1. Ke ka baka la’ng go thaba go ithekgile ka “dilo tša moya?”

 LETHABO la kgonthe ga se go no thaba ka nakonyana feela gomme ka morago wa se sa thaba. Lethabo la kgonthe ke la go ya go ile. Re ra bjang? Jesu o ile a hlalosa thutong ya gagwe ya thabeng gore: “Go thaba bao ba lemogago gore ba nyaka dilo tša moya.” (Mat. 5:3) Jesu o be a tseba gore batho ba bopetšwe gore ba nyake go tseba le go hlankela Mmopi wa bona, Jehofa Modimo. Le gona ka ge Jehofa e le “Modimo yo a thabilego,” bao ba mo hlankelago ba ka thaba.—1 Tim. 1:11.

2-3. (a) Go ya ka Jesu ke bomang ba bangwe bao ba ka thabago? (b) Re tlo ithuta ka eng sehlogong se, gona ke ka baka la’ng go le bohlokwa?

² Na re ka thaba feela ge re se na mathata? Aowa. Jesu o ile a bolela selo se sengwe seo se makatšago thutong ya gagwe. “Bao ba kwelego bohloko” ka baka la dibe tšeo ba di dirilego goba mathata a mangwe a magolo maphelong a bona, le bona ba ka thaba. Jesu o ile a bolela se se swanago le ka bao ba “tlaišeditšwego toko” goba bao ba ‘gobošwago’ ka baka la go ba balatedi ba gagwe. (Mat. 5:4, 10, 11) Eupša go ka kgonega bjang gore motho a be le lethabo la kgonthe, le ge a le ka gare ga maemo a?

³ Jesu o be a ruta gore lethabo ga le tlišwe ke go se be le mathata eupša le tlišwa ke go batamela kgauswi le Modimo. (Jak. 4:8) Re ka dira seo bjang? Sehlogong se re tlo ithuta ka megato e meraro yeo e tlago go re thuša gore re be le lethabo la kgonthe.

4. Mogato wa mathomo wa go hwetša lethabo la kgonthe ke ofe? (Psalme 1:1-3)

⁴ MOGATO 1: E le gore re thabe e le ka kgonthe, re swanetše  go ja dijo tša moya. Batho le diphoofolo ba hloka dijo. Eupša ke batho feela bao ba ka jago dijo tša moya. E bile ba a di hloka. Ke ka lebaka leo Jesu a ilego a re: “Motho a ka se phele ka senkgwa feela, eupša o tla phela le ka polelo e nngwe le e nngwe e tšwago molomong wa Jehofa.” (Mat. 4:4) Ka gona letšatši ga se la swanela go feta re se ra bala Lentšu la Modimo le bohlokwa e lego Beibele. Mopsalme o itše: ‘Go thaba motho yo a kgahlwago ke molao wa Jehofa gomme a o bala mosegare le bošego.’—Bala Psalme 1:1-3.

5-6. (a) Re ka ithuta’ng ka Beibeleng? (b) Go bala Beibele go ka re thuša ka ditsela dife?

⁵ Ka ge Jehofa a re rata, o re file tsebišo e bohlokwa ka Beibeleng ya kamoo re ka bago le lethabo la kgonthe. Re ithuta gore morero wa gagwe ka bophelo bja rena ke ofe. Re ithuta kamoo re ka mmatamelago ka gona le seo re swanetšego go se dira gore a re lebalele dibe tša rena. Gape re ithuta le ka kholofelo e botse yeo a re tshepišago yona ka bokamoso. (Jer. 29:11) Ditherešo tše tšeo re ithutago tšona ka Beibeleng di tlatša dipelo tša rena ka lethabo!

⁶ Ka ge re tseba, Beibele e re nea dikeletšo tšeo di re holago letšatši le letšatši. Ge re latela dikeletšo tšeo re ka hwetša lethabo. Nako e nngwe le e nngwe ge o nyamišitšwe ke mathata a bophelo, tšea nako o bala Lentšu la Jehofa le go naganišiša ka lona. Jesu o itše: “Go thaba bao ba kwago lentšu la Modimo gomme ba le boloka!”—Luka 11:28.

