1. Ke ka baka ka la’ng re kgodišegile gore Lentšu la Modimo le na le matla? (Bona seswantšho se se lego ka mo godimo.)

KA GE re le batho ba Jehofa, re kgodišegile gore Lentšu la Modimo, e lego molaetša wo a o ngwaletšego batho, “le a phela e bile ke le matla.” (Baheb. 4:12) Ba bantši ba rena re na le bohlatse bja gore Beibele e na le matla a go fetoša maphelo ge re nagana gore re be re le batho ba mohuta mang pele re ithuta Beibele. Ba bangwe ba bana babo rena le dikgaetšedi e be e le mahodu, makgoba a diokobatši goba ba phela ka tsela e gobogilego. Ba bangwe e be e le bahumi eupša ba ikwa ba hlaela selo se itšego maphelong a bona. (Mmo. 2:3-11) Ka mehla batho bao ba bego ba feletšwe ke kholofelo bophelong ba ile ba hwetša morero wa bophelo ba thušwa ke matla a Lentšu la Modimo. Ga go pelaelo gore o thabetše go bala diphihlelo tše dintši tša mabapi le taba ye dihlogong tša Morokami tšeo di rego, “Beibele e Fetoša Maphelo.” Le gona o lemogile gore gaešita le ka morago ga gore re amogele therešo ya Mangwalo, ka moka ga rena re tšwela pele re kaonefatša maphelo a rena re diriša Lentšu la Modimo.

2. Lekgolong la pele la mengwaga, Lentšu la Modimo le ile la bontšha bjang gore le na le matla?

² Na re swanetše go makatšwa ke gore batho ba bantši lehono ba dirile diphetogo tše dikgolo maphelong a bona ka baka la go ithuta  Lentšu la Modimo? Le gatee! Diphihlelo tše bjalo di re gopotša ka bana babo rena le dikgaetšedi ba lekgolong la pele la mengwaga, bao ba bego ba na le kholofelo ya go yo phela legodimong. (Bala 1 Bakorinthe 6:9-11.) Ka morago ga gore moapostola Paulo a bolele ka mohuta wa batho bao ba ka se jego bohwa bja Mmušo wa Modimo, o okeditše ka gore: “Seo ke se ba bangwe ba lena le bego le le sona.” Eupša Lentšu la Modimo le moya wa gagwe o mokgethwa di be di thušitše batho bao go lahla mekgwa yeo e mebe. Gaešita le ka morago ga ge ba fetogile Bakriste, ba bangwe ba bona ba ile ba swanelwa ke go lwantšha mekgwa yeo e bego e thulana le Mangwalo. Beibele e re botša ka Mokriste yo mongwe yo a tloditšwego wa lekgolong la pele la mengwaga yo a ilego a swanelwa ke gore a kgaolwe ka phuthegong; yoo ka morago a ilego a bušetšwa. (1 Bakor. 5:1-5; 2 Bakor. 2:5-8) Na ga re ikwe re matlafala ge re nagana ka mathata a fapafapanego ao badumedigotee le rena ba kilego ba kopana le wona le go a fenya ka thušo ya Lentšu la Modimo?

3. Re tlo ithuta ka’ng sehlogong se?

³ Ka ge Lentšu la Modimo e le sedirišwa se matla kudu e bile re na le lona, re swanetše go le diriša ka bokgwari bjo bogolo. (2 Tim. 2:15) Ka baka leo, sehlogong se re tlo ithuta kamoo re ka dirišago matla a Lentšu la Modimo (1) maphelong a rena, (2) ge re le tšhemong le (3) ge re ruta re le sethaleng. Dikgopotšo tše di tlo re thuša go bontšha Tatago rena wa legodimong gore re a mo rata le go mo leboga, yena yo a re rutago gore re holege.​—Jes. 48:17.

4. (a) Re swanetše go dira’ng ge e ba re nyaka gore Lentšu la Modimo le re thuše go kaonefatša maphelo a rena? (b) Ke’ng seo wena o se dirago gore o kgone go bala Beibele ka mehla?

