1, 2. (a) Maemo a sa letelwago a ka kgoma bjang Mokriste? (Bona seswantšho seo se lego ka mo godimo.) (b) Go ya ka Psalme 131, ke’ng seo se ka re thušago gore re dule re na le khutšo ya monagano?

KA MORAGO ga gore Lloyd le mosadi wa gagwe Alexandra ba tsebe gore ba hweditše kabelo e mpsha ya go ya tšhemong, mathomong ba ile ba nyama kudu. Go feta moo, ba be ba hlanketše Bethele ka mengwaga e fetago e 25. Lloyd o re: “Ke be ke ikwa eka Bethele le kabelo yeo ke bego ke šoma go yona di be di le mading a ka. Ke be ke nagana gore ke amogetše gore ke hweditše kabelo e mpsha, eupša ka morago ga dibeke le dikgwedi, gantši ke be ke ikwa eka ke lahlilwe. Ke be ke hlakahlakane. Nengneng ke be ke ikwa ke thabile, nengneng ke ikwa ke nyamile.”

² Ge maphelo a rena a fetoga re sa letela, seo se ka re bakela manyami. (Die. 12:25) Le gona go ka ba boima gore re amogele diphetogo tšeo. Ge e ba maemo a le bjalo, re ka ‘okobatša le go homotša’ bjang meoya ya rena? (Bala Psalme 131:1-3.) Anke ga bjale re ithuteng ka mehlala ya bahlanka ba Jehofa ba mehleng ya kgale le bahlanka ba gagwe ba lehono bao ba ilego ba dula ba na le khutšo ya monagano le ge maemo a bona a ile a fetoga.

3. Josefa o ile a ikhwetša a le maemong afe?

³ Josefa o be a na le mengwaga e ka bago e 17 ge bana babo ba be ba mo jela mona gomme ba mo rekiša gore e be lekgoba. Ba be ba sa mo rate ka gobane tatago bona o be a mo rata kudu go ba feta. (Gen. 37:2-4, 23-28) Josefa o ile a swanelwa ke go kgotlelela go ba lekgoba le go golegwa ka mengwaga e ka bago e 13 kua Egipita, a le kgole le tatagwe yo a bego a mo rata kudu. Ke’ng seo se ilego sa thuša Josefa gore a se galefe le go ikwa a lahlilwe?

4. (a) Ge Josefa a be a le kgolegong, o ile a nagana kudu ka’ng? (b) Jehofa o ile a araba dithapelo tša Josefa bjang?

⁴ Ge Josefa a be a tlaišega kgolegong, o swanetše go ba a ile a nagana kudu ka dilo tšeo Jehofa a mo šegofaditšego ka tšona. (Gen. 39:21; Ps. 105:17-19) Ditoro tša boporofeta tšeo a ilego a di lora ge e be e sa le yo monyenyane, le tšona di swanetše go ba di mo kgodišitše gore Jehofa o be a na le yena. (Gen. 37:5-11) O ile a lahlela mathata a gagwe go Jehofa ka makga a mantši. (Ps. 145:18) Jehofa o ile a araba dithapelo tša Josefa tšeo di tšwago pelong ka go mo kgodiša gore ‘o tla ba le yena’ mathateng a gagwe ka moka.​—Dit. 7:9, 10. *

5. “Khutšo ya Modimo” e ka re thuša bjang go fihlelela dipakane tša moya?

⁵ Go sa šetšwe gore maemo a rena a boima gakaakang, re ka ba le “khutšo ya Modimo” yeo e šireletšago “matla a [rena] a monagano” gomme seo sa dira gore re se tšhoge selo. (Bala Bafilipi 4:6, 7.) Ka gona, ge e ba re kgopela thušo go Jehofa ge re ikwa re imetšwe ke mathata, khutšo ya Modimo e ka re matlafatša gore re fihlelele dipakane tša rena tša moya gomme ya re šireletša gore re se ke ra fela matla. Anke ga bjale re boleleng ka mehlala ya batho ba mehleng ya rena yeo e bontšhago se gabotse.

6, 7. Go botša Jehofa selo seo se go tshwenyago ka go lebanya go ka go thuša bjang gore o be le khutšo ya monagano? Nea mohlala.

