A RE RE setsebi sa boemo bja leratadima se hlahloba boemo bja leratadima. Ke moka se bona ledimo le kotsi le etla ka lebelo le lebile mo go dulago batho ba bantši. Ka ge se na le taba le batho bao, se dira sohle seo se ka se kgonago go ba lemoša pele selemo e eba ngwagola.

Go swana le setsebi se, lehono Jehofa le yena o lemoša batho ka moka ka ledimo le kotsikotsi go feta kotsi le ge e le e efe yeo ba ka kwago ka yona go ditsebi tša boemo bja leratadima. O dira seo bjang? Gona ke ka baka la’ng re ka kgodišega gore o nea batho nako e lekanego gore ba se welwe ke kotsi yeo? E le gore re hwetše dikarabo, anke re boleleng ka ditemošo tšeo Jehofa a ilego a di nea batho nakong e fetilego.

Mehleng ya ge Beibele e be e sa ngwalwa, Jehofa o ile a lemoša batho ka madimo goba dikahlolo tšeo a bego a tlo di tlišetša batho bao ba bego ba sa kwe melao ya gagwe. (Die. 10:25; Jer. 30:23) Nako e nngwe le e nngwe ge a be a lemoša batho bao ba sa mo kwego, o be a ba nea nako e lekanego gore ba itshole, e bile a ba botša seo ba swanetšego go se dira gore ba mo kwe. (2 Dikg. 17:12-15; Neh. 9:29, 30) E le gore Jehofa a thuše batho bao gore ba itshole, gantši o be a diriša bahlanka ba gagwe ba mo lefaseng go thuša batho bao go bona gore ba swanetše go itshola kapejana.—Amose 3:7.

Noa e bile yo mongwe wa batho bao Modimo a ilego a ba diriša go botša batho ka dikahlolo tša gagwe. Ka mengwaga e mentši, Noa o ile a lemoša batho ba mehleng ya gagwe mabapi le gore Meetsefula a tlo tla. Batho bao ba be ba na le boitshwaro bjo bobe e bile ba rata bošoro. (Gen. 6:9-13, 17) Le gona, o ile a ba botša seo ba bego ba swanetše go se dira e le gore ba tle ba phologe Meetsefula. Noa o ile a dula a lemoša batho ka Meetsefula moo a ilego a feleletša a bitšwa “mmoledi wa toko.”—2 Pet. 2:5.

Go sa šetšwe maiteko ao Noa a ilego a a dira a go lemoša batho bao, ga se ba ka ba mo theetša. Ba ile ba bontšha gore ga ba na tumelo. Mafelelong ba ile ba hwa ge Meetsefula a be a ‘etla, gomme a ba gogola ka moka.’ (Mat. 24:39; Baheb. 11:7) Ba be ba ka se bee Modimo molato wa gore ga se a ba lemoša e sa le pele.

Ka dinako tše dingwe Jehofa o be a lemoša batho go šetše nako e nyenyane pele a ka tliša kahlolo. Eupša, yona nako yeo e be e le e lekanego gore batho bao ba fetoge. Ka mohlala, o ile a lemoša Baegipita ka dikotlo tše lesome pele di ka ba wela. Ge a be a tlo tliša kotlo ya bošupa, Jehofa o ile a romela Moshe le Arone go lemoša Farao le bahlanka ba gagwe ka sefako se sešoro seo se bego se tlo ba wela. Ka ge sefako seo se be se tlo na letšatšing le le latelago, na Modimo o be a ba file nako e lekanego ya gore go be le mo ba tšhabelago gona? Ee, ka gobane Beibele e re: “Mang le mang yo a bego a boifa lentšu la Jehofa go bahlanka ba Farao o ile a dira gore bahlanka ba gagwe le diruiwa tša gagwe ba tšhabele mo go šireletšegilego, eupša mang le mang yoo pelo ya gagwe e bego e sa hlomphe lentšu la Jehofa o ile a tlogela bahlanka ba gagwe le diruiwa tša gagwe nageng.” (Ek. 9:18-21) Ruri Jehofa o be a ba neile temošo e lekanego. Ke ka baka leo bao ba ilego ba gata mogato kapejana ba ilego ba se senyagalelwe kudu go swana le bao ba ilego ba se kwe temošo yeo.

