1. Ke’ng seo se re kgodišago gore re phela “mehleng ya bofelo”?

NA O belegwe ka morago ga 1914? Ge e ba go le bjalo, gona o phetše bophelo bja gago ka moka “mehleng ya bofelo.” (2 Tim. 3:1) Ka moka ga rena re kwele ka dilo tšeo Jesu a ilego a bolela e sa le pele gore di tlo direga mehleng ye. Dilo tšeo di akaretša tlala, dintwa, ditšhišinyego tša lefase, mauba a malwetši, go oketšega ga go hloka molao le go tlaišwa ga batho ba Jehofa. (Mat. 24:3, 7-9, 12; Luka 21:10-12) Le gona, re bone ka tsela yeo batho ba itshwarago ka yona go etša ge moapostola Paulo a ile a bolela e sa le pele. (Bona lepokisi le le rego “ Tsela Yeo Batho ba Lego ka Yona Gona Bjale.”) Ka ge re le Dihlatse tša Jehofa, re kgodišegile gore re phela karolong ya mafelelofelelo ya ‘mehla ya bofelo.’—Mika 4:1.

2. Ke dipotšišo dife tšeo re swanetšego go tseba dikarabo tša tšona?

² Ka ge go fetile nako e telele ga e sa le go tloga ka 1914, seo se ra gore re phela karolong ya mafelelofelelo ya ‘mehla ya bofelo.’ Le gona ka ge bofelo bo le kgauswiuswi, re swanetše go tseba dikarabo tša dipotšišo tše tše bohlokwa: (1) Ke dilo dife tšeo di tlago go direga karolong ye ya mafelelofelelo ya ‘mehla ya bofelo’? (2) Gona Jehofa o nyaka gore re dire’ng ge re sa letile gore dilo tšeo di direge?

3. Go ya ka Bathesalonika ba Pele 5:1-3, ke kgoeletšo efe yeo ditšhaba di tlago go e dira?

³ Bala 1 Bathesalonika 5:1-3. Lengwalong le, ge Paulo a bolela ka “letšatši la Jehofa,” o šupa go nako yeo e tlago go thoma ka go hlaselwa ga Babilona o Mogolo, e lego madumedi ka moka a maaka, gomme seo sa feleletša ka ntwa ya Haramagedone. (Kut. 16:14, 16; 17:5) Gateetee pele ga ge letšatši leo le ka thoma, ditšhaba di tla be di goeletša ka gore go na le “khutšo le polokego.” (Diphetolelo tše dingwe di re: “Khutšo le tšhireletšego.”) Ka dinako tše dingwe baetapele  ba lefase ba diriša mantšu a swanago ge ba bolela ka tsela yeo ditšhaba di swanetšego go kaonefatša kamoo di dirišanago ka gona. * Eupša kgoeletšo yeo Beibele e e bolelago ya gore ditšhaba di tla re go na le “khutšo le polokego” e tla ba e se ya tlwaelega. Ke ka baka la’ng re re’alo? Ke ka gobane ge seo se tla be se direga, batho ba bantši ba tlo nagana gore baetapele ba lefase ba tla be ba kgonne go dira gore lefase e be leo le šireletšegilego kutšwanyana. Eupša ge ba sa dutše ba naganne bjalo, “masetlapelo a magolo” a tlo thoma ke moka gateetee ba welwa ke “tshenyego ya tšhoganetšo.”—Mat. 24:21.

4. (a) Ke dilo dife tšeo re sa dutšego re nyaka go di tseba mabapi le kgoeletšo ya gore go na le “khutšo le polokego”? (b) Ke’ng seo re šetšego re se tseba mabapi le kgoeletšo ye?

⁴ Re tseba tše dingwe tša dilo tšeo di tlago go direga mabapi le kgoeletšo ya gore go na le “khutšo le polokego.” Eupša go na le dilo tše dingwe tšeo re sa di tsebego. Ka mohlala, ga re tsebe dilo tšeo di tlago go dira gore babuši ba lefase ba dire kgoeletšo yeo, goba gore kgoeletšo yeo e tla dirwa bjang. Le gona ga re tsebe ge e ba go tla ba le kgoeletšo e tee feela goba go tla ba le ditsebišo tše mmalwa. Eupša go sa šetšwe seo se tlago go direga, ga se ra swanela go forwa. E bile ga se ra swanela go nagana gore babuši ba lefase ba tla kgona go dira gore go be le khutšo mo lefaseng. Go e na le moo, re swanetše go lemoga gore ye ke kgoeletšo yeo Beibele e boletšego ka yona e sa le pele. E tla ba e re bontšha gore “letšatši la Jehofa” le kgauswi le go thoma.