⁶ Ge Ryan le mosadi wa gagwe Juliette ba be ba botšwa gore ga e sa le babulamadibogo ba kgethegilego ba nakwana, ba ile ba nyama kudu. Ryan o re: “Gateetee re ile ra botša Jehofa ka taba yeo. Re be re tseba gore seo e be e le sebaka sa go bontšha gore re a mmota. Ba bantši ba bana babo rena le dikgaetšedi ka phuthegong ba be ba sa tšwa go thoma go kopanela, ka gona re ile ra rapela gore Jehofa a re thuše gore re bee mohlala o mobotse wa go ba le tumelo.”

⁷ Jehofa o ile a araba bjang thapelo ya bona? Ryan o gopola ka gore: “Gateetee ka morago ga gore re rapele, re ile ra se sa ba le maikwelo a fošagetšego le go ikwa re tshwenyega go swana le mathomong. Khutšo ya Modimo e ile ya diša dipelo tša rena le matla a rena a monagano. Re ile ra lemoga gore Jehofa o be a ka tšwela pele a re diriša ge e ba re ka dula re lebelela dilo ka tsela yeo a di lebelelago ka yona.”

8-10. (a) Moya wa Modimo o ka re thuša bjang gore re lebeletšane le mathata? (b) Jehofa a ka šegofatša bjang maiteko a rena a go dula re etišitše pele dilo tša moya?

⁸ Go tlaleletša tabeng ya go re nea khutšo ya monagano, moya wa Modimo o ka re gopotša mangwalo ao a tlago go re thuša gore re dule re etišitše pele dilo tša moya. (Bala Johane 14:26, 27.) Ka mohlala, nagana ka Philip le mosadi wa gagwe Mary, bao ba ilego ba hlankela Bethele ka mengwaga e ka bago e 25. Pele dikgwedi tše nne di ka fela, ka moka ga bona ba ile ba hlokofalelwa ke bommago bona le yo mongwe wa leloko. Ke moka ba ile ba thoma go hlokomela tatago Mary yo a bego a na le bolwetši bja dementia, e lego bolwetši bjo kotsi bja monagano.

⁹ Philip o re: “Ke be ke nagana gore ke tla gabotse, eupša ke be ke ikwa ke hlaelela se sengwe. Ke ile ka kopana le lengwalo la Bakolose 1:11 sehlogong sa Morokami wo re o balago dibokeng. Ke nnete gore ke be ke kgotleletše, eupša e sego ka  mo go tletšego. Ke be ke swanetše go ‘[kgotlelela] ka mo go tletšego ka go se fele pelo le ka lethabo.’ Lengwalo le le ile la nkgopotša gore lethabo la ka ga se la ithekga ka maemo ao ke lebeletšanago le ona, eupša le ithekgile ka tsela yeo moya wa Modimo o nthušago ka gona.”

¹⁰ Jehofa o ile a šegofatša Philip le Mary ka ditsela tše dintši ka baka la maiteko ao ba bego ba a dira a go dula ba etišitše pele dilo tša moya go sa šetšwe boemo bja bona. Gateetee ka morago ga gore ba tloge Bethele, bobedi bja bona ba ile ba hwetša barutwana ba Beibele bao ba bego ba nyaka go ithuta ka makga a fetago gatee mo bekeng. Mary o re: “Barutwana ba ba ile ba re tlišetša lethabo e bile e be e le tsela ya Jehofa ya go re botša gore dilo ka moka di be di tla loka.”

11, 12. (a) Josefa o ile a dira’ng gore Jehofa a mo šegofatše? (b) Jehofa o ile a šegofatša Josefa bjang ka baka la kgotlelelo ya gagwe?

¹¹ Ge re lebeletšane le diphetogo tšeo re bego re se ra di letela, re ka tshwenyega kudu ka bokamoso gomme seo sa dira gore re dule re nyamile. Seo se ka be se ile sa diragalela Josefa. Eupša o ile a kgetha go dula a dira sohle seo a ka se kgonago go hlankela Jehofa, ka go re’alo, Jehofa a šegofatša maiteko ao a gagwe. Le ge Josefa a be a le kgolegong, o ile a šoma ka thata gore a phethe mošomo le ge e le ofe woo a bego a o neilwe ke mohlankedi yo mogolo, go no swana le ge a be a dira selo se sengwe le se sengwe ge a be a šomela Potifara.​—Gen. 39:21-23.

