KE LEBOGA kudu gore batswadi ba ka e lego Fred le Edna Molohan, e be e le Dihlatse tša Jehofa gomme ba ile ba nthuta gore ke rate Modimo. Ge ke be ke belegwa ka 1934, ba be ba šetše ba na le mengwaga e 20 e le Barutwana ba Beibele (Dihlatse tša Jehofa). Re be re dula toropong e nyenyane ya Parsons, yeo e lego ka borwabohlabela bja Kansas, gomme mo e nyakilego go ba ditho ka moka tša phuthego yeo re bego re kopanela go yona e be e le batlotšwa. Lapa la gešo le be le eya dibokeng ka mehla e bile le thabela go ruta batho Beibele. Gantši ka Mokibelo thapama re be re eya go ruta batho Beibele seterateng, e lego modiro woo lehono re o bitšago go ruta batho Beibele mafelong a batho bohle. Gantši re be re lapa, eupša tate o be a re lapološa ka go re rekela ice cream ge re feditše go šoma.

Phuthego ya gabo rena e be e na le tšhemo e kgolo kudu yeo e bego e akaretša ditoropo tše mmalwa tše dinyenyane gotee le dipolasa tše dintši ditikologong tša kgauswi le moo. Ge re be re ile dipolaseng re be re nea batho dikgatišo gomme bona ba re nea merogo, mae (ao a bego a sa tšwa ka segoleng), goba ba re nea dikgogo. Ka ge tate a be a ntšha moneelo wa dikgatišo pele re ka ya go di nea batho, dijo tšeo di be di re thuša ka gae.

Batswadi ba ka ba be ba na le keramafomo yeo ba bego ba e diriša ge ba be ba ruta batho Beibele. Ke be ke le yo monyenyane go ka e diriša, eupša ke be ke thabela go thuša tate le mma ge ba be ba bapala direkhoto tša dipolelo tša Ngwanabo rena Rutherford maetong a go boela le dithutong tša Beibele.

Tate o ile a fetoša koloi ya gagwe ya Ford ya 1936 gore e be le segodišamodumo. Koloi ye e be e re thuša kudu go botša ba bangwe molaetša wa Mmušo wa Modimo. Re be re thoma pele ka go bapala rekhoto ya mmino gore batho ba tsebe goba ba kwe gore re gona, gomme ka morago ga moo re bapala rekhoto ya polelo ya Beibele. Ge rekhoto yeo e feditše go bapala, re  be re nea batho bao ba nyakago go ithuta Beibele dikgatišo.

Toropong e nyenyane ya Cherryvale, Kansas, maphodisa a ile a se dumelele tate gore a tsenye koloi ka phakeng yeo e bego e le toropong yeo, ka gobane batho ba bantši ba be ba iketla moo ka Disontaga. Eupša ba ile ba re a ka e phaka ka ntle. Tate o ile a se gane gomme a e šuthišetša seterateng seo se bego se lebane le phaka e le gore batho ba kgone go kwa molaetša, ke moka a tšwela pele ka go bapala direkhoto. Ka mehla ke be ke thabela go sepela le tate le buti Jerry go yo ruta batho Beibele.

Mafelelong a bo-1930, re be re fela re dira masolo a kgethegilego a go šoma tšhemo ya moo batho ba bego ba re ganetša. Re be re e šoma ka lebelo. Re be re tsoga pele go ka sa (go etša ge re ile ra dira kua Joplin, Missouri) gomme re tsenya dipampišana le dipukwana mejakong ya batho ka setu. Ka morago ga moo, re be re kopana ka ntle ga motse go bona ge e ba go na le bao ba swerwego le go golegwa ke maphodisa.

Mengwageng yeo, re be re dira selo se sengwe se se kgahlišago tšhemong, seo re bego re se bitša masolo a go matšha. Re be re tsebiša batho ka Mmušo wa Modimo ka go atha dipampiri gomme re sepela ka molokeloke toropong yeo ka moka. Ke gopola ka letšatši le lengwe bana babo rena ba sepela toropong yeo re bego re dula go yona ba athile dipampiri tša sehlogo seo se rego, “Bodumedi ke Moreo le Kgwebo ya Bofora.” Ba ile ba sepela toropo yeo monabo wa ka godimo ga khilomithara e tee le seripa, ke moka ba boa ba tla ka gešo. Seo se thabišago ke gore ga se gwa ba le motho yoo a ilego a lwa le bona, eupša ba ile ba hwetša batho ba bantši bao ba thabelago.

