1. Ke ka baka la’ng batho ba bantši ba gakanegile?

 GO NA le dikereke tše dintši tšeo di ipotšago gore di rapela Modimo ka tsela yeo a e amogelago. Ke ka baka leo batho ba bantši ba gakanegilego kudu lehono! Ba ipotšiša gore: “Na go na le kereke e tee yeo Modimo a e amogelago goba na o amogela dikereke ka moka?” Na re kgodišegile gore seo rena Dihlatse tša Jehofa re se rutago le tsela yeo re mo hlankelago, ke yeo Jehofa a e amogelago? Na go a kgonega gore re tsebe karabo? A re kweng bohlatse bjoo bo tlago go re bontšha seo.

2. Go ya ka Bathesalonika ba Pele 1:5, ke ka baka la’ng moapostola Paulo a be a kgodišegile gore o be a hweditše therešo?

² Moapostola Paulo o be a kgodišegile gore o hweditše therešo. (Bala 1 Bathesalonika 1:5.) Le gona o be a se a no kgodišega ka gobane seo se be se tlo mo dira gore a thabe. Go e na le moo, Paulo o be a bala lentšu la Modimo ka mo go tseneletšego. Le gona o be a dumela gore ‘Mangwalo ka moka a buduletšwe ke Modimo.’ (2 Tim. 3:16) Ke’ng seo a ilego a ithuta sona? Paulo o ile a hwetša bohlatse ka Mangwalong bjoo bo bontšhago gore Jesu e be e le yena Mesia yoo a holofeditšwego. Le gona Bajuda ba ile ba kgetha go se tshepe bohlatse bjoo. Bona baetapele bao ba bodumedi bja maaka, ba be ba ipotša gore ba rapela Modimo eupša ba sa dire dilo tšeo Modimo a di amogelago. (Tito 1:16) Paulo o be a sa swane le bona, e bile o be a sa kgethe gore ke Mangwalo afe ao a swanetšego gore a a tshepe. O be a ikemišeditše go ruta batho ba bangwe le go dira ‘dilo ka moka tšeo Modimo a di ratago.’—Dit. 20:27.

3. Na re swanetše go ba le dikarabo tša dipotšišo ka moka e le gore re kgodišege gore re bodumeding bja therešo? (Bona lepokisi leo le rego “ Mediro ya Jehofa le Dikgopolo tša Gagwe ke tše ‘Dintši Kudu Moo re Palelwago ke go di Anega.’”)

 ³ Batho ba bangwe ba nagana gore bodumedi bja therešo bo swanetše go kgona go araba dipotšišo ka moka go akaretša le dipotšišo tšeo Beibele e se nago dikarabo tša tšona. Na seo se a kgonega? A re boneng mohlala wa Paulo. O ile a kgothaletša Bakristegotee le yena gore ba ‘kgonthišetše dilo tšohle.’ Eupša o ile a dumela gore go na le dilo tše dintši tšeo le yena a bego a sa di kwešiše. (1 Bathes. 5:21) O ngwadile gore: ‘Ga re tsebe dilo tše dintši,’ le gore “re bona ka go širega ka seipone sa tšhipi.” (1 Bakor. 13:9, 12) Paulo o be a sa kwešiše dilo ka moka, le rena ga re kwešiše dilo ka moka. Eupša Paulo o be a kwešiša dithuto tše bohlokwa ka Jehofa. O be a kgodišegile gore o hweditše therešo.

4. Re ka dira’ng gore re kgodišege gore re hweditše therešo, gona re tlo ithuta’ng ka Bakriste ba nnete?

⁴ Selo seo se ka re thušago go kgodišega gore re hweditše therešo, ke go bapetša tsela yeo Jesu a bego a hlankela Jehofa ka yona, le tsela yeo Dihlatse tša Jehofa di mo hlankelago ka yona lehono. Sehlogong se, re tlo bona gore Bakriste ba nnete (1) ga ba rapele medingwana ya diswantšho, (2) ba hlompha leina la Jehofa, (3) ba rata therešo, e bile (4) ba ratana go tšwa pelong.

5. Re ithuta’ng go Jesu tabeng ya go rapela Modimo ka tsela yeo a e amogelago, gona re ka diriša seo a se rutilego bjang?

