Kgwerano yeo e ile ya dira le gore go hlongwe mokgatlo o mofsa wo o bitšwago Kgwerano ya Ditšhaba. Morero wa mokgatlo woo e be e le go “kgothaletša dinaga tša lefaseng ka moka gore di dirišane le gore go be le khutšo le polokego lefaseng.” Madumedi a mantši a Bojakane a ile a thekga mokgatlo wa Kgwerano ya Ditšhaba. Lekgotla la Mmušo la Dikereke tša Kriste kua Amerika le ile la reta mokgatlo woo ka gore “ke karolo ya mo lefaseng ya dipolotiki ya Mmušo wa Modimo.” Lekgotla le la dikereke le ile la bontšha gore le thekga Kgwerano ya Ditšhaba ka go romela ditho tša lona sebokeng sa khutšo seo se bego se swaretšwe kua Paris. Yo mongwe wa batho bao ba bego ba ile sebokeng seo o ile a bolela gore seboka seo “e be e le mathomo a histori e mpsha lefaseng.”

Go be go thoma nako e mpsha historing, eupša e be e ka se tlišwe ke banna bao ba bego ba swere seboka sa khutšo. Ka 1919, modiro wa go bolela ditaba tše dibotse o ile wa tšea lemanoga le lengwe ge Jehofa a be a nea batho ba gagwe matla a go bolela ditaba tše dibotse go feta le ge e le neng pele. Eupša pele ga ge se se ka direga, go be go na le selo se sengwe seo Barutwana ba Beibele ba bego ba be ba swanetše go se fetoša. Ba be ba swanetše go fetoša tsela yeo dilo di bego di rulagantšwe ka yona.

Dikgetho tšeo di bego di dirwa ngwaga le ngwaga tša go kgethwa ga batho bao ba bego ba etelela pele mokgatlo wa Watch Tower Bible and Tract Society di ile tša rulaganywa go swarwa ka di-4 tša January 1919. Ka nako yeo, Ngwanabo rena Joseph F. Rutherford le bana babo rena ba bangwe ba šupago ba be ba golegilwe ntle le mabaka a kwagalago kua Atlanta, Georgia, U.S.A. Ge maemo a be a le bjalo, na bana babo rena bao ba bego ba etelela pele ba be ba swanetše go kgethwa lefsa? Goba na go be go swanetše go kgethwa ba bangwe?

Ge Ngwanabo rena Rutherford a be a le kgolegong, o be a tshwenyegile ka gore go be go tlo direga eng nakong e tlago ka mokgatlong. O be a tseba gore bana babo rena ba bangwe ba be ba bona go le kaone gore go kgethwe motho yo mongwe gore e be mopresidente wa mokgatlo. Ka baka leo, o ile a ngwala lengwalo gomme a šišinya gore go kgethwe Ngwanabo rena Evander J. Coward gore e be mopresidente wa mokgatlo. Ngwanabo rena Rutherford o ile a hlalosa Ngwanabo rena Coward e le motho yo a dulago a “išitše maswafo fase,” yo a nago le “temogo” le yo a “botegelago Morena.” Lega go le bjalo,  bana babo rena ba bantši bona ba be ba bona go le kaone gore dikgetho di šuthišwe gomme di tle di dirwe ka morago ga dikgwedi tše tshela. Boramolao bao ba bego ba emela bana babo rena bao ba bego ba golegilwe ba ile ba dumelelana le taba yeo. Bana babo rena ba bangwe ba ile ba galefa ge ba be ba dutše ba boledišana ka gore ba ka rarolla bjang bothata bjo.

Ke moka ka morago go ile gwa direga selo se sengwe seo Richard H. Barber a ilego a se hlalosa ka morago gore e be e le nngalaba ya taba. Yo mongwe wa bana babo rena o ile a emelela gomme a re: “Ga ke setsebi sa molao, eupša ke a tseba gore go botega go ra go reng. Modimo o nyaka gore re botege. Tsela e kaone yeo re ka bontšhago gore re botegela Modimo ke ka go ba le dikgetho gomme re kgethe gape Ngwanabo rena Rutherford gore e be mopresidente.”—Ps. 18:25.

