1, 2. Bafsa ba ka lebeletšana le kgateletšo efe, gona ba ka dira’ng gore ba kgone go lebeletšana le yona?

NGWANA yo mongwe wa kua Brithania o ile a botša kgaetšedi yo mongwe yo mofsa yo a tsenago sekolo le yena gore: “Ka mokgwa wo o lego bohlale ka gona, ga o swanelwe ke go dumela go Modimo.” Ngwanabo rena wa Jeremane o ngwadile gore: “Barutiši ba ka ba lebelela pego ya Beibele ya mabapi le tlholo e le nonwane. Ba e ganetša kudu moo barutwana ba feleletšago ba dumela thuto ya gore dilo di itirile.” Kgaetšedi yo mofsa wa Fora o itše: “Barutiši ba sekolong sa ka ba makatšwa ke gore go sa na le barutwana ba go dumela seo Beibele e se rutago.”

² Ka ge o le mofsa yo a hlankelago Jehofa goba yo a ithutago ka yena, na o kwa o gateletšega go dumela dithuto tšeo batho ba bantši ba di dumelago, tše bjalo ka thuto ya gore dilo di itirile, go e na le go dumela gore go na le Mmopi? Ge e ba go le bjalo, go na le dilo tšeo o ka di dirago go tiiša tumelo ya gago le go e boloka e tiile. Selo sa pele ke gore o diriše tlhaologanyo yeo Modimo a go filego yona, yeo e ‘tlago go go diša.’ E tla go šireletša go difilosofi tša lefase tšeo di ka senyago tumelo ya gago.​—Bala Diema 2:10-12.

3. Re tlo ahlaahla’ng sehlogong se?

 ³ Gore motho a be le tumelo ya kgonthe, o swanetše go ba le tsebo e nepagetšego ka Jehofa. (1 Tim. 2:4) Ka gona ge o dutše o ithuta Lentšu la Modimo le dikgatišo tša rena, o se ke wa no kga ka godimo. Diriša tlhaologanyo ya gago gore o ‘kwešiše’ seo o se balago. (Mat. 13:23) A re bone gore go dira seo go ka tiiša bjang tumelo ya gago go Modimo e le Mmopi le go dumela seo Beibele e se rutago, e lego ditaba tšeo di nago le “bohlatse bjo bo lego molaleng.”​—Baheb. 11:1.

4. Ke ka baka la’ng go nyakega tumelo gore motho a dumele go Modimo goba thutong ya gore dilo di itirile, gona re swanetše go dira’ng gore re fihlelele phetho ya maleba?

⁴ Na o kile wa kwa motho a re o dumela thuto ya gore dilo di itirile ka gobane e theilwe go bohlatse bja thutamahlale, eupša a re go dumela go Modimo go theilwe tumelong feela? Batho ba bantši ba na le pono ye. Eupša re swanetše go dula re gopola taba še: Go nyakega tumelo gore motho a dumele go Modimo goba go thuto ya gore dilo di itirile. Ke ka baka la’ng re re’alo? Ka gobane ga go na motho yo a kilego a bona Modimo goba a bona selo se bopša. (Joh. 1:18) E bile ga go na motho le o tee—​e ka ba rathutamahlale goba go se bjalo​—yo a kilego a bona sephedi se itšego se fetoga sephedi se sengwe. Ka mohlala, ga go na motho yo a kilego a bona tšhwene e fetoga motho. (Jobo 38:1, 4) Ka gona, ka moka ga rena re swanetše go hlahloba bohlatse bjo bo lego gona gomme re šomiše ditlhaologanyo tša rena go fihlelela diphetho tša maleba. Ge moapostola Paulo a be a bolela ka tlholo, o ngwadile gore: “Dika tša [Modimo] tše di sa bonagalego di bonwa gabotse go tloga tlholong ya lefase go ya pele, gobane di hlathwa ka dilo tšeo di dirilwego, ke gore matla a gagwe a neng le neng le Bomodimo bja gagwe, moo ba hlokago boitshwarelelo.”​—Baroma 1:20.