⁵ Ka ge Jesu a be a rata Modimo kudu, o ile a rapela yena a nnoši ge a be a le legodimong le ge a be a le mo lefaseng. (Luka 4:8) O ile a ruta barutiwa ba gagwe gore le bona ba rapele Jehofa a nnoši. Jesu le barutiwa ba gagwe bao ba botegago ga se ba ka ba diriša diswantšho ge  ba rapela. Ka ge Modimo e le moya, ga go na motho yo a ka dirago seswantšho sa go swana le yena! (Jes. 46:5) Eupša re ka reng ka diswantšho tšeo di bitšwago bakgethwa tšeo batho ba di rapelago? Molaong wa bobedi go Melao e Lesome, Jehofa o itše: “O se ke wa itirela seswantšho se se betlilwego goba sebopego sa selo seo se swanago le selo le ge e le sefe seo se lego godimo magodimong goba seo se lego tlase lefaseng . . . O se ke wa di khunamela.” (Ek. 20:4, 5) Bao ba nyakago go kgahliša Modimo ba kwešiša gabotse mantšu a.

6. Lehono Dihlatse tša Jehofa di hlankela Jehofa go swana le bomang?

⁶ Diithuti tša histori di re Bakriste ba mehleng ya pele ba be ba hlankela Modimo feela. Ka mohlala, puku ya History of the Christian Church e re Bakriste ba mehleng ya pele “ba be ba ka se thekge” taba ya gore go dirišwe diswantšho mafelong a borapedi. Dihlatse tša Jehofa lehono, le tšona di dira dilo go swana le Bakriste ba mehleng ya pele. Ga re rapele diswantšho tšeo di bitšwago “bakgethwa” goba barongwa, e bile ga re rapele Jesu. Le gona ga re hlomphe difolaga goba go hlankela mebušo ya dinageng tša gabo rena. Le ge batho ba bangwe ba ka leka go re gapeletša, re ikemišeditše go kwa mantšu a Jesu ao a rego: “Ke Jehofa Modimo wa gago yo o swanetšego go mo rapela.”—Mat. 4:10.

7. Go na le phapano efe magareng ga Dihlatse tša Jehofa le madumedi a mangwe?

⁷ Lehono batho ba bantši ba rata go theetša baruti bao ba tumilego. Ba rata baruti bao go fihla bokgoleng bja gore ba ka ba rapela. Batho ba bantši ba ya dikerekeng tša baruti bao, ba reka dipuku tša dikereke tša bona e bile ba ntšha meneelo e mentši kudu go thekga baruti bao. Batho ba bangwe ba dumela selo se sengwe le se sengwe seo baruti bao ba se bolelago. Ga re tshepe gore tsela yeo batho bao ba thabago ka yona ge ba bona baruti ba bona, ba ka thaba ka yona ge Jesu a be a ka tla mo lefaseng! Go fapana le batho ba dikereke, Bakriste ba nnete ga ba na moruti. Le ge re hlompha bao ba re eteletšego pele, re theetša mantšu a Jesu ao a rego: ‘Ka moka le bana ba motho.’ (Mat. 23:8-10) Ga re hlankele batho, go sa šetšwe gore ke baetapele ba bodumedi goba ba dipolotiki. Le gona ga re thekge dilo tšeo ba di dirago. Go e na le moo re thekga Jehofa ka gobane ga re karolo ya lefase. Ka gona dilo tše ka moka di bontšha gore re fapana kudu le madumedi ka moka ao a ipotšago gore a hlankela Modimo ka tsela yeo a e amogelago.—Joh. 18:36.

8. Re tseba bjang gore Jehofa o nyaka gore leina la gagwe le tagafatšwe le gore batho ka moka ba le tsebe?

⁸ Nakong e nngwe Jesu o ile a rapela ka gore: “Tate tagafatša leina la gago.” Jehofa ka boyena o ile a araba thapelo yeo. O ile a dira seo ka go ntšha lentšu le matla a le legodimong, a tshepiša gore o tlo tagafatša leina la gagwe. (Joh. 12:28) Nakong ya ge Jesu a be a ruta batho ka Modimo mo lefaseng, o ile a fetša nako ya gagwe ka moka a tagafatša leina la Tatagwe. (Joh. 17:26) Ka gona, ke nnete gore Bakriste ba therešo ba ikwa ba na le tokelo ya go diriša leina la Modimo le go le tsebiša batho ba bangwe.