Ka gešo re be re fela re tšea maeto a go tloga Kansas re eya dikopanong tša selete Texas. Tate o be a šoma khamphaning yeo e bitšwago Missouri-Kansas-Texas Railroad (yeo gape e tsebjago e le M-K-T, goba Katy, Railroad). Ka gona re be re sepela mahala ka terene re diriša karata ya gagwe ya mošomong, ka go re’alo re be re kgona go etela ba leloko gomme ka morago re ye kopanong. Malome Fred Wismar le mosadi wa gagwe Eulalie ba be ba dula toropong ya Temple, kua Texas. Malome Fred o be a ithutile therešo e sa le mofsa mengwageng ya bo-1900, a kolobetšwa, ke moka a ruta bana babo seo a ithutilego sona, go akaretša le mma. Bana babo rena ba kua bogareng bja Texas ba be ba mo tseba kudu ka ge a be a kile a hlankela moo e le mohlanka wa mafelo (ga bjale o bitšwa molebeledi wa tikologo). O be a le botho e bile a dula a thabile gomme ka mehla o ka thabela go ba le yena. O be a rata therešo, le gona o ile a nthuša kudu ge ke be ke sa le mofsa.

Ka 1941 lapa la gešo le ile la sepela ka terene go ya kopanong e kgolo ya selete kua St. Louis, Missouri. Bafsa ka moka ba ile ba kgopelwa gore ba dule karolong e itšego go tlo theetša polelo ya Ngwanabo rena Rutherford ya sehlogo seo se rego, “Bana ba Kgoši.” Mafelelong a polelo ya gagwe, ka moka ga rena re ile ra hwetša mpho yeo re bego re sa e letela ya puku e mpsha yeo e rego Children. Ngwanabo rena Rutherford le bathuši ba gagwe ba ile ba re nea puku yeo. Bafsa ba ka godimo ga ba 15 000 ba ile ba thabela go amogela mpho ye.

Ka April 1943 re ile ra thabela kopano e nyenyane eupša ya bohlokwa kua toropong ya Coffeyville, Kansas, ya sehlogo seo se rego, “Gatang Mogato.” Re  ile ra tsebišwa ka seboka se sefsa sa Sekolo sa Pušo ya Modimo seo se bego se tlo swarwa diphuthegong ka moka. Le gona go ile gwa lokollwa pukwana yeo e bego e na le dithuto tše 52 yeo e bego e tlo dirišwa sekolong seo. Ka morago wona ngwageng woo, ke ile ka nea polelo ya ka ya mathomo Sekolong sa Pušo ya Modimo. Kopano yeo e bile e kgethegilego go nna ka gobane nna le bana babo rena ba bangwe ba babedi re ile ra kolobetšwa ka letangwaneng la go tonya polaseng ya kgauswi le moo.

Ke feditše sekolo ka 1951 gomme ka swanelwa ke go kgetha gore ke tlo dira eng ka bophelo bja ka. Ke be ke tloga ke duma go tsenela tirelo ya Bethele, moo buti Jerry a bego a kile a hlankela gona, ka gona kapejana fomo ya ka ya go dira kgopelo e ile ya romelwa ofising ya Brooklyn. Phetho ye ke ilego ka e dira e nthušitše gore ke be le tswalano e botse le Jehofa. Fomo ya ka ga se ya tšea nako. Ka gona ke ile ka amogelwa Bethele gomme ka thoma go hlankela moo ka di-10 tša March 1952.