Ngwanabo rena A. H. Macmillan yoo le yena a bego a golegilwe o gopola gore letšatšing le le latelago Ngwanabo rena Rutherford o ile a kokota lebotong la sele ya gagwe gomme a re: “Ntšha seatla sa gago.” Ke moka Ngwanabo rena Rutherford o ile a mo nea thelekramo. Ngwanabo rena Macmillan o ile a bona molaetša o mokopana gomme kapejana a tseba gore o be o era go reng. Molaetša wo o be o era gore baetapele ka moka ba be ba kgethilwe gape le gore Joseph Rutherford le William Van Amburgh maemo a bona a be a se a fetoga. Ka gona, Ngwanabo rena Rutherford o be a tlo tšwela pele e le mopresidente.

Ge bana babo rena ba seswai ba be ba golegilwe, Barutwana ba Beibele ba ile ba kgopela batho gore ba saene lengwalo leo le bego le eya mmušong la go kgopela gore bana babo rena bao ba lokollwe. Bana babo rena ba le dikgaetšedi bao ba nago le sebete ba ile ba kgopela batho ba ka godimo ga ba 700 000 bao e bego e se Barutwana ba Beibele gore ba saene lengwalo leo. Ka Laboraro la di-26 tša March 1919, Ngwanabo rena Rutherford le bao a bego a golegilwe le bona ba ile ba lokollwa le pele lengwalo leo le ka romelwa mmušong.

Ngwanabo rena Rutherford o ile a botša bao ba ilego ba mo amogela ge a etšwa kgolegong gore: “Ke kgodišegile gore se se sa tšwago go re diragalela e no ba feela go re lokišeletša dinako tše thata tšeo di sa tlago. . . . Le be le sa lwele gore bana babo lena ba tšwe kgolegong. Eupša morero wa lena o mogolo e be le go lwela gore Jehofa a newe letago, gomme lena ka moka bao le dirilego seo le šegofaditšwe kudu.”

Dilo tšeo di diragetšego nakong ya ge bana babo rena ba be ba sekišwa di bontšha gore Jehofa o be hlahla batho ba gagwe. Ka di-14 tša May 1919, kgoro ya tsheko ya boipiletšo e ile ya dira phetho ye: “Batho bao ba bego ba sekišwa molatong wo ga se ba . . . sekišwa ka tsela ya maleba, ka baka leo phetho yeo e bego e dirilwe e ile ya phumolwa.” Bana babo rena bao ba be ba golegetšwe melato e megolo kudu, ka gona dikahlolo tša bona di be di tla dula di le ka difaeleng tša bona ge e ba e le gore ba no lebalelwa goba ge e ba sekwebo sa bona se ile sa no fokotšwa. Ba ile ba se sa bonwa molato ka dilo tše dingwe gape. Ka baka leo, Moahlodi Rutherford o ile a tšwela pele a na le ditshwanelo tša semolao tša go lwela batho ba Jehofa Kgorong ya Tsheko e Phagamego ya  United States, le gona o ile a dira seo ka makga a mantši ka morago ga gore a lokollwe kgolegong.

Ngwanabo rena Macmillan o itše: “Re be re ka se no dula ra phutha matsogo gomme ra letela gore Morena a re iše legodimong. Re ile ra lemoga gore re swanetše go dira se sengwe gore re tsebe gore ge e le gabotse thato ya Morena ke eng.”

Eupša go be go ka se kgonego gore bana babo rena ba ntlongkgolo ba no tšwela pele ka mošomo woo ba bego ba feditše mengwaga e mentši ba o dira. Ka baka la’ng? Ka gobane nakong ya ge ba be ba golegilwe, tše dingwe tša dilo tšeo di bego di dirišwa go phrintha dikgatišo di ile tša senywa. Se se be se fetša matla, e bile ba bangwe ba bana babo rena ba ile ba ipotšiša ge e ba go be go sa hlokagala gore ba tšwele pele ba bolela ditaba tše dibotse.

Na go be go sa na le batho bao ba thabelago go kwa molaetša wa Mmušo wa Modimo woo o bego o bolelwa ke Barutwana ba Beibele? E le go araba potšišo yeo, Ngwanabo rena Rutherford o ile a dira phetho ya gore a nee polelo ya Beibele. Motho yo mongwe le yo mongwe o be a ka tla go theetša polelo yeo. Ngwanabo rena Macmillan o itše: “Ge go be go ka se tle motho polelong yeo, gona re be re tla tseba gore re feditše go bolela ditaba tše dibotse.”

