1. Jehofa a ka dira’ng e le gore a phethagatše morero wa gagwe?

JEHOFA a ka ba selo le ge e le sefe seo a nyakago go ba sona e le gore a phethagatše morero wa gagwe. Ka mohlala, ge re bolela ka dilo tše sego kae feela, Jehofa o ile a ba Morutiši, Mohomotši le Moebangedi. (Jes. 48:17; 2 Bakor. 7:6; Bagal. 3:8) Eupša gantši o diriša batho go phetha merero ya gagwe. (Mat. 24:14; 28:19, 20; 2 Bakor. 1:3, 4) Le gona Jehofa a ka nea motho le ge e le ofe bohlale le matla e le gore a be selo le ge e le sefe seo se hlokagalago gore a phethe thato ya gagwe. Go ya ka diithuti tše mmalwa, ye ke karolo ya seo leina la Jehofa le se bolelago.

2. (a) Ke ka baka la’ng ka dinako tše dingwe re ka no se kgodišege gore Jehofa o a re diriša? (b) Re tlo ithuta ka’ng sehlogong se?

² Ka moka ga rena re nyaka go dirišwa ke Jehofa, eupša ba bangwe ba rena re ka no se kgodišege gore Jehofa o a re diriša. Ka baka la’ng? Ka gobane re ka ikwa re sa kgone go hlankela Jehofa gabotse ka baka la botšofadi, maemo ao re lego go ona le ka baka la ge re se na bokgoni bjo itšego. Ba bangwe ba ka ikwa ba kgotsofaletše seo ba se dirago gona bjale, gomme ba bona go sa hlokagale gore ba hlankele Jehofa ka mo go oketšegilego. Sehlogong se, re tlo bona kamoo Jehofa a ka neago yo mongwe le yo mongwe wa rena seo se nyakegago gore a phethagatše morero wa gagwe. Ke moka re tlo ithuta le ka banna le basadi ba ka Beibeleng bao Jehofa a ilego a ba nea kganyogo le matla gore ba phethe thato ya gagwe. Mafelelong, re tlo ithuta kamoo re ka dumelelago Jehofa gore a re diriše.

3. Go ya ka Bafilipi 2:13, Jehofa a ka re nea bjang kganyogo ya go dira thato ya gagwe?

³ Bala Bafilipi 2:13. * Jehofa a ka re nea kganyogo ya gore re nyake go dira thato ya gagwe. A ka dira seo bjang? Mohlomongwe re ka lemoga gore go na le motho yo a hlokago thušo ka phuthegong, goba gore go na le selo se itšego seo se swanetšego go dirwa ka phuthegong. Goba mohlomongwe bagolo ba ka re balela lengwalo leo le tšwago lekaleng leo le re botšago gore go nyakega thušo kaekae. Se se ka dira gore re ipotšiše gore: ‘Nka dira’ng gore ke thuše?’ Goba mohlomongwe re neilwe kabelo e thata gomme re ipotšiša ge e ba re ka kgona go e phetha gabotse. Goba ka morago ga gore ke bale ditemana tše itšego ka Beibeleng nka ipotšiša gore: ‘Nka diriša bjang ditemana tše go thuša ba bangwe?’ Jehofa a ka se re gapeletše gore re dire selo le ge e le sefe. Eupša ge a bona gore go na le seo re nyakago go se dira, a ka re thuša go se phetha.

4. Jehofa a ka re nea bjang matla a go dira thato ya gagwe?

⁴ Jehofa a ka re nea gape le matla a go dira thato ya gagwe. (Jes. 40:29) Bjang? Ka go re nea moya wa gagwe o mokgethwa go kaonefatša bokgoni bjo re šetšego re na le bjona. (Ek. 35:30-35) Le gona a ka diriša mokgatlo wa gagwe go re ruta mešomo e itšego. Ge e ba o sa kgodišege gore o ka phetha bjang kabelo e itšego, kgopela thušo. Le gona o ka kgopela Tatago rena wa legodimong ka nako le ge e le efe gore a go nee “matla a fetago a tlwaelegilego.” (2 Bakor. 4:7; Luka 11:13) Beibele e na le mehlala e mentši ya banna le basadi bao Jehofa a ilego a ba nea kganyogo le matla a gore ba phethe mošomo wa gagwe. Ge re dutše re ithuta ka e mengwe ya mehlala ye, nagana kamoo le wena Jehofa a ka go dirišago ka tsela e swanago.