Ke be ke duma go šoma metšheneng ya go gatiša gore ke tšee karolo modirong wa go gatiša dimakasine le dikgatišo tše dingwe. Eupša ke ile ka abelwa go šoma go nea batho dijo gomme ka morago ka šoma ka khitšhing, e lego mošomo woo ke ilego ka thabela go ithuta wona. Ka gona ga sa nka ka šoma metšheneng ya go gatiša dimakasine. Lega go le bjalo, mošomo wa khitšhing wa go šoma diiri tšeo di sa swanego le tša ba bangwe, o ile wa nnea nako mosegare ge go homotše gore ke ithute ke diriša dikgatišo tše dintši tšeo di hwetšagalago bokgobapukung bja Bethele. Se se ile sa nthuša go matlafatša tumelo ya ka le go tiiša segwera sa ka le Jehofa. Le gona se ile sa dira gore ke ikemišetše gore ge feela maemo a sa dumela, ke tšwele pele ke hlankela Bethele. Buti Jerry o ile a tšwa Bethele ka 1949 gomme a nyala Patricia, ke moka ba dula kgauswi le Bethele gona moo Brooklyn. Ba be ba dula ba nthuša kudu le go nkgothatša ge ke be ke sa tšwa go fihla Bethele.

Ka moragonyana ga gore ke fihle Bethele, bana babo rena bao ba etelelago pele ba ile ba rulaganya go oketša bana babo rena bao e bego e le diboledi tša go tšwa Bethele. Bana babo rena bao ba kgethilwego ba ile ba abelwa gore ngwageng woo ba etele diphuthego tša kgauswi le Bethele le go fihla bokgoleng bja dikhilomithara tše 322 go yo nea polelo ya phatlalatša moo le go šoma le phuthego tšhemong. Ke ile ka ba le tokelo ya go ba yo mongwe wa bana babo rena bao. Ke ile ka nea polelo ya ka ya mathomo ya phatlalatša ke tšhogile, yeo ka nako yeo e bego e tšea iri ka moka. Gantši ke be ke sepela ka terene ge ke yo etela diphuthego. Mantšiboeng a mangwe a Sontaga sa go tonya ka 1954 ke ile ka namela terene yeo e bego e eya New York yeo e bego e swanetše go mphihliša Bethele ka moragonyana ga gore letšatši le sobele. Go ile gwa tsoga ledimo le matla la moya wa go tonya e bile gwa na lehlwa. Ka baka leo dientšene tša terene di ile tša ba le mathata. Mafelelong terene yeo e ile ya fihla seteišeneng sa New York City ka Mošupologo mesong ka iri ya bohlano. Go tloga moo ke ile ka namela terene ya go ya Brooklyn ke moka ka no fihlela ka khitšhing, ke latetšwe e bile ke lapile ka ge ke be ke dutše ka tereneng bošego ka moka. Eupša mathatanyana ao e be e se selo ge a bapišwa le lethabo la go hlankela bana babo rena le go tsebana le ba bantši ba bona mafelobekeng a ge re ba etetše.

Mengwageng ya ge ke be ke sa tšwa go fihla Bethele, ke ile ka kgopelwa gore ke tšee karolo go gaša mananeo a radio seteišeneng sa WBBR. Ka nako yeo ditudio tša seteišene se di be di le lebatong la bobedi kua 124 Columbia Heights. Ke be ke abetšwe go tšea karolo lenaneong la thuto ya Beibele leo le bego le gašwa beke le beke. Ngwanabo rena A. H. Macmillan, yoo a feditšego nako e telele e le setho sa lapa la Bethele, o be a fela a tšea karolo go gaša mananeo a a radiong. O be a bitšwa Ngwanabo rena Mac, gomme a beela rena bao ba bego ba sa tšwa go fihla Bethele mohlala o mobotse kudu wa go kgotlelela tirelong ya Jehofa.

Ka 1958 ke ile ka kgopelwa gore ke thuše bao ba alogilego Sekolong sa Gilead gore ba hwetše di-visa tša go ya dikabelong tša bona le go ba rulaganyetša dinamelwa tša go ya moo. Mehleng yeo go sepela ka sefofane go be go tura kudu, ka gona e be e le baromiwa ba sego kae feela bao ba bego ba se diriša. Ba bantši bao ba bego ba abetšwe go ya Afrika le ka Bohlabela bja Asia ba be ba sepela ka dikepe tša go rwala merwalo. Ka morago ga gore difofane tša go dirišwa ke batho bohle di thome go ba gona, go sepela ka sefofane go ile gwa se sa tura gomme baromiwa ba bantši ba be ba diriša difofane.

