1. Bakriste bao ba kolobeditšwego ba swanetše go tšwela pele ba dira’ng?

NA O kolobeditšwe? Ge e ba go le bjalo, ge o be o kolobetšwa o bontšhitše ka pele ga batho ba bangwe gore o na le tumelo go Jehofa le gore o nyaka go mo hlankela o le ka mokgatlong wa gagwe. * Eupša tumelo ya gago go Jehofa e swanetše go tšwela pele e gola. Le gona o swanetše go dula o tiiša tumelo ya gago tabeng ya gore Jehofa o diriša mokgatlo wa gagwe lehono.

2-3. Ke ka ditsela dife Jehofa a hlahlago mokgatlo wa gagwe lehono? Nea mehlala.

² Lehono Jehofa o hlahla mokgatlo wa gagwe ka tsela yeo e bontšhago gore ke Modimo wa mohuta mang, yeo e bontšhago merero ya gagwe le melao ya gagwe. Ga bjale a re boleleng ka dika tše tharo tša Jehofa tšeo re di bonago ka mokgatlong wa gagwe.

³ Sa pele, “Modimo ga a bebe sefahlego,” seo se ra gore o rata motho yo mongwe le yo mongwe. (Dit. 10:34) Ka ge Jehofa a re rata, seo se ile sa dira gore a romele Morwa wa gagwe mo lefaseng gore a tlo neela bophelo bja gagwe e le ‘topollo bakeng sa bohle.’ (1 Tim. 2:6; Joh. 3:16) Jehofa o diriša batho ba gagwe go botša ba bangwe ditaba tše dibotse e le gore ba tle ba holwe ke sehlabelo sa topollo. Sa bobedi, Jehofa ke Modimo yo a ratago thulaganyo le khutšo. (1 Bakor. 14:33, 40) Ka baka leo re swanetše go letela gore batho bao ba mo hlankelago ba be le thulaganyo le khutšo. Sa boraro, Jehofa ke ‘Mohlahli yo Mogolo.’ (Jes. 30:20, 21) Ke ka baka leo mokgatlo wa gagwe o šomago ka thata go ruta batho ka moka, bao ba lego ka phuthegong le bao ba sego ka phuthegong Lentšu la gagwe e lego Beibele. Bakriste ba pele ba ile ba bonagatša bjang dika tše  tše tharo tša Jehofa? Batho ba Jehofa lehono ba bonagatša bjang dika tšeo? Gona moya o mokgethwa o ka go thuša bjang ge o dutše o hlankela ka mokgatlong wa Jehofa lehono?

4. Go ya ka Ditiro 1:8, Jesu o ile a laela balatedi ba gagwe gore ba dire’ng, gona ba be ba tlo hwetša thušo efe?

⁴ Mehleng ya Bakriste ba pele. Molaetša woo Jesu a bego a o ruta o ile wa nea batho ka moka kholofelo. (Luka 4:43) O ile a laela balatedi ba gagwe gore ba tšwele pele ka modiro woo a o thomilego le gore ba nee bohlatse “go fihla karolong ya kgole ya lefase.” (Bala Ditiro 1:8.) Eupša ba be ba ka se kgone go dira modiro wo ka matla a bona. Ba be ba tlo hloka moya o mokgethwa, e lego “mothuši” yoo Jesu a bego a ba holofeditše yena.—Joh. 14:26; Sak. 4:6.

5-6. Moya o mokgethwa o ile wa thuša balatedi ba Jesu bjang?

⁵ Balatedi ba Jesu ba ile ba newa moya o mokgethwa ka Pentekoste ya 33 C.E. Ka ge ba be ba thušwa ke moya o mokgethwa, gateetee ba ile ba thoma go botša ba bangwe ditaba tše dibotse, gomme ka nako e kopana feela ke ge batho ba dikete ba šetše ba kwele ditaba tše dibotse le go di amogela. (Dit. 2:41; 4:4) Ge batho ba be ba thoma go tlaiša barutiwa, ga se ba ka ba boifa gomme ba tlogela go bolela ditaba tše dibotse, go e na le moo ba ile ba kgopela Modimo gore a ba thuše. Ba ile ba rapela ka gore: “[Dumelela] bahlanka ba gago go tšwela pele ba bolela lentšu la gago ka sebete ka moka.” Ka morago ga moo ba ile ba newa moya o mokgethwa gomme ba tšwela pele ba “bolela lentšu la Modimo ka sebete.”—Dit. 4:18-20, 29, 31.

