LEFASENG ka moka, bagolo ba rata tokelo yeo ba nago le yona ya go hlankela batho ba Modimo. Ruri re šegofaditšwe ka go ba le bona! Lega go le bjalo, mengwaga e sego kae e fetilego go ile gwa dirwa phetogo e itšego. Bagolo bao ba tšofetšego ba ile ba kgopelwa gore ba nee bagolo bao e sa lego ba bafsa a mangwe a maikarabelo a bona a magolo. Ba be ba swanetše go dira seo bjang?

Tokišetšo e mpsha ke gore balebeledi ba tikologo le bahlahli ba dikolo tše itšego, go swana le sekolo sa bagolo, ba se sa tšwela pele ka dikabelo tša bona ge ba na le mengwaga e 70. Le gona, bagolo bao ba nago le mengwaga e 80 ba swanetše go nea bagolo ba bafsa dikabelo tše dingwe tše bjalo ka go ba molomaganyi wa Komiti ya Lekala goba go ba molomaganyi wa sehlopha sa bagolo ba phuthego. Bagolo ba bao ba godilego ba arabetše bjang diphetogong tše? Ba bontšhitše gore ba botegela Jehofa le mokgatlo wa gagwe.

Ngwanabo rena Ken yo a hlanketšego e le molomaganyi wa Komiti ya Lekala ka mengwaga e ka bago e 49 o itše: “Ke ile ka dumelelana le phetho ye ka pelo ka moka. Ge e le gabotse, mesong ya letšatši leo tsebišo ye e tlilego ka lona, ke be ke sa tšwa  go rapela Jehofa ke kgopela gore ngwanabo rena yo mofsa e be yena molomaganyi.” Tsela yeo Ken a ilego a arabela ka yona e swana le kamoo bana babo rena ba bantši bao ba botegago lefaseng ka moka ba ikwago ka gona. Ke therešo gore mathomong ba ile ba ikwa ba nyamile ka gobane ba be ba rata go hlankela bana babo bona.

Ngwanabo rena Esperandio yo e bego e le molomaganyi wa sehlopha sa bagolo phuthegong ya gabo o itše: “Ke ile ka nyamanyana.” Eupša o re: “Ke be ke hloka nako e oketšegilego gore ke itlhokomele ka ge ke be ke babja.” Esperandio o tšwela pele a hlankela Jehofa ka potego le go ba tšhegofatšo ka phuthegong ya gabo.

Bana babo rena bao ba feditšego mengwaga e mentši e le balebeledi ba tikologo le balebeledi ba selete bao gona bjale ba hlankelago dikabelong tše dingwe bona ba ikwa bjang? Allan yo e bilego molebeledi wa mosepedi ka mengwaga e 38 o re: “Ge ke ekwa ditaba tše, ke ile ka nolega moko.” Lega go le bjalo o ile a bona bohlokwa bja go tlwaetša bafsa gore ba tsebe mošomo, gomme o tšwela pele a hlankela Jehofa ka potego.

Ngwanabo rena Russell yo e bilego molebeledi wa mosepedi le mohlahli ka mengwaga e 40, o re mathomong yena le mosadi wa gagwe ba be ba nyamile. O re: “Re be re rata kabelo ya rena kudu gomme re ikwa re sa na le matla a go tšwela pele kabelong yeo.” Russell le mosadi wa gagwe ba diriša tlwaetšo yeo ba e hweditšego le phihlelo ya bona phuthegong yeo ba kopanelago go yona, gomme seo se thabiša bagoeledi ba moo kudu.

Le ge o se wa ka wa ikwa go swana le bana babo rena ba re sa tšwago go bolela ka bona, pego yeo e lego go Samuele wa Bobedi e ka go thuša go kwešiša kamoo ba ikwago ka gona.

Nagana ka nako ya ge morwa wa Kgoši Dafida e lego Abesalomo a be a nyaka go amoga tatagwe bogoši. Dafida o ile a tloga Jerusalema a tšhabela Mahanaime, ka bohlabela bja Noka ya Jorodane. Ge Dafida le banna bao a bego a tšhabile le bona ba le moo, ba be ba hloka thušo ya dijo le dilo tše dingwe tša bohlokwa. Na o a gopola gore go ile gwa direga’ng?