5. Mokgatlo o re thušitše bjang go diriša menagano ya rena?

⁵ “Go lemoga” ke go bona selo seo se sego molaleng goba seo se sa bonagalego kapela. (Baheb. 11:3) Ka gona, batho bao ba nago le temogo ba diriša menagano ya bona, e sego feela mahlo le ditsebe. Mokgatlo wa Jehofa o re neile dilo tše dintši tšeo di ka re thušago go ba le temogo. Dilo tšeo di ka re thuša ‘go bona’ Mmopi wa rena ka mahlo a tumelo. (Baheb. 11:27)  Dilo tšeo di akaretša bidio ya The Wonders of Creation Reveal God’s Glory, poroutšha ya Na Dilo tše di Phelago di Bopilwe? le ya The Origin of Life​—Five Questions Worth Asking, gotee le puku ya Tlhahlo ya go Dira Nyakišišo ya Dihlatse tša Jehofa. Le gona dimakasine tša rena di re nea tsebišo e botse kudu ka ditaba tše. Gantši Phafoga! e ba le dipoledišano le borathutamahlale le batho ba bangwe bao ba hlalosago gore ke ka baka la eng ga bjale ba dumela go Modimo. Dihlogo tše di rego, “Na di Hlamilwe?” di hlalosa kamoo dilo tše di makatšago di bopilwego ka gona. Gantši ge borathutamahlale ba hlama dilo ba leka go ekiša dilo tšeo.

6. O ka holega bjang ge o ka diriša dilo tšeo mokgatlo o re neilego tšona, gona wena o holegile bjang?

⁶ Ngwanabo rena wa mengwaga e 19 wa kua United States o boletše ka diporoutšha tše pedi tšeo re boletšego ka tšona serapeng se se fetilego gore: “Diporoutšha tše di nthušitše kudu. Ke di badile gantšintši.” Kgaetšedi yo mongwe kua Fora o ngwadile gore: “Dihlogo tše di rego, ‘Na di Hlamilwe?’ di nkgahla kudu! Di bontšha gabotse gore bahlami ba dilo ba ka ekiša dilo tša tlhago eupša ba ka se tsoge ba kgonne go ekiša go raragana ga tšona ka mo go feletšego.” Batswadi ba ngwana wa mengwaga e 15 ba mo Afrika Borwa ba itše: “Sehlogo sa mathomo seo morwedi wa rena a se balago ka gare ga Phafoga! ke se se rego, ‘Poledišano.’” Go thwe’ng ka wena? Na o ikhola ka botlalo ka dilo tše? Di ka dira gore tumelo ya gago e tie go swana le sehlare sa medu e tsemilego. Ka go re’alo, tumelo ya gago e tla go thuša gore o se wišwe ke dithuto tša maaka.​—Jer. 17:5-8.

7. Ke ka baka la’ng Modimo a nyaka gore o diriše monagano wa gago?

⁷ Na go fošagetše go botšiša dipotšišo tše di kwagalago ka seo Beibele e se rutago? Le gatee! Jehofa o nyaka gore o diriše ‘matla a gago a tlhaologanyo’ gore o bone ge e ba seo o se dumelago e le therešo. Ga a nyake gore o dumele selo se itšego feela ka gobane ba bangwe ba se dumela. Ka gona šomiša monagano wa gago gore o hwetše tsebo e nepagetšego. Ke moka tsebo yeo e ka go thuša go ba le tumelo ya kgonthe. (Bala Baroma 12:1, 2; 1 Timotheo 2:4.) Tsela e nngwe ya go hwetša tsebo yeo ke ka go ba le thuto ya motho ka noši.

8, 9. (a) Batho ba bangwe ba thabela go ithuta ka eng? (b) Ba bangwe ba hotšwe bjang ke go naganišiša ka seo ba ithutago sona?

