Ge modiro wa go bolela ditaba tše dibotse o dutše o gola, bagoeledi ba ile ba hloka dikgatišo tše dingwe tše dintši. Bana babo rena ba Bethele ya Brooklyn ba be ba gatiša dimakasine, eupša ba be ba sa ithekgile ka difeme tše dingwe gore ba gatiše dipuku tša bona. Ka morago ga gore go be le tlhaelelo ya dipuku ka dikgwedi tše dintši, mošomo wa go bolela ditaba tše dibotse o ile wa thoma go šitišega. Ngwanabo rena Rutherford o ile a botšiša Robert Martin e lego mookamedi wa feme ge e ba ba ka kgona go ikgatišetša dikgatišo tša bona.

Ngwanabo rena Martin o ile a re: “Ye ke kgopolo e kgahlišago ka gobane se se bolela gore go be go tlo bulwa feme ya go gatiša dipuku.” Bana babo rena ba ile ba hiriša lefelo kua 18 Concord Street Brooklyn gomme ba hwetša le metšhene yeo ba e hlokago.

Ga se batho ka moka ba bego ba thabetše tšwelopele ye. Mopresidente wa khamphani yeo e bego e gatiša dipuku tša rena o ile a etela feme ya rena e mpsha. O ile a re: “Le na le metšhene e mekaonekaone ya go gatiša dipuku eupša ga go le o tee wa lena yo a tsebago go e diriša. Ka dikgwedi tše di tshelelago feela, le tla be le šetše le sentše metšhene.”

Ngwanabo rena Martin o itše: “Se se be se bonagala eka ke therešo. Re be re tseba gore Jehofa o tlo re thuša, le gona o ile a re thuša.” Ngwanabo rena Martin o be a bolela therešo. Ka moragonyana, motšhene wo o ile wa tšweletša dipuku tše 2 000 ka letšatši.

Ka ntle le go gatiša dipuku tša bona feela, bahlanka ba Jehofa ba be ba diriša mokgwa o mongwe wa go bolela ditaba tše dibotse, e lego go diriša radio. Ka di-26 tša February 1922 Sontaga thapama, Ngwanabo rena Rutherford o ile a bolela radiong la mathomo. O ile a nea polelo e  rego: “Batho ba Dimilione Bao ba Phelago Gona Bjale ba ka se Tsoge ba Hwa” seteišeneng sa KOG kua Los Angeles, California, U.S.A.

Batho ba e ka bago ba 25 000 ba ile ba kwa polelo yeo. Ba bangwe ba ile ba romela mangwalo a go leboga polelo yeo. Le lengwe la mangwalo ao le be le etšwa go Willard Ashford yo a bego a dula Santa Ana, California. O ile a reta Ngwanabo rena Rutherford “ka polelo e botse le e kgahlišago.” O ile a oketša ka go re: “Ka ge ka gae go na le batho ba bararo bao ba babjago, re be re ka se kgone go kwa ge o ka be o be o se wa diriša mokgwa wo, le ge o be o ka nea polelo yeo kgauswi le mo re dulago.”

Dibekeng tše di latelago, go ile gwa newa dipolelo tše dingwe. Mafelelong a ngwaga woo, Morokami o itše “batho ba 300 000 ba ka ba ba ile ba kwa molaetša ka radio.”

Ka ge Barutwana ba Beibele ba be ba kgothaditšwe ke batho ba bangwe ka mangwalo le ka dilo tšeo ba ba boditšego tšona ba be ba ikemišeditše go aga seteišene sa radio Sehlakahlakeng sa Staten kgauswi le Bethele ya Brooklyn. Mengwageng e latelago Barutwana ba Beibele ba be ba diriša seteišene sa WBBR go bolela ditaba tše dibotse mafelong a mantši le go batho ba bantši.

Morokami wa June 15, 1922 o ile wa bolela gore kopano e tla swarelwa Cedar Point, Ohio, go tloga ka di 5 tša September go ya go di 13, 1922. Barutwana ba Beibele ba be ba thabile kudu ge ba fihla kopanong.

Ngwanešo Rutherford o ile a bolela polelong ya gagwe gore: “Ke kgodišegile gore Morena o tlo šegofatša kopano ye . . . le go kgonthišetša gore go newa bohlatse bjo bo sa kago bja bonwa lefaseng.” Bao ba bego ba nea dipolelo kopanong yeo ba be ba kgothaletša Barutwana ba Beibele gore ba bolele ditaba tše dibotse.

Ka Labohlano la di 8 tša September, ba 8 000 bao ba bego ba tlile kopanong ba ile ba tla moagong wo Ngwanabo rena Rutherford a bego a nea polelo go ona. Ba be ba holofela gore o tlo ba hlalosetša gore “ADV,” yeo e bego e le ditaletšeng tša bona e ra go re’ng. Ge ba be ba dula fase, ba bantši ba ka be ba ile ba lemoga seila yeo e bego e phuthilwe ka godimo ga sethala.  Arthur Claus yo a bego a tlile a etšwa Tulsa, Oklahoma, U.S.A. o ile a hwetša madulo mo a ka kgonago go kwa polelo gabotse ka gobane ka nako yeo go be go se na dimaekrofounu.

