Baisiraele ba Lwele Dintwa—Le Rena re Swanetše go di lwa.
LEŠOLE le lengwe la Nazi le ile la botša Dihlatse tša Jehofa nakong ya Ntwa ya Bobedi ya Lefase gore: “Ge e ba go ka ba le motho mo gare ga lena yo a ganago go lwa le Fora goba Engelane, ka moka ga lena le swanetše go hwa!” Le ge kgauswi le bona go be go na le mašole ao a bego a itlhamile, ga go le o tee wa bana babo rena bao, yoo a ilego a tshela molao wa Jehofa. Ruri ba ile ba bontšha sebete! Mohlala wo o re bontšha gabotse kamoo re lebelelago ntwa ka gona: Re gana go tsenela dintwa tša lefase le. Le ge re ka tšhošetšwa ka go bolawa, re ka se tšee lehlakore.
Eupša ga se batho ka moka bao ba ipitšago Bakriste ba dumelelanago le seo. Ba bantši ba dumela gore Mokriste o swanetše go lwela naga ya gabo. Ba ka nea mabaka a gore: ‘Baisiraele ba kgale ba lwele dintwa; le rena re swanetše go di lwa.’ O tlo araba bjang? Re swanetše go ba hlalosetša gore boemo bja Baisiraele ba kgale bo fapana kudu le bja rena lehono. A re boledišaneng ka mabaka a mararo.
1. BAHLANKA BA MODIMO E BE E LE SETŠHABA SETEE
Nakong e fetilego, o ile a kgetha setšhaba setee e lego sa Isiraele gore e be batho ba gagwe. O be a bitša Baisiraele gore ke “thoto ya [gagwe] e kgethegilego gare ga merafo e mengwe ka moka.” (Ek. 19:5) Modimo o ile a ba nea le naga e kgethegilego. Ka gona ge Modimo a be a laela Baisiraele gore ba ye ba lwe le ditšhaba tše dingwe, ba be ba sa bolaye barapedi ba Jehofa. a
Lehono, bahlanka ba therešo ba Jehofa ba tšwa “ditšhabeng tšohle, melokong yohle, merafong yohle le malemeng ohle.” (Kut. 7:9) Ge bahlanka ba Jehofa ba be ka tšea karolo ntweng, ba be ba tla lwantšhana ba ba ba bolaya le bahlanka ba bangwe ba Jehofa.
2. JEHOFA O ILE A LAELA BAISIRAELE GORE BA YE NTWENG
Nakong e fetilego, Jehofa o be a dira diphetho tša gore ke neng le gore ke ka baka la’ng Baisiraele ba swanetše go ya ntweng. Ka mohlala Jehofa o ile a laela Baisiraele gore ba lwe le Bakanana e le gore a phethagatše kahlolo ya gagwe go bona, bao ba bego ba tsebja ka go rapela batemona, boitshwaro bjo bo hlephilego le go dira dihlabelo ka bana. Jehofa o ile a laela Baisiraele gore ba fediše batho ka moka bao ba bego ba dira dilo tšeo nageng yeo a ba tshepišitšego yona. (Lef. 18:24, 25) Ka morago ga gore Baisiraele ba fihle Nageng ya Kholofetšo, Modimo o be a fela a ba laela gore ba ye ntweng e le gore ba šireletše naga go manaba a bona. (2 Sam. 5:17-25) Eupša ga go na moo Jehofa a ilego a laela Baisiraele gore ba ikgethele ge e ba ba swanetše go ya ntweng. Ge ba be ba ikgethela, go be go phela go e ba le ditlamorago tše mpe.—Num. 14:41-45; 2 Dikor. 35:20-24.
Lehono, Jehofa ga a laele batho gore ba ye ntweng. Ditšhaba di lwela dilo tšeo di di nyakago, e sego tšeo Jehofa a di nyakago. Ba ya ntweng ka ge ba nyaka naga, ba nyaka go dira tšhelete e ntši goba ka mabaka a dipolotiki. Eupša ke bomang bao ba lwago ka leina la Modimo e le gore ba šireletše madumedi a bona goba ba go bolaya manaba a Modimo? Kgauswinyane Jehofa o tlo šireletša bahlanka ba gagwe gomme a fediša manaba a gagwe ka ntwa ya Haramagedone. (Kut. 16:14, 16) Ntweng yeo, go tlo lwa feela madira a Jehofa a legodimong, e sego bahlanka ba gagwe mo lefaseng.—Kut. 19:11-15.
3. BAISIRAELE GA SE BA BOLAYA BAO BA BEGO BA BONTŠHA TUMELO
Na dintwa tša lehono di phološa bao ba botegago go swana le ge ntweng ya Jehofa ya go lwa le Jeriko go ile gwa phološwa Rahaba le lapa la gagwe?
Nakong e fetilego, ke gantši Baisiraele ba bego ba bontšha bao ba bontšhago tumelo kgaugelo gomme ba bolaya bao Jehofa a rego ba swanelwa ke lehu. Nagana ka mehlala ye e mebedi. Le ge Jehofa a ile a laela gore go fedišwe Jeriko, Baisiraele ba ile ba phološa Rahaba le lapa la gagwe ka ge a ile a bontšha tumelo. (Josh. 2:9-16; 6:16, 17) Ka morago, motse ka moka wa Bagibeone o ile a wa phološwa ka ge batho ba ile ba hlompha Modimo.—Josh. 9:3-9, 17-19.
