SEHLOGO SE ITHUTWAGO 40
KOPELO 30 Tate wa ka, Modimo wa ka le Mogwera wa ka
Jehofa “o Kgothatša Batho Bao Dipelo tša Bona di Kwelego Bohloko”
“O kgothatša batho bao dipelo tša bona di kwelego bohloko, a ba a tlema dintho tša bona.”—PS. 147:3.
SEO RE TLAGO GO ITHUTA SONA
Jehofa o na le taba le batho bao ba nyamilego kudu. Sehlogo se se tlo re bontšha kamoo a re kgothatšago ka gona ge re nyamile le go re thuša gore re kgone go kgothatša ba bangwe.
1. Jehofa o ikwa bjang ka bahlanka ba gagwe?
KE’NG SEO Jehofa a se bonago ge a lebelela bahlanka ba gagwe bao ba lego mo lefaseng? O kgona go bona ge re nyamile le ge re thabile. (Ps. 37:18) O thaba kudu ge a bona re dira sohle seo re ka se kgonago gore re mo hlankele go sa šetšwe mathata ao re a kgotleletšego! O tloga a ikemišeditše go re thekga le go re kgothatša.
2. Jehofa o kgothatša bjang batho bao dipelo tša bona di kwelego bohloko, gona seo se re kgothatša bjang?
2 Psalme 147:3 e re botša gore Jehofa o ‘tlema dintho tša batho’ bao ba kwelego bohloko. Temana ye, e re botša gore Jehofa o thuša batho bao ba nyamilego. Re swanetše go dira’ng gore re holwe ke ditsela tšeo Jehofa a re thušago ka tšona? Nagana ka mohlala wo. Ngaka e ka thuša motho yo a gobetšego gore a fole. Eupša e le gore motho yoo a kgone go fola, o swanetše go latela ditaelo tša ngaka. Sehlogong se, re tlo kwa gore Jehofa o re’ng go batho bao ba nyamilego le go kwa kamoo go diriša keletšo ya gagwe go re holago ka gona.
JEHOFA O RE GOPOTŠA GORE RE BOHLOKWA KUDU GO YENA
3. Ke ka baka la’ng batho ba bangwe ba ikwa ba se na mohola?
3 Re phela lefaseng leo batho ba bantšhi ba se nago lerato, e bile ka maswabi seo se dira gore ba bangwe ba ikwe ba se na mohola. Kgaetšedi yo a bitšwago Helen a o re: “Ke goletše ka lapeng leo le bego le se na lerato. Tate o be a re tlaiša e bile a dula a re botša gore ga re na mohola.” Mohlomongwe le wena go na le motho yo a sa go swarego gabotse, yo a dulago a go hlaba ka mantšu goba yo a dirago gore o ikwe o sa ratwe. Ge e ba go le bjalo, go ka ba thata go tshepa gore go na le motho yo a nago taba le wena.
4. Jehofa o re kgonthišetša ka’ng go Psalme 34:18?
4 Le ge batho ba bangwe ba ka se go sware gabotse, o ka kgodišega gore Jehofa o a go rata e bile o bohlokwa go yena. “Jehofa o kgauswi le bao ba tlaišegago.” (Bala Psalme 34:18.) Le ge o ka ikwa o ‘nyamile o šoro,’ gopola gore Jehofa o bone dika tša gago tše dibotse gomme a go gogela go yena. (Joh. 6:44) O dula a ikemišeditše go go thuša ka gobane o bohlokwa go yena.