⁴ Ge e ba re nyaka gore Lentšu la Modimo le re thuše go kaonefatša maphelo a rena, re swanetše go le bala ka mehla, gomme ge e ba go kgonega, re le bale letšatši le lengwe le le lengwe. (Josh. 1:8) Ke therešo gore ba bantši ba rena re dula re swaregile. Lega go le bjalo, ga se ra swanela go dumelela selo le ge e le sefe—gaešita le maikarabelo a bohlokwa—se re šitiša go bala Beibele ka mehla. (Bala Baefeso 5:15, 16.) Bahlanka ba bantši ba Jehofa ba hweditše mekgwa yeo e ba thušago go bala Beibele letšatši le lengwe le le lengwe, e ka ba mesong, mosegare goba mantšiboa. Ba ikwa go swana le mopsalme yo a ngwadilego gore: “Molao wa gago ke o rata gakaakang! Ke nagana ka wona letšatši ka moka.”​—Ps. 119:97.

5, 6. (a) Ke ka baka la’ng go naganišiša go le bohlokwa? (b) Tsela e botse ya go naganišiša ke efe? (c) Wena o hotšwe bjang ke go bala Lentšu la Modimo le go naganišiša ka seo o se balago?

⁵ Go tlaleletša tabeng ya go bala Beibele, go bohlokwa gore re naganišiše ka seo re se balago. (Ps. 1:1-3) Ke feela ge re dira seo moo re tlago go kgona go diriša bohlale bja Beibele maphelong a rena. Go sa šetšwe gore re bala Lentšu la Modimo re diriša eng, morero wa rena e swanetše go ba gore seo re se balago se re kgome dipelo.

 ⁶ Tsela e botse ya go naganišiša ka seo re se balago ke efe? Ba bantši ba re go a thuša go ema ganyenyane ka morago ga go bala ditemana tše itšego tša Mangwalo gomme wa ipotšiša dipotšišo tša go swana le tše di rego: ‘Se se mpotša’ng ka Jehofa? Na ke šetše ke diriša molao wa motheo wo o lego ditemaneng tše tša Beibele bophelong bja ka? Nka kaonefatša kae?’ Ge re rapela pele re bala Lentšu la Modimo e bile re naganišiša ka seo re se balago, re tlo tutueletšega go diriša keletšo ya lona ka botlalo maphelong a rena. Ee, re tla diriša matla a lona maphelong a rena ka mo go feletšego!​—2 Bakor. 10:4, 5.

7. Re ka bontšha bjang gore re diriša Lentšu la Modimo gabotse ge re le tšhemong?

⁷ Ke’ng seo se ka re thušago go diriša Lentšu la Modimo gabotse tšhemong? Selo sa pele ke gore re le diriše ka botlalo ge re bolela le batho le ge re ba ruta. Ngwanabo rena yo mongwe o beile ditaba ka tsela ye. O itše: “Ge go ka direga gore o šome tšhemo le Jehofa, na o tla nyaka gore e be wena o dulago o bolela, goba na o tla dumelela Jehofa gore e be yena a bolelago?” Ntlha ya gagwe ke efe? Ke gore ge re balela batho ditemana ka go lebanya go tšwa Lentšung la Modimo ge re le tšhemong, re dumelela Jehofa gore e be yena a bolelago le beng ba dintlo. Lengwalo leo le opago kgomo lenaka le tla kgoma motho pelo go feta selo le ge e le sefe seo rena re ka se bolelago. (1 Bathes. 2:13) Ka gona ipotšiše gore: ‘Ge ke botša motho yo a itšego ditaba tše dibotse, na ke dula ke tsoma sebaka sa go mmalela temana go tšwa ka Lentšung la Modimo?’