E le gore go se ke gwa ba le ditšhitišo, modulasetulo o ile a tsebiša gore go se ke gwa ba le motho yo a latetšego yo a tlago go dumelelwa go tsena lefelong la kopano nakong ya polelo ya Ngwanabo rena Rutherford. Ka 9:30 mesong Ngwanabo rena Rutherford o ile a thoma ka go bolela ka mantšu a Jesu a lego go Mateo 4:17 ao a rego: “Mmušo wa magodimo o batametše.” Ge a bolela ka taba ya gore batho ba be ba tlo kwa molaetša wa Mmušo bjang, o ile a re: “Jesu ka boyena, o ile a bolela gore nakong ya go ba gona ga gagwe go tla ba le puno ya batho ba gagwe bao a tlago go ikgobokeletša bona e lego bao ba nago le therešo le bao ba tshephagalago.”

Ngwanabo rena Claus yo a bego a dutše ka holong ya kopano o itše: “Re be re theeditše ka kelohloko lentšu le lengwe le le lengwe.” Eupša go se go ye kae Arthur o ile a thoma go babja gomme a swanelwa ke go tšwa ka holong le ge a be a sa rate go dira bjalo eupša o be a tseba gore a ka se tle a dumelelwa go tsena gape nakong ya polelo ya Ngwanabo rena Rutherford.

Ka morago ga metsotso e sego kae o ile a thoma go kaonefala. O boletše gore ge a boela morago mo a bego a dutše gona, o ile a kwa lešata la batho ba phaphatha diatla. Se se ile sa dira gore a nyake go kwa gore go direga’ng. O ile a phetha ka gore o tlo kgona go kwa karolo ye e šetšego ya polelo, le ge e ba seo se bolela gore a namele ka godimo ga tlhaka. Ngwanabo rena Claus ka nako yeo o be a na le mengwaga e 23 ka gona o ile a kgona go namela moo godimo. O ile a lemoga gore mafasetere a godimo a be a bulegile , ka gona ge a dutše a batamela o ile a kwa polelo yeo gabotse.

Arthur o be a se tee moo. Ba bangwe ba ba bagwera ba gagwe ba be ba le mo tlhakeng. Yo mongwe  wa bona e be e le Frank Johnson yo a ilego a kitimela go yena gomme a mmotšiša gore “Na o swere thipa e nyenyane?”

Arthur o ile a re: “Ee ke e swere.”

Frank o ile a mo fetola ka gore: “O arabile dithapelo tša rena. Na o bona seila ye e kgolo? Ke folaga yeo e bofeletšwego mo dipikiring. Theetša Moahlodi gabotse. a Ge a re ‘tsebatšang, tsebatšang,’ ke moka wena o ripe dithapo tše tše nne.

Ka gona Arthur o be a swere thipa ka letsogo a na le ba bangwe gomme a letile Ngwanabo rena Rutheford gore a bolele mantšu ao. Ka moragonyana Ngwanabo rena Ruthereford o ile a fihla karolong e bohlokwa ya polelo ya gagwe. Ngwanabo rena Rutherford o be a thabile kudu e bile a na le mafolofolo mohlomongwe a nyaka go goeletša ge a be a re: “Ebang dihlatse tše di botegago le tša therešo Moreneng. Tšwelang pele ntweng go fihlela ge karolo ye nngwe le ye nngwe ya Babilona e le lešope. Kwatšang molaetša kgole le kgauswi. Lefase ka moka le swanetše go tseba gore Jehofa ke Modimo le gore Kriste ke Kgoši ya Dikgoši le Morena wa Marena. Le ke letšatši le legolo, Bonang Kgoši e a buša Lena le batseta ba yona ba go phatlalatša. Ka gona tsebatšang, tsebatšang, tsebatšang Kgoši le Mmušo wa yona!”

Arthur o re yena le bana babo bao a bego a na le bona ba ile ba kgaola dithapo tšeo ke moka seila yeo e ile ya theogela fase. Go sepedišana le mongwalo wola wa “ADV,” seila yeo e be e swere molaetša wo o balegago ka gore: “Tsebašang Kgoši le Mmušo wa Yona!”

Kopano yeo e bego e swarwetše Cedar Point e ile ya thuša bana babo rena gore ba dule ba dira modiro o bohlokwa wa go bolela ditaba tše dibotse tša Mmušo wa Modimo gomme bao ba bego bana le moya wa boithapo ba ile ba thabišwa ke goba karolo ya modiro woo. Mmulamadibogo yo a tšwago Oklahoma, U.S.A., o ngwadile gore, “Tikologong ya mo re bego re le gona batho ba moo ba be ba šoma ka malahle e bile ba se na sa bona. O itše: “Gantši ge batho ba be ba ekwa molaetša wo o bego o etšwa ka makasineng wa Golden Age ba be ba lla.” O ile a fetša ka gore, “Re thaba kudu ka gobane re kgona go ba homotša.”

Barutwana ba Beibele ba ile ba bona bohlokwa bja mantšu a Jesu ao a lego go Luka 10:2 ao a rego: “Puno ke e kgolo eupša bašomi ke ba sego kae.” Ge ngwaga o be o dutše o fela, ba be ba ikemišeditše le go feta go tsebatša ditaba tše dibotse tša Mmušo wa Modimo kgole le kgaufsi.