5. Re ithuta’ng tseleng yeo Jesu a bego a swara batho bao ba bego ba nyatšwa ka yona?
5 Re ka ithuta ka dika tša Jehofa ka go naganišiša ka mohlala wa Jesu. Nakong ya ge Jesu a be a le mo lefaseng, o be a bontšha gore o na le taba le batho bao ba bego ba nyatšwa e bile a ba kwela bohloko. (Mat. 9:9-12) Ge mosadi yo mongwe yo a bego a nyaka go fola a kgoma seaparo sa Jesu gore a fole, Jesu o ile a mo kgothatša le go mo reta ka baka la tumelo ya gagwe. (Mar. 5:25-34) Jesu o be a dula a bonagatša dika tša Tatagwe. (Joh. 14:9) O ka kgodišega gore Jehofa o go lebelela o le bohlokwa, e bile o a tseba gore o na le dika tše dibotse tšeo di akaretšago tumelo. Le gona o a tseba gore o mo rata kudu.
6. Motho a ka dira’ng ge a ikwa a se na mohola?
6 O ka dira’ng ge e ba o ikwa o se na mohola? O ka bala ditemana tša Beibele tšeo di go kgonthišetšago gore o bohlokwa go Jehofa, gomme o naganišiše ka tšona. b (Ps. 94:19) Ge e ba o ile wa palelwa ke go fihlelela pakane e itšego, goba o nyamišwa ke gore ga o kgone go dira dilo tšeo batho ba bangwe ba di dirago, o se ke wa fela matla. Jehofa ga se a letela gore o dire dilo tšeo o ka se kgonego go di dira. (Ps. 103:13, 14) Ge e ba o ile wa tlaišwa nakong e fetilego, o se ke wa ipona molato ka gobane ga se phošo ya gago! Dula o gopola gore Jehofa o tlo ahlola bao ba tlaišago ba bangwe gomme a thuša bao ba tlaišwago. (1 Pet. 3:12) Sandra, yo a ilego a tlaišwa ge e be e sa le ngwana o re: “Ke dula ke kgopela Jehofa gore a nthuše go itebelela ka tsela yeo a ntebelelago ka yona.”
7. Re ka diriša bjang diphihlelo tša rena tša nakong e fetilego ge re dutše re hlankela Jehofa?
7 Dula o gopola gore Jehofa a ka go diriša go thuša batho ba bangwe. O go neile tokelo ya gore o be mošomigotee le yena mošomong wa go bolela ditaba tša dibotse. (1 Bakor. 3:9) Dilo tšeo di diragetšego bophelong bja gago di ka ba di go neile sebaka sa gore o kgone go kwela ba bangwe bohloko le go tseba gore ba ikwa bjang. O ka kgona go ba thuša. Helen, yo re boletšego ka yena pejana o ile hwetša thušo gomme gona bjale o kgona go thuša batho ba bangwe. O re: “Ke be ke ikwa ke se na mohola, eupša gona bjale Jehofa o dira gore ke thuše batho ba bangwe.” Helen o thabela go hlankela e le mmulamadibogo wa ka mehla.
JEHOFA O NYAKA RE AMOGELA GORE O A RE LEBALELA
8. Lengwalo la Jesaya 1:18 le re kgonthišetša ka’ng?
8 Bahlanka ba bangwe ba Jehofa ba a itshola ka baka la diphošo tšeo ba di dirilego nakong e fetilego, e ka ba pele goba ka morago ga ge ba kolobeditšwe. Eupša go bohlokwa go gopola gore Jehofa o re neile topollo ka ge a re rata kudu. Ruri o nyaka gore re amogele mpho yeo a re neilego yona. Jehofa o re kgonthišetša gore ka morago ga gore re ‘lokiše ditaba,’ c le yena, o lebala dibe tšeo re di dirilego. (Bala Jesaya 1:18.) Jehofa o tloga a re bontšha gore o a re rata ka go lebala dibe tša rena! Le gona go a thabiša go tseba gore ga a lebale dilo tše dibotse tšeo re di dirago.—Ps. 103:9, 12; Baheb. 6:10.
9. Ke ka baka la’ng re swanetše go nagana ka dilo tšeo di diregago gona bjale go ena le go dulela go nagana ka tša nakong e fetilego?