7. O ka bala bjang Beibele ka tsela yeo e tlago go go hola kudu?

⁷ Ge o bala Lentšu la Modimo, tšea nako o naganišiša ka seo o se balalago. Ka mohlala, na o kile wa diragalelwa ke se? Motho yo  mongwe o go apeela dijo tše o di ratago. Eupša ka ge o le lebelong goba o nagana ka se sengwe o no kwametša o se wa kwa le tatso ya dijo tšeo. Ge o fetša go ja, o lemoga gore o jele ka lebelo gomme o duma okare o ka be o ile wa iketlela tatso ya dijo tšeo. Ka mo go swanago, na o ile wa bala Beibele ka lebelo gomme wa palelwa ke go lemoga molaetša wa se o ithutago sona? Tšea nako o bala Lentšu la Modimo, bona ka leihlo la kgopolo ditiragalo tšeo, nagana ka medumo le mantšu gomme o naganišiše ka seo o se balago. Ge o dira seo, o tlo thaba.

8. “Mohlanka yo a botegago le wa temogo” o phethagatša bjang boikarabelo bja gagwe? (Bona le mongwalo wa tlase.)

⁸ Jesu o kgethile “mohlanka yo a botegago le wa temogo” gore a re nee dijo ka nako e swanetšego. Le gona mohlanka yoo o re fepa gabotse moyeng. b (Mat. 24:45) Se sengwe le se sengwe seo mohlanka yo a botegago a re neago sona se theilwe Mangwalong a buduletšwego. (1 Bathes. 2:13) Dijo tšeo tša moya di re thuša go tseba ka tsela yeo Jehofa a naganago ka yona, bjalo ka ge e bontšhwa ka Beibeleng. Ke ka baka leo re balago Morokami le Phafoga! le dihlogo tše dingwe tšeo di lego go jw.org/nso. Re lokišetša diboka tša gare ga beke le mafelobekeng le go bogela lenaneo la Kgašo ya JW ge e ba le le gona. Ge e ba re kgonthišetša gore re bala Beibele ka mehla, re tlo kgona go tšea mogato wa bobedi wo o tlago go re thuša gore re dule re thabile.

9. Mogato wa bobedi wo o ka re thušago gore re hwetše lethabo la kgonthe ke ofe?

⁹ MOGATO 2: Gore re be le lethabo la kgonthe re swanetše go phela go ya ka ditekanyetšo tša Jehofa. Mopsalme o ngwadile gore: “Go thaba yo mongwe le yo mongwe yo a boifago Jehofa, Yo a sepelago ditseleng tša gagwe.” (Ps. 128:1) Go boifa Jehofa go bolela gore re mo hlompha mo e lego gore re phema go dira selo le ge e le sefe seo se sa mo kgahlišego. (Die. 16:6) Ka gona re dula re nyaka go dumelelana le ditekanyetšo tša Modimo tša se se lokilego le se se sa lokago ka ge di hlaloswa ka Beibeleng. (2 Bakor. 7:1) Re tlo thaba ge re dira dilo tšeo Jehofa a di ratago gomme re phema tšeo a di hloilego.—Ps. 37:27; 97:10; Baroma 12:9.

10. Go ya ka Baroma 12:2, re na le boikarabelo bofe?

¹⁰ Bala Baroma 12:2. Motho a ka tseba gore Jehofa ke yena a nago le tokelo ya go re beela seo se lokilego le seo se sa lokago, eupša o swanetše go latela seo Jehofa a se bolelago. Ka mohlala, motho a ka tseba gore mmušo ke wona o swanetšego go bea melao ya tsela. Eupša a ka no ba a sa nyake go e latela. Ka gona, a ka no otlela go feta lebelo leo le beilwego. Re bontšha ka ditiro tša rena gore re tloga re dumela gore melao ya Jehofa ya seo se lokilego le seo se sa lokago ke ya maleba. (Die. 12:28) Dafida o be a ikwa ka tsela yeo, o ile a bolela ka Jehofa gore: “Wena o . . . ntsebiša tsela ya bophelo. Sefahlego sa gago se sepedišana le go thaba ka botlalo; ka seatleng sa gago sa le letona go bose ka mo go sa felego.”—Ps. 16:11.