⁶ Barutiwa ba Jesu ba be ba na le mathata a mangwe. Ka mohlala, go be go se na dikopi tše dintši tša Mangwalo. Go be go se na dikgatišo tša go ithuta Beibele tša go swana le tšeo re nago le tšona lehono. Le gona barutiwa ba be ba swanetše go botša batho bao ba bolelago maleme a mantši a fapafapanego ditaba tše dibotse. Le ge barutiwa bao ba mafolofolo ba be ba na le mathata, ba ile ba dira selo seo go bego go bonagala se ka se kgonege. Ka mengwaga e ka bago e 30 feela, ba be ba šetše ba boletše ditaba tše dibotse “tlholong yohle yeo e lego tlase ga legodimo.”—Bakol. 1:6, 23.

7. Mengwageng ya ka godimo ga e 100 e fetilego bahlanka ba Jehofa ba ile ba tseba bjang gore o nyaka gore ba dire’ng, gona ba ile ba arabela bjang?

⁷ Mehleng ya lehono. Jehofa o sa tšwela pele go hlahla batho ba gagwe le go ba nea matla a go dira modiro wa gagwe. Selo se segolo seo a se dirišago go ba hlahla ke Beibele yeo bangwadi ba yona ba thušitšwego ke moya wa gagwe o mokgethwa go e ngwala. Ka Beibeleng re bala ka bodiredi bja Jesu le ka taelo yeo a e neilego balatedi ba gagwe ya gore ba tšwele pele ka modiro woo a o thomilego. (Mat. 28:19, 20) Morokami wa Seisemane wa July 1881 o boletše gore: “Jehofa ga se a re kgetha goba go re tlotša gore re tle re hlomphiwe ke batho goba gore re tle re hume, eupša o re kgethile e le gore re tle re diriše sohle seo re nago le sona go bolela ditaba tše dibotse.” Pukwana yeo e gatišitšwego ka 1919 yeo e bego e nea bagoeledi ditaelo tša kamoo ba swanetšego go bolela ditaba tše dibotse e itše: “Re na le modiro o montši wo re swanetšego go o dira, eupša ka ge e le modiro wa Morena, o tla re nea matla a go o dira.” Ka go swana le Bakriste ba pele bana babo rena ba, ba be ba na le sebete e bile ba ile ba šoma ka thata ka gobane ba be ba kgodišegile gore moya o mokgethwa o tla ba thuša go botša batho ba mehuta ka moka ditaba tše dibotse. Le rena re kgodišegile gore moya o mokgethwa o tla re thuša lehono.

8-9. Mokgatlo wa Jehofa o dirišitše mekgwa efe go bolela ditaba tše dibotse?

⁸ Mokgatlo wa Jehofa o dirišitše didirišwa tše kaonekaone tšeo di lego gona go bolela ditaba tše dibotse. Didirišwa tšeo di akaretša dikgatišo tše di phrinthilwego, filimi ya “Photo-Drama of Creation,” dikeramafomo tša go bapala direkhoto, dikoloi tšeo di nago le segodišamodumo, mananeo a radiong gomme mengwageng yeo  e sa tšwago go feta re ile ra thoma go diriša dikhomphutha le Inthanete. Le gona mokgatlo wa Modimo o fetolela dikgatišo ka maleme a mantši go feta le ge e le neng pele! Ke ka baka la’ng mokgatlo o dira se? Ka gobane o nyaka gore batho ba mehuta ka moka ba kwe ditaba tše dibotse ka maleme a gabo bona. Ka ge Jehofa a rata batho ka moka, o ile a bolela e sa le pele gore ditaba tše dibotse di be di tla bolelwa “go ditšhaba tšohle, meloko yohle, maleme ohle le batho bohle.” (Kut. 14:6, 7) O nyaka gore batho ka moka ba kgone go kwa ditaba tše dibotse tša Mmušo wa gagwe.