9 Ge e ba o fela o tshwenywa ke go nagana ka diphošo tšeo o di dirilego nakong e fetilego, dira sohle seo o ka se kgonago gore o nagane ka dilo tše dibotse tšeo di diregago gona bjale le tšeo di tlo diregago nakong e tlago. Nagana ka mohlala wa moapostola Paulo. O ile a itsholela gore o be a tlaiša Bakriste eupša o be a tseba gore Jehofa o mo lebaletše. (1 Tim. 1:12-15) Na o ile a dulela go nagana ka diphošo tšeo a ilego a di dira? Ga go pelaelo gore ga se a ka a nagana ka diphošo tšeo a di dirilego go swana le ge a se a ka a nagana ka dilo tšeo a bego a di dira nakong ya ge e be e le Mofarisei yo a hlomphegago. (Bafil. 3:4-8, 13-15) Go e na le moo, Paulo o ile a phetha bodiredi bja gagwe ka mafolofolo le go dula a nagana ka bokamoso. Le wena o ka se kgone go fetoša diphošo tšeo o di dirilego nakong e fetilego. Eupša o ka tumiša Jehofa ka dilo tšeo o di dirago gona bjale le go naganišiša ka dilo tšeo a tshepišitšego go di dira nakong e tlago.
10. Re ka dira’ng ge eba re ile ra kweša batho ba bangwe bohloko?
10 O ka ba o kwišwa bohloko ke dilo tšeo o di dirilego nakong e fetilego tšeo di kwešitšego batho ba bangwe bohloko. Ke’ng seo se ka go thušago? Dira sohle seo o ka se kgonago gore o lokiše ditaba, le gona ba botše gore o kgopela tshwarelo. (2 Bakor. 7:11) Kgopela Jehofa gore a thuše bao o ba kwešitšego bohloko. A ka thuša wena le bao o ba kwešitšego bohloko gore le kgone go tšwela pele le mo hlankela le gore le be le khutšo.
11. Re ithuta’ng mohlaleng wa moporofeta Jona? (Bona le seswantšho sa letlakala la ka ntle.)
11 Ithute diphošong tša gago gomme o ikemišetše go dumelela Jehofa a go diriša ka tsela yeo a nyakago ka yona. Nagana ka mohlala wa moporofeta Jona. Go e na le gore a ye Ninife moo Jehofa a mo romilego gona, o ile a tšhabela lefelong le lengwe. Jehofa o ile a mo phošolla, gomme Jona o ile a ithuta phošong ya gagwe. (Jona 1:1-4, 15-17; 2:7-10) Jehofa ga se a ka a mo swarela sekgopi. Modimo o ile a roma Jona gape gore a ye Ninife gomme lekgeng le o ile a mo kwa. Jona o ile a itshola ka baka la phošo yeo a e reilego nakong e fetilego eupša ga se a gana ge Jehofa a mo roma gape.—Jona 3:1-3.
Ka morago ga gore moporofeta Jona a tšwe ka gare ga mpa ya hlapi e kgolo, Jehofa o ile a mmotša gape gore a ye Ninife le gore a bolele molaetša wa gagwe (Bona serapa 11)
JEHOFA O RE KGOTHATŠA KA MOYA WA GAGWE O MOKGETHWA
12. Jehofa o re thuša bjang ge re nyamile goba ge motho yo re mo ratago a hlokofetše? (Bafilipi 4:6, 7)
12 Jehofa o diriša moya wa gagwe o mokgethwa go re kgothatša ge re ekwa bohloko goba ge motho yo re mo ratago a hlokofala. Nagana ka phihlelo ya ngwanabo rena Ron le mosadi wa gagwe Carol. Morwa wa bona o ile a ipolaya. Ba re: “Re ile ra kopana le mathata a mantšhi nakong e fetilego eupša bjo bo be bo a feta ka moka. Ka mehla re be re dula re rapela Jehofa, gomme mafelelong ra kgona go bona khutšo yeo go bolelwago go yona go Bafilipi 4:6, 7.” (Bala.) Ge e ba o lebeletšane le mathata, rapela Jehofa ka mehla gomme o mo ntšhetše sa mafahleng. (Ps. 86:3; 88:1) Dula o kgopela Jehofa gore a go tšhollele moya wa gagwe o mokgethwa. O tlo dula a go thuša.—Luka 11:9-13.