9. Bakriste ba pele ba ile ba bontšha bjang gore ba be ba hlompha leina la Modimo?

⁹ Mehleng ya Bakriste ba pele, ka moragonyana ga gore phuthego ya Bokriste e hlongwe, Jehofa o ile a “retologela ditšhabeng go amogela batho ba leina la gagwe go tšwa go tšona.” (Dit. 15:14) Bakriste bao ba pele ba be ba thabišwa ke go diriša leina la Modimo le go le tsebiša batho ba bangwe. Ba ile ba diriša leina la Jehofa ge ba be ba bolela ditaba tše  dibotse le ge ba be ba ngwala Mangwalo a Makgethwa. * Ka baka leo ba ile ba bontšha gore ke bona fela bao ba bego ba botša batho ba bangwe ka leina la Modimo.—Dit 2:14, 21.

10. Ke bohlatse bofe bjoo bo bontšhago gore Dihlatse tša Jehofa ke tšona di nnoši tšeo di tsebišago batho ka leina la Jehofa?

¹⁰ Na Dihlatse tša Jehofa ke tšona di nnoši tšeo di tsebišago batho ka leina la Jehofa? Ekwa bohlatse bjo bo latelago. Lehono baetapele ba bantši ba dikereke ba dirile sohle seo ba ka se kgonago go dira gore batho ba dumele gore Modimo ga a na leina. Le gona ba tlošitše leina la gagwe ka Dibeibeleng tša bona mola ba bangwe ba be ba dira gore le se dirišwe dikerekeng tša bona. * Go molaleng gore Dihlatse tša Jehofa ke tšona di nnoši tšeo di hlomphago leina la Jehofa.” Re leka ka thata gore re tsebiše batho ba bantši leina la Modimo go feta kereke le ge e le efe! Ka baka leo, re dira sohle seo re ka se kgonago gore re phelele leina la rena. Re Dihlatse tša Jehofa! (Jes. 43:10-12) Re tšweleditše dikopi tša Beibele ya Phetolelo ya Lefase le Lefsa ya Mangwalo a Makgethwa tše fetago tše dimilione tše 240. Le gona di bušeditše leina la Modimo mafelong ao bafetoledi ba bangwe ba Beibele ba bego ba le tlošitše. Re tšweleditše le dikgatišo tšeo di nago le leina la Jehofa ka maleme a fetago a 1 000!

11. Bakriste ba pele ba ile ba bontšha bjang gore ba rata therešo?

¹¹ Jesu o be a rata dilo ka moka tšeo Modimo a re tshepišitšego go tlo re direla tšona. Jesu o be a phela ka go dumelelana le therešo e bile o ile a e botša ba bangwe. (Joh. 18:37) Balatedi ba Jesu ba nnete le bona ba be ba tloga ba rata therešo. (Joh. 4:23, 24) Le gona moapostola Petro o ile a re phuthego ya Bokriste ke “tsela ya therešo.” (2 Pet. 2:2) Ka ge Bakriste ba pele ba be ba tloga ba rata therešo, ba ile ba gana go latela ditšo, madumedi a mangwe, le dilo tšeo batho ba di bolelago tšeo di sa dumelelanego le therešo. (Bakol. 2:8) Ka mo go swanago, lehono Bakriste ba dira sohle seo ba ka se kgonago go ‘tšwela pele ba sepela therešong’ ka gore ba leke go phela ka go dumelelana le seo Lentšu la Jehofa le se bolelago.—3 Joh. 3, 4.

12. Ge bana babo rena bao ba re etelelago pele ba lemoga gore tsela yeo re kwešišago selo se itšego ka yona e nyaka go kaonefatšwa ba dira’ng, gona ke ka baka la’ng ba dira seo?

¹² Batho ba Modimo lehono ga ba bolele gore ba kwešiša dilo ka moka tšeo di lego ka Beibeleng. Ka dinako tše dingwe ba na le go dira diphošo ge ba hlalosa dithuto tša Beibele goba ge ba dira dilo tše itšego ka mokgatlong. Ke nnete gore seo ga se sa swanela go re makatša. Beibele e bolela ka mo go kwagalago gore ge nako e dutše e eya, batho ba Modimo ba be ba tlo ba le tsebo e nepagetšego. (Bakol. 1:9, 10) Jehofa o re utollela therešo ganyenyane-ganyenyane. Re swanetše go ikemišetša go se fele pelo go fihla re kwešiša therešo gakaone. (Die. 4:18) Ge bana babo rena bao ba re etelelago pele ba lemoga gore go na le selo seo se swanetšego go kaonefatšwa, ba dira diphetogo kapelapela. Baetapele ba dikereke ba fetoša tsela yeo ba rutago ka yona ka gobane ba nyaka go thabiša batho bao ba tlago dikerekeng tša bona le go nyaka go tuma. Eupša mokgatlo wa Jehofa o fetoša tsela yeo re kwešišago dilo ka yona ka gobane o nyaka go re thuša gore re be le segwera se sebotse le Modimo le gore re mo hlankele go swana le Jesu. (Jak. 4:4) Ge Dihlatse tša Jehofa di dira diphetogo, ga di dire seo ka gobane tsela yeo batho ba naganago ka yona mo lefaseng e fetogile, eupša di dira seo ka gobane di kwešiša Beibele gakaone. Di rata therešo kudu!—1 Bathes. 2:3, 4.

