NGWAGA o mongwe le o mongwe, bahlanka ba Jehofa ba bantši ba bušetšwa ka phuthegong. Nagana ka “lethabo le legolo” leo le bago gona legodimong ge motho yo mongwe a boela ka phuthegong! (Luka 15:7, 10) Ge e ba o bušeditšwe ka phuthegong o ka kgodišega gore Jesu, barongwa le Jehofa ba thabile kudu. Ka gona ge o dutše o lokiša segwera sa gago le Jehofa, o ka kopana le mathata. O ka kopana le mathata afe, gona o ka thušwa ke’ng?

Bana babo rena ba bantši le dikgaetšedi ba sa ikwa ba nyamile le ka morago ga gore ba bušetšwe ka phuthegong. Mohlomongwe o ka ba o kwešiša kamoo Kgoši Dafida a ilego a ikwa ka gona. Le ka morago ga ge a be a lebaletšwe dibe tša gagwe o ile a re: ‘Melato ya ka ke e mentši.’ (Ps. 40:12; 65:3) Ka morago ga ge motho a boetše go Jehofa a ka ikwa a le molato goba a lewa ke dihlong ka mengwaga e mentši kudu. Isabelle * yoo a ilego a kgaolwa ka mengwaga e fetago e 20 o itše: “Go be go le thata go amogela gore Jehofa a ka ntebalela.” Ge o ka nyama, o ka boela wa se sa ba le segwera se sebotse le Jehofa. (Die. 24:10) Leka ka thata gore seo se se ke sa go diragalela.

Batho ba bangwe ba bona eka ba ka no se kgone go dira dilo tšeo go hlokegago gore ba di dire gore ba boele ba be le segwera se sebotse le Jehofa gape. Ka morago ga gore Antoine a bušetšwe ka phuthegong, o itše: “Ke be ke ikwa eka ke lebetše dilo ka moka tšeo ke ilego ka ithuta tšona ge ke be ke thoma go ba Mokriste.” Go ikwa ka tsela yeo go ka dira gore ba bangwe ba ikwe ba palelwa ke go hlankela Jehofa kamoo ba ka kgonago ka gona.

Ka mohlala, motho yo ntlo ya gagwe e sentšwego ke ledimo, a ka nyama ge a nagana ka nako le matla ao a swanetšego go a diriša gore a e lokiše. Ka mo go swanago, ge e ba segwera sa gago le Jehofa se senyegile ka ge o dirile sebe se segolo, o ka bona eka go tlo hlokega maiteko a magolo gore o boele o be le segwera se sebotse le Jehofa. Eupša batho ba bangwe ba ka go thuša.

 Jehofa o re: “Etlang re lokišeng ditaba.” (Jes. 1:18) Ke nnete gore o šetše o šomile ka thata gore o ‘lokiše ditaba,’ le gona Jehofa o a go rata. Ka ge o boetše go Jehofa a ka go diriša bjalo ka mohlala go bontšha gore Diabolo o na le maaka!—Die. 27:11.

Ka ge o boetše go Jehofa, seo se bontšha gore o šetše o batametše kgauswi le yena gomme o tshepiša gore le yena o tla batamela kgauswi le wena. (Jak. 4:8) Bana beno ba tla thabela go bona gore o boile ka phuthegong. Eupša go na le selo se sengwe seo o swanetšego go se dira. O swanetše go dula o bontšha Jehofa gore o a mo rata ka ge e le Tatago le mogwera wa gago. O ka dira seo bjang?

Leka go ipeela dilo tšeo o ka kgonago go di fihlelela. Mohlomongwe o ka ba o sa gopola dilo tšeo o ithutilego tšona ka Jehofa le dilo tšeo a tshepišago go tlo re direla tšona nakong e tlago. Eupša o swanetše go dula o eya dibokeng le tšhemong ka mehla le go fetša nako o na le bana beno le dikgaetšedi. A re boneng dilo tše dingwe tšeo o ka di dirago.