13. Moya o mokgethwa o re thuša bjang gore re dule re hlankela Jehofa ka go botega? (Baefeso 3:16)
13 Na o ile wa welwa ke mathata ao a go fetšago matla? Moya o mokgethwa o ka go thuša gore o tšwele pele o hlankela Jehofa ka go botega. (Bala Baefeso 3:16.) Nagana ka phihlelo ya kgaetšedi Flora. Yena le monna wa gagwe ba be ba hlankela e le baromiwa, ke moka monna wa gagwe a se sa botega gomme ba hlalana. O re: “Bohloko bjo ke ilego ka bo kwa bo ile bja mphetša matla. Ke ile ka kgopela Jehofa gore a nthuše ke kgone go kgotlelela. Jehofa o ile a nkgothatša gomme a nthuša gore ke kgone go kgotlelela le ge mathomong go be go bonagala nka se kgone go dira bjalo.” O lemogile gore Jehofa o mo thušitše gore a dule a mo tshepa le gore o tlo kgona go mo thuša ge a kopana le mathata. O oketša ka gore: “Mantšu ao a lego go Psalme 119:32 a nthušitše kudu. Mantšu ao a re: ‘Ke tla latela ditaelo tša gago ka pelo ka moka, ka gobane o nthuša gore ke di kwešiše.’”
14. Re ka dira’ng gore moya o mokgethwa o šome go rena?
14 O swanetše go dira’ng gore moya o mokgethwa o kgone go go thuša? Dira dilo tšeo di ka thušago moya wa Modimo gore o šome go wena. Dilo tšeo di akaretša goba gona dibokeng ka mehla le go ya tšhemong. Tlatša monagano wa gago ka dikgopolo tša Jehofa letšatši le lengwe le le lengwe. (Bafil. 4:8, 9) Ge o dutše o bala, naganišiša ka batho ba ka Beibeleng bao ba ilego ba kopana le mathata, ke moka o bone kamoo Jehofa a ilego a ba thuša ka gona gore ba kgone go kgotlelela. Sandra, yo re boletšego ka yena pejana o ile a kopana le mathata a mantšhi. O re: “Pego ya Josefa e tloga e nkgothatša kudu. Josefa ga se a ka a dumelela mathata ao a ilego a kopana le ona le go swarwa ka go hloka toka go senya segwera sa gagwe le Jehofa.”—Gen. 39:21-23.
JEHOFA O DIRIŠA BANA BABO RENA LE DIKGAETŠEDI GO RE KGOTHATŠA
15. Ke bomang bao ba ka re homotšago gona ba ka re thuša bjang? (Bona le seswantšho.)
15 Ge re kopana le mathata, bana babo rena e ka ba bona ba “tlogago ba [re] matlafatša.” (Bakol. 4:11) Bana babo rena le dikgaetšedi ba re bontšha kamoo Jehofa a re ratago ka gona. Ba ka re kgothatša ka go fetša nako le rena goba ba re theetša ge re ba botša ka dilo tšeo di re tshwenyago. Ba ka re kgothatša ka temana ya Beibele goba ba rapela le rena. d (Baroma. 15:4) Ka dinako tše dingwe, ngwanabo rena goba kgaetšedi a ka re gopotša kamoo Jehofa a lebelelago dilo ka gona gomme seo sa re thuša gore re kgotlelele. Bakriste gotee le rena ba ka re thuša ka dilo tšeo re di hlokago, go swana le go re nea dijo.
