1-2. (a) Baetapele ba lefase ba kgauswi le go dira kgoeletšo efe? (b) Re swanetše go hwetša dikarabo tša dipotšišo dife?

A RE RE baetapele ba lefase ba sa tšwa go dira kgoeletšo ya gore go na le “khutšo le polokego” yeo go boletšwego ka yona e sa le pele. Ba ka ikgantšha ka go bolela gore ruri lefase le tloga le šireletšegile. Baetapele ba lefase ba tla nyaka go re dira gore re nagane gore ba tla kgona go rarolla mathata ka moka a lefase. Eupša ruri ba ka se kgone go thibela seo se tla bago se le kgauswi le go direga! Ka baka la’ng? Ka gobane Beibele e re ‘tshenyego ya tšhoganyetšo e tla ba wela gateetee gomme ba ka se ke ba phonyokga le gatee.’—1 Bathes. 5:3.

² Re swanetše go hwetša dikarabo tša dipotšišo tše tše bohlokwa: (1) Go tlo direga’ng nakong ya “masetlapelo a magolo”? (2) Jehofa o nyaka gore re tle re dire’ng nakong yeo? (3) Gona re ka dira’ng gona bjale gore re itokišeletše go tlo dula re botega nakong ka moka ya masetlapelo a magolo?—Mat. 24:21.

3. Go ya ka Kutollo 17:5, 15-18, Modimo o tlo fediša bjang “Babilona o Mogolo”?

³ Bala Kutollo 17:5, 15-18. Go ya ka ditemana tše, “Babilona o Mogolo” o tlo fedišwa. Ka ge re šetše re boletše, ka nako yeo baetapele ba lefase ba ka se kgone go dira selo. Ka baka la’ng? Ka gobane ‘Modimo o tla tsentšha dipelong tša bona gore ba phethe kgopolo ya gagwe.’ Kgopolo yeo ke efe? Ke ya gore ba fediše madumedi  ka moka a maaka go akaretša le Bojakane. * Modimo o tla tsenya kgopolo ya gagwe ka dipelong tša “dinaka tše lesome” tša “sebata sa mmala o mohwibiduhwibidu.” Dinaka tše lesome di emela mebušo ka moka yeo e thekgago “sebata,” e lego Ditšhaba tše Kopanego. (Kut. 17:3, 11-13; 18:8) Ge mebušo yeo e hlasela bodumedi bja maaka, seo se tla be se bontšha gore masetlapelo a magolo a thomile. Ruri yeo e tla ba e le tiragalo yeo e tlago go boifiša motho yo mongwe le yo mongwe lefaseng ka moka.

4. (a) Ke mabaka afe ao baetapele ba lefase ba ka tlago ba širela ka ona ge ba tla be ba fediša madumedi a maaka? (b) Go ka direga gore batho bao e bego e le ditho tša dikereke ba tle ba re’ng?

⁴ Ga re tsebe gore baetapele ba lefase ba tlo širela ka mabaka afe ge ba tla be ba hlasela Babilona o Mogolo. Ba ka no tla ba bolela gore madumedi a lefase a šitiša gore go be le khutšo mo lefaseng, e bile a dula a tsenatsena ditabeng tša dipolotiki. Goba mohlomongwe ba ka tla ba re madumedi ao a lefase a na le mahumo a mantši le meago e mentši. (Kut. 18:3, 7) Ke mo go kwagalago go phetha ka gore ge baetapele ba lefase ba tla be ba fediša dikereke, ba ka se fediše motho yo mongwe le yo mongwe yo a tsenago dikereke tšeo. Go e na le moo, go bonagala ba tlo fediša mekgatlo ya bodumedi. Ge madumedi ao a šetše a fedišitšwe, batho bao e bego e le ditho tša ona ba tlo lemoga gore baetapele ba bona ba bodumedi ba paletšwe ke go ba direla dilo tšeo ba bego ba ba tshepišitše tšona. Ka gona mohlomongwe batho bao ba tlo re ga se ya ka ya ba karolo ya madumedi ao.

