MAGARENG a bo-1930, tate le mma—e lego James le Jessie Sinclair—ba ile ba hudugela Bronx, e lego toropo ya kua New York City. Yo mongwe wa bagwera ba bona yo ba sa tšwago go kopana le yena e be e le Willie Sneddon, yoo le yena a bego a etšwa Scotland. Go se go ye kae, ke ge ba šetše ba bolela ka malapa a bona. Seo se diragetše mengwaga e sego kae pele nka belegwa.

Mma o ile a botša Willie gore nakwana pele ga Ntwa e Kgolo ya Lefase, tatagwe le buti’agwe ba ile ba kgangwa ke meetse ge seketswana seo ba bego ba se nametše sa go rea dihlapi se be se thula mmaene, karolong ya Lewatle la leboa la Atlantic. Willie o ile a araba ka gore, “Tatago o heleng!” Willie e be e le Hlatse ya Jehofa, gomme a e bile matseno a tšhošago a gore mma a tsebe therešo ya Beibele.

Seo Willie a se boditšego mma se ile sa mo kweša bohloko ka gobane o be a tseba gore tatagwe be e le monna wa go loka. Eupša Willie o okeditše ka gore: “Na o be o ka thaba ge nka go botša gore Jesu o ile a ya heleng?” Mma o ile a gopola seo a ilego a se rutwa kerekeng, gore Jesu o ile a išwa heleng gomme a tsošwa ka letšatši la boraro. Ka ge a be a tseba dihele e le lefelo la mollo moo batho ba babe ba hlokofatšwago gona, o ile a ipotšiša gore: ‘Ke ka baka la’ng Jesu a ile a ya moo?’ Seo se ile sa dira gore mma a nyake go tseba ka therešo ya Beibele. O ile a thoma go ya dibokeng Phuthegong ya Bronx, gomme a kolobetšwa ka 1940.

Ka nako yeo, batswadi ba Bakriste ba be ba sa kgothaletšwe gore ba ithute Beibele le bana ba bona. Ge ke be ke sa le yo monyenyane, tate o be ntlhokomela mola mma a tla be a ile dibokeng le go ya tšhemong mafelobekeng. Ka morago ga gore go fete mengwaga e mmalwa, nna le tate re ile ra thoma go ya dibokeng le mma. Mma o be a le mafolofolo kudu go boleleng ditaba tše dibotse e bile a swara dithuto tše mmalwa tša Beibele le batho bao ba thabelago. Ge e le gabotse, go ile gwa ba le nako yeo a ilego a swara tše dingwe tša dithuto tša gagwe ka sehlopha, ka gobane barutwana ba gagwe ba Beibele ba be ba dula kgauswi le kgauswi. Ke be ke eya le yena tšhemong ge dikolo di tswaletšwe. Ka go re’alo, ke ile ka ithuta dilo tše dintši ka Beibele le kamoo nka rutago ba bangwe seo e se bolelago.

Le tla ntshwarela ge ke le botša gore ge ke be ke sa le yo monyenyane, ke be ke sa nape ke rata therešo ya Beibele. Ke be ke bona e se bohlokwa. Lega  go le bjalo, ge ke be ke na le mengwaga e ka bago e 12, ke ile ka ba mogoeledi wa Mmušo wa Modimo le gona go tloga ka nako yeo, ke ile ka tšea karolo ka mehla go boleleng ditaba tše dibotse. Ge ke be ke na le mengwaga e 16, ke ile ka neela bophelo bja ka go Jehofa gomme ka kolobetšwa ka di-24 tša July, 1954, kopanong ya kua Toronto, Canada.

Ba bangwe ba bana ba babo rena ka phuthegong ya gešo e be e le ditho tša Bethele mola ba bangwe e kile ya ba tšona. Ba ile ba nkgothatša kudu. Tsela yeo ba bego ba kgona go bea ditaba ka yona le kamoo ba bego ba hlalosa ditherešo tša Beibele e be e nkgahla. Le ge barutiši ba ka ba be ba nyaka gore ke ye yunibesithi, ke be ke nyaka go ya Bethele. Ka baka leo, ke ile ka tlatša fomo ya go ya Bethele kopanong yeo ya selete ya Toronto. Ke ile ka e tlatša gape ka 1955 kopanong ya selete ya kua Yankee Stadium, New York City. Nakwana ka morago ga moo, ge ke be ke na le mengwaga e 17, ke ile ka laletšwa go yo thoma go hlankela Bethele ya Brooklyn ka di-19 tša September, 1955. Letšatšing la bobedi ke le Bethele, ke ile ka thoma go šoma Lefapheng la go Tlema Dipuku (Bindery) kua 117 Adams Street. Ke be ke šoma motšheneng wo o bego o kopanya matlakala a dipuku, woo mafelelong o bego o tšweletša puku e feletšego.

