1, 2. (a) Solomone o ile a newa mošomo ofe wa bohlokwa? (b) Ke ka baka la’ng Dafida a ile a bolela a tshwenyegile ka Solomone?

SOLOMONE o ile a laelwa gore a okamele o mongwe wa mediro e megolo kudu ya go aga, e lego modiro wa go aga tempele kua Jerusalema. Tempele yeo e be e tlo ba e ‘kgolo kudu moo dinageng ka moka moo e lego gore e be e tlo tsebja ka botse bja yona.’ Sa bohlokwa le go feta ke gore tempele yeo e be e tlo ba “ntlo ya Jehofa Modimo wa therešo.” Jehofa o ile a laela Solomone gore a okamele modiro woo wa go aga.​—1 Dikor. 22:1, 5, 9-11.

² Kgoši Dafida o be a kgodišegile gore Modimo o be a tla thekga modiro wo, ka gore ka nako yeo Solomone e be e sa le “mofsa e bile [a] sa tekateka,” goba a se na maitemogelo. Na Solomone o be a tla ba le sebete sa go amogela kabelo yeo ya go aga tempele? Na taba ya gore e be e sa le mofsa e bile a se na maitemogelo e be e tla mo šitiša go phetha modiro wo? E le gore Solomone a atlege modirong wo, o be a swanetše go ba le sebete le go gata mogato.

3. Solomone a ka ba a tsebile bjang gore tatagwe o be a na le sebete?

³ Go bonagala Solomone a kwele gore tatagwe e lego Dafida o be a na le sebete. Ge Dafida e be e sa le mofsa, o ile a lwa le dibata gore a šireletše  dinku tša tatagwe. (1 Sam. 17:34, 35) Le gona, o ile a bontšha sebete se segolo ge a be a elwa le senatla sa go tseba ntwa e lego Goliata. Dafida o ile a kgona go fenya senatla seo ka thušo ya Jehofa le ka leswikana le boreledi.​—1 Sam. 17:45, 49, 50.

4. Ke ka baka la’ng Solomone a be a swanetše go ba le sebete?

⁴ Ruri ga go makatše ge ka morago Dafida a ile a kgothaletša Solomone gore a be le sebete gomme a age tempele! (Bala 1 Dikoronika 28:20.) Ge Solomone a be a ka palelwa ke go bontšha sebete, gomme a dumelela go boifa go mo fetša matla, o be a ka se kgone go agela Jehofa tempele.

5. Ke ka baka la’ng re swanetše go ba le sebete?

⁵ Go swana le Solomone, re hloka thušo ya Jehofa gore re be le sebete le go phetha mešomo yeo a re neilego yona. Gore re kgone go dira seo, re swanetše go naganišiša ka bahlanka ba gagwe ba bogologolo bao ba bontšhitšego sebete. Ka morago ga moo, re ka nagana kamoo le rena re ka bontšhago sebete le go phetha mešomo ya rena.

6. Ke’ng seo se go kgahlago ka sebete sa Josefa?

⁶ Nagana ka sebete seo Josefa a se bontšhitšego ge mosadi wa Potifara a be a mo goketša gore a robale le yena. Josefa o swanetše go ba a be a tseba gore ge a be a ka gana go robala le mosadi yoo, ditlamorago e be e tla ba tše bohloko kudu. Lega go le bjalo, go e na le gore a ineele sebeng seo, o ile a bontšha sebete gomme a gata mogato ka go akgofa.​—Gen. 39:10, 12.

