimo bao a sa ba bolelago ka maina. Ka mohlala, moapostola yo o bolela ka basadi ba tumelo bao ba ilego ba hwelwa ke bana eupša ka morago ba ba amogela gape tsogong ya bahu. Ke moka o bolela ka ba bangwe bao “ba ka se [amogelego] go lokollwa ka topollo e nngwe, e le gore ba fihlelele tsogo e kaone.” (Baheb. 11:35) Le ge re ka se kgodišege gore Paulo o be a bolela ka bomang, ba bangwe, go swana le Nabothe le Sakaria, ba ile ba bolawa ka maswika ka gobane ba be ba ekwa Modimo e bile ba dira thato ya gagwe. (1 Dikg. 21:3, 15; 2 Dikor. 24:20,​21) Daniele le bagwera ba gagwe ba ka be ba ile ba “lokollwa” ge nkabe ba ile ba kgetha go se botegele Modimo. Go e na le moo, ka tsela ya seswantšhetšo, tumelo ya bona go Modimo e ile ya ba thuša go “thiba melomo ya ditau” le go “tima matla a mollo.”​—Baheb. 11:33, 34; Dan. 3:16-18, 20, 28; 6:13, 16, 21-23.

11. Baporofeta ba bangwe ba ile ba kgotlelela mathata afe ka baka la tumelo ya bona?

¹¹ Ka baka la tumelo ya bona, baporofeta ba go swana le Mikaya le Jeremia “ba lekilwe ka go kwerwa le . . . ka dikgolego.” Ba bangwe, go swana le Eliya, “ba ile ba ralala maganateng, dithabeng, maweng le meleteng ya lefase.” Ka moka ga bona ba ile ba kgotlelela ka gobane ba be ba na le “tebelelo e kgonthišeditšwego ya seo se holofetšwego.”​—Baheb. 11:1, 36-38; 1 Dikg. 18:13; 22:24-27; Jer. 20:1, 2; 28:10, 11; 32:2.

12. Ke mang yo a re beetšego mohlala o mogolo wa go kgotlelela diteko, gona ke’ng se se mo thušitšego go di kgotlelela?

¹² Ka morago ga gore Paulo a bolele ka banna le basadi ba fapafapanego ba tumelo, o ile a bolela ka mohlala o mogolo wa tumelo, e lego wa Morena wa rena Jesu Kriste. Baheberu 12:2 e re: “Ka  baka la lethabo leo le bego le beilwe pele ga gagwe o ile a kgotlelela kota ya tlhokofatšo, a se be le taba le go hlabišwa dihlong gomme a dula ka letsogong la le letona la sedulo sa bogoši sa Modimo.” Ge re lebeletšane le diteko tše dikgolo, re swanetše go ‘naganišiša’ kudu ka mohlala wa Jesu wa tumelo. (Bala Baheberu 12:3.) Go swana le Jesu, Bakriste ba lekgolong la pele la mengwaga bao ba hwetšego tumelo ya bona, ba bjalo ka morutiwa Antipase, ba ile ba gana go se botege. (Kut. 2:13) Modimo o tlo ba putsa ka go ba tsošetša legodimong, e lego tsogo yeo e phalago “tsogo e kaone” yeo babotegi ba pele ga mehla ya Bokriste ba tlago go e hwetša. (Baheb. 11:35) Nako e itšego ka morago ga gore Mmušo wa Modimo o thome go buša legodimong ka 1914, batlotšwa ka moka ba bjalo ba botegago, bao ba bego ba robetše lehung, ba ile ba tsošetšwa legodimong gore ba tle ba thuše Jesu go buša batho mo lefaseng.​—Kut. 20:4.

13, 14. Rudolf Graichen o ile a welwa ke diteko dife, gona o thušitšwe ke’ng go kgotlelela?

¹³ Lehono bahlanka ba Modimo ba dimilione ba latela mohlala wa Jesu ka go dula ba nagana ka kholofelo ya bona le go se dumelele diteko di fokodiša tumelo ya bona. Nagana ka mohlala wa Rudolf Graichen, yo a belegetšwego Jeremane ka 1925. O ile a gopola diswantšho tša dikanegelo tša  ka Beibeleng tšeo di bego di pharilwe lebotong la ntlo ya gabo. O ngwadile gore: “Seswantšho se sengwe se be se na le phiri le kwana, putšanyana le lepogo, namane le tau​—ka moka di phela ka khutšo, di eteletšwe pele ke mošemanyana. . . . Diswantšho tšeo di ile tša tiiša tumelo ya ka.” (Jes. 11:6-9) Go sa šetšwe go tlaišwa o šoro ka mengwaga e mentši ke Maphodisa a Nazi gomme ka morago ke Maphodisa a sehlogo a ka Bohlabela bja Jeremane, Rudolf o ile a dula a nagana ka lefase la paradeise.