Ka morago ga mo e ka bago kgwedi ke šoma Lefapheng le la go Tlema Dipuku, ke ile ka išwa Lefapheng la Dimakasine ka gobane ke be ke tseba go thaepa. Mehleng yeo, bana babo rena le dikgaetšedi ba be ba thaepa diaterese tša bao ba bego ba ingwadišitše gore ba hwetše Merokami le Diphafoga! tše difsa kgwedi le kgwedi. Ka morago ga dikgwedi tše mmalwa, ke ile ka šoma Lefapheng la go Romela Dikgatišo. Klaus Jensen, yoo e bego e le mookamedi wa lefapha leo o ile a nkgopela gore ke felegetše ngwanabo rena yoo a bego iša mapokisi a dikgatišo ka lori maemakepeng. Dikgatišo tšeo di be di tlo romelwa lefaseng ka moka. Le gona go be go na le masaka a  dimakasine ao a bego a swanetše go išwa posong gore a romelwe diphuthegong tša United States. Ngwanabo rena  Jensen o ile a re mošomo wa matsogo o tla ntshwanela. Ke be ke imela feela dikhilograma tše e ka bago tše 57, gomme ke le yo mosesane bjalo ka lehlokwana. Maeto ao a go ya maemakepeng le diposong a nthušitše gore ke tielele mmeleng. Go be go le molaleng gore Ngwanabo rena Jensen o be a tseba seo ke bego ke se hloka!

Lefapha la Dimakasine le be le ikarabela ka go nea diphuthego dimakasine tšeo di di kgopetšego. Ka baka leo ke ile ka tseba gore ke maleme afe ao dimakasine tša rena di bego di phrinthwa ka ona kua Brooklyn, gore di romelwe dikarolong tše dingwe tša lefase. A mantši a maleme ao ke be ke sa nka ka kwa ka ona, eupša ke ile ka thabela go tseba gore dimakasine tše diketekete di be di romelwa mafelong a mantši a kgole. Ka nako yeo ke be ke sa tsebe gore ke tlo ba le tokelo ya go etela a mantši a mafelo ao mengwageng e latetšego.

Ka 1961, ke ile ka abelwa go yo šoma Ofising ya Ditšhelete ke okamelwa ke ngwanabo rena Grant Suiter. Ka morago ga mengwaga e itšego ke šoma moo, ke ile ka bitšwa ofising ya ngwanabo rena Nathan Knorr, yoo ka nako yeo a bego a etelela pele mošomo wa lefase ka moka. O ile a mpotša gore yo mongwe wa bana babo rena yoo a bego a šoma ka ofising ya gagwe o be a tlo ya Sekolong sa Bodiredi sa Pušo ya Modimo kgwedi ka moka, gomme ka morago ga moo o be a tla šoma Lefapheng la Tirelo. Ke ile ka abelwa gore ke yo šoma legatong la gagwe, ke dirišana le ngwanabo rena Don Adams. Ke ile ka makala ge ke hwetša gore ngwanabo rena Don ke yena a amogetšego fomo ya ka ya Bethele kopanong ya selete ya 1955. Bana babo rena ba bangwe ba babedi bao ba bego ba šetše ba šoma mmogo ka ofising yeo e be e le Robert Wallen le Charles Molohan. Ka moka ga rena re šomile mmogo ka mengwaga e fetago e 50. Ruri ke thabetše go šoma le banna ba, bao ba bego ba botega e bile ba rata Modimo!​—Ps. 133:1.

Go thoma ka 1970, ke ile ka abelwa go etela diofisi tša makala tše mmalwa tša Mokgatlo wa  Watch Tower ka dibeke tše sego kae ngwaga le ngwaga goba ka morago ga mengwaga e mebedi. Maetong ao, ke be ke eya go kgothatša malapa a Bethele le baromiwa ba tšhemong ya lekala la moo, le go hlahloba dipego tša lekala leo. Ruri ke ile ka thabela go kopana le ba bangwe ba bao ba ilego ba aloga diklaseng tša mathomo tša Sekolo sa Gilead. Ka moka ga bona ba be ba sa dutše ba hlankela Jehofa ka go botega dikabelong tša bona dinageng dišele! Ke ile ka ba le tokelo ya go etela dinaga tše di fetago tše 90 ka baka la mošomo wo.

Ditho ka moka tša Bethele kua Brooklyn di be di abetšwe diphuthego tša New York City. Nna ke be ke abetšwe phuthegong ya toropong ya Bronx. Phuthego ya mathomo yeo nna ke bego ke le go yona yeo e bitšwago Upper Bronx, e ile ya gola gomme ya tswala diphuthego tše dingwe.

Magareng a mengwaga ya bo-1960, lapa le lengwe la Dihlatse tša Jehofa leo le tšwago Latvia leo le bego le hweditše ditherešo ka borwa bja Bronx, le ile la hudugela Phuthegong ya Upper Bronx. Morwedi wa lapa leo yo mogolo e lego Livija, o ile a ba mmulamadibogo wa ka mehla gateetee ka morago ga gore a fetše sekolong sa sekontari. Ka morago ga dikgwedi tše sego kae, o ile a hudugela tlhokagalong kua Massachusetts, moo go bego go nyakega bagoeledi ba oketšegilego. Ke ile ka thoma go mo ngwalela mangwalo ke mmotša ka ditaba tše dibotse tšeo di bego di direga phuthegong ya gešo. Le yena o be mphetola a mpotša ka dilo tše dibotse tšeo di bego di direga tšhemong yeo a bego a le go yona ya Boston.