Lehono, mašole ga a dikadike go bolaya bao ba bontšhago tumelo goba bao e sego mašole. Ka dinako tše dingwe ge go na le diphapano magareng ga dinaga tše dingwe, batho ba bangwe ba bolawa ba se na molato.
4. BAISIRAELE BA BE BA SWANETŠE GO LATELA DITAELO TŠA JEHOFA GE BA EYA NTWENG
Nakong e fetilego, Jehofa o be a laela gore Baisiraele ba latele ditaelo tša gagwe pele ba eya ntweng. Ka mohlala, ka dinako tše dingwe Modimo o be a ba kgopela gore ba dire khutšo le setšhaba seo ba swanetšego go lwa le sona. (Doit. 20:10) Le gona Jehofa o be a letetše gore Baisiraele ba phele ba hlwekile mmeleng le go phela ka ditekanyetšo tša gagwe tša boitshwaro. (Doit. 23:9-14) Le ge madira a dinaga tša kgauswi le Baisiraele a be a kata basadi ge a fentše dinaga tše dingwe, Jehofa o be a sa dumelele Baisiraele gore ba dire seo. Le gona ba be ba se ba swanela go nyala makgoba a basadi go fihla ge kgwedi e fetile basadi bao ba le bokgobeng.—Doit. 21:10-13.
Lehono, dinaga tše dintši di dumelelane gore di ka lwa dintwa ka tlase ga maemo a itšego. Le ge ba dira se bakeng sa go šireletša batho, ka dinako tše dingwe dinaga di no tshela molao.
5. JEHOFA O BE A LWELA SETŠHABA SA GAGWE
Na Modimo o lwela naga le ge e le efe lehono go swana le ge a ile a lwela Baisiraele kua Jeriko?
Nakong e fetilego, Jehofa o be a lwela Baisiraele, gantši o be a dira mehlolo gore ba fenye ntweng. Ka mohlala, Jehofa o thušitše Baisiraele bjang gore ba fenye Jeriko? Jehofa o laetše Baisiraele gore ba dire eng. Ge setšhaba se “se thomile go hlaba mokgoši o mogolo wa ntwa, morako wa phušoga,” gore go be bonolo go Baisiraele go hlasela motse woo. (Josh. 6:20) Ba ile ba fenya bjang Baamore? “Jehofa a ba nešetša sefako se segolo se etšwa magodimong . . . Bao ba bolailwego ke sefako e be e le ba bantši go feta bao ba bolailwego ke bana ba Isiraele ka tšhoša.”—Josh. 10:6-11.
Lehono, Jehofa ga a lwele setšaba le ge e le sefe. Mmušo wa gagwe woo Kgoši ya wona e lego Jesu Kriste, “ga se karolo ya lefase le.” (Joh. 18:36) Go e na le moo, Sathane ke yena a nago le matla godimo ga mebušo ka moka ya batho. Tsela yeo lefase le lego le lebe ka yona, le bontšha dika tša gagwe tše mpe.—Luka 4:5, 6; 1 Joh. 5:19.
BAKRISTE BA THEREŠO BA DIRA KHUTŠO LE BA BANGWE
Ka ge re bone tsela yeo dilo di lego ka yona lehono e fapana kudu le ya Baisiraele ba kgale. Eupša diphapano tše ga se lebaka le nnoši leo le dirago gore re se ke ra ya ntweng. Go na le mabaka a mangwe. Ka mohlala, Modimo o boletše gore mehleng ya bofelo bao ba rutwago ke yena ba ‘ka se sa hlwa ba ithuta ntwa,’ e bile ba ka se e tsenele. (Jes. 2:2-4) Godimo ga moo, Kriste o itše barutiwa ba gagwe ga se “karolo ya lefase.” Ba ka se tšee karolo dipolotiking lefaseng le le hlakahlakanego.—Joh. 15:19.
Kriste o ile a laela balatedi ba gagwe gape gore ba dire go feta moo. O ba laetše gore ba pheme go dira dilo tšeo di feleletšago ka go boloka sekgopi, bogale le ntwa. (Mat. 5:21, 22) Le gona o laetše balatedi ba gagwe gore e be “badirakhutšo” le gore ba rate manaba a bona.—Mat. 5:9, 44.
Rena re ka dira se bjang? Re ka ba re sa rate go ya dintweng, eupša na go na le motho yo re sa kwanego le yena ka phuthegong? A re duleng re leka ka thata gore re tloše maikwelo le ge e le afe a go swana le a ka dipelong tša rena.—Jak. 4:1, 11.
Ga re ye dintweng tša ditšhaba, go e na le moo, re leka ka thata gore re dire khutšo le go ratana. (Joh. 13:34, 35) Eka re ka dula re sa tšee lehlakore go fihla letšatšing leo Jehofa a tlago go fedišetša ntwa sa ruri.—Ps. 46:9.
a Ka dinako tše dingwe meloko ya Baisiraele e be e elwa seng sa bona, eupša dintwa tše di be di nyamiša Jehofa. (1 Dikg. 12:24) Ka dinako tše dingwe o be a dumelela dintwa tše ka gobane meloko e mengwe e be e mo hlanogetše goba e dirile dibe.—Baa. 20:3-35; 2 Dikor. 13:3-18; 25:14-22; 28:1-8.
You May Also Like
DIPOTŠIŠO TŠEO DI BOTŠIŠWAGO KUDU
Ke ka Baka La’ng Dihlatse tša Jehofa di sa ye Ntweng?
Dihlatse tša Jehofa di tsebja lefaseng ka bophara gore di gana go ya ntweng. Ithute lebaka leo re dirago se ka lona.
