Jehofa o ile a nea bana babo rena ba ba mafolofolo matla. Ngwageng woo palo ya babulamadibogo e ile ya oketšega go tloga go ba 225 go ya go ba 350. Wona ngwageng woo, ka lekga la pele bagoeledi ba ka godimo ga ba 8 000 ba ile ba romela pego ya tirelo ya bona ya tšhemo ntlongkgolo. Jehofa o ile a ba šegofatša kudu.

Ka di-21 tša March 1920, Ngwanabo rena Joseph F. Rutherford, yoo ka nako yeo a bego a etelela pele modiro wa Barutwana ba Beibele o ile a nea polelo yeo e nago le sehlogo seo se rego, “Batho ba Dimilione Bao ba Phelago Gona Bjale ba ka se Tsoge ba hwa.” Barutwana ba Beibele ba ile ba dira sohle se ba ka se kgonago go mema batho gore ba tlo theetša polelo ye. Ba ile ba hira e nngwe ya diholo tše dikgolo toropong ya New York City gomme ba sepediša ditaletšo tše e ka bago tše 320 000.

Go ile gwa tla batho ba bantši go feta kamoo Barutwana ba Beibele ba bego ba naganne. Batho ba ka godimo ga ba 5 000 ba ile ba tlala ka holong yeo, ke moka ba bangwe ba 7 000 ba swanelwa ke go boela morago ka ge go be go se sa na madulo. Morokami o ile wa re “yeo e bile e nngwe ya ditiragalo tše dikgolo le tše di kgothatšago kudu tšeo Barutwana ba Beibele ba ilego ba di swara ka nako yeo.”

Barutwana ba Beibele ba ile ba tsebja ka go bolela molaetša wa gore “batho ba dimilione bao ba phelago gona bjale ba ka se tsoge ba hwa.” Ka nako yeo ba be ba sa kwešiše gore ditaba tše dibotse tša Mmušo wa Modimo di be di sa swanetše go bolelwa le dinageng tše dingwe. Eupša le ge ba be ba sa tsebe seo, ba be ba na le mafolofolo kudu. Kgaetšedi Ida Olmstead yoo a thomilego go kopanela ka 1902 o itše: “Re be re tseba gore batho ka moka ba be ba tlo šegofatšwa, ka gona re ile ra tšwela pele re botša batho ka moka bao re kopanago le bona tšhemong ditaba tše tše dibotse.”

Bana babo rena ba Bethele ba ile ba thoma go phrintha tše dingwe tša dikgatišo ka bobona e le gore go dule go na le dikgatišo tše di lekanego. Ba ile ba reka metšhene ya go phrintha, ba e tsenya moagong o rentilwego wa kua No.35 Myrtle Avenue, Brooklyn, New York, wo o bego o se kgole kudu le Bethele.

Leo Pelle le Walter Kessler ba fihlile Bethele ka January 1920. Walter o re: “Ge re fihla ngwanabo rena yo a bego a hlokometše modiro wa phrinthareng o ile a re go rena, ‘Go sa šetše iri le seripa pele nako ya dijo tša mosegare e ka fihla, tsenang fase le  šomeng.’ O ile a kgopela gore re yo tšea mapokisi a dipuku ao a bego a le lebatong la ka fasefase.”

Ngwanabo rena Leo ge a hlalosa seo se diragetšego letšatšing le le latelago o itše: “Mošomo wa rena e be e le go hlatswa maboto a lebatong la pele la moago. E be e le mošomo wa go šišimiša kudu wo nkilego ka o dira. Eupša ka ge re be re šomela Jehofa, re ile ra o dira ka pelo e tšhweu.”

Ka morago ga dibeke tše sego kae feela, bana babo rena ba baithaopi ba mafolofolo ba be ba šetše ba thomile go phrintha makasine wa Morokami. Dimakasine tše 60 000 tša Morokami wa February 1, 1920, di ile tša phrinthiwa motšheneng wo o bego o le lebatong la bobedi. Ka yona nako yeo, bana babo rena ba bangwe ba be ba swaregile ka go tsenya motšhene o mongwe o mogolo lebatong la ka tlase, wo ba ilego ba o reela leina ba re ke Sekepe sa Ntwa. Makasine wa Golden Age woo gona bjale re o bitšago Phafoga! o ile wa thoma go phrinthiwa ka kgatišo ya April 14, 1920. Go be go le molaleng gore Jehofa o be a šegofatša mošomo wa bana babo rena bao.

