1, 2. (a) Batho ba lebeletšane le mathata a mohuta ofe lehono, gomme seo se feleletša ka eng? (b) Lentšu la Modimo le nea kholofelo efe go Jesaya 41:10, 13?

KGAETŠEDI yo e lego mmulamadibogo wa ka mehla yo a nyetšwego ke mogolo, o re: “Go sa šetšwe gore ke dula ke kgomaretše lenaneo le lebotse la dilo tša moya, ke tshwentšwe ke dipelaelo ka mengwaga e mentši. Seo se ntlhora boroko, se kgoma boemo bja ka bja tša maphelo le tsela yeo ke swarago ba bangwe ka yona. Ka dinako tše dingwe ke ikwa eka nka ineela ke moka ka re lefase bulega ke tsene.”

² Na o kgona go kwešiša maikwelo a kgaetšedi yoo? Ka manyami, go phela lefaseng le kgopo la Sathane go re tlišetša kgateletšo e kgolo, yeo e ka bakelago motho dipelaelo ke moka a ikwa a imetšwe. Seo se ka swana le sekepe seo se swerwego ke tshetledi gomme se sa kgone go ya pele. (Die. 12:25) Ke’ng seo se ka go dirago gore o ikwe ka tsela yeo? Go ka direga gore o leka go lebeletšana le go hwelwa ke motho yo o mo ratago, bolwetši bjo šoro, go hlokomela lapa la gago maemong a a thata a tša ikonomi goba o ka ba o lebeletšane le kganetšo. Ge nako e dutše e eya, go imelwa maikwelong go ka go fetša matla. Go ka ba gwa go tšeela lethabo. Eupša o ka kgodišega gore Modimo o ikemišeditše go go thuša.​—Bala Jesaya 41:10, 13.

3, 4. (a) Beibele e diriša bjang lentšu “diatla”? (b) Ke’ng seo se ka hlephišago diatla tša rena?

³ Gantši Beibele e diriša ditho tša mmele go swantšhetša dika  goba ditiro tše di sa swanego. Ka mohlala, e bolela ka seatla ka makga a makgolo. Go matlafatša diatla tša motho go ka bolela go kgothatšwa le go matlafaletšwa go dira selo se itšego. (1 Sam. 23:16; Esera 1:6) Se se ka bolela go ba le pono e botse le e bontšhago go ba le kholofelo ka bokamoso.

⁴ Ka dinako tše dingwe go hlephiša goba go rephiša diatla ka tsela ya seswantšhetšo go dirišitšwe go hlalosa motho yo a nyemilego moko, yo a nyamilego goba yo a se nago kholofelo. (2 Dikor. 15:7; Baheb. 12:12) Gantši motho yo a lego boemong bjoo o a ineela. O ka hwetša kae sebete seo se nyakegago ge e ba o lebane le maemo ao a go gateletšago goba ao a dirago gore o ikwe o imetšwe mmeleng, maikwelong goba gaešita le moyeng? O ka tutuetšwa le go matlafatšwa bjang gore o kgotlelele le go ba le lethabo?

5. (a) Re ka dira’ng ge mathata a tšwelela, eupša re swanetše go ikgopotša’ng? (b) Re tlo ahlaahla eng?

⁵ Bala Tsefanya 3:16, 17. Go e na le gore o boife goba o nyeme moko, mo go swantšhwago le go hlephiša diatla tša rena, Tatago rena yo lerato, e lego Jehofa, o re laletša gore re ‘lahlele dipelaelo tša rena ka moka go yena.’ (1 Pet. 5:7) Re ka homotšwa ke seo Modimo a se boditšego Baisiraele bao ba bego ba le bothopša gore ‘seatla sa gagwe se matla ga se se sekopana kudu mo se ka se kego sa phološa’ bahlanka ba gagwe bao ba botegago. (Jes. 59:1) Re tla ahlaahla mehlala e meraro e kgahlišago ya ka Beibeleng yeo e bontšhago gore Jehofa o rata go matlafatša batho ba gagwe e bile o kgona go ba thuša gore ba dire thato ya gagwe go sa šetšwe mathata ao go ka bonagalago go se bonolo go a fenya. Bona kamoo mehlala ye e ka go matlafatšago ka gona.

6, 7. Re ka ithuta dithuto dife tše bohlokwa tabeng ya go fenya ga Baisiraele Baamaleke?

⁶ Ka moragonyana ga gore Baisiraele ba lokollwe ka mohlolo bokgobeng kua Egipita, Baamaleke ba ile ba ba hlasela. E le ge a latela taelo ya Moshe, Joshua yo a nago le sebete o ile a eta Baisiraele pele ba ya ntweng. Ka yona nako yeo, Moshe o ile a tšea Arone le Huru ba ya thabaneng ya kgauswi moo ba bego ba kgona go bona ntwa. Na banna bao ba bararo ba be ba boifa go ya ntweng? Ga go bjalo le gatee!