Bana babo rena bao ba godilego le ba botegago ba ka kgona go go homotša le go go thekga (Bona serapa 15)
16. Re ka dira’ng gore batho ba bangwe ba kgone go re thekga?
16 Ka dinako tše dingwe re ka swanelwa ke go kgopela batho ba bangwe thušo gore ba kgone go re thekga. Bana babo rena le dikgaetšedi ba a re rata e bile ba nyaka gore thuša. (Die. 17:17) Eupša ka dinako tše dingwe ba ka no se tsebe gore re ikwa bjang goba ke eng seo re se hlokago. (Die. 14:10) Ge eba o ikwa o nyamile, o se ke wa tšhaba go botša ba bangwe kamoo o ikwago ka gona. Ba botše gore ke eng seo se ka go thušago. O ka boledišana le mogolo o tee goba ba babedi bao o ikwago o lokologa ge o bolela le bona. Bokgaetšedi ba bangwe ba kgothatšwa ke go bolela le bokgaetšedi bao ba godilego.
17. Ke mathata a fe a mangwe ao a ka dirago gore re se ke ra hwetša kgothatšo go batho ba bangwe, gona re ka dira’ng gore seo se se ke sa direga?
17 O se ke wa fetša nako e ntšhi o nnoši. O ka no ikwa o sa nyake go ba gare ga batho ka ge o nyamile. Ka dinako tše dingwe, bana babo rena le dikgaetšedi ba ka no se go kwešiše goba ba se bolele le wena gabotse. (Jak. 3:2) O se ke wa dumelela dilo tša mohuta woo di go šitiša go hwetša kgothatšo yeo o e hlokago. Mogolo yo a bitšwago Gavin, yo a nago le kgateletšego ya monagano, o re: “Ke fela ke ikwa ke sa nyake go fetša nako le bagwera ba ka.” Lega go le bjalo, Gavin ga a lahlele toulo, e bile o ikwa a le kaone ka morago ga gore a kopane le batho ba bangwe. Kgaetšedi yo a bitšwago Amy o re: “Gantšhi ke palelwa ke go tshepa batho ka baka la dilo tšeo di ilego tša ntiragalela nakong e fetilego. Eupša ke ithuta go rata bana bešo le go ba tshepa go swana le kamoo Jehofa a ba tshepago ka gona. Ke a tseba gore ge ke dira bjalo ke thabiša Jehofa, e bile le nna se a nthabiša.”
DILO TŠEO JEHOFA A TSHEPIŠAGO GO RE DIRELA TŠONA DI KA RE KGOTHATŠA
18. Ke’ng seo se tlago go direga nakong e tlago, gona re swanetše go dira’ng gona bjale?
18 Re ka kgona go naganišiša ka dilo tšeo di tlo diregago nakong e tlago ka gobane re a tseba gore e se kgale Jehofa o tlo tloša dilo ka moka tšeo di re kwešago bohloko le go re nyamiša. (Kut. 21:3, 4) Go se kgale, dilo ka moka tšeo di re kwešago bohloko “di ka se sa rotoga pelong.” (Jes. 65:17) Le gona bjale re a bona gore Jehofa o a re thuša ge re tlaišega. Jehofa o re neile dilo tše dintšhi tšeo di re thušago le go re kgothatša, ka gona amogela dilo ka moka tšeo a go neago tšona. Le ka mohla o se ke wa belaela gore “o a [go] hlokomela.”—1 Pet. 5:7.
KOPELO 7 Jehofa ke Matla a Rena
a Maina a fetotšwe.
b Bona lepokisi leo le rego “ O Bohlokwa go Jehofa.”
c Gore re kgone “go lokiša ditaba” le Jehofa, re swanetše go bontšha gore re a itshola ka go mo kgopela gore a re lebalele dibe tša rena le go tlogela tsela yeo re ka bago re itshwere ka yona. Ge e ba re ka dira sebe se segolo, re swanetše go kgopela bagolo gore ba re thuše.—Jak. 5:14, 15.