⁹ Mokgatlo o dira’ng go thuša batho bao go sego bonolo go ba botša ditaba tše dibotse ka magaeng a bona, ka ge ba dula mafelong a šireleditšwego kudu moo go phelago go notletšwe dikeiti? E le go thuša ba bantši ba batho bao gore ba kwe ditaba tše dibotse, Jehofa o thušitše mokgatlo wa gagwe go thoma go diriša mekgwa e fapafapanego go bolela ditaba tše dibotse mafelong a batho bohle. Ka mohlala, ka 2001 Sehlopha se Bušago se ile sa dumelela gore go dirišwe diteroli le mafelo a mangwe a go bea dikgatišo kua France ke moka ka morago seo sa tla sa dumelelwa le dinageng tše dingwe. Mafelelo a seo e bile a mabotse kudu. Le gona ka 2011 bana babo rena le dikgaetšedi ba ile ba thoma mokgwa o mongwe o mofsa wa go bolela ditaba tše dibotse kua United States karolong ya leemaema ya New York City. Ngwageng wa mathomo wa ge go be go dirišwa mokgwa wo, bana babo rena ba ile ba sepediša dipuku tše 102 129 le dimakasine tše 68 911. E bile batho ba 4 701 ba ile ba kgopela go swarelwa dithuto tša Beibele! Ga go pelaelo gore Jehofa o be a diriša moya wa gagwe o mokgethwa go thekga modiro wo. Ka gona Sehlopha se Bušago se ile sa dumelela bana babo rena le dikgaetšedi lefaseng ka moka go diriša mokgwa wa go bolela ditaba tše dibotse ka diteroli le mafelo a mangwe a go bea dikgatišo.

10. Re ka dira’ng gore re kaonefatše bokgoni bja rena modirong wa go bolela ditaba tše dibotse?

¹⁰ Wena o ka dira eng? Diriša tlwaetšo yeo re e hwetšago ge re le dibokeng. Etšwa tšhemo ka mehla le sehlopha sa tšhemo seo o abetšwego go sona. Bana babo rena le dikgaetšedi ba sehlopheng seo o abetšwego go sona ba ka go thuša gore o kaonefatše bokgoni bja gago bja go bolela ditaba tše dibotse e bile ba ka go kgothatša ka mohlala wa bona o mobotse. Tšwela pele o bolela ditaba tše dibotse le ge o na le mathata. Ka ge lengwalo la sehlogo se le re gopoditše, re kgona go dira modiro woo Jehofa a re neago wona ka ge a re nea matla, e sego ka matla a rena. (Sak. 4:6) Le  gona re kgodišegile gore Jehofa o tla re nea matla ka ge re dira modiro wa gagwe.

11. Sehlopha se bušago se ile sa šoma bjang ka botee gore batho ba Modimo ba dule ba na le thulaganyo mehleng ya Bakriste ba pele?

¹¹ Mehleng ya Bakriste ba pele. Sehlopha se bušago kua Jerusalema se ile sa šoma ka botee gore batho ba Modimo ba dule ba na le thulaganyo le khutšo. (Dit. 2:42) Ka mohlala, mo e ka bago ka 49 C.E. ge go be go tsogile ngangišano ka taba ya lebollo, sehlopha se bušago se ile sa boledišana ka taba yeo se hlahlwa ke moya o mokgethwa. Ge nkabe Bakriste bao ba ile ba dula ba sa kwane ka taba ye ya lebollo, ba be ba ka se kgone go bolela ditaba tše dibotse. Le ge baapostola le banna ba bagolo e be e le Bajuda, ga se ba ka ba dumelela setšo sa Sejuda goba bao ba thekgago setšo seo ba tutuetša tsela yeo ba dirago phetho ka yona tabeng ye. Go e na le moo ba ile ba nyaka tlhahlo ka Lentšung la Modimo le go rapelela gore moya o mokgethwa o ba thuše go dira phetho e swanetšego. (Dit. 15:1, 2, 5-20, 28) Mafelelo a seo e bile afe? Jehofa o ile a šegofatša phetho ya bona, gwa tšwela pele go na le khutšo le botee ka phuthegong e bile modiro wa go bolela ditaba tše dibotse wa tšwela pele.—Dit. 15:30, 31; 16:4, 5.