8. Ke ka baka la’ng go fo balela batho Mangwalo ge re le tšhemong go se gwa lekana?

⁸ Ge re botša batho ditaba tše dibotse, ga se gwa lekana go fo ba balela ditemana tša Beibele. Ke ka baka la’ng re re’alo? Ke ka gobane batho ba bantši ba tseba ganyenyane ka Beibele gomme ba bangwe ga ba tsebe selo ka yona. Go be go le bjalo le lekgolong la pele la mengwaga, gomme go sa dutše go le bjalo le lehono. (Baroma 10:2) Ka gona ga se ra swanela go ipotša gore motho o tla kwešiša seo temana e itšego e se bolelago feela ka  gobane re mmaletše yona. Re swanetše go arola dikgopolo tša motheo temaneng yeo re e badilego—mohlomongwe ka go bušeletša mantšu a motheo—le go hlalosa seo di se bolelago. Ge re ka dira bjalo, re ka thuša batheetši ba rena gore molaetša wa Lentšu la Modimo o ba fihlelele menagano le dipelo.​—Bala Luka 24:32.

9. Re ka rola mangwalo bjang ka tsela yeo e tlago go thuša batho gore ba hlomphe Beibele? Nea mohlala.

⁹ Le gona re swanetše go rola mangwalo ka tsela yeo e tlago go thuša batho go hlompha Beibele. Ka mohlala, re ka re: “Anke re kwe seo Mmopi wa rena a se bolelago tabeng ye.” Ge re bolela le motho yo a sa tsenego kereke, re ka re: “Ekwa seo Mangwalo a Makgethwa a se bolelago.” Goba ge e ba re bolela le motho yo a se nago taba le kereke re ka re: “Na o kile wa kwa ka seema se sa bogologolo?” Re swanetše go lebelela maemo a motho yo mongwe le yo mongwe gomme re dire gore thero ya rena e swanele maemo ao a gagwe.​—1 Bakor. 9:22, 23.

10. (a) Anega phihlelo yeo ngwanabo rena yo a itšego a bilego le yona. (b) Wena o bone bjang gore Lentšu la Modimo le na le matla ge o be o le tšhemong?

¹⁰ Ba bantši ba hweditše gore go šomiša Lentšu la Modimo ge ba le tšhemong go ba le mafelelo a mabotse kudu mothong yo ba boledišanago le yena. Nagana ka mohlala o latelago. Ngwanabo rena yo mongwe o ile a dira leeto la go boela go mokgalabje yo a itšego yoo a badilego dimakasine tša rena ka mengwaga e mentši. Go e na le gore ngwanabo rena yoo a no mo nea Morokami o mofsa wo a bego a mo tlišeditše wona, o ile a mmalela lengwalo leo le lego ka makasineng woo. O ile a mmalela 2 Bakorinthe 1:3, 4 yeo e rego: ‘Tate wa dikgaugelo le Modimo wa khomotšo yohle, o re homotša ditlaišegong tša rena tšohle.’ Lengwalo leo le ile la kgoma pelo ya mokgalabje yoo moo a ilego a kgopela ngwanabo rena gore a le bale gape. O ile a bolela gore yena le mosadi wa gagwe ke kgale ba nyaka go homotšwa, gomme ga bjale o ile a thoma go thabela molaetša wa Beibele. Na o a bona gore Lentšu la Modimo le na le matla a go kgoma dipelo tša batho tšhemong?​—Dit. 19:20.

11. Bana babo rena bao ba rutago ba le sethaleng ba na le boikarabelo bofe?

¹¹ Ka moka ga rena re thabela go ba gona dibokeng le dikopanong tše dikgolo le tše dinyenyane. Morero o mogolo wa go ya moo ke go yo rapela Jehofa. Le gona re holwa kudu ke thuto e botse yeo re e newago moo. Dipokanong tše bjalo, bana babo rena bao ba rutago ba le sethaleng ba neilwe tokelo e kgolo kudu. Ka baka leo, ba swanetše go lemoga gore ba na le boikarabelo bjo bogolo kudu. (Jak. 3:1) Ka mehla ba swanetše go kgonthišetša gore seo ba se rutago se tšwa ka Lentšung la Modimo. O ka diriša bjang ka bokgwari matla a Lentšu la Modimo ge o nea polelo?