Ka 1960 mošomo wa ka o ile wa oketšega. Ke be ke rulaganya difofane tša maeto a kgethegilego tša go tloga United States go ya Yuropa bakeng sa dikopano tša ditšhabatšhaba tša 1961. Ke ile ka ya go e nngwe ya dikopano tše ke diriša sefofane sa go tloga New York go ya toropong ya Hamburg kua Jeremane. Ka morago ga kopano yeo, nna le bana babo rena ba bangwe ba bararo re ile ra hiriša koloi gomme ra tloga Jeremane ra ya Italy, ra etela ofisi ya lekala kua Roma. Go tloga moo re ile ra leba Fora, ra feta Dithabeng tša Pyrenees, ra tsena Sepania, moo ka nako yeo modiro wa rena o bego o thibetšwe. Re ile ra kgona go išetša bana babo rena ba toropong ya Barcelona dikgatišo, re di phuthetše bjalo ka ge eka ke dimpho. Re ile ra thabela go bonana le bona. Ge re fihla Amsterdam, re ile ra namela sefofane sa go boela New York.

Ka morago ga mo e ka bago ngwaga, mošomo wa ka Bethele o be o akaretša go rulaganyetša bana babo rena ba mmalwa go ya dikopanong tša ditšhabatšhaba tšeo di bego di swaretšwe lefaseng ka moka. Dikopano tšeo di ile tša swarwa ka 1963, gomme sehlogo sa tšona se be se re, “Ditaba tše Dibotse tša ka mo go sa Felego.” Go ile gwa rulaganywa gore bana babo rena ba 583 ba sepele lefase ka moka go ya dikopanong kua Yuropa, Asia, South Pacific, ba feleletša leeto la bona Honolulu kua Hawaii le Pasadena kua California. Ba be ba tlo ya le Libanoni le Jorodane gore ba ithute ka dinaga tša ka Beibeleng. Ntle le go rulaganya difofane le dihotele, lefapha leo ke bego ke šoma go lona Bethele le be le rulaganya di-visa tša batho ka moka bakeng sa dinaga tše dingwe tšeo ba bego ba tlo ya go tšona.

Nka se tsoge ka lebetše ngwaga wa 1963. Ka di-29 tša June ke ile ka nyalana le Lila Rogers yo a tšwago Missouri, yo a bego a tlile Bethele mengwaga e meraro pele ga moo. Ka morago ga beke re nyalane, nna le Lila re ile ra sepela le sehlopha seo se bego se eya dikopanong tša ditšhabatšhaba gomme mo nakong ye ra ya Gerika, Egipita le Libanoni. Re ile ra sepela nako e kopana ka sefofane go tloga Beirut go ya boemafofaneng bjo bonyenyane kua Jorodane. Ka ge modiro wa rena kua Jorodane o be o thibetšwe re be re boditšwe gore Dihlatse tša Jehofa di ka se newe di-visa tša go tsena nageng yeo, ka gona re ile ra ipotšiša gore go tlo direga eng ge re fihla moo. Re ile ra thaba kudu ge re fihla boemafofaneng re hwetša sehlopha sa batho bao ba thabilego se swere lešela leo le ngwadilwego gore: “Re a le Amogela Lena Dihlatse tša Jehofa”! Le gona re ile ra ipshina kudu ka go bona dinaga tšeo go bolelwago ka tšona ka Beibeleng. Re ile ra etela dinaga tšeo bapatriareka ba bego ba dula go tšona, moo Jesu le baapostola ba bego ba ruta batho le moo phuthego ya Bokriste e thomilego gona ke moka ya phatlalala lefaseng ka moka.—Dit. 13:47.

Go fihla ga bjale Lila o nthekgile ka potego dikabelong tša ka ka moka ka mengwaga e 55. Re ile ra etela Sepania le Portugal ka makga a mmalwa ge modiro wa rena o be o sa thibetšwe dinageng tšeo. Re ile ra kgona go kgothatša bana babo rena le go ba išetša dikgatišo le dilo tše dingwe tšeo ba bego ba di hloka. Re ile ra kgona le go etela ba bangwe ba bana babo rena bao ba bego ba golegilwe kampeng ya kgale ya mašole kua Cádiz, Sepania. Ke ile ka thaba kudu ka ge ke ile ka  kgona go ba kgothatša ka go ba nea polelo e kgothatšago yeo e theilwego Mangwalong.