5. Jehofa o re tshepišitše’ng mabapi le masetlapelo a magolo, gona ka baka la’ng?

⁵ Beibele ga e re botše gore go fedišwa ga Babilona o Mogolo go tlo tšea nako e kae, eupša seo re se tsebago ke gore go tlo tšea nako e kopana kudu. (Kut. 18:10, 21) Jehofa o re tshepišitše gore o tlo “fokotša matšatši ao” a masetlapelo a magolo e le gore “bakgethwa” ba gagwe ba se ke ba fedišwa le gore bodumedi bja therešo bo dule bo le gona. (Mar. 13:19, 20) Eupša Jehofa o nyaka gore re tle re dire’ng go tloga ge masetlapelo a magolo a thoma go fihla ntweng ya Haramagedone?

6. Ke ka baka la’ng go se gwa lekana go no tlogela go ba karolo ya bodumedi bja maaka?

⁶ Ka ge re ithutile sehlogong se se fetilego, Jehofa o nyaka gore re se be karolo ya bodumedi bja maaka. Eupša ga se gwa lekana go no tlogela go ba karolo ya bodumedi bja maaka. Re swanetše go ikemišetša go dula re hlankela Jehofa. Ela hloko ditsela tše pedi tšeo re ka dirago seo ka tšona.

7. (a) Re ka dira’ng gore re dule re phela ka melao ya Jehofa ya boitshwaro? (b) Ke ka baka la’ng Baheberu 10:24, 25 e re re bokane gotee, gona ke ka baka la’ng seo se le bohlokwa kudu gona bjale?

⁷ Sa pele, re swanetše go dira sohle seo re ka se kgonago gore re phele ka melao ya Jehofa ya boitshwaro. Ga se ra swanela go dumelelana le go hloka boitshwaro ga batho ba lefase le. Ka mohlala, ga re amogele boitshwaro le ge e le bofe bjo bo sa hlwekago, go akaretša le go nyalana ga batho ba bong bjo bo swanago le tsela yeo ba phelago ka yona. (Mat. 19:4, 5; Baroma 1:26, 27) Sa bobedi, re swanetše go tšwela pele re hlankela Jehofa re na le Bakristegotee le rena. Re dira se kae le kae moo re ka kgonago go bokana gona, e ka ba Diholong tša Mmušo, goba ge e ba go hlokagala ra ya magaeng a bana babo rena goba mafelong a mangwe moo re ka se bonwego ke batho. Go sa šetšwe gore go direga’ng, re ka se tsoge ra tlogela go ya dibokeng. Ge e le gabotse, re swanetše go bokana gotee ‘kudukudu ka ge re bona letšatši le batamela.’—Bala Baheberu 10:24, 25.

8. Molaetša wo re o botšago batho o ka tla wa fetoga bjang nakong e tlago?

⁸ Molaetša woo re tla bego re o botša batho nakong ya masetlapelo a magolo o tlo fetoga. Gona bjale re botša batho ditaba tše dibotse tša Mmušo wa Modimo gomme re leka go ba dira barutiwa. Eupša ka nako yeo, re tlo botša batho molaetša woo o beago taba phaa. Beibele e swantšha molaetša woo le sefako se segolo. (Kut. 16:21) Go ka direga gore re tle re botše batho gore lefase la Sathane le kgauswi le go fedišwa ka mo go feletšego. Ge nako e dutše e eya, re tlo tseba gabotse gore molaetša wa rena e tla be e le ofe le gore re tlo o botša batho bjang. Na re tlo diriša mekgwa ya go ruta batho yeo re e dirišago gona bjale? Goba na re tlo diriša mekgwa e mengwe? Re tla bona gona. Go sa šetšwe gore re tlo diriša mokgwa ofe, go bonagala Jehofa a tlo re nea tokelo ya go botša batho molaetša wa gagwe wa kahlolo ka sebete.—Hesek. 2:3-5.

