Bana babo rena ba Bethele ba ile ba fetša ngwaga ba aga seteišene sa radio sa WBBR kua Staten Island, New York City. Ka morago ga go kgora le go rema mehlare, ba ile ba aga moago woo bašomi ba tlago go dula go ona le go aga moago woo ba tlago go o dirišetša go bea dilo tša go šoma. Ka morago ga gore bana babo rena ba fetše go aga ba ile ba thoma go beakanya “seteišene sa radio.” Eupša ba be ba na le mathatanyana ao ba bego ba swanetše gore ba a lokiše.

Go be go se bonolo gore bana babo rena ba hlome eriele ya seteišene seo. Go be go nyakega eriele ya botelele bja dimithara tše 91 yeo e bego e tlo ba godimo ga dikota tše pedi tša botelele bja dimithara tše 61. Ge ba be ba sa thoma ba ile ba palelwa. Mafelelong ba ile ba kgona ka morago ga gore ba tshepe Jehofa. Ngwanabo rena Calvin Prosser, yo a bego a šoma moo o ile a re: “Ge nkabe re kgonne dilo tšeo ka moka nakong ya ge re sa thoma, re be re tlo ipetha sefega ke moka ra re, ‘re kgonne dilo tše ka moka ka matla a rena!’” Bana babo rena ba ile ba leboga Jehofa ka mošomo wo ba ilego ba kgona go o dira. Eupša dikgolo di be di sa etla.

Ka nako yeo, radio e be e sa le selo se seswa gomme go be go se bonolo go hwetša dilo tša go šoma ka yona. Bana babo rena ba ile ba hwetša metšhene e mengwe yeo motho yo mongwe a bego a e dirile. Go ena le gore ba reke maekrofouno, ba ile ba diriša wo o bego o hwetšwa ka gare ga founo. Bošegong bjo bongwe ka February, bana babo rena ba ile ba nyaka go bona ge e ba radio yeo e be e šoma. Ba be ba hloka lenaneo leo ba ka le gašago, ka gona, bana babo rena ba ile ba kgetha go opela dikopelo tša Mmušo. Ngwanabo rena Ernest Lowe o gopola gore ge bana babo rena ba be ba sa  opela, ba ile ba hwetša mogala go tšwa go Moahlodi Rutherford, b yo a bego a ba theeditše radiong ya gagwe a le Brooklyn.

Ngwanabo rena Rutherford o ile a re go bona: “Tlogelang seo le se dirago, le kwagala okare le dikatse!” Bana babo rena ba ile ba lewa ke dihlong gomme ba tima metšhene, eupša ba be ba kgodišegile gore ba tlo kgona go thoma go gaša.

Ka di-24 tša February, 1924, bana babo rena ba ile ba gaša la mathomo gomme Ngwanabo rena Rutherford a hlalosa gore radio ye e tlo ba thuša go dira modiro woo “Kgoši ya bona Jesu Kriste a ba neilego ona.” A hlalosa le gore morero o mogolo wa seteišene se “ke go thuša batho gore ba kwešiše molaetša wa Beibele, le go kwešiša seo se bolelwago ke mehla yeo ba phelago go yona.”

Lenaneo leo la mathomo le ile la sepela botse kudu. WBBR e ile ya dirišetšwa go phatlalatša ditaba tše dibotse ka mengwaga e 33.

Ka July 1924, Barutwana ba Beibele ba ile ba ba le kopano kua Columbus, Ohio. Batho ba go tšwa lefaseng ka moka ba ile ba tla kopanong yeo ke moka ba theetša dipolelo ka se-Arabic, Seisemane, Sefora, Sejeremane, Segerika, se-Hungary, Setaliana, se-Lithuania, se-Polish, se-Russia, maleme a Scandinavia, le se-Ukrain. Dikarolo tše dingwe tša lenaneo leo di ile tša gašwa radiong e bile gwa dirwa le dithulaganyo tša gore Ohio State Journal e be le dipego tša letšatši le lengwe la kopano.

Ka Labone la di-24 tša July, batho ba fetago ba 5 000 bao ba bego ba tlile kopanong ba ile ba tšea karolo tšhemong. Ba ile ba sepediša dipuku tše e ka bago tše 30 000 le go thoma dithuto tše dintšhi tša Beibele. Morokami wa September 1 1924, o ile wa bolela gore “ye e bile karolo e kgahlišago kudu ya kopano.”