Go tloga ka 1963, ke ile ka thabela go thuša ka go rulaganya maeto a go ya dikopanong tša ditšhabatšhaba Afrika, Australia, Bogareng bja Amerika le Borwa bja Amerika, Bohlabela bja Asia, Hawaii, New Zealand, Puerto Rico le Yuropa. Nna le Lila re thabetše go ya gotee dikopanong tše dikgolo tšeo re ka se tsogego re di lebetše, go akaretša le yeo e bego e swaretšwe toropong ya Warsaw, kua Poland ka 1989. Bana babo rena ba bantši ba Russia ba ile ba kgona go ya kopanong yeo, le gona e be e le kopano ya bona ya mathomo. Bana babo rena le dikgaetšedi ba bantši bao re kopanego le bona moo ba be ba feditše mengwaga e mentši ba le dikgolegong ka baka la tumelo ya bona.

Tokelo e nngwe yeo ke ilego ka e thabela kudu e bile ya go etela diofisi tša makala lefaseng ka moka e le gore ke matlafatše le go kgothatša ditho tša malapa a Bethele le baromiwa. Leetong la rena la mafelelo ge re be re etetše Korea Borwa, re ile ra kgona go bonana le bana babo rena ba 50 bao ba bego ba le kgolegong kua Suwon. Bana babo rena bao ka moka ba be ba sa bonagale ba nyamile e bile ba be ba fela pelo ya go tlo tšwela pele ka bodiredi bja bona. Go kopana le bona go ile ga re kgothatša kudu!​—Baroma 1:11, 12.

Mengwageng ye ka moka ke bone kamoo Jehofa a ilego a šegofatša batho ba gagwe ka gona. Ge ke be ke kolobetšwa ka 1943 go be go na le bagoeledi ba 100 000 lefaseng ka moka, gomme gona bjale ke ba ka godimo ga 8 000 000 dinageng tše 240. Dialoga tša Gilead di kgathile tema e kgolo modirong wo. Ruri ke thabetše go šomišana le ba bantši ba baromiwa ba ka mengwaga e mentši, gotee le go ba thuša go fihla dikabelong tša bona dinageng tše dingwe!

Ke leboga gore ge ke be ke sa le mofsa ke ile ka dira phetho ya go oketša nako yeo ke e fetšago ke hlankela Jehofa ka go tlatša fomo ya go tsenela tirelo ya Bethele. Ga e sa le go tloga ka nako yeo go fihla le lehono, Jehofa o ntšhegofaditše kudu. Go oketša go lethabo leo ke le hwetšago ka go hlankela Bethele, nna le Lila re feditše mengwaga e mentši re thabela go šoma tšhemo le diphuthego tša Brooklyn, moo re nago le bagwera ba bantši bao re ka se tsogego re ba lahlile.

Letšatši le lengwe le le lengwe Lila o tšwela pele a nthekga tirelong ya ka ya Bethele. Le ge gona bjale ke na le mengwaga ya ka godimo ga e 84, ke sa kgona go šoma. Ke thuša go amogela mangwalo mokgatlong, go a beakanya le go a romela moo a swanetšego go ya gona.

Ruri go thabiša kudu go ba karolo ya mokgatlo o kgahlišago wa Jehofa le go bona phapano e kgolo yeo e lego gona magareng ga bao ba hlankelago Jehofa le bao ba sa mo hlankelego. Re kgona go kwešiša gabotse mantšu a Maleaki 3:18 ao a rego: “Lena le tla buša la bona phapano magareng ga moloki le yo kgopo le magareng ga yo a hlankelago Modimo le yo a sa mo hlankelego.” Letšatši le lengwe le le lengwe re bona lefase la Sathane le mpefala le go feta, le tletše ka batho bao ba se nago kholofelo e bile ba sa ipshine ka bophelo. Eupša bao ba hlankelago Jehofa ba thabile le ge ba phela mehleng ye e thata, le gona ba na le kholofelo ka bokamoso. Ruri re na le tokelo e kgolo kudu ya go botša ba bangwe ditaba tše dibotse tša Mmušo wa Modimo! (Mat. 24:14) Re fela pelo ya gore Mmušo wa Modimo o tle o fediše lefase le la Sathane gomme re hwetše ditšhegofatšo tšeo Modimo a re tshepišitšego tšona. Ka nako yeo bahlanka ba Jehofa mo lefaseng ba ka se sa ba babja gomme ba tla ipshina ka bophelo ka mo go sa felego.