Banna ba bararo ba tikologong yeo ba ile ba tliša malao, dijo tša mehutahuta le dibjana. Yo mongwe wa banna bao e be e le Barasilai. (2 Sam. 17:27-29) Ka morago ga gore maano a Abesalomo a se atlege, Dafida o ile a hwetša sebaka sa go boela Jerusalema gomme Barasilai a mo felegetša Nokeng ya Jorodane. Dafida o ile a re Barasilai a ye le yena Jerusalema. Kgoši Dafida o ile a tshepiša Barasilai gore o tla mo nea dijo, gaešita le ge Barasilai “a be a humile kudu” gomme a be a ka se hloke dijo tšeo tša kgoši. (2 Sam. 19:31-33) Ga go pelaelo gore Dafida o be a nyaka gore Barasilai a ye le yena Jerusalema gore a kgone go mo thuša ka go mo nea keletšo le ditšhišinyo ka ge a be a na le phihlelo. Ruri e be e tla ba tokelo e kgolo go dula ka mošate le go šoma moo!

Ka ge Barasilai a be a ikokobeditše e bile a lemoga maemo a gagwe, o ile a botša Dafida gore o na le mengwaga e 80. Ke moka a oketša ka gore: “Na nka hlwa ke sa kgona go tseba seo se lokilego le se sebe?” O be a era go re’ng? Barasilai o swanetše go  ba a be a le bohlale ka ge e be e le kgale a phela. Le gona o be a ka kgona go nea keletšo e botse, go no swana le ge ka morago “banna ba bagolo” ba ile ba kgona go eletša Kgoši Rehoboama. (1 Dikg. 12:6, 7; Ps. 92:12-14; Die. 16:31) Ka gona mantšu a Barasilai a gore a ka se kgone go tseba seo se lokilego le se sebe a ka ba a be a šupa gore ka ge a be a tšofetše, go na le mediro yeo a bego a ka se sa kgona go e dira. O ile a bolela le gore ka ge a be a tšofetše, o be a se sa kgona go kwa tatso ya dijo e bile a se sa kwa gabotse. (Mmo. 12:4, 5) Ka gona Barasilai o ile a kgothaletša Dafida gore a sepele le Kimehama ge a eya Jerusalema, yoo go ka diregago gore e be e le morwa wa Barasilai.​—2 Sam. 19:35-40.

Diphetogo tšeo re boletšego ka tšona mathomong tša mabapi le bana babo rena bao ba tšofetšego, di dumelelana le kamoo Barasilai a ilego a ikwa ka gona. Lega go le bjalo, diphetogo tšeo di dirilwego e be e se feela ka baka la go naganela maemo le bokgoni bja motho o tee feela, go swana le boemong bja Barasilai. Bana babo rena ba ile ba swanelwa ke go lebeledišiša gabotse seo se bego se tla hola bagolo bao ba botegago lefaseng ka moka.

Bana babo rena ba bao ba tšofetšego le bao ba ikokobeditšego ba ile ba kgona go bona gore ge ba ka tlwaetša bana babo rena ba bafsa go dira mediro yeo bona ba feditšego mengwaga e mentši ba e dira, seo se tla thuša mokgatlo wa Jehofa nakong e tlago ge go e ba le koketšego. Maemong a mantši, bana babo rena bao ba godilego ke bona ba bego ba tlwaetša ba bafsa, go swana le ge go ka direga gore Barasilai o ile a tlwaetša morwa wa gagwe gomme moapostola Paulo a tlwaetša Timotheo. (1 Bakor. 4:17; Bafil. 2:20-22) Bana babo rena ba ba bafsa ba bontšhitše gore ga bjale ke “dimpho tšeo e lego banna,” ba kgona go thuša “go aga mmele wa Kriste.”​—Baef. 4:8-12; bapiša le Numeri 11:16, 17, 29.