Ka Labohlano la di-25 tša July, ge Ngwanabo rena Rutherford a be a nea polelo, o hlalositše gore re swanetše go ganetšana le dithuto tša maaka. Re swanetše go bontšha sebete ge re dutše re ganetšana le dithuto tša maaka. O boletše gore baetapele ba dipolotiki, ba bodumedi le bo rakgwebo, ba “thibela batho go ithuta ka Mmušo wa Modimo, e lego mmušo woo a tlago go o diriša go šegofatša batho.” O ile a oketša ka gore “baetapele bao ba thekga mmušo wa Maisemane le Maamerika e bile ba bolela gore ke ona Modimo a o dirišago go buša lefase.” Barutwana ba Beibele ba be ba  swanetše gore ba be le sebete gore ba kgone go bolela ka seo Ngwanabo rena Rutherford a bego a sa tšwa go se bolela.

Ge Morokami o be o bolela ka taba yeo o itše: “Bana babo rena ba tlogile moo ba na le mafolofolo a go bolela ditaba tše dibotse . . . , ba na le sebete sa go dira bjalo le ge ba ka ganetšwa.” Ngwanabo rena Leo Claus, yo a bego a le gona kopanong yeo, o itše: “Re tlogile moo re na le mafolofolo e bile re fela pelo ya go bolela molaetša woo.”

Ka October, Barutwana ba Beibele ba ile ba sepediša dipampišana tše dintšhi kudu tšeo di bego di na le molaetša woo Ngwanabo rena Rutherford a ilego a bolela ka ona polelong ya gagwe. Kua toropong e nyenyane ya Cleveland, Oklahoma, Frank Johnson, o ile a fetša go sepediša dipampišana tša gagwe ka pela ke moka a fetša metsotso e 20 a emetše bana babo rena bao ba bego ba tlo mo lata. Ngwanabo rena o be a swanetše go khuta ka gobane go be go na le batho bao ba mo nyakago. Batho bao ba be ba galefišitšwe ke molaetša woo a bego a o bolela. Ngwanabo rena Johnson o ile a khuta ka kerekeng. O ile a hwetša ka kerekeng go se na motho ke moka a bea dipampišana tšeo setulong se sengwe le se sengwe. O ile a tšwa kamoo kerekeng ka pela. Ka ge a be a sa na le nako, o ile a ya dikerekeng tše dingwe tše pedi le gona a tlogela dipampišana ditulong.

Frank o ile a kitimela moo bana babo rena ba bego ba swanetše go mo tšea gona. O ile a khuta seteišeneng sa go tšhela peterolo e bile o be a le šedi. Banna bao ba bego ba mo nyaka ba ile ba feta moo a bego a khutile gona ba se mmone. Bana babo rena ba ile ba tla ba tšea Frank moo a bego a khutile gona gomme ba tloga le yena.

Ngwanabo rena yo mongwe o ile a bolela gore, “ge re be re e tšwa ka toropo, re ile ra feta dikereke tše tharo. Mo pele ga tšona go be go eme batho ba e ka bago ba 50. Ba bangwe ba bona ba be ba bala dipampišana mola ba bangwe ba be ba di swaretše godimo gore moruti a di bone. Re fetile moo ka pela pele ba ka re bona! Re leboga Modimo gore o ile a re thuša gore re sepediše molaetša woo ntle le gore bao ba lwantšhanago le Mmušo wa gagwe ba re sware.”

Dinageng tše dingwe, barutwana ba Beibele ba be ba bolela ditaba tše dibotse ka sebete. Kua leboa la France, Ngwanabo rena Józef Krett, o ile a botša batho bao ba šomago maeneng ditaba tše dibotse bao ba bego ba etšwa Poland. O be a abetšwe go nea polelo yeo e nago le sehlogo seo se rego “Bahu ba tlo Tsošwa e se Kgale.” Ge bana babo rena ba be ba mema batho, moruti yo mongwe o ile a kgothaletša balatedi ba gagwe gore ba se ke ba ya. Batho bao ba ile ba se mo theetše. Batho ba fetago ba 5 000 ba ile ba theetša polelo yeo, go akaretša le yena moruti yoo! Ngwanabo rena Krett o ile a kgopela moruti gore a tle a boledišane le yena ka seo a se dumelago eupša moruti yoo o ile a gana. Ngwanabo rena Krett o ile a sepediša dikgatišo ka moka tšeo a bego a di swere, a ba a bontšha gore batho bao a bego a bolela le bona ke kgale ba nyoretšwe Lentšu la Modimo.—Amose 8:11.