9. Molaetša wa rena o ka tla wa dira gore batho ba leke go dira’ng, eupša ke’ng seo re kgodišegilego ka sona?

⁹ Go na le kgonagalo e kgolo ya gore molaetša wa rena o tle o dire gore batho ba leke go re tswalela melomo. Go etša ge re ithekga ka Jehofa gona bjale ge re botša batho ditaba tše dibotse, le nakong yeo re tlo swanelwa ke go ithekga ka yena. Re ka kgodišega gore Modimo wa rena o tlo re nea matla a go phetha thato ya gagwe.—Mika 3:8.

10. Go ya ka Luka 21:25-28, dilo tšeo di tlago go direga nakong ya masetlapelo a magolo di tlo dira gore batho ba bantši ba ikwe bjang?

¹⁰ Bala Luka 21:25-28. Batho ba tlo tšhoga kudu nakong ya masetlapelo a magolo ge ba bona dilo tšeo ba bego ba nagana gore di tla dula di le gona di fedišwa. Ba tlo ‘tlalelwa’ kudu gomme ba tšhoga gore le bona ba ka bolawa nakong yeo e thatathata yeo e sa kago ya ba gona. (Tsef. 1:14, 15) Ka nako yeo go ka direga gore gaešita le batho ba Jehofa ba tle ba thatafalelwe ke bophelo ka ge ba tla dula e se karolo ya lefase. Le gona go ka direga gore re tle re phele ntle le dilo tše itšego tšeo re di hlokago bophelong.

11. (a) Ka morago ga ge madumedi ka moka a fedišitšwe, ke ka baka la’ng mahlo ka moka a tla be a lebeletše rena? (b) Ke ka baka la’ng re sa swanela go boifa masetlapelo a magolo?

¹¹ Nengneng nakong ya masetlapelo a magolo, batho bao madumedi a bona a fedišitšwego, ba tlo galefišwa ke gore bodumedi bja Dihlatse tša  Jehofa bo sa le gona. Ruri seo se tlo tsoša mmudubudu ge batho bao ba bolela kamoo ba ikwago ka gona, e bile ba dira seo le Diinthaneteng. Sathane le batho ba gagwe ba tlo re hloya ka ge bodumedi bja rena e tla be e le bjona feela bo sego bja fedišwa. Ba tla be ba paletšwe ke go fihlelela morero wa bona wa go fediša madumedi ka moka mo lefaseng. Ka gona mahlo ka moka a tla be a lebeletše rena. Mo nakong ye, ditšhaba di tla bitšwa Gogo wa Magogo. * Di tla ipopa ngatana e tee gomme tša diriša matla a tšona ka moka go hlasela batho ba Jehofa. (Hesek. 38:2, 14-16) Re ka thoma go tshwenyega ka seo se tlago go direga nakong ya masetlapelo a magolo, kudukudu ka ge re sa tsebe ditaba ka botlalo mabapi le seo se tlago go direga. Eupša seo re kgodišegilego ka sona ke se: Ga se ra swanela go boifa masetlapelo a magolo ka gobane Jehofa o tla re nea ditaelo tšeo di tlago go re thuša gore re phologe. (Ps. 34:19) Re tlo kgona go ‘inamologa gomme ra emišetša dihlogo tša rena godimo’ ka gobane re tla be re tseba gore “topollo ya [rena] e a batamela.” *

12. “Mohlanka yo a botegago le wa temogo” o be a dutše a re thuša bjang go itokišeletša seo se tlago go direga nakong ya masetlapelo a magolo?

¹² Ke kgale “mohlanka yo a botegago le wa temogo” a re lokišeletša go tlo dula re botega nakong ya masetlapelo a magolo. (Mat. 24:45) O dirile se ka ditsela tše dintši, eupša nagana ka mohlala wo o tee: O ile a re lokišetša dikopano tša selete go tloga ka 2016 go fihla ka 2018 tšeo di bego di bolela ka masetlapelo a magolo. Dikopano tšeo di ile tša re thuša go tiiša dika tšeo re tlago go di hloka ge letšatši la Jehofa le dutše le batamela. Anke re boledišaneng ka bokopana ka dika tšeo.

