1, 2. Joshua o ile a lebeletšana le diphetogo dife ka morago ga lehu la Moshe?

JEHOFA o ile a botša Joshua gore: “Moshe mohlanka wa ka o hwile; bjale ema o tshele Noka ye ya Jorodane gotee le setšhaba se ka moka gomme le tsene nageng yeo ke e neago sona.” (Josh. 1:1, 2) Ruri maemo a Joshua a ile a fetoga kapejana! O be a bile mothuši wa Moshe ka mengwaga e ka bago e 40.

² Ka ge Moshe a ile a etelela pele setšhaba sa Baisiraele ka nako e telele, mohlomongwe Joshua o be a ipotšiša gore ga bjale setšhaba se se be se tlo arabela bjang ge yena a se etelela pele. (Doit. 34:8, 10-12) Puku e nngwe ya go hlalosa Beibele ge e bolela ka Joshua 1:1, 2, e re: “Mehleng ya kgale gaešita le mehleng ya lehono, nako e thata kudu setšhabeng ke ge go fetošwa moetapele.”

3, 4. Re tseba bjang gore Joshua o be a bota Modimo, gona ke potšišo efe yeo re ka ipotšišago yona?

³ Joshua o swanetše go ba a be a na le mabaka a kwagalago a gore a boife, eupša ka morago ga matšatši a sego kae feela, o ile a kwa ditaelo tša Jehofa. (Josh. 1:9-11) Ga se a ka a tlogela go bota Jehofa. Ka ge pego ya Beibele e bontšha, Jehofa o ile a hlahla Joshua le setšhaba sa Gagwe sa Baisiraele a diriša morongwa. Ke mo go kwagalago go nagana gore morongwa  yoo e be e le Lentšu, e lego Morwa wa Modimo wa leitšibulo.​—Ek. 23:20-23; Joh. 1:1.

⁴ Ka thušo ya Jehofa, Baisiraele ba ile ba latela tlhahlo ya Joshua, go no swana le ge ba be ba latela ya Moshe. Le rena re phela mehleng ya diphetogo, ka gona re ka ipotšiša gore, ‘Ka ge mokgatlo wa Modimo o gatela pele ka lebelo, na re na le mabaka a kwagalago a go tshepa gore Jehofa o kgethile Jesu e le Moetapele wa rena?’ (Bala Mateo 23:10.) Ga bjale anke re ithuteng kamoo Jehofa a ilego a hlahla batho ba gagwe nakong e fetilego, a diriša baetapele ba gagwe ba botegago.

5. Ke’ng seo Joshua a ilego a lebeletšana le sona ge a be a le kgauswi le go tsena motseng wa Jeriko? (Bona seswantšho seo se lego mathomong a sehlogo.)

⁵ Gateetee ka morago ga gore Baisiraele ba tshele noka ya Jorodane, Joshua o ile a lebeletšana le selo se itšego seo a bego a se a se letela. Ge a dutše a batamela kgauswi le motse wa Jeriko, o ile a kopana le monna yo a bego a swere tšhoša. Ka ge Joshua a be a sa tsebe gore monna yoo ke mang, o ile a mmotšiša gore: “Na o wa gabo rena goba o wa manaba a rena?” Seo se ilego sa makatša Joshua ke gore monna yoo o ile a ikutolla gore ke yena mang. E be e le “kgošana ya madira a Jehofa,” yeo e bego e tlo lwela batho ba Modimo. (Bala Joshua 5:13-15.) Le ge mafelong a mangwe pego ye e bontšha gore Jehofa e be e le yena a bego a bolela le Joshua, ga go pelaelo gore o be a diriša morongwa wa gagwe, go etša ge a be a kile a dira bjalo nakong e fetilego.​—Ek. 3:2-4; Josh. 4:1, 15; 5:2, 9; Dit. 7:38; Bagal. 3:19.

6-8. (a) Ke ka baka la’ng go ya ka pono ya motho tše dingwe tša ditaelo tša Jehofa di be di ka bonagala di ka se šome? (b) Ditaelo tša Jehofa di ile tša bontšha bjang gore ke tša maleba e bile di tlile ka nako? (Bona le mongwalo wa ka tlase.)