12. Ke’ng seo se bontšhago gore go na le thulaganyo le khutšo ka mokgatlong wa Jehofa lehono?

¹² Mehleng ya lehono. Mokgatlo o be o dutše o thuša batho ba Modimo gore ba dule ba na le thulaganyo le khutšo. Ka 1895, makasine wa Zion’s Watch Tower and Herald of Christ’s Presence wa November 15 o ile wa gatiša sehlogo seo se bego se theilwe go Bakorinthe ba Pele 14:40 seo se rego, “Ka Bothakga le ka Thulaganyo.” Sehlogo seo se boletše gore: “Baapostola ba ile ba ngwalelwa Bakriste ba pele dilo tše dintši mabapi le go ba le thulaganyo . . . Go bohlokwa gore re tšwele pele re latela ‘dilo tšeo di ilego tša ngwalwa kgale e le go re ruta.’” (Baroma 15:4) Le lehono, mokgatlo wa Jehofa o sa šoma ka thata gore diphuthego tša Bokriste di dule di na le thulaganyo le khutšo go no swana le mehleng ya Bakriste ba pele. Ka mohlala, ge o ka ya sebokeng sa Thuto ya Morokami phuthegong e nngwe goba nageng e nngwe, o tlo tseba gore thuto yeo e tlo swarwa bjang le gore go tlo ithutwa sehlogo sefe. O tlo no ikwa o le gae ga mahlaku! Ke moya wa Modimo feela wo o ka dirago gore botee bja mohuta wo bo kgonege.—Tsef. 3:9.

13. Re naganne ka lengwalo la Jakobo 3:17, re swanetše go ipotšiša dipotšišo dife?

 ¹³ Wena o ka dira eng? Jehofa o nyaka gore batho ba gagwe ba “[boloke] botee bja moya setlemong se se tlemaganyago sa khutšo.” (Baef. 4:1-3) Ka gona ipotšiše gore: ‘Na ke dira gore ka phuthegong go be le botee le khutšo? Na ke kwa bao ba re etelelago pele ka phuthegong? Na ba bangwe ba ka ntshepa, kudukudu ge e ba ke na le maikarabelo ka phuthegong? Na ke swara nako, ke rata go thuša ba bangwe le go ba direla dilo?’ (Bala Jakobo 3:17.) Ge e ba o bona go na le moo o ka kaonefatšago gona, rapelela moya o mokgethwa gore o go thuše. Ge o dumelela moya o mokgethwa o go thuša go kaonefatša semelo sa gago le go kaonefatša tsela yeo o dirago dilo ka yona, bana beno ka phuthegong ba tla go rata kudu.

14. Go ya ka Bakolose 1:9, 10, Jehofa o ile a thuša bjang Bakriste ba pele gore ba kwešiše “tsebo e nepagetšego ya thato ya gagwe”?

¹⁴ Mehleng ya Bakriste ba pele. Jehofa o rata go ruta batho ba gagwe. (Ps. 32:8) O nyaka gore ba mo tsebe, ba mo rate le go phela ka mo go sa felego. Dilo tše ka moka di ka se kgonege ge e ba a sa rute batho ba gagwe. (Johane 17:3) Jehofa o ile a diriša phuthego ya Bokriste ya pele go ruta batho ba gagwe. (Bala Bakolose 1:9, 10.) Moya o mokgethwa, e lego “mothuši” yoo Jesu a bego a holofeditše gore o be a tla o romela barutiwa ba gagwe, le wona o ile wa ba thuša kudu. (Joh. 14:16) Moya o mokgethwa o ile wa thuša barutiwa ba Jesu go kwešiša Lentšu la Modimo le go gopola dilo ka moka tšeo Jesu a ilego a di bolela le go di dira. Dilo tšeo ka morago di ile tša ngwalwa ka Diebangeding. Le gona dilo tšeo di ile tša tiiša tumelo ya Bakriste ba pele, tša dira gore ba rate Modimo kudu, Morwa wa gagwe gotee le go ratana.