13. Re ka matlafatša bjang go botegela ga rena Jehofa, gona ke ka baka la’ng re swanetše go dira seo gona bjale?

¹³ Potego: Sehlogo sa kopano ya selete ya 2016 se be se re: “Dula o Botegela Jehofa!” Kopano yeo e re rutile gore ge e ba re na le tswalano e botse le Jehofa, gona re tlo dula re mmotegela. Le gona e ile ya re gopotša gore re ka matlafatša segwera sa rena le Jehofa ka go mo rapela go tšwa pelong, le ka go ithuta Lentšu la gagwe ka mo go tseneletšego. Go dira bjalo go re nea matla a go kgona go lebeletšana le mathata a magolo ao a re welago gona bjale. Ge masetlapelo a magolo a dutše a batamela, go botegela ga rena Modimo le Mmušo wa gagwe go tlo lekwa kutšwanyana. Le gona go ka direga gore batho ba tle ba tšwele pele ba re kwera. (2 Pet. 3:3, 4) Seo se ka direga kudukudu ka ge re sa thekge karolo le ge e le efe ya lefase la Sathane. Re swanetše go matlafatša potego ya rena gona bjale e le gore re tle re kgone go dula re botegela Jehofa nakong ya masetlapelo a magolo.

14. (a) Ke phetogo efe yeo e tla bago gona mabapi le bana babo rena bao ba re etelelago pele mo lefaseng gona bjale? (b) Ke ka baka la’ng ka nako yeo re tlo swanelwa ke go dula re botegela Jehofa?

¹⁴ Nengneng nakong ya masetlapelo a magolo, re ka se sa etelelwa pele ke bana babo rena bao ba re etelelago pele gona bjale. Ke ka baka la’ng re re’alo? Ka gobane ge masetlapelo a magolo a dutše a tšwela pele, batlotšwa ka moka bao ba tla bego ba sa le mo lefaseng ba tla kgobokeletšwa legodimong go yo lwa ntwa ya Haramagedone. (Mat. 24:31; Kut. 2:26, 27) Seo se tla ra gore re ka se sa ba le bana babo rena ba Sehlopha se Bušago mo lefaseng. Eupša seo ga se re gore go tla ba le tlhakatlhakano ka mokgatlong wa Jehofa. Bana babo rena bao ba  swanelegago ba dinku tše dingwe ba tla re etelela pele. Re tlo swanelwa ke go bontšha gore re botegela Jehofa ka go thekga bana babo rena bao, le ka go kwa ditaelo le ge e le dife tšeo ba tla bego ba re nea tšona tšeo di tšwago go Modimo. Le gona, ge e ba re nyaka go phologa re tlo swanelwa ke go ba kwa.

15. Re ka dira’ng gore re matlafatše kgotlelelo ya rena, gona ke ka baka la’ng go le bohlokwa gore re dire se gona bjale?

¹⁵ Kgotlelelo: Sehlogo sa kopano ya selete ya 2017 se be se re: “O se ke wa Fela Matla!” Kopano yeo e re thušitše go kaonefatša bokgoni bja rena bja go lebeletšana le mathata. Re ithutile gore ga se ra swanela go kgotlelela feela ge maemo a dumela. Re ka matlafatša kgotlelelo ya rena ka go ithekga ka Jehofa. (Baroma 12:12) Anke le ka mohla re se ke ra lebala gore Jesu o ile a re tshepiša gore: “Yo a [kgotlelelago] go fihla bofelong ke yena a tlago go phološwa.” (Mat. 24:13) Tshepišo yeo e ra gore re swanetše go no dula re kgotleletše go sa šetšwe gore re welwa ke mathata afe. Ge e ba re ka kgotlelela mathata ka moka ao a re welago gona bjale, gona tumelo ya rena e tla dula e tiile go fihla nakong ya masetlapelo a magolo.