Farao le bahlanka ba gagwe le bona ba ile ba lemošwa e sa le pele ka kotlo yeo e bego e tlo tla ya lesome. Lega go le bjalo, ba ile ba bontšha bošilo ka go gana go kwa temošo yeo. (Ek. 4:22, 23) Ka baka leo, maitšibulo a bona a ile a hwa. Ruri seo se be se kweša bohloko! (Ek. 11:4-10; 12:29) Na go na le seo ba bego ba ka se dira? Ee. Gateetee Moshe o ile a lemoša Baisiraele ka kotlo ya  lesome, gomme a ba botša seo ba swanetšego go se dira gore bona le malapa a bona ba se tlo welwa ke kotlo yeo. (Ek. 12:21-28) Ke batho ba bakae bao ba ilego ba kwa temošo yeo? Go akanyetšwa gore e bile batho ba dimilione tše tharo, go akaretša Baisiraele gotee le “lešaba le legolo la mahlakanasele,” e lego batho ba bangwe bao e bego e se Baisiraele le Baegipita ba bangwe. Ba ile ba phologa kotlo yeo gomme ba tloga Egipita.—Ek. 12:38.

Go etša ge mehlala ye re boletšego ka yona e bontšha, Jehofa o be a dula a kgonthišetša gore o nea batho nako e lekanego ya gore ba kwe ditemošo tšeo a ba neago tšona. (Doit. 32:4) Ke ka baka la’ng a be a dira bjalo? Moapostola Petro o hlalositše gore Jehofa “ga a rate gore go fedišwe le ge e le mang, eupša o rata gore bohle ba fihlelele boitsholo.” (2 Pet. 3:9) Ruri Jehofa o be a rata batho bao. O be a nyaka gore ba itshole gomme ba fetoge pele a ka ba otla.—Jes. 48:17, 18; Baroma 2:4.

Le lehono batho ka moka ba swanetše go kwa temošo yeo e newago batho lefaseng ka moka, gomme ba gate mogato. Ge Jesu a be a le mo lefaseng, o ile a lemoša batho gore lefase le la Sathane le tlo fedišwa nakong ya “masetlapelo a magolo.” (Mat. 24:21) Ge Jesu a be a bolela ka seo se tlago go direga nakong e tlago, o ile a botša balatedi ba gagwe boporofeta bjo bo bego bo hlalosa ditaba ka botlalo mabapi le seo ba bego ba tla se bona, le seo se bego se tla ba diragalela ge nako yeo e dutše e batamela. Boporofeteng bjoo, Jesu o ile a bolela ka ditiragalo tšeo re di bonago lehono.—Mat. 24:3-12; Luka 21:10-13.

Ka go dumelelana le boporofeta bjoo, gona bjale Jehofa o kgothaletša batho ka moka gore ba mo kwe gomme ba mo hlankele. O nyaka gore batho bao ba mo kwago ba ipshine ka bophelo gona bjale e bile ba tle ba hwetše ditšhegofatšo lefaseng le lefsa la go loka. (2 Pet. 3:13) Jehofa o nyaka gore batho ba be le tumelo ya gore dilo tšeo a ba tshepišitšego tšona di tlo phethagala. O dira seo ka go ba nea molaetša wo o tlago go ba phološa. Molaetša woo ke ‘ditaba tše dibotse tša Mmušo.’ Jesu o boletše gore ditaba tšeo di tla “bolelwa lefaseng ka moka gore e be bohlatse go ditšhaba tšohle.” (Mat. 24:14) Modimo o rulagantše bahlanka ba gagwe gore ba nee “bohlatse” bjoo goba ba bolele molaetša woo dinageng tše e ka bago tše 240. Jehofa o nyaka gore batho ba bantši ka mo go ka kgonegago ba kwe temošo ya gagwe, gomme ba tle ba phologe “ledimo” leo le sa tlago, e lego kahlolo ya gagwe ya go loka.—Tsef. 1:14, 15; 2:2, 3.

Ka gona, ga go bohlokwa gore re hlwe re ipotšiša ge e ba Jehofa a nea batho nako e lekanego ya gore ba kwe ditemošo tša gagwe. Re šetše re kwele gore o dula a dira seo. Ka gona potšišo e bohlokwa ke gore: Na batho ba tla kwa temošo ya Modimo nako e sa le gona? Anke re tšweleng pele re thuša batho ba bantši kamoo re ka kgonago gore ba tle ba phologe ge lefase le la Sathane le fedišwa.