Lefaseng ka moka go na le bana babo rena ba bantši bao ba neilego bana babo rena ba bafsa e mengwe ya mediro yeo ba bego ba e dira, gomme ga bjale ba tšwela pele ba hlankela Jehofa ka ditsela tše dingwe.

Ngwanabo rena Marco yo a feditšego mengwaga e 19 e le molebeledi wa mosepedi o re: “Gona bjale ke kgona go ipha nako ya go boledišana le banna bao e sego Bakriste eupša ba nyalane le dikgaetšedi tša ka phuthegong ya gešo.”

Ngwanabo rena Geraldo yo a feditšego mengwaga e 28 e le molebeledi wa mosepedi o re: “Dipakane tša rena tše difsa di akaretša go thuša bao ba fodilego moyeng le go swara dithuto tše oketšegilego tša Beibele.” O re go fihla ga bjale yena le mosadi wa gagwe ba swara dithuto tša Beibele tše 15 e bile ba thušitše batho ba mmalwa bao ba bego ba fodile moyeng gomme ga bjale ba tla dibokeng.

Ngwanabo rena Allan yoo go boletšwego ka yena pejana o re: “Ga bjale re kgona go fetša nako e ntši re diriša mekgwa e fapafapanego ya go ruta batho Beibele. Re thabela go bolela le batho mafelong a batho bohle, mafelong a kgwebo le go boledišana le baagišani ba rena gomme ba babedi ba bona ba šetše ba kile ba tla Holong ya Mmušo.”

Go na le tsela e nngwe e kgethegilego yeo o ka thušago ka yona ge e ba o le ngwanabo rena yo a nago le bokgoni le yo a botegago yo a sa tšwago go hwetša kabelo e mpsha ka mokgatlong wa Modimo. O ka thekga modiro wa Jehofa ka go tlwaetša bana babo rena ba bafsa ka phuthegong. Russell yoo go boletšwego ka yena pejana o re: “Jehofa o tlwaetša bafsa bao ba nago le bokgoni le go ba diriša. Bana babo rena ba holwa ke tsela ya bona e mafolofolo ya go ruta le ya go diša mohlape!”—Bala lepokisi leo le rego, “ Thuša Bana Babo Rena ba Bafsa go Diriša Bokgoni bja Bona.”

Ge e ba o sa tšwa go tsenela mohuta o mongwe wa tirelo, o se ke wa fela matla. O šetše o kgomile batho ba bantši kudu ka mošomo wa gago, gomme o ka tšwela pele o ba kgoma. Re a go rata e bile re tla dula re go rata.

Sa bohlokwa le go feta, o kgomile pelo ya Jehofa. A ka se ‘lebale modiro wa gago le lerato leo o le bontšhitšego leineng la gagwe, ka ge o hlanketše bakgethwa  e bile o tšwela pele o ba hlankela.’ (Baheb. 6:10) Mantšu ao a buduletšwego a re kgonthišetša ka moka ga rena gore Jehofa a ka se lebale mediro ya rena ka moka. O bohlokwa kudu gore Jehofa a ka lebala mediro ya gago ya nakong e fetilego le yeo o tšwelago pele o e dira e le gore o mo kgahliše!

Ge e ba diphetogo tše re boletšego ka tšona ka mo godimo di sa go ame, gona o ka holega bjang?

Ge e ba gona bjale o šoma le ngwanabo rena yo a tšofetšego yoo a ilego a hwetša kabelo e nngwe, ithute phihlelong ya gagwe. Mo kgopele keletšo. Kgopela ditšhišinyo. Le gona o lebelele kamoo gona bjale a phethago kabelo ya gagwe ka gona le kamoo a dirišago phihlelo ya gagwe ka gona.

Go sa šetšwe gore o ngwanabo rena yo a tšofetšego yoo a hweditšego kabelo e mpsha goba o ngwanabo rena goba kgaetšedi yo a ka holwago ke phihlelo ya bana babo rena bao ba tšofetšego, o se ke wa lebala gore Jehofa o rata potego ya bao e lego kgale ba mo hlankela e bile ba tšwelago pele ba mo hlankela.