Gaešita le ge Ngwanabo rena Rutherford a be a babja kudu, ka Sontaga sa di-4 tša May 1919, o ile a nea polelo ya sehlogo se se rego, “Kholofelo Bakeng sa Batho Bao ba Nyamilego” kua Los Angeles, California. Batho ba e ka bago ba 3 500 ba ile ba theetša polelo yeo, eupša ba bangwe ba bantši ba ile ba boela morago ka ge go be go tletše. Letšatšing le le latelago, batho ba bangwe ba 1 500 ba ile ba tla go theetša polelo yeo. Bana babo rena ba ile ba bona gore go be go sa hlokagala gore ba tšwele pele ba bolela ditaba tše dibotse. Ruri batho ba be ba sa nyaka go kwa ditaba tše dibotse!

Seo bana babo rena ba ilego ba se dira ka morago ga moo se ile sa kgoma tsela yeo re dirago modiro wa go bolela ditaba tše dibotse go fihla le lehono.

Ka Morokaming wa August 1, 1919, go ile gwa tšwelela tsebišo ya gore mathomong a September go be go tla ba le kopano ya selete kua Cedar Point, Ohio. Clarence B. Beaty yo a tšwago Missouri yoo e  bego e le Morutwana wa Beibele wa mofsa o itše: “Go be go se na yo a nyakago go šala kopanong yeo.” Kopanong yeo go ile gwa tla batho ba ka godimo ga ba 6 000, e lego batho ba bantši kudu go feta kamoo go bego go letetšwe ka gona. Seo se ilego sa dira gore kopano yeo e kgahliše le go feta ke gore go ile gwa kolobetšwa batho ba ka godimo ga ba 200 lefelong la kgauswi le moo leo le bitšwago Lake Erie.

Ka di-5 tša September 1919, e be e le letšatši la bohlano la kopano yeo ya selete. Letšatšing leo Ngwanabo rena Rutherford o ile a nea polelo yeo e rego, “Go Bolela le Bašomigotee,” gomme polelong yona yeo a tsebiša ka go lokollwa ga makasine o mofsa wo o bitšwago The Golden Age. * Makasine woo o be o tla “bolela ka ditaba tše bohlokwa tšeo di sa tšwago go direga, wa hlalosa go ya ka Mangwalo gore ke ka baka la eng dilo tšeo [di be di] direga.”

Barutwana ba Beibele ka moka ba ile ba kgothaletšwa gore ba bolele ditaba tše dibotse ka sebete ba diriša kgatišo ye e mpsha. Lengwalo leo le bego le hlalosa kamoo modiro wo o bego o tla dirwa ka gona le itše: “Anke bakgethwa ka moka [goba bohle bao ba kolobeditšwego] ba gopole gore ke tokelo e kgolo go hlankela ba bangwe, le gona ba diriše sebaka seo gona bjale. Ba dire sohle seo ba ka se kgonago go bolela ditaba tše dibotse lefaseng ka moka.” Batho ba bantši ba ile ba arabela gabotse go seo. Ka December wona ngwageng woo, bagoeledi ba Mmušo ba mafolofolo ba be ba hweditše batho ba ka godimo ga ba 50 000 bao ba bego ba nyaka go romelwa makasine wo o mofsa kgwedi le kgwedi.

Mafelelong a 1919, batho ba Jehofa ba be ba rulagantšwe lefsa e bile ba matlafetše. Go oketša moo, diporofeto tše mmalwa tše bohlokwa tša mabapi le mehla ya bofelo di be di šetše di phethagetše. Go lekwa le go hlwekišwa ga batho ba Modimo moo go bego go boletšwe e sa le pele go Maleaki 3:1-4, go be go feditšwe. Batho ba Jehofa ba be ba lokolotšwe bokgobeng bja seswantšhetšo bja “Babilona o Mogolo,” gomme Jesu o be a kgethile “mohlanka yo a botegago le wa temogo.” * (Kut. 18:2, 4; Mat. 24:45) Mo nakong ye, Barutwana ba Beibele ba be ba loketše go dira modiro woo Jehofa a bego a nyaka gore ba o dire.