Batho ba Jehofa bao ba botegago ba be ba thabela segwera le mošomo o mofsa. Eupša ba bangwe ba Barutwana ba Beibele ba be ba ile ba tlogela mokgatlo nakong e thata mengwageng ya go tloga ka 1917 go ya go 1919. Go be go ka dirwa’ng go ba thuša?

Morokami wa April 1, 1920, o be o na le sehlogo seo se rego “A re Duleng ka Khutšo.” Sehlogo seo se be se na le mantšu a borutho ao a rego: “Re kgodišegile gore . . . motho yo mongwe le yo mongwe yo a nago le moya wa Morena . . . o tla lebala diphošo tšeo a di dirilego nakong e fetilego, . . . ke moka a boa gore re tlo šoma gotee.”

Ba bantši ba bao ba bego ba tlogetše mokgatlo ba ile ba arabela gabotse mantšung ao. Banyalani ba bangwe ba ile ba ngwala gore: “Re kgodišegile gore ngwageng o fetilego re sentše nako ka go no dula re sa bolele ditaba tše dibotse mola ba bangwe ba be ba swaregile ka modiro woo. . . . Re ikemišeditše go tšwela pele re bolela ditaba tše dibotse ka mafolofolo.” Bana babo rena ba bao ba bego ba boile ka mokgatlong ba be sa na le mošomo o montši wo ba bego ba swanetše go o dira.

Ka di-21 tša June 1920, Barutwana ba Beibele ba ile ba thoma lesolo le legolo la go sepediša puku ya The Finished Mystery, yeo e lego bolumo ya bošupa ya Studies in the Scriptures. Tše dintši tša dipuku tše di be di ile tša bolokwa lefelong le itšego  ka morago ga gore puku ye e thibelwe ke mmušo ka 1918.

Mokgatlo o ile wa mema bagoeledi ka moka gore ba tšee karolo modirong wa go sepediša puku ye. Modiro woo o be o sa dirwe ke babulamadibogo feela. Mokgatlo o itše: “Motho yo mongwe le yo mongwe yo a kolobeditšwego ka phuthegong yo a nyakago go tšea karolo modirong wo, o swanetše go dira bjalo. Eka yo mongwe le yo mongwe a ka ipotša gore: ‘Ke nyaka go tšea karolo lesolong le la go sepediša puku ya The Finished Mystery.” Edmund Hooper o re e be e le la mathomo bagoeledi ba bantši ba eya ka ntlo le ntlo ge re be re sepediša puku ye. O okeditše ka gore: “Re ile ra thoma go kwešiša gabotse gore modiro wo e bego e le o mogolo go feta kamoo re bego re naganne ka gona, o be o akaretša eng.”

Ka ge go boledišana le Barutwana ba bangwe ba Beibele go be go se bonolo nakong Ntwa ya Pele ya Lefase, Ngwanabo rena Rutherford o be a nyaka go kgothatša bana babo rena bao le go ba thuša go rulaganya modiro wa go bolela ditaba tše dibotse lefsa. Ka gona ka di-12 tša August 1920, yena le bana babo rena ba bangwe ba bane ba ile ba tšea leeto la go ya England le dinageng tše dingwe tše dintši gore ba yo kgothatša bana babo rena moo.

Barutwana ba Beibele ba ile ba swara dikopano tše tharo tša selete le diboka tše dingwe tše 12 moo England nakong ya ge Ngwanabo rena Rutherford a be a ba etetše. Go akanyetšwa gore batho bao ba bilego gona e be e le ba 50 000. Ge Morokami o be o bolela ka boripana ka ketelo yeo o itše: “Bana babo rena ba moo ba ile ba kgothatšega le go matlafala. Ba ile ba hlankela Jehofa ba le gotee le go šoma mmogo, e bile seo se ile sa ba thabiša kudu.” Ngwanabo rena Rutherford ge a be a le Paris o ile a nea gape polelo ya sehlogo seo se rego, “Batho ba Dimilione Bao ba Phelago Gona Bjale ba ka se Tsoge ba hwa.” Ge polelo e be e thoma, holo yeo ba bego ba le ka go yona e be e tletše. Ka morago ga moo, batho ba 300 ba ile ba kgopela Barutwana ba Beibele gore ba ba hlalosetše ka mo go oketšegilego.