⁸ Ba bangwe ba itiretše lenaneo la go ithuta ka boporofeta bja Beibele goba go nepagala ga histori ya Beibele, go dumelelana ga yona le thutamahlale le baepi ba marope. Boporofeta bjo bongwe bjo bo kgahlišago bjo o ka ithutago ka bjona ke bja Genesi 3:15. Temana ye e rola sehlogo sa Beibele, e lego go godišwa ga bogoši bja Modimo le go kgethagatšwa ga leina la gagwe a diriša Mmušo wa gagwe. Temana yeo e hlalosa ka tsela ya seswantšhetšo kamoo Jehofa a tlago go rarolla mathata ao a wetšego batho ga e sa le go tloga tšhemong ya Edene. O ka ithuta bjang Genesi 3:15? Tsela e nngwe ke ka gore o thale mothaladi wo o bontšhago tatelano ya ditiragalo tše di hlalosago temana ye. Mothalading woo, ngwala mangwalo ao a bontšhago kamoo ganyenyane-ganyenyane Modimo a utolotšego batho le dilo tšeo go bolelwago ka tšona temaneng ye tšeo di hlatselago gore boporofeta bjo bo be bo tla phethagala. Ge o bona kamoo mangwalo ao a dumelelanago ka gona, ka kgonthe o tla phetha ka gore baporofeta ba ka Beibeleng le bangwadi ba yona ba be ba “šušumetšwa ke moya o mokgethwa.”​—2 Pet. 1:21.

⁹ Ngwanabo rena wa kua Jeremane o ngwadile gore: “Sehlogo sa Beibele sa mabapi le Mmušo wa Modimo se hwetšagala pukung e nngwe le e nngwe ya Beibele. Seo se bjalo, gaešita le ge Beibele e ngwadilwe ke banna ba e ka bago ba 40. Le gona ba bantši ba bona ba phetše ka nako  e sa swanego e bile ba be ba sa tsebane.” Kgaetšedi wa kua Australia o ile a kgongwa ke sehlogo sa Morokami ka kgatišong e ithutwago ya December 15, 2013, seo se bego se hlalosa Paseka. Tiragalo yeo ya bohlokwa e sepedišana tlwaa le Genesi 3:15 le go tla ga Mesia. O ngwadile gore: “Sehlogo seo se ile sa mpula mahlo, ka bona bohlale bja Jehofa. Ruri ke mohlolo gore tokišetšo yeo e bego e neilwe Baisiraele e ile ya phethagala go Jesu. Ke ile ka swanelwa ke go ema gomme ke naganišiše kamoo boporofeta bjoo bja mabapi le Paseka bo makatšago ka gona!” Ke ka baka la’ng kgaetšedi yo a ile a ikwa ka tsela ye? Ke ka gobane o ile a naganišiša kudu ka seo a bego a se bala gomme ‘a se kwešiša.’ Seo se ile sa tiiša tumelo ya gagwe gomme a batamela kgauswi kudu le Jehofa.​—Mat. 13:23.

10. Taba ya gore bangwadi ba Beibele ba boletše ka mafokodi a bona e tiiša bjang tumelo ya gago?

¹⁰ Selo se sengwe seo se ka tiišago tumelo ya gago ke go naganišiša ka sebete sa bangwadi ba Beibele le go botega ga bona. Bangwadi ba bantši ba mehleng ya Beibele ba be ba ngwala dilo tše dibotse feela ka baetapele ba bona le go tumiša mebušo ya bona. Lega go le bjalo, Baporofeta ba Jehofa ba be ba bolela therešo ka mehla. Ba ile ba bolela ka mafokodi a batho ba gabo bona le a dikgoši tša bona. (2 Dikor. 16:9, 10; 24:18-22) Le gona ba ile ba bolela le ka mafokodi a bona ka noši le a bahlanka ba bangwe ba Modimo. (2 Sam. 12:1-14; Mar. 14:50) Ngwanabo rena yo mofsa wa kua Brithania o itše: “Taba ya gore bangwadi ba Beibele ba boletše ka mafokodi a bona e hlatsela gore Beibele e tšwa go Jehofa.”