12. Seboledi se ka kgonthišetša bjang gore polelo ya sona e thekgwa ke Mangwalo?

¹² Kgonthišetša gore polelo ya gago e thekgwa ke Mangwalo. (Joh. 7:16) Se se bolela’ng? Sa pele, o se ke wa dumelela selo le ge e le sefe—e ka ba diphihlelo, dipapišo goba gaešita le mokgwa wa gago wa go nea polelo—di šira goba di tloša tlhokomelo ya batheetši ditemaneng tša Beibele tšeo o di balago. Le gona gopola gore go fo balela batheetši ditemana tše dintši ga go bolele gore o ruta go tšwa Mangwalong. Ge e le gabotse, go diriša mangwalo a mantši go ka dira gore batheetši ba feleletše ba sa gopole le letee la mangwalo ao. Ka baka leo, kgetha ka kelohloko mangwalo a motheo polelong ya gago, iphe nako e lekanego ya go a bala, go a hlalosa, go dira dipapišo ka wona le go bontšha kamoo a re thušago ka gona. (Neh. 8:8) Ge kabelo ya gago e theilwe thulaganyong ya polelo yeo e tšwago mokgatlong, bala thulaganyo yeo ya polelo le mangwalo a yona ka moka. Lwela go kwešiša kamoo dikgopolo tšeo di lego polelong yeo di tswalanago ka gona le mangwalo ao a bontšhitšwego moo. Ka morago ga moo, diriša mangwalo ao o kgethago  go a bala go ruta batheetši seo se lego polelong yeo. (O ka hwetša dintlha tšeo di ka go thušago tabeng ye go thuto 21 go ya go 23, ka pukung ya Holwa ke Thuto ya Sekolo sa Bodiredi sa Pušo ya Modimo.) Go feta dilo ka moka, kgopela Jehofa ka thapelo gore a go thuše go ruta batheetši ditherešo tša bohlokwa tšeo di lego ka Lentšung la gagwe.​—Bala Esera 7:10; Diema 3:13, 14.

13. (a) Kgaetšedi yo mongwe o ile a kgongwa pelo bjang ke go dirišwa ga mangwalo dibokeng? (b) Tsela yeo diboledi di hlalosago Mangwalo ge di ruta, wena e go hotše bjang?

¹³ Kgaetšedi yo mongwe kua Australia o ile a kgongwa pelo ke tsela yeo diboledi di bego di hlalosa mangwalo ka yona dibokeng. Gaešita le ge a godišitšwe gabohloko, o ile a amogela molaetša wa Beibele gomme a neela bophelo bja gagwe go Jehofa. Lega go le bjalo, kgaetšedi yo o be a thatafalelwa ke go amogela gore Jehofa o a mo rata. Eupša ge nako e dutše e eya, o ile a dumela gore Jehofa o a mo rata. Go tlile bjang gore a dumele seo? Ka letšatši le lengwe o ile a naganišiša ka le lengwe la mangwalo ao a ilego a balwa dibokeng, gomme a tswalanya lengwalo leo le ditemana tše dingwe tša Beibele. * Na le wena o kile wa kgongwa pelo ke tsela yeo Lentšu la Modimo le ilego la dirišwa ka yona dibokeng le dikopanong tše dikgolo le tše dinyenyane?​—Neh. 8:12.

14. Re ka bontšha bjang gore re leboga Lentšu la Jehofa?

¹⁴ Na ga re leboge Jehofa ge a re neile Lentšu la gagwe e lego Beibele? Ga se feela gore Jehofa o re neile Lentšu la gagwe ka lerato, eupša o bile o phethagaditše kholofetšo ya gagwe ya gore le tla dula le le gona. (1 Pet. 1:24, 25) Ka gona, re swanetše go bala Lentšu la Modimo ka mehla, re phele ka go dumelelana le seo le re botšago sona, e bile re le šomiše ge re thuša ba bangwe. Ge re dira bjalo, re tla ba re bontšha gore re rata letlotlo le leo le tšwago go Modimo le go le leboga. Sa bohlokwa le go feta, re tla ba re bontšha gore re rata Mongwadi wa lona e lego Jehofa Modimo le go mo leboga.