5. Re ithuta’ng tseleng yeo Jehofa a ilego a diriša Moshe ka yona, le nako yeo a ilego a e kgetha go mo diriša go lokolla Baisiraele Egipita?

⁵ Jehofa o ile a diriša Moshe go lokolla Baisiraele Egipita. Eupša o ile a mo diriša neng? Na e bile nakong ya ge Moshe a be a ikwa eka o a swanelega ka morago ga gore a “[rutwe] ka bohlale ka moka bja Baegipita”? (Dit. 7:22-25) Aowa, Jehofa o mo dirišitše feela ka morago ga gore a mo thuše go ba monna yo a ikokobeditšego le yo boleta. (Dit. 7:30, 34-36) Jehofa o ile a nea Moshe sebete sa go bolela le kgoši e matla ya kua Egipita. (Ek. 9:13-19) Re ithuta’ng tseleng yeo Jehofa a ilego a diriša Moshe ka yona, le nako yeo a ilego a e kgetha go mo diriša? Re ithuta gore Jehofa o diriša bao ba ekišago dika tša gagwe le bao ba ithekgago ka yena gore a ba nee matla.—Bafil. 4:13.

6. Re ithuta’ng tseleng yeo Jehofa a ilego a diriša Barasilai go thuša Kgoši Dafida?

⁶ Ka morago ga mengwaga e makgolo, Jehofa o ile a diriša Barasilai gore a thuše Kgoši Dafida. Dafida le batho ba gagwe ba be ba “swerwe ke tlala, ba lapile e bile ba nyorilwe” ge ba be ba tšhabela Abesalomo e lego morwa wa Dafida. Barasilai yoo ka nako yeo a bego a tšofetše, o ile a bea bophelo bja gagwe kotsing ka gore yena gotee le ba bangwe ba thuše Dafida le batho ba gagwe ka dilo tšeo ba bego ba di hloka. Barasilai ga se a ka a phetha ka gore ga a sa na mohola go Jehofa ka ge a be a tšofetše. Go e na le moo, o ile a diriša seo a bego a na le sona go thuša bahlanka ba Jehofa bao ba bego ba hloka thušo. (2 Sam. 17:27-29) Re ithuta’ng tabeng ye? Re ithuta gore go sa šetšwe gore re na le mengwaga e mekae, Jehofa a ka re diriša go thuša bana babo rena bao ba hlokago thušo bao ba lego diphuthego tša gabo rena, goba bao ba  lego dinageng tše dingwe. (Die. 3:27, 28; 19:17) Le ge re ka se kgone go ba thuša ka go lebanya, re ka ntšha meneelo ya go thekga modiro wa rena wa lefase ka bophara gore tšhelete e dule e le gona gore e thuše bana babo rena le dikgaetšedi ge ba e hloka.—2 Bakor. 8:14, 15; 9:11.

7. Jehofa o ile a diriša bjang Simeone, gona ke ka baka la’ng seo se re kgothatša?

⁷ Jehofa o ile a tshepiša Simeone, e lego mokgalabje yo a bego a botega wa kua Jerusalema gore o be a ka se hwe pele a bona Mesia. Tshepišo ye e swanetše go ba e ile ya kgothatša Simeone kudu, ka ge a be a letile ka mengwaga e mentši gore a tle a bone Mesia. Jehofa o ile a šegofatša Simeone ka ge a be a na le tumelo e bile a kgotleletše. Ka letšatši le lengwe o ile a ya tempeleng “a išwa ke moya.” Ge a be a le moo o ile a bona Jesu yo e bego e le lesea, ke moka Jehofa o ile a mo diriša go bolela boporofeta bja mabapi le gore Jesu e be e tla ba Kriste. (Luka 2:25-35) Le ge go ka direga gore Simeone o ile a hwa pele Jesu a ka thoma bodiredi bja gagwe, o ile a thabela gore Jehofa o be a mo dirišitše go bolela boporofeta bjoo. Le gona Jehofa o sa tlo mo šegofatša ka dilo tše dintši nakong e tlago. Lefaseng le lefsa, monna yo yo a bego a botega o tla bona kamoo pušo ya Jesu e tlago go tlišetša batho ka moka ditšhegofatšo mo lefaseng. (Gen. 22:18) Le rena re thabela tsela le ge e le efe yeo Jehofa a re dirišago ka yona go mo hlankela.