¹² Ka letšatši le lengwe, Josefa o ile a kgethwa gore e be yena a hlokomelago banna ba babedi bao ba kilego ba ba le maemo a godimo ka lapeng la Farao. Ka ge Josefa a ile a swara banna bao gabotse, ba ile ba mmotša mathata a bona le ditoro tšeo ba di lorilego bošegong bjo bo fetilego tšeo di bego di ba tshwentše. (Gen. 40:5-8) Ka nako yeo Josefa o be a sa tsebe gore poledišano yeo ba bilego le yona e be e tlo dira gore mafelelong a lokollwe kgolegong. Le ge a ile a swanelwa ke go kgotlelela mengwaga e mengwe gape e mebedi a le kgolegong, mafelelong o ile a lokollwa. Lona letšatšing leo a lokolotšwego ka lona o ile a kgethwa gore e be yo mogolo ka bogošing, a fetwa feela ke Farao ka maemo.​—Gen. 41:1, 14-16, 39-41.

13. Re ka dira’ng gore re nee Jehofa mabaka a go re šegofatša go sa šetšwe maemo a rena?

¹³ Go swana le Josefa, re ka ikhwetša re le boemong bjoo re sa kgonego go bo laola. Lega go le bjalo, ge e ba re ka dula re sa fele pelo e bile re leka go dira sohle seo re ka se kgonago go hlankela Jehofa, re tlo mo nea mabaka a gore a re šegofatše. (Ps. 37:5) Ke therešo gore ka dinako tše dingwe re ka ikwa re ‘gakanegile,’ eupša go etša ge Paulo a ile a bolela, re tlo hwetša “tsela ya go tšwa.” (2 Bakor. 4:8) Re tla bona mantšu a ao Paulo a a boletšego a phethagala ge e ba re ka dula re botša batho ditaba tše dibotse.

14-16. Moebangedi Filipi o ile a dira’ng gore a dule a etišitše Modimo pele le ge maemo a gagwe a ile a fetoga?

¹⁴ Moebangedi Filipi o re beetše mohlala o mobotse wa go dula re etiša pele modiro wa go bolela ditaba tše dibotse go sa šetšwe gore maemo a rena a a fetoga. Kua Jerusalema, go ile gwa tsoga kganetšo e šoro ka morago ga gore Stefano a bolawe. * Ka nako yeo, Filipi yena o be a thabela kabelo ya gagwe e mpsha. (Dit. 6:1-6) Eupša ge balatedi ba Kriste ba phatlalatšwa, Filipi ga se a ka a no phutha matsogo. O ile a ya go bolela ditaba tše dibotse kua Samaria, e lego motse o mogolo woo go bego go sa ka gwa bolelwa ditaba tše dibotse go wona ka nako yeo.​—Mat. 10:5; Dit. 8:1, 5.

¹⁵ Filipi o be a ikemišeditše go ya kae le kae moo moya wa Modimo o bego o mo hlahla gore a ye gona. Ka gona Jehofa o ile a mo diriša gore a ye le metseng yeo go bego go sa ka gwa bolelwa ditaba tše dibotse. Ka ge Filipi a be a sa kgetholle batho, seo se swanetše go ba se ile sa lapološa Basamaria bao ba bego ba tlwaetše go nyatšwa ke Bajuda. Ga go makatše ge mašaba a ile a theetša ‘ka kelohloko’ dilo tšeo a bego a di bolela!​—Dit. 8:6-8.

¹⁶ Ka morago, moya wa Modimo o ile wa hlahla Filipi gore a ye Ashidodo le Kesarea, e lego metse e mebedi e megolo yeo e bego e na le batho ba bantši bao e bego e se Bajuda. (Dit. 8:39, 40) Mengwaga e 20 ka morago ga gore a thome go bolela ditaba tše dibotse kua Samaria, go bonagala maemo a Filipi a ile a fetoga gape. Ga bjale ka ge a be a na le lapa, o ile a dula lefelong letee gore a bolele ditaba tše dibotse. Go sa šetšwe gore maemo a gagwe a ile a fetoga, o ile a dula a bolela ditaba tše dibotse gomme mafelelong, Jehofa o ile a šegofatša yena le lapa la gagwe.​—Dit. 21:8, 9.

17, 18. Go dula re bolela ditaba tše dibotse go ka re thuša bjang gore re dule re thabile le ge maemo a rena a fetoga?