Dibekeng tša ka morago ga moo, Ngwanabo rena Rutherford le bana babo rena ba bane bao a bego a sepele le bona ba ile ba etela Athene, Cairo le Jerusalema. E le go thuša batho bao ba bego ba thabela go kwa ditaba tše dibotse mafelong ao, Ngwanabo rena Rutherford o ile a dira gore go be le lefelo la go bea dikgatišo toropong ya Ramallah, kgauswi le Jerusalema. Ka morago o ile a boela Yuropa, a rulaganya gore ofisi e mpsha ya lekala e hlomiwe moo le gore dikgatišo di thome go phrinthiwa gona moo.

Ka September 1920, Barutwana ba Beibele ba ile ba lokolla makasine wa The Golden Age wa No. 27 wo e bego e le kgatišo e kgethegilego yeo e bego e bolela ka go tlaišwa ga Barutwana ba Beibele ka  1918. Motšhene wola wa go phrintha re boletšego ka wona wo o bego o bitšwa Sekepe sa Ntwa, o ile wa šoma bošego le mosegare go phrintha dimakasine tša ka godimo ga tše dimilione tše nne.

Batho bao ba ilego ba bala makasine woo ba ile ba kwa ka molato wo o bego o sa tlwaelega wa Emma Martin. Kgaetšedi Martin e be e le mmulamadibogo kua San Bernardino, California. Ka di-17 tša March 1918, yena le bana babo rena ba bangwe ba bararo e lego E. Hamm, E. J. Sonnenburg le E. A. Stevens, ba ile ba ba gona sebokeng sa Barutwana ba Beibele seo go sona go bego go se na batho ba bantši.

Sebokeng seo go be go na le monna yo mongwe yo a bego a se a tlela go ithuta Beibele. Ka morago monna yoo o ile a re: “Ke be ke ile sebokeng seo . . . ka ge ke be ke romilwe ke ba kgorong ya tsheko. Ba be ba nthomile gore ke yo nyaka bohlatse.” O ile a hwetša bohlatse bjo a bego a bo nyaka, e lego puku ya The Finished Mystery. Matšatši a sego kae ka morago, Kgaetšedi Martin le bana babo rena bale ba bararo ba ile ba golegwa. Ba ile ba bewa molato wa gore ba tshetše molao ka go nea batho puku yeo e bego e thibetšwe ke mmušo.

Kgaetšedi Emma le bana babo rena bale ba bararo ba ile ba bonwa molato gomme ba ahlolelwa mengwaga e meraro kgolegong. Ba ile ba ipiletša ka makga a mmalwa kgorong ya tsheko, eupša boipiletšo bja bona bja se ke bja amogelwa. Ka gona ka di-17 tša May 1920, ba ile ba thoma sekwebo sa bona sa mengwaga e meraro. Eupša go se go ye kae dilo di ile tša fetoga.

Ka di-20 tša June 1920, Ngwanabo rena Rutherford o ile a bolela phihlelo ya bona kopanong yeo e bego e swaretšwe kua San Francisco. Batho bao ba bego ba tlile kopanong ba ile ba se thabišwe ke tsela yeo bana babo rena ba ba bego ba swerwe ka yona, ka gona yo mongwe le yo mongwe wa bona o ile a ngwalela mopresidente wa United States thelekramo. Ba ile ba ngwala gore: “Re bona go golegwa . . . ga Mohumagadi Martin . . . ka molato wa gore o tshetše molao e le go hloka toka . . . Re bona mmušo o dirišitše matla gampe . . . ka gobane o ile wa romela motho gore a yo nyaka bohlatse . . . e le gore mafelelong . . . Mohumagadi Martin . . . a tle a golegwe.”

Letšatšing le le latelago, Mopresidente Woodrow Wilson o ile a fetoša kapejana kahlolo ya Kgaetšedi Martin, Ngwanabo rena Hamm, Ngwanabo rena Sonnenburg le Ngwanabo rena Stevens. Ba ile ba lokollwa kgolegong.

Mafelelong a 1920, Barutwana ba Beibele ba ile ba hwetša dilo tše dintši tšeo di bego di diragetše ngwageng woo tšeo di bego di ba thabiša. Mošomo wa ntlongkgolo o ile wa tšwela pele o oketšega, le gona Barutwana ba bantši ba Beibele ba ile ba tšwela pele ba bolela ka mafolofolo gore Mmušo wa Modimo ke wona feela o tlago go re rarollela mathata a rena. (Mat. 24:14) Ngwageng wo o latetšego wa 1921, le wona e bile ngwaga o mobotse kudu wa go tsebatša Mmušo wa Modimo.