Dula o rapela Jehofa. Ge o dula o ikwa o le molato, Tatago o kwešiša kamoo o ikwago ka gona e bile seo se ka dira gore go be thata gore o mo rapele. (Baroma 8:26) Eupša ‘phegelela thapelo’ gomme o botše Jehofa gore o nyaka go ba le segwera se sebotse le yena. (Baroma 12:12) Andrej o re: “Ke ile ka ikwa ke na le molato kudu e bile ke lewa ke dihlong. Eupša ka morago ga go rapela, ke ile ka ikwa ke le kaone kudu e bile ke na le khutšo ya monagano.” Ge e ba o sa tsebe gore o ka rapelela eng, nagana ka dithapelo tša Kgoši Dafida ge a be a itshola tšeo di lego go Psalme 51 le 65.

Ithute Beibele ka mehla. Seo se tla go thuša gore o be le tumelo e tiilego go Jehofa le go mo rata kudu. (Ps. 19:7-11) Felipe o re: “Selo seo se dirilego gore ke we moyeng le go kweša Jehofa bohloko, ke go se be le lenaneo le lebotse la go ithuta Beibele. Ka ge ke be ke se sa nyaka go kweša Jehofa bohloko gape, ke ile ka phetha ka gore ke be le thuto ya motho ka noši.” Le wena o ka dira se se swanago. Ge e ba o nyaka dihlogo tšeo di ka go thušago gore o be le thuto ya motho ka noši, o ka kgopela mogwera wa gago yoo e lego kgale a le ka phuthegong gore a go thuše.

Lokiša segwera sa gago le bana beno le dikgaetšedi. Batho ba bangwe bao ba ilego ba boa ka phuthegong ba be ba nagana gore ba bangwe ba ba kwatetše. Larissa o re: “Ke be ke lewa ke dihlong kudu. Ke be ke nagana gore ke nyamišitše bana bešo le dikgaetšedi kudu. Ke ile ka ikwa ka tsela ye ka nako e telele.” Kgodišega gore bagolo le bana beno le dikgaetšedi ba bangwe ba nyaka go go thuša gore o be le segwera se sebotse le Jehofa. (Bona lepokisi leo le rego “ Bagolo ba ka Thuša Bjang Batho Bao ba Boetšego ka Phuthegong?”) Ba thabišwa ke gore o boile ka phuthegong le gona ba nyaka gore o dule o thabile!—Die. 17:17.

O ka dira’ng gore o be le segwera se sebotse le bana beno le dikgaetšedi gape? Dula o eya dibokeng le go ya tšhemong le bana beno le dikgaetšedi. Seo se ka go thuša bjang? Felix o re: “Bana babo rena le dikgaetšedi ba be ba fela pelo ya gore ke boe ka phuthegong. Ke ile ka ikwa ke le bohlokwa. Ka moka ga bona ba ile ba nthuša gore ke ikwe ke amogelegile ka phuthegong, le go bona gore Jehofa o ntebaletše le gore nka kgona go tšwela pele ke mo hlankela gape.”—Bona lepokisi leo le rego “ O ka Dira Eng Gore o Lokiše Segwera sa Gago le Jehofa?”

Sathane o tla dula a go tlišetša mathata gore a go nyamiše ge o leka go lokiša segwera sa gago le Jehofa. (Luka 4:13) Ikemišetše go dula o lokiša segwera sa gago le Jehofa.

Jehofa o tshepiša dinku tša gagwe gore: “Ke tla tsoma yeo e timetšego, ka buša yeo e arogilego, yeo e robegilego ka e tlema ka mašela ka ba ka matlafatša yeo e fokolago.” (Hesek. 34:16) Jehofa o thušitše batho ba bangwe ba bantši gore ba boele ba be le segwera se sebotse le yena. Kgodišega gore le wena o nyaka go go thuša gore o dule o na le segwera se sebotse le yena.