11. Ke’ng seo se ka thušago bafsa go bona bohlokwa bja go phela ka melao ya motheo ya Beibele?

¹¹ Batho ba bantši ba kgodišegile gore Beibele e buduletšwe ke Modimo ka baka la tlhahlo ya yona e botse. (Bala Psalme 19:7-11.) Kgaetšedi yo mofsa wa Japane o ngwadile gore: “Lapa lešo le thabile kudu ka gobane re phela ka melao ya Beibele. Re na le khutšo, botee e bile re a ratana.” Melao ya motheo ya Beibele e re šireletša go dithuto tša maaka le go ditumelakhwele tšeo di dirilego batho ba bantši makgoba. (Ps. 115:3-8) Na difilosofi tša gore Modimo ga a gona di timetša batho e le ka kgonthe? Dithuto tša go swana le gore dilo di itirile di dira gore batho ba rapele tlhago go e na le go rapela Jehofa. Bao ba rego ga go na Modimo ba bolela gore bokamoso bo ka diatleng tša bona. Lega go le bjalo, ba ka se go botše seo o swanetšego go se dira gore o be le bokamoso bjo bobotse.​—Ps. 146:3, 4.

12, 13. O ka boledišana bjang ka bohlale le bao o tsenago le bona sekolo, barutiši goba batho ba bangwe ka tlholo ya Modimo goba Beibele?

¹² Ke’ng se se ka go thušago go atlega ge o boledišana le batho ka tlholo le ka Beibele? Sa pele, o se ke wa akgofela go nagana gore o tseba seo batho ba bangwe ba se dumelago. Batho ba bangwe ba dumela gore dilo di itirile, eupša ba bile ba nagana gore Modimo o gona. Ba nagana gore Modimo o dirišitše diphedi tše itšego go tšweletša mehuta e mengwe ya diphedi. Ba bangwe ba re ba dumela go thuto ya gore dilo di itirile ka gobane e be e ka se rutwe dikolong ge nkabe e se therešo. Ba bangwe ba tlogela go dumela go Modimo ka baka la go nyamišwa ke bodumedi. Ka gona ge o boledišana le motho ka taba ya kamoo bophelo bo thomilego ka gona, ke gabohlale gore o mmotšiše dipotšišo pele. Ekwa gore motho yoo o dumela eng. Ge e ba o sa mo gapeletše dikgopolo tša gago e bile o mo theetša, le yena a ka go theetša.​—Tito 3:2.

¹³ Ge e ba motho yo mongwe a ganetša gore dilo di bopilwe, ka bohlale dira gore a je marapo a hlogo. O ka mmotšiša gore bophelo bo thomile bjang ntle le Mmopi. E le gore go be le mehutahuta ya diphedi, go swanetše gore go be le sephedi sa mathomo seo se tlago go tšweletša  diphedi tša mohuta wa sona. Moporofesara yo mongwe wa dikhemikhale o re tše dingwe tša dilo tšeo di bego di tla nyakega gore sephedi se tšweletše mehuta ya sona ke (1) letlalo la go šireletša ditho tša mmele, (2) bokgoni bja go hwetša matla le go a diriša, (3) boitsebišo bja leabela (DNA) le (4) bokgoni bja sephedi seo bja go tšweletša mehuta ya sona. O okeditše ka gore: “Go a makatša gore gaešita le diphedi tše dinyenyane kudu di raragane ka tsela yeo e re tlogelago re ahlame.”