⁶ Morongwa yoo o ile a botša Joshua gore a dire eng e le gore a fenye motse wa Jeriko. Mathomong, go be go bonagala eka tše dingwe tša ditaelo tšeo ga di kwagale. Ka mohlala, Jehofa o be a laetše gore banna ka moka ba be ba swanetše go bolotšwa, e lego selo seo se bego se tla dira gore ba se kgone go dira selo ka matšatši a mmalwa. Na yeo e be e le nako ya maleba ya gore banna bao ba bego ba swanetše go ya ntweng ba bolotšwe?​—Gen. 34:24, 25; Josh. 5:2, 8.

⁷ Go ka direga gore mašole ao a Baisiraele, ao a bego a sa kgone go itwela a be a ipotšiša gore a be a tla šireletša malapa a ona bjang ge e ba manaba a ona a be a ka šwahlela mešaša ya ona. Eupša gateetee go ile gwa tla tsebišo ya gore dikgoro tša Jeriko di be di “tswaletšwe di notletšwe ka baka la bana ba Isiraele.” (Josh. 6:1) Ruri ditaba tšeo di swanetše go ba di ile tša dira gore mašole ao a bote tlhahlo ya Jehofa le go feta!

⁸ Go oketša moo, Baisiraele ba be ba laetšwe gore ba se hlasele motse wa Jeriko eupša ba o dikologe gatee ka letšatši ka matšatši a tshela, eupša ka letšatši la bošupa, e lego letšatši la sabatha ba o dikologe ka makga a šupago. Mašole a mangwe a ka ba a ile a nagana gore, ‘Ruri re senya nako le matla a rena!’ Eupša morongwa yoo a bego a eteletše Baisiraele pele o be a tseba seo a se dirago. Tlhahlo ye ga se ya ka ya no matlafatša tumelo ya Baisiraele eupša e ile ya ba ya ba phološa go bagale ba Jeriko.​—Josh. 6:2-5; Baheb. 11:30. *

9. Ke ka baka la’ng re swanetše go latela ditaelo tšeo re di hwetšago mokgatlong wa Modimo? Nea mohlala.

⁹ Re ithuta’ng pegong ye? Re ithuta gore ka dinako tše dingwe re ka no se kwešiše ka botlalo ditaelo tšeo mokgatlo wa Jehofa o re neago tšona. Ka mohlala, mohlomongwe mathomong re be re sa kwešiše gore ke ka baka la eng re swanetše go  šomiša didirišwa tša elektroniki ge re dira thuto ya motho ka noši, ge re le tšhemong le ge re le dibokeng. Eupša ga bjale ba bantši ba rena re bona mehola ya go di diriša. Ge re bona mehola ya diphetogo tše bjalo ka tše, tumelo ya rena e a matlafala e bile re ba le botee, le ge mathomong re be re na le dipelaelo.

10. Ke mang yo a bego a eteletše pele seboka se bohlokwa sa sehlopha se bušago sa kua Jerusalema?

¹⁰ Mengwaga e ka bago e 13 ka morago ga gore Koronelio yo a bego a se a bolla a fetoge Mokriste, Bajuda ba bangwe ba Bakriste ba be ba sa nyaka gore batho ba bolotšwe. (Dit. 15:1, 2) Ka morago ga gore go tsoge ngangišano kua Antiokia, go ile gwa rulaganywa gore Paulo a iše taba ye go sehlopha se bušago kua Jerusalema. Eupša tlhahlo yeo e be e tšwa go mang? Paulo o itše: “Ke rotogetše gona ka ge ke be ke utolletšwe seo.” Go molaleng gore tlhahlo yeo e be e etšwa go Kriste, ka ge a be a nyaka gore sehlopha se bušago se rarolle taba yeo.​—Bagal. 2:1-3.

11. (a) Ke boemo bofe bjo bo ilego bja no tšwela pele bo le gona magareng ga Bakriste ba Bajuda mabapi le taba ya lebollo? (b) Go kwa ga Paulo bagolo ba kua Jerusalema go ile gwa lekwa bjang? (Bona le mongwalo wa ka tlase.)