16. Ke’ng seo se ka dirago gore re be le sebete, gona ke ka baka la’ng re swanetše go matlafatša seka se gona bjale?

¹⁶ Sebete: Sehlogo sa kopano ya selete ya 2018 se be se re: “Eba le Sebete!” Kopano yeo e re gopoditše gore ga re be le sebete ka baka la bokgoni bjo re nago le bjona. Go no swana le ge re swanetše go ithekga ka Jehofa gore re be le kgotlelelo, re swanetše go ithekga ka yena e le gore re be le sebete. Re ka dira’ng gore re ithekge ka Jehofa kutšwanyana? Re ka bala Lentšu la gagwe letšatši le letšatši le go naganišiša ka tsela yeo a ilego a phološa batho ba gagwe nakong e fetilego. (Ps. 68:20; 2 Pet. 2:9) Ge ditšhaba di tlo re hlasela nakong ya masetlapelo a magolo, re tlo swanelwa ke go ba le sebete gomme re bote Jehofa go feta le ge e le neng pele. (Ps. 112:7, 8; Baheb. 13:6) Ge e ba re ithekga ka Jehofa gona bjale, re tlo ba le sebete seo re se hlokago ge Gogo a tlo re hlasela. *

17. Ke ka baka la’ng re sa swanela go boifa ntwa ya Haramagedone? (Bona seswantšho sa letlakala la ka ntle.)

¹⁷ Go etša ge re kwele sehlogong se se fetilego, bontši bja rena re phetše bophelo bja rena ka  moka mehleng ya bofelo. Eupša re holofela le go tlo phologa masetlapelo a magolo. Tshepedišo ye ka moka ya lefase la Sathane e tlo fihla mafelelong ka ntwa ya Haramagedone. Eupša ga se ra swanela go boifa selo. Ka baka la’ng? Ka gobane ye e tla be e le ntwa ya Jehofa gomme go ka se hlokagale gore rena re lwe. (Die. 1:33; Hesek. 38:18-20; Sak. 14:3) Ka morago ga gore Jehofa a ntšhe taelo, Jesu Kriste o tlo etelela pele madira a Modimo go yo lwa ntweng yeo. O tla be a na le batlotšwa bao ba tsošeditšwego legodimong gotee le barongwa ba diketekete. Ka moka ga bona ba tlo lwa le Sathane, batemona ba gagwe gotee le balatedi ba bona ka moka ba mo lefaseng.—Dan. 12:1; Kut. 6:2; 17:14.

18. (a) Jehofa o re neile kgonthišetšo efe? (b) Kutollo 7:9, 13-17 e dira gore re be le kgodišego efe ka bokamoso?

¹⁸ Jehofa o re kgonthišetša gore: “Sebetša le ge e le sefe seo se rulelwago go lwa le [lena] se ka se atlege.” (Jes. 54:17) “Lešaba le legolo” la batho ba Jehofa bao ba botegago le tlo “[tšwa] masetlapelong a magolo” le phela. Ke moka le tla tšwela pele le mo hlankela. (Bala Kutollo 7:9, 13-17.) Ruri Beibele e re nea mabaka a mantši a gore re kgodišege gore Jehofa o tla re phološa nakong e tlago! Re a tseba gore “Jehofa o šireletša bao ba botegago.” (Ps. 31:23) Bohle bao ba ratago Jehofa le go mo hlankela ba tla thabela go bona ge a hlatswa leina la gagwe le lekgethwa leo Sathane a le sentšego.—Hesek. 38:23.

19. Re tlo hwetša bokamoso bofe kgauswinyane?

¹⁹ Nagana kamoo lengwalo la Timotheo wa Bobedi 3:2-5 le bego le tla balega ka gona ge nkabe le be le hlalosa batho bao ba phelago lefaseng le lefsa leo le sa laolwego ke Sathane. (Bona lepokisi leo le rego, “ Tsela Yeo Batho ba Tlago go ba ka Yona Nakong e Tlago.”) Ngwanabo rena George Gangas * yoo e bego e le setho sa Sehlopha se Bušago o ile a hlalosa taba ye ka tsela ye: “Lefaseng go tlo kgahliša kudu ge motho yo mongwe le yo mongwe a tla be a hlankela Jehofa! Kgauswinyane o tla be o phela lefaseng leo la Paradeise. Ge feela Jehofa a le gona, le wena o tla tšwela pele o le gona. Re tlo phela ka mo go sa felego.” Ruri ye ke kholofelo e kgahlišago!