11-12. (a) Ke’ng seo re swanetšego go se hlokomela ge re tshwenyegile goba re nyamile? (b) Mantšu ao a lego go Bafilipi 4:8 a ka re thuša bjang go kgetha boithabišo?

¹¹ Ge re ikwa re nyamile goba re fedile matla, re ka hloka selo seo se tlago go re thuša gore re se ke ra belaela ka mathata a rena. Seo se a kwešišega eupša re swanetše go hlokomela gore re se ke ra dira dilo tšeo Jehofa a di hloilego.—Baef. 5:10-12, 15-17.

 ¹² Lengwalong la gagwe leo le yago go Bafilipi, moapostola Paulo o ile a kgopela Bakriste gore ba tšwele pele ba nagana ka dilo tšeo di “lokilego . . . tše di sekilego, . . . tše di rategago, . . . [le] tša bokwala.” (Bala Bafilipi 4:8.) Le ge Paulo a be a sa ngwale ka boithabišo eupša seo a se ngwadilego se swanetše go šušumetša tsela yeo re kgethago boithabišo ka yona. Leka se: Kae le kae mo lentšu “dilo” le tšwelelago gona, legatong la lona bea mantšu a, “dikoša,” “dimubi,” “dipuku,” goba “dipapadi tša bidio.” Go dira se go ka re thuša go bona dilo tšeo di amogelegago go Jehofa le tšeo di sa amogelegego. Re nyaka go latela ditekanyetšo tše di phagamego tša Jehofa. (Ps. 119:1-3) Ka ge re tla be re na le letswalo le le hlwekilego, re tlo kgona go tšea mogato wa boraro wo o tlago go re thuša gore re be lethabo la kgonthe.—Dit. 23:1.

13. Mogato wa boraro wo o ka dirago gore re be le lethabo la kgonthe ke ofe? (Johane 4:23, 24)

¹³ MOGATO 3: Dira gore go hlankela Jehofa go tle pele bophelong bja gago. Ka ge Jehofa e le Mmopi wa rena, re swanetše go mo hlankela! (Kut. 4:11; 14:6, 7) Ka gona re swanetše go mo hlankela ka tsela yeo a e amogelago, “ka moya le ka therešo.” (Bala Johane 4:23, 24.) Re nyaka gore moya wa Modimo o re hlahle gore re hlankele Modimo go ya le ka ditherešo tšeo di lego ka Lentšung la gagwe. Go hlankela Modimo go tla pele maphelong a rena le ge re dula dinageng tšeo modiro wa rena o thibetšwego. Gona bjale, bana babo rena le dikgaetšedi ba go feta 100 ba golegilwe ka baka la ge e le Dihlatse tša Jehofa. c Lega go le bjalo, ba dira sohle se ba ka se kgonago ba thabile gore ba rapele, ba ithute le go botša ba bangwe ka Modimo le Mmušo wa gagwe! Ge e ba re gobošwa goba re tlaišwa re ka thaba ka gobane re tseba gore Jehofa o na le rena le gona o tlo re putsa.—Jak. 1:12; 1 Pet. 4:14.