13. Ke seka sefe se bohlokwa kudu seo Bakriste ba peleng ba bego ba na le sona, gona Dihlatse tša Jehofa di se bontšha bjang lehono?

¹³ Go dika ka moka tše dibotse tšeo Bakriste ba peleng ba bego ba na le tšona, se bohlokwa kudu go tšona ka moka e be e le lerato. Jesu o itše: “Bohle ba tla tseba ka se gore le barutiwa ba ka, ge e ba le ratana.” (Joh. 13:34, 35) Lehono Dihlatse tša Jehofa lefaseng ka moka di bontšhana lerato la nnete le botee. Go fapana le dikereke tše dingwe ka moka, re a ratana le ge re etšwa ditšong tša go se swane le dinageng tša go se swane. Re bontšhana lerato ge re le dibokeng le dikopanong tša tikologo le tša selete. Tsela yeo re ratanago ka yona e dira gore re kgodišege gore Jehofa o amogela tsela yeo re mo hlankelago ka yona.

14. Go ya ka Bakolose 3:12-14, ke selo sefe se bohlokwa kudu seo re ka se dirago go bontšha gore re ratana go tšwa pelong?

¹⁴ Beibele e re kgothaletša gore re ‘ratane ka lerato le le tseneletšego.’ (1 Pet. 4:8) Tsela yeo re ka bontšhanago ka yona gore re a ratana, ke ka go lebalelana le go kwešiša gore ka moka ga rena re na le mafokodi. Le gona re swanetše go dira sohle seo re ka se kgonago gore re rate go fana le go amogela batho ka moka ka phuthegong, gaešita le bao ba ka  bago ba re kgopišitše. (Bala Bakolose 3:12-14.) Ge re bontšhana lerato ka tsela ye, re tla be re bontšha gore re Bakriste ba nnete.

15. Re bontšha bjang gore re latela tsela yeo Bakriste ba pele ba bego ba dira dilo ka yona?

¹⁵ Re bontšha gore re latela tsela yeo Bakriste ba pele ba bego ba dira dilo ka yona. Ka mohlala, mokgatlo wa rena o rulagantše dilo go swana le Bakriste ba pele. Re na le balebeledi ba basepedi, bagolo le bahlanka ba bodiredi go swana le bona. (Bafil. 1:1; Tito 1:5) Re hlompha melao ya Jehofa ya mabapi le thobalano le lenyalo, tsela yeo re lebelelago madi ka yona e bile re šireletša phuthego go batho bao ba sa nyakego go kwa melao ya Modimo.—Dit. 15:28, 29; 1 Bakor. 5:11-13; 6:9, 10; Baheb. 13:4.

16. Mantšu ao a lego go Baefeso 4:4-6 a re ruta’ng?

¹⁶ Jesu o boletše gore batho ba bantši ba be ba tlo bolela gore ke balatedi ba gagwe, eupša ga se ka moka ga bona bao e bego e tlo ba balatedi ba gagwe ba nnete. (Mat. 7:21-23) Beibele le yona e boletše gore mehleng ya bofelo, batho ba bantši ba be ba tlo ‘bonagala eka ke barapedi ba Modimo.’ (2 Tim. 3:1,5) Eupša Beibele e boletše ka mo go kwagalago gore ke batho bao ba nago le “tumelo e tee” feela bao Modimo a ba amogelago.—Bala Baefeso 4:4-6.

17. Ke bomang lehono bao ba latelago Jesu le bao ba nago le tumelo e tee?

¹⁷ Ke bomang bao ba nago le tumelo e tee lehono? Re hweditše bohlatse. Le gona re bone tsela yeo Jesu a bego a hlankela Jehofa ka yona le kamoo Bakriste ba pele ba ilego ba mo ekiša ka gona. Dihlatse tša Jehofa ke tšona feela tšeo di latelago Jesu e bile di nago le tumelo e tee. Ruri ke tokelo e kgolo go ba bahlanka ba Jehofa, go tseba nnete ka yena le ka merero ya gagwe! Eka ka moka ga rena re ka tšwela pele re kgodišegile gore re hweditše nnete.