7. Hlalosa sebete seo Rahaba a ilego a se bontšha. (Bona seswantšho seo se lego mathomong a sehlogo.)

⁷ Rahaba le yena o ile a bontšha sebete. Ge dihlodi tša Baisiraele di fihla legaeng la gagwe kua Jeriko, nkabe a ile a boifa gomme a di bolaiša. Eupša ka ge a be a botile Jehofa, o ile a bontšha sebete ka go uta banna bao ba babedi gomme a ba thuša gore ba tšwe motseng woo ba šireletšegile. (Josh. 2:4, 5, 9, 12-16) Rahaba o be a dumela gore Jehofa ke Modimo wa therešo, le gona o be a dumela gore o be a tla nea Baisiraele naga yeo. Ga se a ka a dumelela go boifa batho, go akaretša le kgoši ya Jeriko le mašole a yona, go mo palediša go dira botse. Go e na le moo, o ile a gata mogato woo o ilego wa dira gore mafelelong yena le lapa la gagwe ba phologe ge Jeriko e be e fedišwa.​—Josh. 6:22, 23.

8. Mohlala wa Jesu wa go ba le sebete o thušitše baapostola ba gagwe bjang?

⁸ Baapostola ba Jesu le bona ba re beetše mohlala o mobotse wa go ba le sebete. Ba ile ba bona ge Jesu a bontšha sebete. (Mat. 8:28-32; Joh. 2:13-17; 18:3-5) Mohlala wa Jesu o ile wa ba thuša gore le bona ba be le sebete. Ge Basadutsei ba be ba ba ganetša go ruta batho ka leina la Jesu, baapostola ba ba ile ba no tšwela pele ba bolela ka yena.​—Dit. 5:17, 18, 27-29.

9. Timotheo wa Bobedi 1:7 e re thuša bjang go tseba moo sebete se tšwago gona?

⁹ Josefa, Rahaba, Jesu le baapostola, ba ile ba bontšha sebete seo se ilego sa ba tutueletša go dira se se nepagetšego. Ga se gore ba be ba ipota. Ba be ba ithekgile ka Jehofa. Le rena re kopana le maemo ao a nyakago gore re bontšhe sebete. Go e na le gore re itshepe, re swanetše go ithekga ka Jehofa. (Bala 2 Timotheo 1:7.) Anke re boleleng ka maemo a mabedi ao go ona re swanetšego go bontšha sebete, e lego ka lapeng le ka phuthegong.

10. Ke ka baka la’ng bafsa ba Bakriste ba swanetše go ba le sebete?

¹⁰ Bafsa ba Bakriste ba kopana le maemo a mantši ao a nyakago gore ba bontšhe sebete gore ba hlankele Jehofa. Ba ka ithuta go Solomone go bontšha sebete, le go ekiša mohlala wa gagwe ka ge a ile a ba le sebete sa go dira diphetho tše bohlale le go fetša modiro wa go aga tempele. Gaešita le ge bafsa ba Bakriste ba swanetše go hlahlwa ke batswadi ba bona, go sa dutše go na le diphetho tšeo ba swanetšego go itirela tšona ka bobona. (Die. 27:11) Ba swanetše go ba le sebete gore ba  kgone go itirela diphetho tše bohlale ditabeng tša go kgetha bagwera ba babotse, boithabišo bja maleba, go ba le boitshwaro le go kolobetšwa. Lebaka ke gore ge ba dira bjalo, Sathane o tlo ba hloya, yena yoo a kwerago Modimo.

11, 12. (a) Moshe o beile mohlala ofe wa go ba le sebete? (b) Bafsa ba ka ekiša mohlala wa Moshe bjang?