¹¹ Kriste o ile a hlahla sehlopha se bušago go dira phetho ya gore go be go sa hlokagale gore Bakriste bao e sego Bajuda ba bolotšwe. (Dit. 15:19, 20) Eupša ka morago ga mengwaga e mentši phetho yeo e dirilwe, Bajuda ba bantši ba ile ba no tšwela pele ba bolotša bana ba bona. Ge bagolo ba kua Jerusalema ba ekwa gore go be go na le mabarebare ao a phatlalatšwago ka Paulo a gore o be a sa latele Molao wa Moshe, ba ile ba mo nea ditaelo tšeo di bego di sa letelwa. * (Dit. 21:20-26) Ba ile ba mmotša gore a tšee banna ba bane a ba iše tempeleng e le gore batho ba bone gore Paulo o be a “boloka Molao.” Paulo nkabe a ile a belaela seo ba mmoditšego gore a se dire, a fahlela ka gore bothata bjo bogolo bo be bo na le Bakriste ba Bajuda bao ba bego ba sa kwešiše gabotse taba ya lebollo. Eupša ka ge a be a tseba gore bagolo bao ba be ba nyaka gore go be le botee ka phuthegong,  ka boikokobetšo o ile a latela ditaelo tšeo a bego a di neilwe. Lega go le bjalo, re ka ipotšiša gore: ‘Ke ka baka la’ng Jesu a ile a dumelela taba ye ya lebollo gore e se rarollwe ka nako e telele gakaakaa mola lehu la gagwe le fedišitše Molao wa Moshe?’​—Bakol. 2:13, 14.

12. Ke ka baka la’ng Kriste a ka ba a ile a dumelela gore go fete nako pele go ka rarollwa taba ya lebollo?

¹² Ba bangwe ba rena, re tšea nako gore re tlwaele diphetogo goba kwešišo e mpsha. Bajuda ba Bakriste ba be ba hloka nako gore ba amogele gore ga ba sa diriša Molao wa Moshe. (Joh. 16:12) Ba bangwe ba ile ba thatafalelwa ke go amogela gore go bolla go be go se sa bontšha gore motho o na le tswalano e kgethegilego le Modimo. (Gen. 17:9-12) Ba bangwe ka ge ba be ba tšhaba gore ba tla tlaišwa, ba ile ba se nyake go fapana le Bajuda ba bangwe. (Bagal. 6:12) Eupša ge nako e dutše e eya, Kriste o ile a ba nea tlhahlo e oketšegilego a diriša mangwalo a makgethwa ao a ngwadilwego ke Paulo.​—Baroma 2:28, 29; Bagal. 3:23-25.

13. Ke’ng seo se ka re thušago go thekga tsela yeo Kriste a etelelago pele batho ba Modimo lehono?

¹³ Ge e ba re sa kwešiše gabotse gore ke ka baka la eng go na le diphetogo ka mokgatlong wa Jehofa, re swanetše go nagana ka tsela yeo Kriste a ilego a etelela batho ba Modimo pele nakong e fetilego. Go sa šetšwe gore e be e le mehleng ya Joshua goba lekgolong la pele la mengwaga, ka mehla Kriste o be a nea batho ba Modimo tlhahlo e le gore a ba šireletše e le sehlopha, a matlafatše tumelo ya bona le gore ba dule ba na le botee.​—Baheb. 13:8.

14-16. Tlhahlo yeo re e hwetšago go “mohlanka yo a botegago le wa temogo” e bontšha bjang gore Kriste o nyaka gore re be le tswalano e tiilego le Jehofa?

¹⁴ Lehono “mohlanka yo a botegago le wa temogo” o re nea tlhahlo ka nako e swanetšego. (Mat. 24:45) Tlhahlo yeo e bontšha gore Jesu o a re hlokomela. Marc, e lego tate wa bana ba bane o re: “Sathane o nyaka go fokodiša diphuthego ka go hlasela malapa. Ga bjale ka ge re kgothaletšwa go swara borapedi bja lapa beke e nngwe le e nngwe, dihlogo tša malapa di a bona gore Jehofa o re go tšona: Šireletšang malapa a lena!”

¹⁵ Ge re bona gore Kriste o a re hlahla, re kgona go kwešiša gore o nyaka gore re be le tswalano e tiilego le Jehofa. Patrick yo e lego mogolo, o re: “Mathomong bana babo rena ba bangwe le dikgaetšedi ba be ba bona go le boima go kopana re le dihlopha tše dinyenyane mafelobekeng gore re ye tšhemong. Eupša thulaganyo ye e re thušitše go bona seka se segolo sa Jesu sa go bontšha gore o rata batho ka moka ka phuthegong. Se se dirile gore bana babo rena le dikgaetšedi bao ba nago le dihlong goba bao ba fodilego moyeng ba ikwe ba le bohlokwa gomme sa ba dira gore ba gole moyeng.”