¹⁴ Tše dingwe tša diteko tšeo di ilego tša wela Rudolf ke lehu la mmagwe, yoo a bolailwego ke bolwetši bja typhus kampeng ya tlaišo ya Ravensbrück, le go bona tatagwe a fokola tumelong go fihlela a saena pampiri ya gore yena ga a sa nyaka go ba Hlatse ya Jehofa. Ka morago ga gore Rudolf a lokollwe kgolegong, o ile a ba le tokelo ya go ba molebeledi wa tikologo ke moka a laletšwa Sekolong sa Gilead. O ile a abelwa go yo ba moromiwa kua Chile, moo le gona a ilego a hlankela e le molebeledi wa tikologo. Eupša diteko tša Rudolf di be di se tša hlwa di felela. Ka morago ga ngwaga a nyalane le moromiwagotee e lego Patsy, lesea la bona le ile la hlokofala. Ka morago, mosadi wa gagwe, yo a bego a na le mengwaga e 43, le yena o ile a hlokofala. Rudolf o ile a kgotlelela diteko tše ka moka. Le gona le ge a be a tšofetše e bile a babja, o be a hlankela e le mmulamadibogo wa ka mehla e bile e le mogolo ge phihlelo ya gagwe e be e gatišwa ka go tokollo ya Morokami wa August 1, 1997, matlakala 20-25. ^[1]

15. Ke mehlala efe ya lehono ya Dihlatse tša Jehofa tšeo di kgotlelelago diteko ka lethabo?

¹⁵ Dihlatse tša Jehofa di tšwela pele di thaba kholofelong ya tšona go sa šetšwe go tlaišwa o šoro ka mehla. Ka mohlala, bana babo rena ba bantši le dikgaetšedi ba kgolegong kua Eritrea, Singapore le South Korea, ba bantši ba bona ba golegilwe feela ka gobane ba ekwa mantšu a Jesu a gore re se ke ra lwa le motho. (Mat. 26:52) Gare ga bana babo rena ba ba makgolokgolo go na le Isaac, Negede le Paulos, bao ga bjale ba nago le mengwaga e fetago e 20 ba le kgolegong kua Eritrea! Le ge ba ganeditšwe go hlokomela batswadi ba bona bao ba tšofetšego le go nyala, bana babo rena ba ba botegela Modimo go sa šetšwe go tlaišwa o šoro. Difahlego tša bona tše di edilego, go etša ge re ba bona wepesaeteng ya rena ya jw.org, di bontšha gore tumelo ya bona e tiile. Gaešita le baletakgolego ba šetše ba ba hlompha.

16. Tumelo e tiilego e ka go šireletša bjang?

¹⁶ Dihlatse tše dintši tša Jehofa ga se tša hlwa di tlaišwa o šoro. Di welwa ke mehuta e mengwe ya diteko. Dihlatse tše dingwe di ile tša swanelwa ke go kgotlelela bodiidi goba go hlaka nakong ya dintwa tša selegae goba dikotsi tša tlhago. Tše dingwe di swana le Moshe le bapatriareka ka kgopolo ya gore di tlogetše bophelo bja maemo bja lefase le le botumo. Di lwa ka matla gore di se ke tša lekega go rata mahumo le bophelo bja boithati. Di thušwa ke’ng go dira se? Di thušwa ke go rata Jehofa le tumelo ya tšona e tiilego kholofetšong ya gagwe ya gore o tlo fediša go hloka toka ka moka le go putsa bahlanka ba gagwe ba botegago ka bophelo bjo bo sa felego lefaseng le lefsa la go loka.​—Bala Psalme 37:5, 7, 9, 29.

17. O ikemišeditše go dira’ng, gona re tlo ithuta ka’ng sehlogong se se latelago?

¹⁷ Sehlogong se, re bone kamoo go naganišiša ka dikholofetšo tša Modimo le go rapela ka mehla go tlago go tiiša tumelo ya rena. Ke moka tumelo yeo e tla re thuša go kgotlelela diteko ge re dutše re nagana ka kholofelo ya rena ka “tebelelo e kgonthišeditšwego.” Eupša Beibele e hlalosa tumelo ka tsela e nngwe gape, gomme re tla ithuta ka seo sehlogong se se latelago.