¹¹ Phetho e nngwe ya bohlokwa yeo bafsa ba swanetšego go e dira ke ya go ipeela dipakane. Dinageng tše dingwe, bafsa ba bantši ba kgothaletšwa go ipeela dipakane tša go kitimiša thuto e phagamego le go hwetša mešomo ya go patela tšhelete e ntši. Mola dinageng tše dingwe, maemo a ikonomi a ka gapeletša bafsa go nagana gore ba swanetše go šoma ka thata gore ba tle ba ntšhe malapa a gabo bona mohlakong. Ge e ba o le yo mongwe wa bafsa ba, nagana ka mohlala wa Moshe. Ka ge Moshe a godišitšwe ke morwedi wa Farao, nkabe a ile a ipeela pakane ya go tlo ba le maemo goba go ba le sa gagwe. Ga go pelaelo gore ditho tša ka bogošing, barutiši ba gagwe le baeletši ba gagwe ba swanetše go ba ba ile mo dira gore a ikwe a gapeletšega go phegelela dilo tšeo! Eupša go e na le gore Moshe a dire dilo tšeo, o ile a bontšha sebete gomme a thekga borapedi bja therešo. Ka morago ga gore a tlogele mahumo a Egipita, o ile a bontšha sebete ka go bota Jehofa. (Baheb. 11:24-26) Jehofa o ile a mo šegofatša, gomme ga go pelaelo gore o tlo mo šegofatša le go feta nakong e tlago.

¹² Ka mo go swanago, Jehofa o tlo šegofatša bafsa bao ka sebete ba ipeelago dipakane tirelong ya gagwe le go etiša Mmušo wa Modimo pele maphelong a bona. O tlo ba thuša gore ba hlokomele malapa a gabo bona. Lekgolong la pele la mengwaga, Timotheo, yoo e bego e sa le yo mofsa, o ile a etiša tirelo ya Jehofa pele bophelong bja gagwe. Le wena o ka kgona go dira bjalo. *​—Bala Bafilipi 2:19-22.

13. Sebete se ile sa thuša mofsa yo mongwe bjang gore a fihlele dipakane tša gagwe?

¹³ Kgaetšedi yo mongwe wa mofsa kua Alabama, U.S.A., o ile a swanelwa ke go ithuta go ba le sebete sa go ipeela dipakane tša moya. O ngwadile gore: “Ke gotše ke na le dihlong kudu. Gaešita le Holong ya Mmušo ke be ke boifa go bolela le batho, ga ke sa bolela ka go kokota mejakong ya batho bao ke sa ba tsebego tšhemong.” Ka baka la thušo ya batswadi ba gagwe le ditho tša phuthego, kgaetšedi yo wa mofsa o ile a kgona go fihlelela pakane ya gagwe ya go ba mmulamadibogo wa ka mehla. O re: “Lefase la Sathane le re go rutega, go tuma, go ba le tšhelete le go ba le dilo tše dintši tša maemo ke dipakane tše dibotse. Gantši dipakane tše ga di fihlelelege e bile di bakela motho stress le dipelaelo tše dingwe. Eupša go hlankela Jehofa go ntlišeditše lethabo le legolo kudu le kgotsofalo.”

14. Ke maemong afe a mangwe moo batswadi ba Bakriste ba swanetšego go bontšha sebete?

¹⁴ Batswadi ba Bakriste le bona ba swanetše go ba le sebete. Ka mohlala, mong wa mošomo a ka dula a go kgopela gore o šome di-overtime mantšiboa le mafelobekeng, e lego dinako tšeo o di beetšego ka thoko bakeng sa borapedi bja lapa, tšhemo le diboka. O swanetše go bontšha sebete gore o gane dikgopelo tše bjalo tša ka mehla gomme o beele bana ba gago mohlala o mobotse tabeng ye. Mohlomongwe batswadi ba bangwe ka phuthegong ba dumelela bana ba bona go dira dilo tšeo wena o sa nyakego bana ba gago ba di dira. Batswadi bao ba ka go botšiša gore go reng o sa dumelele bana ba gago ba dira dilo tše bjalo. Na o tla ba le sebete sa go ba hlalosetša mabaka a gago ka bohlale?