14. Ngwanabo rena wa mofsa kua Tajikistan o ile a diragalelwa ke’ng gona ka baka la’ng?

¹⁴ Le ge bana babo rena le dikgaetšedi ba ile ba kopana le mathata eupša ka baka la go latela megato ye e meraro yeo re boletšego ka yona, ba ile ba ba le lethabo la kgonthe. Bona se se ilego sa diragalela ngwanabo rena wa mengwaga e 19 yo a bitšwago Jovidon Bobojonov, wa go tšwa Tajikistan, ka go gana go tsenela bošole. Ka di 4 tša October 2019, ba ile ba mo ntšha ka legaeng la gagwe gomme ba mo iša kgolegong ka dikgwedi tše dintšinyana gomme ba mo swara bjalo ka lehodu. Ka ge ba ile ba mo swara ka go hloka toka, dinaga tše dingwe di ile tša tseba ka seo. Go ile gwa begwa gore o be a bethwa ka baka la ge ba be ba leka go mo gatelela gore a tsenele bošole. Ka morago ga moo o ile a bonwa molato ke moka a romelwa kampeng ya tlaišo go fihla ge mopresidente a mo lebalela ke moka a laela gore a lokollwe. Nakong yeo ka moka, Jovidon o ile a dula a botega. Bjang? Ka go dula a etiša dilo tša moya pele.

15. Jovidon o be a ithuta ka Jehofa bjang ge a be a le kgolegong?

¹⁵ Ge Jovidon a be a le kgolegong, o be a ithuta ka Jehofa le ge a be a se na Beibele goba dikgatišo tša rena. O be a dira seo bjang? Bana babo rena le dikgaetšedi ba kgaufsi le moo a bego a golegilwe gona ba be ba mo išetša dijo ke moka ba ngwala temana ya letšatši godimo ga mokotlana wa dijo.  Ka baka la se o be a kgona go bala Beibele letšatši le lengwe le le lengwe ka gona a naganišiša ka seo a se badilego. Ka morago ga ge a lokolotšwe kgolegong o ile a eletša bao ba sego ba tšwa ba kopana le mathata a magolo gore: “Go bohlokwa gore le diriše tokologo ya lena ka mo go tletšego go ithuta ka Jehofa le go bala Beibele le dikgatišo tše dingwe.”

16. Jovidon o be a dula a nagana ka eng?

¹⁶ Ngwanabo rena o be a phela ka melao ya Jehofa. Go e na le gore a nagane ka dilo tše di sa lokago le go amega dilong tše mpe, o be a dula a nagana ka dilo tšeo Jehofa a di lebelelago di le bohlokwa. Jovidon o be a thabišwa ke dilo tše dibotse tšeo Modimo a di bopilego. Mesong e mengwe le e mengwe o be a tsoga a e kwa medumo ya dinonyana. Bošego o be a lebelela ngwedi le dinaledi. O itše: “Dimpho tše tše di tšwago go Jehofa di be di dira gore ke dule ke thabile e bile di nkgothatša.” Ge re leboga dijo tša moya le tša nama tšeo Jehofa a re fago tšona, re thaba kudu gomme lethabo leo le ka re thuša gore re kgotlelele.

17. Mantšu ao a lego go 1 Petro 1:6, 7 a ka thuša bjang motho yo a ikhwetšago a le boemong bjo bo swanago le bjo Jovidon a bilego go bjona?

¹⁷ Jovidon o be a etiša go hlankela Jehofa  pele. O be a tseba bohlokwa bja go dula a botegela Modimo wa therešo. Jesu o itše: “Ke Jehofa Modimo wa gago yo o swanetšego go mo rapela, e bile ke yena a nnoši yo o swanetšego go mo direla tirelo e kgethwa.” (Luka 4:8) Mašole a be a nyaka gore Jovidon a tlogele go ba yo mongwe wa Dihlatse tša Jehofa. Eupša o be a dula a rapela go tšwa pelong bošego le mosegare a kgopela Jehofa gore a mo thuše gore a dule a mmotegela. Le ge Jovidon a be a sa swarwe gabotse, o ile a dula a botegela Jehofa. Ga bjale o thabile ka ge a na le tumelo yeo e ilego ya lekwa, yeo a bego a sena yona pele a eya kgolegong.—Bala 1 Petro 1:6, 7.

18. Re ka dira’ng gore re dule re thabile?

¹⁸ Jehofa o tseba seo re se hlokago gore re be le lethabo la kgonthe. Ge o ka latela megato e meraro yeo e dirago gore o be le lethabo la kgonthe, o tlo dula o thabile le ge o na le mathata. Gomme le wena o tlo kgona gore: “Go thaba batho bao Modimo wa bona e lego Jehofa!”—Psalme 144:15.