⁷ Moshe o ile a tla le leano la gore ba fenye. O ile a dula a emišeditše diatla tša gagwe le lepara la Modimo wa therešo godimo. Jehofa o be a matlafatša diatla tša Baisiraele gore ba fenye Baamaleke, ge feela Moshe a be a dula a emišitše diatla le lepara. Lega go le bjalo, ge diatla tša Moshe di be di lapa gomme a di theošetša fase, Baamaleke ba be ba thoma go ba fenya. Ka go akgofa, Arone le Huru “ba ile ba [beela Moshe] leswika gomme a dula godimo ga lona; Arone le Huru ba thekga diatla tša gagwe, yo mongwe a le ka lehlakoreng le gomme yo mongwe a le ka go le lengwe, moo diatla tša gagwe di ilego tša dula di eme go fihlela letšatši le sobela.” Ruri Modimo o ile a thuša Baisiraele go fenya ntwa yeo.​—Ek. 17:8-13.

8. (a) Asa o ile a arabela bjang ge Baethiopia ba be ba tšhošetša Juda? (b) Re ka ekiša bjang tsela yeo Asa a bego a ithekgile ka Modimo?

⁸ Jehofa gape o bontšhitše gore seatla sa gagwe ga se se sekopana kudu le mehleng ya Kgoši Asa. Go bolelwa ka dintwa tše dintši ka Beibeleng. Eupša madira a mantši go feta a mangwe ka moka ao a kilego a kgoboketšwa ke a Tsera wa Moethiopia. O be a na le mašole a 1 000 000 ao a bego a na le phihlelo. Madira a Baethiopia a be a feta a Asa mo e nyakilego go ba gabedi. O ka akanya kamoo go ka bago go bile bonolo gore Asa a tshwenyege, a boife le go nyema moko moo go bego go ka feleletša ka gore a fenywe.  Go e na le gore a ikwe bjalo, gateetee Asa o ile a kgopela thušo go Jehofa. Go ya ka pono ya madira, go be go ka bonagala go ka se kgonege go fenya Baethiopia, eupša “go Modimo dilo tšohle di a kgonega.” (Mat. 19:26) Modimo o ile a bontšha matla a gagwe a magolo gomme “a fenya Baethiopia pele ga Asa” yoo “pelo ya [gagwe e ilego] ya dula e botegela Jehofa matšatšing ka moka a bophelo bja gagwe.”​—2 Dikor. 14:8-13; 1 Dikg. 15:14.

9. (a) Ke’ng seo se sa kago sa thibela Nehemia go aga merako ya Jerusalema lefsa? (b) Modimo o ile a arabela bjang thapelong ya Nehemia?

⁹ Akanya kamoo Nehemia a ka bago a ile a ikwa ka gona ge a be a eya Jerusalema. Motse o be o bonagala o sa šireletšega mola Bajuda ba gabo ba be ba nyemile moko kudu. Manaba a tšwago dinageng dišele a ile a tšhošetša Bajuda gore ba nyeme moko gomme ba tlogele go aga lefsa merako ya Jerusalema. Na Nehemia le yena o ile a dumelela gore boemo bjoo bo mo nyemiše moko? Aowa! Ka go swana le Asa, Moshe le bahlanka ba bangwe ba botegago ba Jehofa, Nehemia o be a šetše a thomile go ithekga ka Jehofa ka thapelo. Le nakong ye o ile a dira sona seo. Jehofa o ile a arabela ge Nehemia a kgopela thušo boemong bjo go bego go bonagala go se bonolo gore Bajuda ba fenye. Modimo o ile a diriša ‘matla a gagwe a magolo’ le ‘seatla sa gagwe se matla’ go matlafatša Bajuda. (Bala Nehemia 1:10; 2:17-20; 6:9.) Na o a dumela gore Jehofa o diriša ‘matla a gagwe a magolo’ le ‘seatla sa gagwe se matla’ go matlafatša bahlanka ba gagwe lehono?

10, 11. (a) Sathane o leka bjang go re nyemiša moko? (b) Jehofa o diriša’ng bakeng sa go re matlafatša? (c) O hotšwe bjang ke thuto le tlwaetšo ya pušo ya Modimo?