8. Jehofa a ka re diriša bjang go swana le ge a ile a diriša Baranaba?

⁸ Lekgolong la pele la mengwaga C.E., monna yo mongwe yo a bego a rata go nea yo a bitšwago Josefa o ile a dumelela Jehofa gore a mo diriše. (Dit. 4:36, 37) Ka ge go ka direga gore o be a rata go homotša ba bangwe, baapostola ba ile ba mmitša Baranaba, e lego leina leo le rago gore “Morwa wa Khomotšo.” Ka mohlala, ka morago ga gore Saulo e be Mokriste, batho ba bantši ba be ba tšhaba go mmatamela ka ge a be a kile a tlaiša balatedi ba Jesu. Eupša Baranaba o ile a kgothatša Saulo le go mo thuša, gomme se se swanetše go ba se ile sa kgothatša Saulo. (Dit. 9:21, 26-28) Ka morago, bagolo ba kua Jerusalema ba ile ba bona go nyakega gore ba kgothatše bana babo bona bao ba dulago kgole kua motseng wa Antiokia wo o bego o le Siria. Ba ile ba roma mang? Baranaba. Ruri ba be ba kgonne go kgetha! Beibele e re botša gore Baranaba o ile a thoma go “ba kgothatša ka moka gore ba tšwele pele Moreneng ka boikemišetšo bjo bo tšwago pelong.” (Dit. 11:22-24) Le rena lehono Jehofa a ka re diriša gore re kgothatše bana babo rena le dikgaetšedi. Ka mohlala, a ka re diriša gore re kgothatše bao ba hlokofaletšwego. Goba a ka re diriša gore re etele goba re founele motho yo a babjago goba yo a gateletšegilego gore re mo kgothatše. Na o tla dumelela Jehofa gore a go diriše go etša ge a ile a diriša Baranaba?—1 Bathes. 5:14.

9. Re ithuta’ng tseleng yeo Jehofa a ilego a thuša ngwanabo rena Vasily gore e be mogolo yo a kgonago go diša phuthego gabotse?

⁹ Jehofa o ile a thuša ngwanabo rena yo mongwe yo a bitšwago Vasily gore e be mogolo yo a kgonago go diša phuthego gabotse. Ge Vasily a be a kgethwa go ba mogolo ge a be a na le mengwaga e 26, o be a nagana gore ga a na bokgoni bjo bo lekanego bja go thuša bana babo le dikgaetšedi ka phuthegong, kudukudu bao ba bego ba na le mathata. Eupša o ile a thušwa ke bagolo bao ba bego ba na le phihlelo le go ya Sekolong sa Bodiredi sa Mmušo. Vasily o ile a šoma ka thata gore a kaonefatše bokgoni bja gagwe. Ka mohlala, o ile a ngwala fase dilo tše dinyenyane tšeo a bego a nyaka go di dira. Ge a be a bona a kgona go di dira, o ile a se sa boifa. O re: “Mediro yeo e bego e ntšhoša kgale, gona bjale ke e thabela kudu. Ge Jehofa a nthuša gore ke hwetše lengwalo le le swanetšego gore ke yo kgothatša ngwanabo rena goba kgaetšedi ka phuthegong, seo se nthabiša kudu.” Lena  bana babo rena, ge e ba le dumelela Jehofa a le diriša go swana le ge Vasily a ile a dira bjalo, gona a ka le nea bokgoni bja go dira mediro e megolo ka phuthegong.