5. Go ya ka lengwalo la Bathesalonika ba Pele 5:4-6, re swanetše go dira’ng e le gore re itokišeletše “letšatši la Jehofa”?

⁵ Bala 1 Bathesalonika 5:4-6. Lengwalong le Paulo o re botša seo re swanetšego go se dira e le gore re dule re itokišeleditše “letšatši la Jehofa.” Ga se ra swanela go “robala go etša ge ba bangwe ka moka ba robala.” Re swanetše go dula “re phafogile” e bile re hlaphogetšwe monaganong. Ka mohlala, re swanetše go ba šedi e le gore re se tšee karolo dipolotiking. Ge e ba re ka tšea karolo dipolotiking, re tla be re le “karolo ya lefase.” (Joh. 15:19) Re a tseba gore Mmušo wa Modimo ke wona feela o tlago go re tlišetša khutšo ya kgonthe mo lefaseng.

6. Re swanetše go thuša batho ba bangwe gore ba dire’ng, gona ka baka la’ng?

⁶ Go tlaleletša tabeng ya go dula re phafogile, re swanetše go thuša le batho ba bangwe gore le bona ba phafoge gomme ba tsebe seo Beibele e re boditšego e sa le pele gore se tlo direga ka lefase le. Re swanetše go dira se gona bjale, ka gobane ge masetlapelo a magolo a thoma, nako e tla ba e jelwe ke magotlo. Ke ka baka leo go akgofilego kudu gona bjale gore re botše batho ditaba tše dibotse! *

7. Jehofa o letetše gore re dire’ng gona bjale?

⁷ Nakong ye e nyenyane yeo e šetšego pele “letšatši” la Jehofa le ka thoma, Jehofa o letetše  gore re dule re swaregile ka go botša batho ditaba tše dibotse. Re swanetše go kgonthišetša gore re na le “mo gontši mo [re ka] go dirago modirong wa Morena.” (1 Bakor. 15:58) Jesu o boletše e sa le pele seo re bego re tla se dira. Ge a be a bolela ka dilo tšeo di bego di tla direga mehleng ya bofelo, o boletše le gore: “Le gona ditaba tše dibotse di swanetše go bolelwa pele ditšhabeng ka moka.” (Mar. 13:4, 8, 10; Mat. 24:14) E no nagana ka taba ye: Nako le nako ge o eya tšhemong o thuša gore boporofeta bjoo bja Beibele bo phethagale.

8. Re tseba bjang gore modiro wa rena wa go bolela ditaba tše dibotse o tšwela pele o gola?

⁸ Go fihla ga bjale re ka re modiro wa rena wa go bolela ditaba tše dibotse o gotše gakaaka’ng? Ngwaga le ngwaga batho ba bantši ba kwa ditaba tše dibotse tša Mmušo wa Modimo. Ka mohlala, nagana ka tsela yeo palo ya bagoeledi e oketšegilego lefaseng ka moka mehleng ye ya bofelo. Ka 1914, go be go na le bagoeledi ba 5 155 dinageng tše 43. Lehono go na le bagoeledi ba e ka bago ba 8 500 000 dinageng tše 240. Eupša ga se gore re feditše go dira modiro wa rena. Re swanetše go tšwela pele re botša batho gore Mmušo wa Modimo ke wona feela o tlago go rarolla mathata ka moka a rena.—Ps. 145:11-13.