14. O ka dira’ng ge e ba o tšhaba go boledišana le batho ka thuto ya gore dilo di itirile goba ka tlholo?

¹⁴ Ge e ba o tšhaba go boledišana le ba bangwe ka taba ya gore dilo di itirile goba ka tlholo, o ka leka go ekiša Paulo. O ngwadile gore: “Ntlo e nngwe le e nngwe e agwa ke motho, eupša yo a agilego dilo ka moka ke Modimo.” (Baheb. 3:4) Tsela e bjalo ya go nea mabaka e a šoma! Ee, selo se sengwe le se sengwe se se raraganego se bopilwe. O ka diriša le dikgatišo tša rena. Kgaetšedi yo mongwe o ile a diriša diporoutšha tše pedi tšeo go boletšwego ka tšona pejana go thuša lesogana leo le bego le sa dumele gore Modimo o gona eupša le dumela gore dilo di itirile. Ka morago ga mo e ka bago beke, lesogana leo le ile la re: “Ga bjale ke dumela gore Modimo o gona.” Lesogana leo le ile la swarelwa thuto ya Beibele gomme ga bjale ke Hlatse.

15, 16. O ka kaonefatša bjang tsela yeo o boledišanago le ba bangwe ka Beibele, gona morero wa gago e swanetše go ba ofe?

¹⁵ O ka diriša mokgwa o swanago ge o bolela le motho yo a belaelago Beibele. Thoma ka go tseba seo a se dumelago le gore o kgahlwa ke ditaba dife. (Die. 18:13) Ge e ba a kgahlwa ke thutamahlale, a ka go theetša ge o mmontšha gore Beibele e nepagetše ka tša thutamahlale. Batho ba bangwe ba ka kgahlwa ke go tseba gore histori ya Beibele e nepagetše le gore boporofeta bja yona bo nepagetše. Goba o ka mmontšha go šoma ga melao ya motheo ya Beibele, ya go swana le yeo e hwetšagalago Thutong ya Jesu ya Thabeng.

¹⁶ Gopola gore morero wa gago ke go fihlelela dipelo tša batho, e sego go fenya ngangišano. Ka gona theetša batho ka kelohloko. Ba botšiše dipotšišo ka tlhompho, gomme o bolele dintlha tša gago ka botho le ka tlhompho, kudukudu ge o bolela le batho ba bagolo. Le bona ba tla hlompha seo o ba botšago sona. Le gona ba tla bona gore o tlogile o naganišiša ka ditumelo tša gago. Bafsa ba bantši ga se ba hlwa ba dira seo. Gopola gore ga o gapeletšege go araba bao ba thatafišago dihlogo goba bao ba no nyakago go kwera ditumelo tša gago.​—Die. 26:4.

17, 18. (a) Ke’ng seo se ka go thušago go phelela therešo? (b) Re tlo ahlaahla potšišo efe sehlogong se se latelago?

¹⁷ Go no tseba dithuto tša motheo tša Beibele ga go bolele gore o tla ba le tumelo e tiilego. Ka gona epa ka Lentšung la Modimo, bjalo ka ge e ka o tsoma matlotlo a utilwego. (Die. 2:3-6) Diriša dilo tšeo di lego gona ka segageno, tše bjalo ka Watchtower Library go DVD, BOKGOBAPUKU BJA INTHANETENG, gotee le Watch Tower Publications Index goba Tlhahlo ya go Dira Nyakišišo ya Dihlatse tša Jehofa. Le gona ipeele pakane ya go bala Beibele ka moka. Leka go e fetša ka ngwaga o tee. Go na le dilo tše dintši tšeo di tiišago tumelo go akaretša le go bala Lentšu la Modimo. Molebeledi yo mongwe wa tikologo o gopola ge e be e sa le mofsa ka gore: “Selo seo se ilego sa nthuša go bona gore Beibele ke Lentšu la Modimo ke go e bala ka moka ga yona. Dipego tša yona tšeo ke di badilego ke sa le ngwana mafelelong di ile tša kwešišega. Se ke sona se nthušitšego go gola moyeng.”

¹⁸ Batswadi, ke lena le swanetšego go thuša bana ba lena go tia tumelong. Le ka ba thuša bjang go tiiša tumelo ya bona? Sehlogo se se latelago se tla ahlaahla taba ye.