¹⁶ Go tlaleletša tabeng ya gore Kriste o re fepa ka dijo tša moya, o re thuša gape le go dula re le mafolofolo modirong o bohlokwa wo re swanetšego go o dira lefaseng ka moka. (Bala Mareka 13:10.) André yo a sa tšwago go kgethwa go ba mogolo, ka mehla o be a dutše a sepedišana le diphetogo tšeo di bago gona ka mokgatlong wa Modimo. O re: “Taba ya gore diofisi tša makala di fokotša batho e re gopotša gore modiro wa go bolela ditaba tše dibotse o akgofile e bile re swanetše go diriša nako ya rena le go dula re bolela ditaba tše dibotse ka mafolofolo.”

17, 18. Ke ka baka la’ng re swanetše go nagana kudu ka mehola yeo re e hwetšago ge re sepedišana le diphetogo?

¹⁷ Tlhahlo yeo re e hwetšago go Jesu Kriste, yoo ga bjale a bušago legodimong, e tla re thuša gona bjale le nakong e tlago. Ka gona, anke re thabeleng mehola yeo e tlišwago ke go sepedišana le diphetogo tšeo di dirwago ka mokgatlong wa Jehofa gona bjale. Nakong ya borapedi bja lena bja lapa, le ka holwa ke go boledišana ka mehola yeo le e hweditšego ka go sepedišana le diphetogo tšeo di bilego gona mabapi le diboka tša gare ga beke goba tšhemo.

 ¹⁸ Ge e ba re latela ditaelo tšeo re di hwetšago ka mokgatlong wa Jehofa e bile re bona gore di a re hola, re tlo latela tlhahlo ya Jehofa re thabile. Ka mohlala, re thaba kudu gore mokgatlo o seketša tšhelete ka gobane ga bjale re diriša thekinolotši gomme ga go sa phrinthiwa dikgatišo tše dintši go swana le mathomong. Seo se re thuša gore re kgone go botša batho ba bantši ditaba tše dibotse. Ge e ba go kgonega, re swanetše go diriša kutšwanyana dikgatišo tšeo di lego didirišweng tša rena tša elektroniki le dibidio. Ge re ka dira bjalo, re tla ba re bontšha gore re tshwenyegile ka go diriša tšhelete ya mokgatlo wa rena ka šedi.

19. Ke ka baka la’ng re swanetše go latela tlhahlo ya Kriste?

¹⁹ Ge e ba re latela tlhahlo ya Kriste ka dipelo tša rena ka moka, re matlafatša tumelo bana babo rena e bile re dira gore go be le botee ka phuthegong. Ge André a bolela ka go fokotšwa ga ditho tša malapa a Bethele lefaseng ka moka, o re: “Go bona ka tsela yeo bana babo rena le dikgaetšedi bao ba bego ba le Bethele ba sepedišanago le diphetogo tšeo ba di hweditšego, go ntira gore ke be le tumelo go Jehofa le go mo hlompha. Ba sepedišana le koloi ya Jehofa ka go hwetša lethabo dikabelong le ge e le dife tšeo ba di newago.”

20, 21. (a) Ke ka baka la’ng re swanetše go bota Kriste, e lego Moetapele wa rena? (b) Sehlogong se se latelago re tlo araba potšišo efe?

²⁰ Moetapele wa rena yo a kgethilwego e lego Jesu Kriste, kgauswinyane o tlo “feleletša phenyo ya gagwe” gomme a “[phetha] dilo tše di boifišago.” (Kut. 6:2; Ps. 45:4) Ge a sa dutše a letile seo, ga bjale o lokišeletša batho ba Modimo nako yeo ka yona yo mongwe le yo mongwe a tlago go tšea karolo modirong wa go ruta batho ka Modimo le wa go fetoša lefase paradeise wo o tlago go dirwa ge bahu ba tsošwa.

²¹ Kgoši ya rena yeo e tloditšwego e tla atlega ge e dutše e re hlahla go fihlela re tsena lefaseng le lefsa. Rena re swanetše go e bota go sa šetšwe diphetogo tšeo di bago gona ka mokgatlong wa Jehofa. (Bala Psalme 46:1-3.) Ka dinako tše dingwe re ka thatafalelwa ke go amogela diphetogo, kudukudu ge bophelo bja rena bo fetoga re sa letela. Ka gona, re swanetše go dira’ng gore re dule re na le khutšo ya monagano le go dula re bota Jehofa? Re tlo araba potšišo ye sehlogong se se latelago.