15. O bone Jehofa a phethagatša ka ditsela dife tshepišo ya gagwe yeo e lego go Jesaya 2:2, 3?

¹⁵ Mehleng ya lehono. Jehofa o ile a bolela e sa le pele gore “mehleng ya bofelo” batho ba ditšhaba ka moka ba be ba tla tla thabeng ya gagwe, ke gore ba be tla thoma go mo hlankela e le gore ba rutwe ka ditsela tša gagwe. (Bala Jesaya 2:2, 3.)  Re bona boporofeta bjoo bo phethagala. Le gona re kgona go bona gore borapedi bja therešo bo phala madumedi ka moka a maaka. E bile Jehofa o ruta batho ba gagwe dilo tše dintši go tšwa ka Beibeleng! (Jes. 25:6) Jehofa o diriša “mohlanka yo a botegago le wa temogo” go re ruta a diriša mekgwa e fapafapanego. Ka mohlala, o diriša dihlogo tšeo re ka di balago, dipolelo tšeo re ka di theetšago le dibidio tša dipopaye tšeo re ka di bogelago. (Mat. 24:45) Re ikwa go swana le mogwera wa Jobo e lego Elihu, yoo a ilego a re: “Ke mang mohlahli yo a swanago le [Modimo]?”—Jobo 36:22.

16. O ka dira’ng gore segwera sa gago le Jehofa se tšwele pele se gola?

¹⁶ Wena o ka dira eng? Moya wa Modimo o tla go thuša gore o diriše seo o se balago le go ithuta sona ka Beibeleng. Rapela go swana le mopsalme yo a ilego a re: “Nthute ditsela tša gago, hle Jehofa. Ke tla sepela therešong ya gago. Ntire gore ke boife leina la gago ka pelo ka moka.” (Ps. 86:11) Tšwela pele o bala le go ithuta Beibele gotee le dikgatišo tše dingwe tša mokgatlo. Ke therešo gore ge o bala ga o nyake feela go no hwetša tsebo, eupša o nyaka gore seo o se balago se nwelele ka pelong ya gago e bile o se diriše. Moya wa Jehofa o ka go thuša go dira seo. Le gona o swanetše go kgothatša bana beno le dikgaetšedi. (Baheb. 10:24, 25) Ka baka la’ng? Ka gobane go no swana le wena, le bona ke karolo ya lapa la Jehofa. Rapelela moya wa Modimo gore o go thuše go nea dikarabo tše di tšwago pelong ge o le dibokeng le gore o dire sohle seo o ka se kgonago ge o na le kabelo goba polelo. Ge o ka dira seo, o tla be o bontšha Jehofa le Morwa wa gagwe gore o rata “dinku” tša bona tše bohlokwa.—Joh. 21:15-17.

17. O ka bontšha ka ditsela dife gore o thekga mokgatlo wa Jehofa le go o botegela?

¹⁷ Kgauswinyane mo lefaseng go tla be go šetše feela mokgatlo wa Modimo woo o hlahlwago ke moya wa gagwe. Ka baka leo, dirišana le mokgatlo wa Jehofa. Le wena bontšha gore o rata batho ka moka go swana le Modimo ka go botša bohle bao o kopanago le bona ditaba tše dibotse. Ekiša tsela yeo Modimo a ratago gore dilo di dirwe ka thulaganyo le ka khutšo ka go dira gore ka phuthegong go be le botee. Le gona theetša Mohlahli wa gago yo Mogolo ka gore o ithute dilo ka moka tšeo a re neago tšona a diriša mokgatlo wa gagwe. Ge o ka dira dilo tše, o ka se boife ge Modimo a tla be a fediša lefase le la Sathane. Go e na le moo, o tla ema ka sebete gare ga bao ba hlankelago mokgatlo wa Jehofa ka go botega.