15. Puku ya Psalme 37:25 le lengwalo la Baheberu 13:5 di ka thuša batswadi bjang?

¹⁵ Re bontšha gore re na le sebete ge re thuša bana ba rena go ipeela dipakane tirelong ya Jehofa le go di fihlelela. Ka mohlala, batswadi ba bangwe ba ka dikadika go kgothaletša bana ba bona go tšea bobulamadibogo, go ya tlhokagalong, go  hlankela Bethele goba go šoma medirong ya go aga mafelo a rena a borapedi. Batswadi ba bjalo ba ka boifa gore bana ba bona ba ka tla ba palelwa ke go itlhokomela goba go hlokomela bona ge ba tšofetše. Lega go le bjalo, batswadi ba bohlale ba bontšha sebete gomme ba tshepa dikholofetšo tša Jehofa. (Bala Psalme 37:25; Baheberu 13:5.) Go oketša moo, tsela e nngwe yeo o ka bontšhago ka yona gore o na le sebete le gore o tshepa Jehofa ke ka go thuša ngwana wa gago go dira se se swanago.​—1 Sam. 1:27, 28; 2 Tim. 3:14, 15.

16. Batswadi ba bangwe ba thušitše bana ba bona bjang go ipeela dipakane tša moya, gona mehola e bile efe?

¹⁶ Banyalani ba bangwe kua United States ba ile ba thuša bana ba bona go ipeela dipakane tirelong ya Jehofa. Tate wa lapeng leo o re: “Gaešita le pele bana ba rena ba ka ithuta go sepela le go bolela, re be re ba botša ka lethabo leo le tlišwago ke go ba mmulamadibogo le go hlankela phuthego. Gona bjale ba ipeetše pakane ya go dira dilo tšeo. Go ipeela dipakane tša moya le go di fihlelela go thuša bana ba rena go fenya meleko ya lefase la Sathane le go tsepelela go Jehofa.” Ngwanabo rena yo mongwe yo a nago le bana ba babedi o ngwadile gore: “Batswadi ba bantši ba šoma ka thata go thuša bana ba bona gore ba atlege dilong tša go swana le dipapadi, boitapološo le thuto. Seo se bontšha gore le rena re swanetše go šoma ka thata go thuša bana ba rena go fihlela dipakane tšeo di tlago go ba thuša go dula ba amogelwa ke Jehofa. Re thabišwa kudu ke go bona bana ba rena ba fihlelela dipakane tša bona le go tseba gore Jehofa o re thušitše gore ba di fihlelele.” Kgodišega gore Modimo o tlo šegofatša batswadi bao ba thušago bana ba bona go ipeela dipakane tirelong ya gagwe le go di fihlelela.

17. Nea mohlala wa maemo ao go wona go nyakegago sebete ka phuthegong?

¹⁷ Re swanetše go bontšha sebete gape ka phuthegong. Ka mohlala, bagolo ba swanetše go ba le sebete ge ba swaragana le ditaba tša boahlodi goba ge ba thuša motho yo a lego maemong ao a hlobaetšago a tša kalafo. Bagolo ba bangwe ba etela dikgolegong gore ba yo ruta bagolegwa ditaba tše dibotse tša Mmušo wa Modimo. Go thwe’ng ka dikgaetšedi tša rena tše di sego lenyalong? Ga bjale dikgaetšedi tšeo di na le dibaka tše  dintši tša go oketša tirelo ya tšona ka go tšea bobulamadibogo, go ya tlhokagalong, go thuša Lefapheng la Bohlami le la Mediro ya go Aga le go ya Sekolong sa Baebangedi ba Mmušo. E bile tše dingwe di ka ya Sekolong sa Gilead.