Kua Afrika, Ngwanabo rena Claude Brown, o ile a bolela ditaba tše dibotse kua Gold Coast, yeo ga bjale e tsebjago e le Ghana. Dipolelo tša gagwe le dikgatišo tšeo a bego a di sepediša, di thušitše batho ba nageng yeo gore ba hwetše ditaba tše dibotse ka pela. John Blankson, yo a bego a ithutela mošomo wa go nea batho dihlare, o ile a ba gona go e nngwe ya dipolelo tša Ngwanabo rena Brown. O ile a lemoga ka pelapela gore o be e a hweditše therešo. John o re: “Therešo yeo e ile ya dira gore  ke thabe kudu gomme ka thoma go bolela ka yona sekolong.”

Ka letšatši le lengwe, John o ile a etela kereke ya Anglican gore a botšiše moruti ka thuto ya Boraro bjo tee yeo ga bjale a bego a tseba gore ga se thuto yeo e tšwago mangwalong. Moruti yoo o ile a mo raka a mo hlabetše mašata a re: “Ga o Mokriste; o ngwana wa Diabolo. Tšwaa ka mo!”

Ge John a fihla gae, o ile a ngwalela moruti lengwalo a mo mema gore ba tle ba boledišane ka thuto yeo ya Boraro bjo tee ba le gare ga batho. Moruti yoo o ile a botša John gore a ye ofising ya Hlogo ya sekolo. Hlogo ya sekolo e ile ya mmotšiša ge e ba ka nnete a ngwaletše moruti lengwalo.

John o ile a re: “Ee ke mo ngwaletše.”

Hlogo ya sekolo e ile ya botša John gore a ngwale lengwalo la go kgopela tshwarelo. John o ile a ngwala gore:

“Mohlomphegi, morutiši wa ka o nkgopetše gore ke go ngwalele lengwalo la go kgopela tshwarelo gomme ke ikemišeditše go dira bjalo ge e ba o ka dumela gore o ruta dithuto tša maaka.”

Hlogo ya sekolo e ile ya makala, gomme ya mmotšiša gore “monna, o ngwadile tšona tše?”

O ile a araba ka gore, “ee mohlomphegi, go bjalo.”

Hlogo ya sekolo e ile ya mmotša gore “re tlo go raka. O ka se bolele le moruti wa kereke ya mmušo ka tsela ye ke moka wa nyaka go tšwela pele o tsena sekolo sa mmušo.”

John o ile a re: “Eupša mohlomphegi, . . . Akere ge le re ruta gomme re sa kwešiše, re dumeletšwe go botšiša dipotšišo?”

Hlogo ya sekolo ya re: “O nepile.”

John a re: “Mohlomphegi, ke sona seo se diragetšego. Monna yola o be a re ruta Beibele gomme ka mmotšiša potšišo. Ke ka baka la’ng ke swanetše go mo kgopela tshwarelo mola e le yena a paletšwego ke go nkaraba?”

Blankson ga se a ka a rakwa e bile ga se a kgopela tshwarelo.

Ge Morokami o bolela ka seo se diragetšego ngwageng woo ka moka, o itše: “Re ka dumelelana la mantšu a Dafida ao a rego: ‘Wena o tla mpha matla a gore ke lwe.’ (Psalme 18:39) Ngwaga wo e bile wo o kgahlišago kudu ka gobane re bone letsogo la Morena . . . Mokriste yo mongwe le yo mongwe yo a kolobeditšwego. . . o ile a thabela go nea bohlatse.”

Ge ngwaga o eya mafelelong, bana babo rena ba ile ba nagana ka go ba le seteišene se sengwe sa radio. Mošomo wa go aga seteišene se sengwe o ile wa thoma kua kgauswi le Chicago. Seteišene seo se be se na le leswao la WORD. Nakong ye, ba be ba diriša metšhene yeo e nago le matla gore radio e kgone go fihlelela batho ba bantšhi bao ba lego kgole.

Ka ngwaga wa 1925, Jehofa o ile a thuša Barutwana ba Beibele gore ba kwešiše gabotse seo se bolelwago ke lengwalo la Kutullo kgaolo 12. Ba bangwe ba ile ba tlogela go hlankela Jehofa ka baka la kwešišo ye e mpsha. Eupša ba bantšhi ba ile ba thabela go kwešiša gore seo se diregago legodimong se kgoma bjang bahlanka ba Modimo bao ba lego mo lefaseng.