10. Abigaile o ile a dira’ng, gona o ka ithuta’ng mohlaleng wa gagwe?

¹⁰ Dafida le banna bao a bego a na le bona ba be ba rakedišwa ke Kgoši Saulo gomme ba hloka thušo. Banna bao ba ile ba kgopela Nabala dijo. Nabala e be e le monna wa Moisiraele yo e bego e le mohumi. Ba ile ba se tšhabe go mo kgopela ka gobane ba be ba hlokometše mehlape ya gagwe kua lešokeng. Eupša Nabala yo, yo a bego a se na taba le batho ba bangwe o ile a ba gana le tšona. Dafida o ile a galefa kudu gomme a nyaka go bolaya Nabala le banna ka moka ba ntlong ya gagwe. (1 Sam. 25:3-13, 22) Eupša mosadi wa Nabala e lego Abigaile o be a le botse e bile a na le temogo. O ile a bontšha sebete ka go khunama pele ga Dafida a mo kgopela gore a se ke a bolaya Nabala le banna bao ba gagwe. O ile a mo eletša ka temogo gore a tlogelele taba ye go Jehofa. Dafida o ile a kgongwa kudu ke temogo ya Abigaile le tsela yeo a ilego a bolela le yena ka yona. O ile a lemoga gore Abigaile o be a romilwe ke Jehofa. (1 Sam. 25:23-28, 32-34) Abigaile o be a ithutile go ba le dika tše dibotse tšeo di ilego tša dira gore Jehofa a mo diriše. Ka mo go swanago, Jehofa a ka diriša basadi ba Bakriste bao ba lego šedi e bile ba nago le temogo gore ba tiiše malapa a bona le go thuša ba bangwe ka phuthegong.—Die. 24:3; Tito 2:3-5.

11. Barwedi ba Shalume ba ile ba dira’ng, gona ke bomang bao ba ba ekišago lehono?

¹¹ Ka morago ga mengwaga e makgolo Jehofa a dirišitše Abigaile, barwedi ba Shalume ba ile ba ba gare ga batho bao Jehofa a ilego a ba diriša go lokiša maboto a Jerusalema. (Neh. 2:20; 3:12) Le ge tatago bona e be e le kgošana, barwedi ba Shalume ba be ba ikemišeditše go dira mošomo woo o thata le o kotsi. (Neh. 4:15-18) Ba be ba sa swane le banna ba bagolo ba Bathekoa bao ba ilego “ba gana go” thuša mošomong woo. (Neh. 3:5) Nagana kamoo barwedi ba Shalume ba ilego ba thaba ka gona gore mošomo woo o fedile ka morago ga matšatši a 52 feela! (Neh. 6:15) Lehono, dikgaetšedi tšeo di ratago go hlankela Jehofa ka tsela e kgethegilego di tšea karolo medirong ya go aga le go hlokomela meago yeo e dirišetšwago go hlankela Modimo. E le gore modiro wo o atlege, re hloka dikgaetšedi tše tšeo di nago le bokgoni, tšeo di lego mafolofolo le tšeo di botegago.

12. Jehofa a ka re diriša bjang go swana le ge a ile a diriša Thabitha?

¹² Jehofa o ile a thuša Thabitha go dira “ditiro tše dibotse le [go nea ba bangwe] dimpho tša kgaugelo,” kudukudu bahlologadi. (Dit. 9:36) Ka ge a be a rata go nea e bile a le botho, batho ba bantši ba ile ba lla ge a hwile. Eupša ba ile ba thaba kudu ge moapostola Petro a be a mo tsoša bahung. (Dit. 9:39-41) Re ithuta’ng go Thabitha? Re ithuta gore go sa šetšwe gore re bana goba re batho ba bagolo, re banna goba basadi, ka moka ga rena go na le seo re ka se dirago go thuša bana babo rena le dikgaetšedi.—Baheb. 13:16.

13. Jehofa o ile a diriša bjang kgaetšedi yo mongwe yoo a bego a na le dihlong, gona kgaetšedi yo o ile a phetha ka go re’ng?