¹⁰ Re ka kgodišega gore Diabolo a ka se tsoge a hwile matwa tabeng ya go leka go kgaotša mediro ya rena ya Bokriste. O diriša maaka le ditšhošetšo tše di tšwago go mebušo, baetapele ba bodumedi le bahlanogi. Morero wa gagwe ke ofe? Ke go re fetša matla modirong wa go bolela ditaba tše dibotse tša Mmušo. Lega go le bjalo, Jehofa o kgona go re fa matla a diriša moya wa gagwe o mokgethwa e bile o ikemišeditše go dira bjalo. (1 Dikor. 29:12) Ke gabohlokwa gore re ithekge ka moya woo gore re kgone go lebeletšana le tlhohlo le ge e le efe yeo re e tlišetšwago ke Sathane le tshepedišo ya gagwe e kgopo. (Ps. 18:39; 1 Bakor. 10:13) Le gona, re ka leboga gore re na le Lentšu la Modimo, leo le tšweleditšwego ka moya o mokgethwa. E bile nagana ka dijo tša moya tšeo di theilwego Beibeleng tšeo re di hwetšago kgwedi le kgwedi. Mantšu ao a lego go Sakaria 8:9, 13 (bala) a ile a bolelwa nakong ya ge tempele ya kua Jerusalema e be e agwa lefsa. Le rena mantšu ao a ka re matlafatša kudu.

¹¹ Le gona re matlafatšwa ke thuto ya Modimo yeo re e hwetšago dibokeng tša rena tša Bokriste, dikopanong tše dinyenyane le tše dikgolo gotee le dikolong tša rena tša pušo ya Modimo. Tlwaetšo yeo e ka re thuša gore re hwetše tutuetšo e botse, re ipeele dipakane tša moya le go phethagatša boikarabelo bja rena bjo bogolo bja Bokriste. (Ps. 119:32) Na o fagahlela go matlafatšwa ke thuto ya mohuta woo?

12. Re ka dira’ng gore re dule re matlafetše moyeng?

¹² Jehofa o ile a thuša Baisiraele gore ba fenye Baamaleke le Baethiopia gomme a nea Nehemia le batho ba gabo matla a go phetha modiro wa go aga lefsa. Le rena Modimo o tla re nea matla a go emeletšana le kganetšo, go se thabele ga batho ditaba tše dibotse le dipelaelo e le gore re kgone go phetha modiro wa rena wa go bolela ditaba tše dibotse. (1 Pet. 5:10) Ga se ra letela gore Jehofa a re direle mehlolo. Go e na le moo, re swanetše go kgatha tema ya rena. Seo se akaretša go bala Lentšu la Modimo letšatši le letšatši, go lokišeletša le go ya dibokeng beke le beke, go fepa menagano le dipelo tša  rena ka thuto ya motho ka noši le borapedi bja lapa gotee le go ithekga ka Jehofa ka thapelo ka dinako tšohle. Anke le ka mohla re se ke ra dumelela dilo tše dingwe tšeo di phegelelwago gotee le mediro e mengwe di tsenatsenana le tsela yeo Jehofa a e dirišago go re matlafatša le go re kgothatša. Ge e ba o ikwa gore o fedile matla go e nngwe ya dikarolo tše, kgopela Modimo gore a go thuše. Ke moka bona kamoo moya wa gagwe o go ‘fago mafolofolo, a go neago kganyogo le matla a gore o dire dilo tšohle tšeo a di ratago.’ (Bafil. 2:13) Ka gona, o ka dira’ng gore o matlafatše ba bangwe?

13, 14. (a) Ngwanabo rena yo mongwe o ile a matlafatšwa bjang ka morago ga go hwelwa ke mosadi? (b) Re ka matlafatša ba bangwe ka ditsela dife?

¹³ Jehofa o re file borwarre bja lefase ka bophara bja barapedi bao ba nago le lerato bao ba ka re kgothatšago. Gopola gore moapostola Paulo o ngwadile gore: “Matlafatšang matsogo a lekelelago le matolo a fokolago, gomme le dule le lokiša ditsela bakeng sa dinao tša lena.” (Baheb. 12:12, 13) Ba bantši lekgolong la pele la nywaga ba ile ba matlafatšwa moyeng ka tsela yeo. Go bjalo le lehono. Ka morago ga gore ngwanabo rena yo mongwe a hwelwe ke mosadi le gore a lebeletšane le maemo a mangwe a kwešago bohloko, o itše: “Ke ithutile gore re ka se ikgethele diteko, gore di re wele neng goba gakae. Thapelo le thuto ya motho ka noši di ile tša nthuša gore ke se ke ka nyama kudu. Gape ke ile ka homotšwa kudu ke thekgo ya bana bešo le dikgaetšedi ba Bakriste. Ke lemogile bohlokwa bja go ba le tswalano e botse le Jehofa le pele mathata a ka tšwelela.”