¹⁷ Bana babo rena le dikgaetšedi ba bantši bao ba lego tirelong ya nako e tletšego ba a dumela gore go dula ba swaregile tšhemong go ba thušitše gore ba dule ba thabile go sa šetšwe gore maemo a bona a ile a fetoga. Ka mohlala, ge Osborne le mosadi wa gagwe Polite bao ba tšwago Afrika Borwa ba be ba tloga Bethele, ba be ba nagana gore ba tla hwetša mošomo wa nakwana le lefelo la go dula kapejana. Osborne o re: “Ka manyami ga se gwa ka gwa ba bjalo, ga se ra ka ra hwetša mošomo kapejana kamoo re bego re nagana ka gona.” Polite o re: “Re ile ra fetša dikgwedi tše tharo re nyakana le mošomo, e bile re be re se na tšhelete yeo re e bolokilego. Ruri yeo e be e le tlhohlo e kgolo.”

¹⁸ Ke’ng seo se ba thušitšego gore ba lebeletšane le bothata bjo bjo bogolo? Osborne o re: “Go ya tšhemong le bana babo rena le dikgaetšedi go ile gwa re thuša kudu gore re se ke ra dula re naganne  ka mathata a rena. Re ile ra phetha ka gore re dule re bolela ditaba tše dibotse go e na le go fo dula gomme ra tshwenyega. Go dira seo go ile gwa re thabiša kudu. Re ile ra nyaka mošomo kae le kae, gomme mafelelong ra o hwetša.”

19-21. (a) Ke’ng seo se ka re thušago gore re dule re na le khutšo ya monagano? (b) Re tlo hwetša ditšhegofatšo dife ge re tlwaela maemo a mafsa ao re lebeletšanego le ona?

¹⁹ Go etša ge mehlala ye e bontšha, ge e ba re dira sohle seo re ka se kgonago go hlankela Jehofa maemong a rena gomme re mo letela ka go se fele pelo, re tlo dula re na le khutšo ya monagano. (Bala Mika 7:7.) E bile re ka ba ra lemoga gore go tlwaela maemo a rena a mafsa go matlafaditše tswalano ya rena le Jehofa. Ge Polite yoo go boletšwego ka yena dirapeng tše di fetilego a bolela seo a ithutilego sona phihlelong ya gagwe, o re: “Go hwetša kabelo e mpsha go nthutile gore go ithekga ka Jehofa go bolela eng, gaešita le ge go bonagala maemo a le thata kudu. Ga bjale tswalano ya ka le Jehofa e matlafetše.”

²⁰ Mary, yoo re boletšego ka yena mathomong, o sa tšwela pele a hlokomela tatagwe yo a tšofetšego e bile ke mmulamadibogo. O re: “Ke ithutile gore ge ke ikwa ke imelwa ke mathata, ke swanetše go ema, ke rapele gomme ke se sa tshwenyega ka selo. Ke ithutile le gore go tlogelela dilo go Jehofa ke selo se bohlokwa, e bile seo se tlo nyakega kudu nakong e tlago.”

²¹ Lloyd le Alexandra, bao le bona re boletšego ka bona mathomong, ba dumela gore maemo a bona ao a ilego a fetoga a ile a leka tumelo ya bona ka ditsela tšeo ba bego ba sa ka ba di letela. Eupša ba re: “Ge tumelo ya rena e lekwa seo se utolla ge e ba e tiile e bile e ka kgona go re thekga le go re homotša ge re lebeletšane le mathata. Ge re fetile tekong, re tšwa re matlafetše le go feta.”

22. Ge e ba re dira sohle seo re ka se kgonago gore re lebeletšane le boemo bjoo re lego go bjona, re ka kgodišega ka’ng?

²² Mehleng ye ya bofelo maemo a bophelo a ka fetoga o sa letela. Go sa šetšwe gore o hwetša kabelo e mpsha ka mokgatlong, o thoma go babja, o ba le maikarabelo a mafsa ka lapeng, kgodišega gore Jehofa o tla go hlokomela le gore o tla go thuša ka nako e swanetšego. (Baheb. 4:16; 1 Pet. 5:6, 7) Ge o sa dutše o letetše gore Jehofa a go thuše, leka go dira sohle seo o ka se kgonago go mo hlankela. Batamela kgauswi le Tatago wa legodimong ka thapelo, gomme o ithute go tlogelela dilo diatleng tša Jehofa. Ge o dira bjalo, le wena o tlo dula o na le khutšo ya monagano go sa šetšwe gore maemo a gago a a fetoga.