Mengwageng e sego kae e latetšego, Livija o ile a kgethwa go ba mmulamadibogo yo a kgethegilego. O be a nyaka go dira mo gontši ka mo go ka kgonegago tirelong ya Jehofa, ka gona o ile a tlatša fomo ya Bethele gomme a bitšwa ka 1971. Go be go bonagala eka Jehofa o re, mosadi šoo! Ka di-27 tša October, 1973, re ile ra nyalana gomme ra ba le tokelo ya gore Ngwanabo rena  Knorr a nee polelo ya lenyalo la rena. Diema 18:22 e re: “Na motho o hweditše mosadisadi? Gona o hweditše selo se sebotse, gomme o amogelwa ke Jehofa.” Nna le Livija re ile ra šegofatšwa ka go šoma tirelong ya Bethele ka mengwaga e fetago e 40. Le gona re sa tšwela pele re kopanela phuthegong e nngwe gona moo Bronx.

Ke ile ka thabela kudu go šoma le Ngwanabo rena Knorr. O be a šoma ka thata tirelong ya Jehofa e bile a tšeela godimo kudu modiro wa baromiwa lefaseng ka moka. Ba bantši ba baromiwa ba, e be e le Dihlatse tša Jehofa tša mathomo dinageng tšeo ba bego ba abetšwe go tšona. Ke ile ka kwa bohloko kudu ge ke bona Ngwanabo rena Knorr a swere ke kankere ka 1976. Nakong e nngwe ge a be a babja kudu moo e lego gore o be a sa kgone le go tsoga mpeteng, o ile a nkgopela gore ke mmalele kgatišo e nngwe yeo e bego e tlo phrinthiwa. O ile a nkgopela gore ke yo bitša ngwanabo rena Frederick Franz gore le yena a tlo theetša ge ke bala. Ka morago ke ile ka kwa gore ka ge Ngwanabo rena Franz a be a sa bone gabotse, Ngwanabo rena Knorr o be a fetša nako ya gagwe e ntši a mmalela dikgatišo tše bjalo.

Ngwanabo rena Knorr o ile a hlokofala ka 1977, eupša bao ba mo tsebago le go mo rata ba ile ba homotšwa ke go tseba gore o feditše bophelo bja gagwe bja mo lefaseng a botega. (Kut. 2:10) Ka  morago ga moo, Ngwanabo rena Franz o ile a etelela pele modiro wa rena.

Ka nako yeo, ke be ke le mongwaledi wa Ngwanabo rena Milton Henschel, yoo a šomilego le Ngwanabo rena Knorr ka mengwaga e mentši. Ngwanabo rena Henschel o ile a mpotša gore ga bjale boikarabelo bja ka bjo bogolo kua Bethele e be e tla ba go thuša Ngwanabo rena Franz ka selo le ge e le sefe seo a se hlokago. Se sengwe sa dilo tšeo e be e le go mmalela kgatišo pele e ka phrinthiwa. Ngwanabo rena Franz o be a sa lebale dilo e bile o be a kgona go theetša ka kelohloko seo a bego a se balelwa. Ruri ke thabetše tokelo ya go mo thuša ka tsela yeo go fihlela a fetša bophelo bja gagwe bja mo lefaseng ka December 1992 a dutše a botega!

Mengwaga e 61 yeo ke e feditšego ke le Bethele e fetile ka lebelo. Batswadi ba ka ba hwile ba botegela Jehofa, gomme ke fela pelo ya go tlo ba amogela lefaseng le lefsa leo le tla bego le le maemong a mabotse. (Joh. 5:28, 29) Lefaseng le la Sathane, ga go na selo seo nka se bapetšago le tokelo yeo ke bilego le yona ya go šoma le banna le basadi ba botegago bao ba emelago batho ba Modimo lefaseng ka moka. Nna le Livija re bolela ka go kgodišega gore nakong ka moka ya ge re be le re tirelong ya nako e tletšego, ‘lethabo leo Jehofa a re neilego lona e bile sebo sa rena.’​—Neh. 8:10.

Ga go na motho yo a lego bohlokwa go feta ba bangwe ka mokgatlong wa Jehofa, gomme modiro wa go bolela ditaba tše dibotse o tšwela pele lefaseng ka moka. Mengwageng ka moka yeo ke e feditšego tirelong ya Jehofa, ke thabetše tokelo ya go šoma le bana babo rena le dikgaetšedi bao ba botegago. Ba bantši ba bana babo rena bao ba tloditšwego bao ke šomilego le bona ga ba se phela mo lefaseng. Eupša ke thabela gore ke ile ka šoma mmogo le bana babo rena ba, bao ba ratago Jehofa.