¹⁴ Arone le Huru ba ile ba thekga matsogo a Moshe ka tsela ya kgonthe nakong ya ntwa. Ge e le rena, re ka tsoma ditsela tša go thekga le go thuša ba bangwe. Bomang? Bao ba lwantšhanago le ditlamorago tša botšofadi, go se phele gabotse mmeleng, go ganetšwa ke ba malapa a gabo bona, go lewa ke bodutu goba go hwelwa ke motho yo ba mo ratago. Le gona re ka matlafatša bafsa bao ba lebeletšanego le kgateletšo tabeng ya go dira sebe goba bao ba rego ba nyaka go atlega tshepedišong ye ya dilo, go sa šetšwe gore ke ditabeng tša thuto, tša ditšhelete goba mošomo wo ba ithutetšego wona. (1 Bathes. 3:1-3; 5:11, 14) Tsoma ditsela tša go bontšha ba bangwe gore o ba kgahlegela e le ka kgonthe Holong ya Mmušo, bodireding, ge le thabela dijo gotee goba ge le boledišana mogaleng.

15. Mantšu a mabotse a ka kgoma bjang Bakristegotee le rena?

¹⁵ Ka morago ga phenyo e kgolo ya Asa, moporofeta Asaria o ile a kgothatša Asa le setšhaba sa gagwe ka mantšu a rego: “Ebang le sebete gomme le se ke la hlephiša diatla tša lena, ka gobane modiro wa lena o na le moputso.” (2 Dikor. 15:7) Se se ile sa tutuetša Asa gore a dire diphetogo tše dintši e le gore a tsošološe borapedi bjo bo sekilego. Ka tsela e swanago, mantšu a gago a mabotse a ka kgoma ba bangwe kudu. Ka go re’alo o ka ba thuša gore ba hlankele Jehofa ka botlalo. (Die. 15:23) Le gona ge o le dibokeng, le ka mohla o se ke wa hlokomologa kamoo o ka kgomago ba bangwe kudu ka gona ka gore o emiše letsogo o nee ditlhaloso.

16. Go swana le Nehemia, bagolo ba ka matlafatša bjang diatla tša bao ba lego ka phuthegong? Nea mehlala ya kamoo badumedigotee le wena ba ilego ba go thuša ka gona.

¹⁶ Ka thekgo ya Jehofa, Nehemia le bao ba bego ba na le yena ba ile ba matlafatšwa gore ba šome. Ke moka ba ile ba fetša merako ya Jerusalema ka matšatši a 52 feela! (Neh. 2:18; 6:15, 16) Nehemia o be a sa okamele mošomo feela. Le yena o be a tsenya letsogo go ageng lefsa merako ya Jerusalema. (Neh. 5:16) Ka mo go swanago, bagolo ba bantši ba lerato ba kgonne go  ekiša Nehemia ka go thuša medirong ya go aga mafelo a pušo ya Modimo goba ka go hlwekiša le go hlokomela Diholo tša gabo bona tša Mmušo. Ba bile ba matlafatša diatla tšeo di fokolago tša bao dipelo tša bona di tshwenyegilego ka go šoma le bagoeledigotee le bona bodireding le ka go dira maeto a bodiši.​—Bala Jesaya 35:3, 4.

17, 18. Re ka kgodišega ka’ng ge re lebeletšane le mathata goba re tshwenyegile?

¹⁷ Go hlankela ka botee le bana babo rena le dikgaetšedi go kgothaletša botee. Go bile go aga segwera seo se swarelelago le go oketša kgodišego ya rena ka ditšhegofatšo tšeo di tlago tša Mmušong wa Modimo. Ge re dutše re matlafatša diatla tša ba bangwe, re ba thuša go lwa le maemo ao a nyamišago le go kgomarela pono e nepagetšego le ya go bontšha go ba le kholofelo ka bokamoso. Go feta moo, go direla ba bangwe seo go re thuša gore re dule re tsepamišitše dikgopolo tša rena dilong tša moya le go bona go ba ga kgonthe ga dilo tšeo Modimo a re boloketšego tšona. Ruri seo le rena se re matlafatša diatla.

¹⁸ Go bona kamoo Jehofa a ilego a thekga le go šireletša bahlanka ba gagwe ba botegago maemong a sa swanego nakong e fetilego go swanetše go matlafatša tumelo ya rena le go mmota lehono. Ka gona ge o lebeletšane le dikgateletšo le mathata, “o se ke wa nyema moko”! Go e na le moo, rapela Jehofa gomme o dumelele seatla sa gagwe se matla gore se go matlafatše le go go lebiša ditšhegofatšong tša Mmušo.​—Ps. 73:23, 24.