9. Ke ka baka la’ng re swanetše go tšwela pele re botša batho ditaba tše dibotse?

⁹ Re ka se tlogele go botša batho ditaba tše dibotse go fihlela ge Jehofa a re go lekane. Go šetše nako e kaaka’ng gore batho ba tsebe Jehofa Modimo le morwa wa gagwe Jesu Kriste? (Joh. 17:3) Ga re tsebe. Eupša seo re se tsebago ke gore gona bjale go fihlela pele masetlapelo a magolo a ka thoma, motho le ge e le ofe yo a nago le “tshekamelo e swanetšego ka bophelo bjo bo sa felego” o sa dutše a ka kwa ditaba tše dibotse gomme a kgetha go hlankela Jehofa. (Dit. 13:48) Re ka thuša bjang batho ba pele selemo e eba ngwagola?

10. Jehofa o re thuša bjang go ruta batho therešo?

¹⁰ Jehofa o diriša mokgatlo wa gagwe go re nea dilo ka moka tšeo re di hlokago go ruta batho therešo. Ka mohlala, bekeng e nngwe le e nngwe re newa tlwaetšo sebokeng sa gare ga beke. Seboka se se re thuša go tseba seo re swanetšego go se bolela ge re le tšhemong maetong a pele le maetong a go boela. Le gona se re thuša go tseba kamoo re ka swarago dithuto tša Beibele. E bile Jehofa o diriša mokgatlo wa gagwe go re nea dilo tšeo re swanetšego go di diriša ge re le tšhemong tšeo di lego ka go Dikgatišo le Dibidio tša go Ruta Batho Beibele (Teaching Toolbox). Dikgatišo tše le dibidio di re thuša . . .

• go thoma go boledišana le batho

• go dira gore molaetša wa rena o kgahle batho

• go dira gore batho ba nyake go tseba ka mo go oketšegilego ka Beibele

•   go ruta batho therešo ge re swere dithuto tša Beibele

• le go botša batho bao ba thabelago molaetša wa rena gore ba tsene wepesaeteng ya rena gotee le go ba mema go ya dibokeng tša rena.

Ke therešo gore ga se gwa lekana go no ba le didirišwa tše. Re swanetše go di diriša. * Ka mohlala, ka morago ga gore o boledišane le motho yo a thabelago, ge o mo tlogeletše pampišana goba makasine, a ka kgona go šala a bala go fihlela o tlo boledišana le yena gape. Re na le boikarabelo bja go botša batho ditaba tše dibotse kgwedi e nngwe le e nngwe.

11. Ke ka baka la’ng go ile gwa dirwa karolo ya Ithute Beibele Inthaneteng o Nnoši wepesaeteng ya rena?

¹¹ Tsela e nngwe yeo Jehofa a e dirišago go ruta batho therešo ke ka go diriša karolo yeo e lego go jw.org^® yeo e rego Ithute Beibele Inthaneteng o Nnoši (Online Bible Study Lessons). Ke ka baka la’ng karolo ye e ile ya dirwa? Ka gobane kgwedi e nngwe le e nngwe batho ba bantšintši lefaseng ka moka ba tsena Inthaneteng ba nyaka go tseba seo Beibele e se rutago. Karolo ye yeo e lego wepesaeteng ya rena e ka thuša batho bao go tseba therešo e itšego yeo e lego ka Lentšung la Modimo. Ba bangwe ba batho bao o ba botšago ditaba tše dibotse ba ka dikadika ge o ba kgopela gore o ithute le bona Beibele. Ka gona, ba bontšhe karolo ye mo wepesaeteng ya rena goba o ba romele linki ya yona. *

12. Ke’ng seo motho a ka ithutago sona karolong yeo e rego Ithute Beibele Inthaneteng o Nnoši?

¹² Karolo ye ya Ithute Beibele Inthaneteng o Nnoši e bolela ka ditaba tše tše di latelago: “Beibele le Mongwadi wa Yona,” “Batho Bao ba Tsebjago Kudu ba ka Beibeleng” le “Molaetša wa Beibele wo o re Neago Kholofelo.” Ge motho a dutše a bala karolo ye, o tlo ithuta:

• Kamoo Beibele e ka mo thušago ka gona

• Gore Jehofa, Jesu le barongwa ke bomang

• Gore ke ka baka la eng Modimo a bopile batho

• Gore ke ka baka la eng re tlaišega e bile go direga dilo tše mpe mo lefaseng

Le gona karolo ye e bolela kamoo Jehofa a tlago . . . 