18. Dikgaetšedi tšeo di tšofetšego di ka bontšha bjang gore di na le sebete?

¹⁸ Dikgaetšedi tše di tšofetšego ke tšhegofatšo ka phuthegong. Ruri re di rata kudu! Tše dingwe tša tšona di ka no ba di se sa kgona go dira mo gontši tirelong ya Jehofa go etša peleng, eupša di sa dutše di ka bontšha sebete le go gata mogato. (Bala Tito 2:3-5.) Ka mohlala, kgaetšedi yo a tšofetšego o swanetše go bontšha sebete ge a kgopetšwe gore a thuše kgaetšedi wa mofsa yo a sa aparego gabotse. A ka se omanye kgaetšedi yoo wa mofsa ka diaparo tša gagwe, eupša a ka mo kgothaletša gore a naganišiše kamoo diaparo tša gagwe di ka dirago gore ba bangwe ba ikwe ka gona. (1 Tim. 2:9, 10) Thušo e bjalo e lerato e ka ba le mafelelo a mabotse.

19. (a) Bana babo rena bao ba kolobeditšwego ba ka bontšha sebete bjang? (b) Bafilipi 2:13 le 4:13 di ka thuša bjang bana babo rena gore ba be le sebete?

¹⁹ Ba bangwe bao ba swanetšego go bontšha sebete le go gata mogato ke bana babo rena bao ba kolobeditšwego. Banna ba sebete bao ba katanelago go hwetša maikarabelo a oketšegilego ke tšhegofatšo ka phuthegong. (1 Tim. 3:1) Lega go le bjalo, ba bangwe ba ka dikadika go katanela go fihlelela maikarabelo a bjalo. Mohlomongwe ngwanabo rena o kile a dira sebe nakong e fetilego, gomme ga bjale o ikwa a sa swanelege go ka ba mohlanka wa bodiredi goba mogolo. Goba ngwanabo rena yo mongwe a ka ikwa eka a ka se kgone go phetha maikarabelo a itšego. Ge e ba le wena o ikwa ka tsela ye, Jehofa a ka go thuša go ba le sebete. (Bala Bafilipi 2:13; 4:13.) Gopola gore Moshe le yena o kile a ikwa a sa swanelege go phetha kabelo e itšego. (Ek. 3:11) Eupša ge nako e dutše e eya, e bile a thušwa ke Jehofa, Moshe o ile a kgona go ba le sebete le go phetha mošomo wo a bego a o neilwe. Ngwanabo rena yo a kolobeditšwego le yena a ka ba le sebete se bjalo ka go kgopela Modimo gore a mo nee sona. O swanetše go se kgopela ka thapelo e tseneletšego le ka go bala Beibele letšatši le letšatši. Go naganišiša ka batho ba ka Beibeleng bao ba bontšhitšego sebete le gona go ka mo thuša. A ka kgopela bagolo ka boikokobetšo gore ba mo tlwaetše go dira mešomo e itšego le go ithaopela go thuša ka ditsela tše dingwe ge go nyakega. Re kgopela bana babo rena ka moka bao ba kolobeditšwego gore ba be le sebete gomme ba šome ka thata go thuša phuthego!

20, 21. (a) Dafida o ile a kgonthišetša Solomone ka eng? (b) Rena re ka kgodišega ka eng?

²⁰ Kgoši Dafida o ile a gopotša Solomone gore Jehofa o be a tla ba le yena go fihlela a fetša go aga tempele. (1 Dikor. 28:20) Ka ge mantšu a tatagwe a be a nweletše ka monaganong wa gagwe le ka pelong ya gagwe, Solomone ga se a ka a dumelela bofsa bja gagwe le go hloka maitemogelo di mo palediša go šoma. O ile a bontšha sebete se segolo gomme a thoma go šoma. Ka thušo ya Jehofa, o ile a kgona go fetša tempele yeo e kgolo kudu ka mengwaga e šupago le seripa.

²¹ Go fo swana le ge Jehofa a thušitše Solomone, le rena a ka re thuša go ba le sebete le go phetha mešomo yeo a re neilego yona ka lapeng le ka phuthegong. (Jes. 41:10, 13) Ge re bontšha sebete tirelong ya Jehofa, re ka kgodišega gore o tla re šegofatša gona bjale le nakong e tlago. Ka baka leo, “eba le sebete gomme . . . o gate mogato.”