¹³ Kgaetšedi yo mongwe yo a bego a na le dihlong yo a bitšwago Ruth o be a nyaka go ba moromiwa. Ge e be e sa le yo monyenyane, o be a eya ka ntlo le ntlo gomme a tšama a phakiša batho dipampišana. O itše: “Ke be ke tloga ke rata modiro wo.” Eupša Ruth o be a thatafalelwa ke go bolela le batho ka go lebanya gore a ba botše ka Mmušo wa Modimo. Le ge Ruth a be a na le dihlong, o ile a ba mmulamadibogo wa ka mehla ge a be a na le mengwaga e 18. Ka 1946, o ile a ya Sekolong sa Beibele sa Watchtower sa Gilead gomme ka morago a ba moromiwa kua Hawaii le  Japane. Jehofa o ile a mo diriša ka tsela e botse kudu go bolela ditaba tše dibotse dinageng tšeo. Ka morago ga mengwaga e ka bago e 80 Ruth a bolela ditaba tše dibotse, o re: “Ka mehla Jehofa o be a dutše a mmatlafatša. O nthušitše le gore ke se sa ba le dihlong. Ke tloga ke dumela gore Jehofa a ka diriša motho yo mongwe le yo mongwe yo a mmotago.”

14. Go ya ka Bakolose 1:29, ke’ng seo re swanetšego go se dira ge e ba re nyaka gore Jehofa a re diriše?

¹⁴ Ga e sa le go tloga kgale, Jehofa o be a dutše a diriša bahlanka ba gagwe go dira mediro e fapafapanego. Ke eng seo Jehofa a ka go dirago gore o be sona? Karabo ya potšišo ye e ithekgile ka gore wena o ikemišeditše go šoma ka thata gakaakang. (Bala Bakolose 1:29.) Ge e ba o ikemišeditše go dirišwa ke Jehofa, a ka go thuša gore o be mogoeledi yo mafolofolo, morutiši yo botse, mohomotši, mošomi yo a nago le bokgoni, mogwera wa kgonthe goba selo le ge e le sefe seo a se hlokago go phetha thato ya gagwe.

15. Go ya ka Timotheo wa Pele 4:12, 15, bana babo rena ba bafsa ba swanetše go kgopela Jehofa gore a ba thuše go dira’ng?

¹⁵ Go thwe’ng ka lena bana babo rena ba bafsa? Ka phuthegong go nyakega bana babo rena bao ba nago le mafolofolo e le gore e be bahlanka ba bodiredi. Diphuthegong tše dintši go na le bagolo ba bantši go feta bahlanka ba bodiredi. Na lena bana babo rena ba bafsa le ka ikemišetša go thuša kutšwanyana ka phuthegong? Ka dinako tše dingwe bana babo rena ba bangwe ba re: “Ke thabela go no ba mogoeledi.” Ge e ba le wena o ikwa bjalo, kgopela Jehofa gore a go thuše gore o nyake go ba mohlanka wa bodiredi, le gore a go fe bokgoni bja go dira sohle seo o ka se kgonago go mo hlankela. (Mmo. 12:1) Re tloga re hloka thušo ya gago!—Bala 1 Timotheo 4:12, 15.

16. Ke’ng seo re swanetšego go se kgopela go Jehofa, gona ka baka la’ng?

¹⁶ Jehofa a ka go dira gore o be selo le ge e le sefe seo a se hlokago gore a phethe thato ya gagwe. Ka gona mo kgopele gore a go nee kganyogo ya go dira modiro wa gagwe le matla ao o a hlokago gore o dire modiro woo. Go sa šetšwe gore o ngwana goba o motho yo mogolo, diriša nako ya gago, matla a gago le bokgoni bja gago go hlankela Jehofa gona bjale. (Mmo. 9:10) O se ke wa dumelela letšhogo le go ikwa o sa swanelege di go palediša go diriša sebaka se sengwe le se sengwe go hlankela Jehofa. Ruri ke tokelo e kgolo kudu go dira sohle seo o ka se kgonago go nea Jehofa letago leo le mo swanelago!