• go fediša tlaišego le lehu,

• go tsoša bahu

• le go fediša mebušo ya batho gomme a tliša Mmušo wa gagwe.

13. Ge motho a feditše go bala karolo yeo e rego Ithute Beibele Inthaneteng o Nnoši, na go ra gore ga go sa hlokagala gore a ithute le Hlatse ya Jehofa? Hlalosa.

¹³ Ga se gore ge motho a feditše go bala karolo yeo e rego Ithute Beibele Inthaneteng o Nnoši ga go sa hlokagala gore a ithute Beibele le Hlatse ya Jehofa. Jesu o re laetše gore re dire batho barutiwa. Ka gona karolo ye e hlametšwe go thuša batho bao ba thabelago go kwa molaetša wa rena gore ba kgahlwe ke seo ba ithutago sona gomme ba nyake go ithuta ka mo go oketšegilego ka Modimo. Ge e ba ba ka dira bjalo, mohlomongwe ba tla dumela ge re ba kgopela go ithuta Beibele le bona. Mafelelong a karolo e nngwe le e nngwe, mmadi o bontšhwa moo a ka kgotlago gona ge e ba a ka rata go ithuta Beibele le motho yo a itšego. Letšatši le letšatši mokgatlo wa rena o amogela dikgopelo tša go ithuta Beibele tše e ka bago tše 230 lefaseng ka moka wepesaeteng ya rena. Go bohlokwa gore motho yo a thabelago a ithute Beibele le Hlatse ya Jehofa.

14. Go ya ka ditaelo tšeo re di hwetšago go Mateo 28:19, 20, ke’ng seo re lekago ka thata go se dira, gona ka baka la’ng?

¹⁴ Bala Mateo 28:19, 20. Ge re dutše re ithuta le batho Beibele, re swanetše go leka ka thata go ‘ba dira barutiwa le go ba ruta go boloka dilo tšohle tšeo Jesu a re laetšego tšona.’ Re swanetše go thuša batho go kwešiša gore go bohlokwa kudu  gore ba kgethe go hlankela Jehofa le go thekga Mmušo wa gagwe. Se se bolela gore re swanetše go thuša batho gore ba diriše seo ba ithutago sona, ba ineele go Jehofa gomme ba kolobetšwe. Ke feela ge ba ka dira bjalo moo ba tlago go phologa letšatši la Jehofa.—1 Pet. 3:21.

15. Ke’ng seo re sa swanelago go se dira, gona ka baka la’ng?

¹⁵ Go etša ge re kwele pejana, go šetše nako e nyenyanenyenyane gore lefase le le fedišwe. Ka baka leo, ga se ra swanela go senya nako ka go no tšwela pele re ithuta le batho bao ba sa nyakego go dira diphetogo gore e be Dihlatse tša Jehofa. (1 Bakor. 9:26) Ruri modiro wa rena o akgofile kudu! Go sa na le batho ba bantši bao ba swanetšego go kwa molaetša wa Mmušo wa Modimo pele selemo e eba ngwagola.

16. Go ya ka Kutollo 18:2, 4, 5, 8, ka moka ga rena re swanetše go dira’ng? (Bona le mongwalo wa ka tlase.)

¹⁶ Bala Kutollo 18:2, 4, 5, 8. Ditemana tše di bolela ka selo se sengwe gape seo Jehofa a nyakago batho ba gagwe ba se dira. Bakriste ka moka ba therešo ba swanetše go kgonthišetša gore ba ba kgole le Babilona o Mogolo. Pele morutwana wa Beibele a ka tseba therešo, mohlomongwe e be e le setho sa bodumedi bja maaka. A ka ba a be a tšea karolo ditirelong tša bodumedi bjoo le medirong e mengwe e sepedišanago le bjona. Goba mohlomongwe a ka ba a neetše tšhelete kerekeng yeo. Ka gona, pele morutwana wa Beibele a ka swanelega go ba mogoeledi yo a sego a kolobetšwa, o swanetše go kgonthišetša gore ga e sa le karolo ya bodumedi bja maaka. E bile o swanetše go ngwalela kereke yeo a bego a e tsena lengwalo goba mokgatlo le ge e le ofe wo o sepedišanago le Babilona o Mogolo wo a bego a le go wona, a hlalose gore ga e sa le setho sa kereke goba mokgatlo woo. *

17. Ke mošomo wa mohuta ofe woo Mokriste a sa swanelago go o dira, gona ka baka la’ng?

¹⁷ Mokriste wa therešo o swanetše go kgonthišetša gore mošomo wa gagwe ga o sepedišane le Babilona o Mogolo. (2 Bakor. 6:14-17) Ka mohlala, ga se a swanela go šomela dikereke. Le gona, Mokriste yo a hirilwego ke khamphani e itšego, a ka dira mošomo o itšego o monyenyane ge khamphani yeo e yo šomela meago yeo e dirišetšwago bodumedi bja maaka goba dikereke. Le gona ge e ba Mokriste a na le kgwebo, a ka se saene kontraka ya go šomela karolo le ge e le efe ya Babilona o Mogolo. Ke ka baka la’ng re gana re tiišitše go šomela karolo le ge e le efe ya Babilona o Mogolo? Ka gobane ga re nyake go ba le kabelo dibeng tša Babilona o Mogolo goba go ba karolo ya mekgatlo ya bodumedi bja maaka bjoo Jehofa a bo lebelelago bo se bja hlweka.—Jes. 52:11. *

18. Ngwanabo rena yo mongwe o ile a latela bjang melao ya motheo ya Beibele mošomong wa gagwe?

 ¹⁸ Mengwageng e fetilego, ngwanabo rena yo mongwe wa mogolo yo a bego a na le kgwebo ya go šoma ka lepolanka o ile a kgopelwa ke rakontraka yo mongwe gore a tlo šoma kerekeng ya lefelong leo a dulago go lona. Rakontraka yo o be a dutše a tseba gore ngwanabo rena yo o be a gana go šoma dikerekeng. Eupša mo lekgeng le, rakrontraka o be a tloga a hloka motho yo a ka mo šomelago. Eupša ngwanabo rena yo o ile a latela melao ya motheo ya Beibele gomme a gana a tiišitše go dira mošomo woo. Bekeng e latelago, kuranta ya lefelong leo e ile ya ntšha senepe sa motho yo a bego a fega sefapano godimo ga kereke yeo. Ge nkabe ngwanabo rena yoo a se a ka a latela melao ya motheo ya Beibele, nkabe kuranta yeo e ntšhitše senepe sa gagwe a fega sefapano kerekeng yeo. Nagana kamoo Bakristegotee le yena ba bego ba tla mo lebelela ka gona. Le gona, nagana kamoo Jehofa a bego a tlo kwa bohloko ka gona!

19-20. (a) Re ithutile’ng sehlogong se? (b) Re tlo araba dipotšišo dife sehlogong se se latelago?

¹⁹ Beibele e re boporofeta bjo bogolo bjo bo lego kgauswi le go phethagala ke bja ge babuši ba lefase ba tla be ba goeletša gore go na le “khutšo le polokego” mo lefaseng. Eupša rena re a tseba gore babuši ba lefase ba ka se kgone go tliša khutšo ya kgonthe mo lefaseng. Re swanetše go dira’ng pele boporofeta bjo bo ka phethagala gomme tshenyego ya tšhoganetšo ya re wela? Jehofa o nyaka gore re tšwele pele re botša batho ditaba tše dibotse gomme re dire batho ba bantši barutiwa. Ge re dutše re swaregile ka modiro wo wa rena, re swanetše go ba kgole le bodumedi bja maaka. Se se ra gore re swanetše go tlogela go ba ditho tša Babilona o Mogolo e bile re se šome mešomo yeo e amanago le bodumedi bja maaka.

²⁰ Go sa na le dilo tše dingwe tšeo di sa tlago go direga karolong ye ya mafelelofelelo ya ‘mehla ya bofelo.’ Le gona go na le dilo tše dingwe tšeo Jehofa a nyakago re di dira. Dilo tšeo ke’ng, gona re ka dira’ng go itokišeletša dilo ka moka tšeo di sa tlago go direga kgauswinyane? Sehlogo se se latelago se tla re botša.